يوميات عانس (الحلقة الثانية)

(المشهد الأول)
ارتدت نادية فستان الحفلة الوردي بصعوبة ، نفخت بتعب وهي تتامل المرآة..فقالت باحباط :
-ياه !! شهالجسم !! كان روعة على أماني .. ليش هالبلاوي كلها طلعت !
دخلت لأم بالبخور :
- الله - جذي البنت السنعة ، تتكشخ بكل مناسبة ..يالله تتوفقين.. هذا الفستان اللي انخطبت فيه اماني عساه وجه خير علينا بعد!!
نادية بتذمر :
-والله فشلة ، عرس ولد خالة حرمة ولد جارنا.. وأنا لابسة هالضيق القصير ، لاو مكياجي بالصالون ؟!
يمة أنا حيل مستحية !!
ردت الأم بعصبية :
-جبي يالله ..البنات ماينخطبون الا بالعروس ، منو يعرفج لاماطلعتي وشافوج الناس!!
بعدين كم عمرج الحين ؟! كل بنات خالاتج الي أصغر منج الي متزوجة والي عندها عيال .. وانت عانس على قلبي!!
طفرت دمعة من عين نادية ، واستسلمت لتخطيطات الأم ؟!

(المشهد الثاني )
بضجة العرس وتزاحم المعاريس، تغمز الأم لنادية لتراقص احدى الامهات الكبار على ساحة البست ..!!
رقصت نادية أكثر من عشر مرات وقد أخذت تزاحم الراقصات ذهابا وايابا ،، حتى عادت منهكة القوى للأم الراضية عما فعلته البنت من استعراضات مخجلة !!
تشرب الأم فنجال القهوة وتلتفت لابنتها تأمرها بتغطية ذراعيها وذلك باسدال الشعر على الكتفين لان الأم ترى أن ذلك يعجب كبار السن من النساء العاقلات !!
وقضت نادية يومها ذاك بتقبيل العجائز على الرؤوس والذهاب خلف الأم لتعرف الأم الجميع بابنتها الكبرى !!

(المشهد الثالث )
تتذمر نادية :
- لأ يمة حرام .. ترا اللعنة موسهلة !
تحمر عينا الأم غضبا :
-أقولج الحفافة بعد شوي جاية .. وأنا أقول محد خطبج ؟! من هالحواجب اللي كنهم صوف غنم .. حفلة تخرج ولد جارنا باجر ، بتحفين لين افتك منج وأزوجج!
وبذلك تحطم الأم مابقى لنادية من قلب وكيان ، بكت نادية بحرقة بعد أن أغلقت الأم باب الحجرة ..
وتخيلت نادية منظرها بالحفلة ، مصخرة أكثر وكرامة تسكب عند كل عجوز أكثر !!
دخلت الحفافة ، والأم تشرف على ماستفعله بحواجب ابنتها الخبلة المسكينة كما تضن الأم !!

( المشهد الرابع )
الام غاضبة :
-فيه سحر ..انتي معمولج عمل ! ليش كل البنات ينخطبون وانتي محد خطبج ؟!
حتى ولد أخوي الخبل خطب ريم بنت خالته اليابسة ولا جاج !!؟
نادية بحزن :
- يمة ..قسمتي هذي ..والله لو اعشعش بالعروس اذا الله مو كاتبلي اتزوج ماراح أتزوج .. ولو كاتبلي الله راح يخطبوني وأنا حواجبي علي وأنا ما أطلع من البيت بعد؟!!
ردت الأم بتذمر :
-أقول انطمي ..باجر بروح لأم سرور يقولون تفك السحر ابيع سبحتي الذهب وتروحين معاي لها ..
صاحت نادية باكية اخيرا وقد تقلدت سلاح التحدي :
- بس يايمه .. راح ديني كله .. مابقى عندي لاكرامه ولا دين ..لي هنيه وبس ..!!
صفنت الأم ولم تعلق !!