يوم زاد معاشه يبي يفتح بيت ثاني

السلام عليكم خواتي


انا تعبانه ومحتاجه احد يفكر معاي

أنا متزوجة من 13 سنة كان وقتها عمري 18 وزوجي اكبر مني ب10 سنين ومن بداية زواجنا كان واضح عدم الانسجام بيننا وكان يختلف 180 درجة عن مواصفات الرجل بالنسبة لي يعني ما يغار مايخاف علي لو اتأخر بره البيت ما يعرف يتكلم (مع ان عنده شهادة جامعية وبتخصص مهم)
كانوا على طول الناس يسألوني شلون زوجك ما يغار عليك مع اني حلوة ولله الحمد وادرس بالجامعة ومعاي شباب بالدراسة بس عمره ماقالي خففي مكياجك او غيري ملابسك واروح الجامعة من الصبح واقعد عند اهلي لآخر الليل ولا يسأل عني المهم هذا ببداية زواجنا بس حبيت اقولكم هالمقدمة عشان يكون عندكم فكرة عن حياتي معاه

حملت بصعوبة لأن انا وياه عندنا مشاكل تأخر الحمل ويبت بنتي الوحيدة اللي عمرها الحين 8 سنين بعد ما ولدت صارت بنتي كل حياتي وعوضتني عن كل سنين الالم اللي عشتها وانا صغيرة ومحرومة من الحب والحنان ( نسيت اقولكم ان اهو بااااارد يعني ما يحب ولا يشتاق لأحد حتى بنته لو ما يشوفها اسبوع او اكثر عادي عنده )

المهم الفترة اللي طافت اكتشفت انه عنده علاقات مع فلبينيات والله من بعدها كرهته وفصلت غرفتي وقمت انام مع بنتي وصار ماله وجود بحياتنا يعني يطوف ايام واهو بايت برا البيت بالاضافة ان مايدري عن مصروف البيت وخصوصا اني اشتغل بوظيفة زينه وراتبي يكفينا آنا وبنتي بس كان بين وقت والثاني وبعد هوشات كبيرة يدفع راتب الخدامة ويعطيني مبلغ ما يكفي حتى مشوار واحد للجمعية


تأقلمنا على هالوضع آنا وبنتي مع ان بنتي تحبه مووووووت وكل يوم تبوس صورته قبل لا تنام والله تكسر خاطري بس ماودي اقولها شي عن ابوها يكدر خاطرها ولأني اراعي نفسيتها حيييييل واهي ولله الحمد متزنة نفسيا ومتفوقة دراسيا

المهم قبل كم شهر اعلنوا زيادة كبير بالرواتب للقطاع اللي يشتغل فيه زوجي وقبل يومين فاتحني وقال ابي اتزوج طبعا طردته من البيت وبدا يدز لي مسجات يقولي انتي بتكونين ببيتك معززة مكرمة بس مو عارفة شسوي أنا فكرت كثير بالطلاق بس شلت هالفكرة من بالي عشان خاطر بنتي لا تحس انها غير عن الناس بالاضافة ان انا مرتاحة ببيتي واذا تطلقت اكيد اخواني ماراح يخلوني اسكن بشقة بروحي مع ان اهو ملزم يدفع الايجار والسكن في بيتنا عذاااااااب لأن البيت صغير وفيه اخواني وزوجاتهم وعيالهم

واذا رضيت بالزواج الثاني اكيد بعد بنتي ماراح تشوفه مع الوقت واكيد هالشي بيترك اثر في نفسية بنتي وخصوصا ان مافي احد من اللي حوالينا واهلنا متزوج على زوجته وبيكون هالشي غريب عليها

ساعدوني الله يساعدكم مو عارفة اتخذ قرار واللي ما تبي ترد تدعي بهالايام المباركة ان الله يهديني وينورني للحل اللي فيه خير لي ولبنتي ....آمين