يوم كثرت فلوسه وشلت الديون تزوج علي

اعرف اني فاشلة في المقدمات لكن اتوقع ملخص قصتي باختصار حنا في زمن المؤدبة والهادية المسالمة ماتعيش انا وحدة ماعمدي الا هاللسان الجلج وبس باختصار متزوجة من عشر سنوات حياتي ماكانت المثالية لكن ماكانت سيئة ايضآ تزوجت وانا لسه في اول سنة كلية وكنت فرحانة بالزواج واشوفه عالم وردي رسمت لعالمي اشياء كثير الان يوم اتذكرها اضحك على نفسي زوجي رجل يحب نفسه بقوة وفيه نزعة انانية كان جاف عاطفيا معي جدا ولاروحات ولاتمشيات ولاهدايا ولا دلع وكنت اشوف مجتمعه العكس بس مادققت وقلت كفاية انه يعاملني كويس غلطتي الككبيرة لما تخرجت وتوظفت اني كنت اساعده ماديا بطيبة قلب وبدون نقاش لما جبت اربع اطفال وانا الان حامل للمرة الخامسة في خمس سنوات بدون توقف عشان كنت مقتنعة انه يحب الاطفال واكتشفت الان اني بالنسبة له صرافة وشيالة لعياله الان فقط بديت اصحى انو ماعمره حبني يمكن احترمني ورحمني ويعطف علي لانه يعرف اني طيبة ومالي في المشاكل
صبرا على شي كثير صوته عالي وخيانات متكررة و اهمال مادي لي ولعياله وكنت اقول ماعنده شي من وين يجيب فصل من وظيفته وسكت ودبر وظيفة في القطاع الخاص وكنت من غبائي اشوف ماديا ماتأثر كثير وسكت ماجا في بالي انه معاه فلوس اشترى ارض وبدا يبني البيت وانا اقول ربي يرزقه بيتي كل شي اخترته فيه على ذوقي وطبعا البيت اللي انا فيه الان عرضه صاحبه وخلاني اطلع قرض واشتريه و غير انه مناشبني في كل ريال اعطيه اهلي مع ان اهلي احوج منه لراتبي يقول اذا انباع البيت فلوسك اللي دفعيها خوذيها والزايد باخذه انا مشاكل كثير وكلها بسبب هالوظيفة
والانكى والامر انه خطب وبيتزوج وبكل قوة وجه يقول لي بجرب و اشوف انا مضغوط انا تعبان من حقي ادلع نفسي وبدا سياسة التحطيم لي انا قلت تبي الزواج تفضل روح ماعليك حسوفة طاب خاطري منك وفعلا خطب وناوي يكون زواجه في نفاسي هو ينكر وانا متاكدة انه ناوي كذا والزيادة انه لحد الان طمعان في طيبتي ومصر اني انا اللي افرش البيت يقول لاتدفعين في البيت ريال بس افرشي وانا عارفة مايبي ادفع ليش لان خطته المستقبلية يسكنها فوق اخاف بعد لاحطني انا فوق وهي تحت مشاكلي معاه من عشر سنوات ماوقفت وكلها مادية كرهت الفلوس وكرهته و بديت احس ان عيالي هم اللي مسببين ضعفي كل الناس تققول بياخذ ربي حقك منه لانه خاطب وحدة قوية ومشاكلها مع زوجها الاول الى الان في المحاكم وتحب الفلوس اكثر منه حتى ام زوجي قالت لي ربي يحبك يوم اختارها بيوريك فيه طاب خاطري يابنات قلت له فلوسي ترجع والزايد من البيت الله لايحللك فيه وتحطني في بيتي الجديد بعد نفاسي وجب سواق ولا عاد لك كلمة علي و ولاعاد تامر ولاتنهى علي وغرفتي ماتدخلها انت عندنا مثل الضيف وعزايمك اللي هاد حيلي فيها ماعاد نرفع لك فنجال والمشكلة وافق وانبسط اني عطيته ضوء اخضر يتزوج
يابنات لااحد يقول لي ليه سمحتي له وكذا هو مخلص اموره وناوي ومعزم وافقت ولا لا بس يبي مىافقتي عشان اهله بس يسكتون عنه المشكلة الان قايم قاعد يحلفني بالله مااحرمه من عياله ويطلبني طلب اني مااروح واتطلق تذكرت كم مرة اروح لااهلي واقعد بالشهوور ابي الطلاق وبعدين ارجع الطلاق الان هو اللي بين عيوني فقط ولاابي غيره كرهته وعفته ولاعاد اطيقه عشر سنوات انا وهو شيل وحط ومشاكل واتحمله وهو نفسه معترف ويقول انا بتغير معك وانا ظلمتك وسامحيني وانا اقول الله لايسامحك
نار في صدري مولعة مااحد مستوعبها ولا فاهمها انا يوم وقفت معه مو لاني ساذجة لكن لان الرجل كان فعلا محتاج وقفاتي وكان وضعه المادي صعب حرمت نفسي من شي كثير عشان مااضغط عليه بس فعلا الرجال مو صديق ابد الان تتعذب اذا رحت للبيت اللي يبنى كل شي فيه انا اخترته تصميم تشطيب الوان بس مااحس انه بيكون بيتي ابد احس مو مكتوب اعيش فيه اعرف زوجي وشخصيته بيدلع الجديدة ويرفها مو انه يحبها لكن لانه يبيها تدلعه بعد مدري افصخ الحياء واصير قليلة ادب وطويلة لسان ولا اجلس واكل في مفسي ولا انحاش بعيالي واتطلق وابعد عنه يشهد ربي اني مااتحمل اشوفه ولااسمعه ممكن هو فيه حسنات كثير انه يرحم ويموت في عياله ويعشقهم وانه مايغلط علي في الالفاظ مهما بلغت مشكلتنا بس مااحب ابد اسمعه يقول احبك لاني اصرخ واقول وين الحب ذا ماجا غير يوم خطبت ماديا مايقصر على بيته وعياله مع اني انا اشيل نفسي عنه واشيل عيالي احيانا ويحترم اهلي وابوي خصوصا وعودهه كثيرة جدا والمضحك يقول اعتبري زواجي بداية جديدة لنا ويمكن لو جربت غيرك اعرف قيمتك كلامه يحرقني وهو مايحس
كلامي ملخبط جدا جدا بس اعتبروها فضفضة لكم