يالله حيهم كلهم ..اولا الحمد لله على سلامه الكثير من الاعضاء ..
واللي اغلبهم سووا عمليات جراحيه..وعلى حسب ذيك العمليه ..
فيه منهم عمليات اليوم الواحد مثل عمليات اللحميه بالانف وعمليات اللوز .
وفيه عمليات جراحيه صعبه مثل عمليات القلب والاعصاب والمخ ..
وفيه المتوسطه واللي بفضل ربي اصبحت سهله مثل عمليات العظام والولاده القيصريه..واشياء كثيره غيرها ..
ماراح اتكلم عن انواع العمليات وافصلهن بقدر ماابتكلم عن الاشياء اللي يمر فيهن المريض ..قبل العمليه ..
هي لحظات تخوف بقدر ماتخليها تركز بالبال وتصير لحظات ماتنسى ..
صحيح اني خوافه بدرجه فضيعه لكن ماان تكون عندي عمليه بكرى يكون بالي مرتاح
ماادري ليه ..؟؟على كثر القصص اللي سمعنا عن الاطباء بس عندي ايمان بالله قوي..
1)
طبعا لازم يكون المريض صايم قبل العمليه اقل شي باربع ساعات ..<بغت تموتني هالاربع ساعات .
والافضل انه يصوم من 12 بالليل ..المستشفيات الحكوميه لازم تنام عندهم ذيك الليله ..اما الاهليه
فلا عادي لو ماتجي الا يوم العمليه بس يكون افضل تجي بدري ..علشان الاوراق وفيه كذا دكتور راح يمر عليك قبل ..
2)
اول ماتنسدح على السرير علشان تهيئ نفسك للعمليه يجيك ابليس اعوذ بالله منه يبدا يوسوس لدرجه انك تقول هونت ماابي اسوي عمليه.. قبل مده مو بعيده كان تأجيل العمليات وارد لان بعض المرضى يرتفع عندهم الضغط وبكذا مايقدرون يسون له شي ..فتتأجل العمليه ..
بس اللحين لا ..قولوا ليه؟ لانهم يعطون المريض حبوب هلوسه بس خفيفه ..يعني يدخل المريض غرفه العمليات وهو يضحك.. صدق وربي جربته مرتين ..ادخل الغرفه وانا اضحك على اي شي ..<<لاتضحكون ربي يبلاكم .
3)
بعد ماتجي الممرضه وتركب المغذي .. وتعطيك الحبه وتعطيك برضوا ابره اختبار الحساسيه الظاهر ان عددهم ثنيتين اذا كنت مو واهمه..وياخذون ضغطك وكل شي تمام .. ويجي طبيب التخدير ويسالك كذا سوال ..
يجي عاد السرير المتحرك واللي راح ينقلك لغرفه العمليات ..تنسدح بالسرير وتبدا الممرضات الفلبينيات انواع السواليف فوق راسك وانت ماتدري وش يقولون ..
هم يتكلمون عنك ..عن الدكتور؟؟ عن موضوع انت مالك دخل فيه ماتدري وشو .. يحطونك بغرفه انتظار مثل غرف الاسعاف .. ويجي عاد دكتور ماادري وش سالفته بس انه يسالك
كذا سوال ..عن عدد العمليات؟؟ ..واخر مره سويت عمليه ويين فيه ؟؟..وبعدين عاد يروح ولاتشوفه .
تجي عاد الممرضات ويسحبونك مره ثانيه للغرفه .. ومثل ماشفتوا اول صوره ..مافيه شي ابد فاضيه بس سرير
وكبس يعور عوينك وانت جالس تعد اللمبات..وكذا طاوله اللي فيها العده .. بعدها عاد يدخل الدكتور وهو يقول (ايزيك يااريج ..الحمد لله بخير ,..
مستعده للعمليه ...(وليش انا هنا اجل .) ان شاء الله دكتور ..انسدح على سرير العمليه وبعده يجي طبيب التخدير ويحط انبوب الاكسجين على خشمي ..
عدي للثلاثه ..واحد /اثنين /ثلاثه .. وتصير بسابع نومه .
4)
وماتحس بشي الا الممرضه تصفقك بكفوف خفيفه علشان تصحى بس عاد يالله يالله .. والحاله شي خورافي والعطش لاعب فيك لعب ..
ويمنون عليك بالماء بس يخلونك شوي تشرب .. وكل الشي بذاك الوقت تكون بغرفه اسمها غرفه الافاقه
يعني تصير عندك ممرضه اللين تقوم ..بعد مايكشف عليك الدكتور وتصير صاحي والتركيز عندك ممتاز ومافيه شي يوجعك الا مكان العمليه ينقلونك لغرفتك عاد ..والحمد لله على السلامه ..
انا من النوع اللي الا الوقت هذا عادي الوضع عندي تمام بس ماان اشوف اللي جالس ينتظرني بالغرفه تجيني نوبه بكاء شديده ماادري ليه..تتوقعون الفرحه اني رجعت حيه من جديد ...ياليت احد يقول انه كذا بس علشان ان صحت بالعمليه الجايه ماانقد على روحي .. يضل المريض كذا يوم وعلى حسب الحاله ..ومثل ماقلت فيه ناس يوم وناس شهر ..ولازم الثلاث ايام الاولى ان كنت عندهم يصومونك ماتذوق شي الا ماء وقليل بعد ..(يعني شقاء )
معلومه ,,/
1) الطبيب يلبس اللون الاخضر لانه ينظرالى لون الدم الاحمربالساعات وعلى مدى السنوات..فعندما يرفع الطبيب نظره عن المريض في غرفة العمليات تلقائيا ستبحث عينه عن اللون الاخضر ..
وحتى تكون عين الطبيب مرتاحة ولا ينعكس ذلك سلبا على نفسيته بفطرته البشرية ...البسوه اللون الاخضر لانه هو الموافق مع اللون الاحمر .
2) مريض فقر الدم ماايسون له عمليه..الا ان وافق على اعطاءه دم بوقت العمليه .. والا يصبر الى ان يترفع عنده الدم ..
المريض اللي اسنانه تركيب مايخدر تخدير كامل ..بس جزئي ..(تخيلوا اشوف الناس تقصص بي وتقطع ..مااظن اني راح اتحمل ..)
) في التخدير العام مادة التخدير عبارة عن غاز يتم استنشاقه من بداية تنبيب القصبة الهوائية الى ان يفيق المريض وهو مستمر في استنشاق هذا الغاز وهناك غازات كثيرة تعطى وتقرر حسب حالة المريض وحجمه وعمره وحالته الصحية وهذه الغازات منها(غاز الفلورين ومشتقاته وغاز اوكـسيد النيتروجين وغاز الهالوثين وقديماً غاز ثنائي الايثر وغيرها تمزج هذه الغازات مع اوكـسجن نسبة100%بواسطة جهاز التخدير) اما كيف تعمل هذه الغازات فانها تدخل الى الرئتين وتنشر في الدم الى ان تصل للدماغ وتفقد المريض وعيه تماماً بحيث لا يحس بما حوله ويفقد الاحساس بالالم ويفقد الحركة بما فيها حركة الجهاز التنفسي وعضلات الجسم كله بما فيها عضلات التنفس عدا عضلة القلب ويكون المريض معتمد على الله ثم جهاز مراقبة التخدير وطبيب التخدير.
لكم المايك ..مواقفكم مع العمليات ..؟؟
..http://www.vb.*****.com/images/smilies/rose.gif
شكرا لردك