وأدخل ذاك البيت برجلي اليمين .. وأنا طاقتني النفاضه .. أبي أمي.. أبي أبوي .. ويـــــــــــــــــــــــــــــن دخول الحمام مهوب مثل خروجه كل هالحتسي كان يدور في خلدي طبعاً لم أفصح به لرجلي .. وتدرون أهم شي التوفيق وعلى قولة القايل :


الين جاد الحظ باع لك واشترى لك000 ولين ترادى الحظ عزي لحالي وحالك0

وأرقى فوق الينهم ماقصروا أنا أشهد حاطين لي سويت لايقل عن سويت الغنم جمالا .. الرجال عاد الظليمه شينه
كان جنتل مان وأهلي جعل مساكنهم عليين والجنه ياربي مايعلمونس وشو العرس أحسبه خلاقين وسعسعه وتمشي



وفي خاطري أن الدعوه الحقني وألحقك ونسولف وننوم ونقوم وفلة حجاج وبس .. بس..يعني بس ! ! ! ! عاد ذيك الأيام وشخليت من الرشاقه والبطن ملهوف والشعر يضرب على ( اللهم ياكافي ) أثر الدعوه فيها حارش بارش يحيل الله

0

والبيت حان ران مليان ناس ... ياربي وين أروح !!!!





جاء صباحية العرس وأسمع هرج ومرج في البيت وأثرهم مسوين ضيفه ... عادي مايحتاج كوافير ولا شي كلها كحل قلم وبودره ( روج ) أم ريال المخططه بذهبي ورهش على الخدود كن أحد مسطرس عليهن وكدي الشوشه والبسي من الهديمات الزري .. كلهن موديلهن واحد اللهم الا الدلعه ياتكون مربعه ولا مدوره ولا سبعه 0000 والكنادر لونين أسود وأبيض عشان تناسب كل الملابس 0



وتجي خالتي وتطق علي باب الغرفه وتقعد رجولي تصافق من الروعه عاد أمي موصيتني عليها وأقوم وأسحب راسها وأمطخها مع كل كتر الين مابقى فيني روج وآذاني والله تصقهت من الروعه مدري وشي تقول بس شكلها تبارك لي 0





وتعدي الضيفه على خير واروح غريفتي لآخذ قسطاً من الراحه 00




المهم عبادي لازق بالغرفه وأنا أوجست في نفسي ريبه وأحول بس وين ؟؟؟؟ ماذكرت الا الغنم 0



وأقعد معهم كنهم استلطفوني يعني لوني طولت معهم شوي قهووني وما قاموا يباعون ولا خالتي مقبله وقالت وأنا خالتس الحرمه السنعه ماتخلي رجلها لحاله وابتسمت انا ابتسامه صفراء وزمجرت في ذات نفسي وكل مانزلت رجعتني هي (عاد عقب هو ينزل تحت وأنا أرجعه ) 0 الله يذكر ذيك الأيام بالخير




العروس تعطى مهله شهر أجازه استثنائيه يمنحها أعضاء المنزل للعروس وعقبها تباشر العمل ..... وتاكلين شحم لو أحتجيت على تكدسات المواعين ومدام رضيت تعيشين مع حموله يعني تحملين الكرف0





أنا فيني حقي من القشاره بس أبوي وأمي جعل مساكنهم عليين يهفون فوق راسي كل ماجتني فكره ماكره طيروها من راسي وزن في اذني بنت الحمايل تحشم ربعها0

المهم خالتي الله يمتعها على طاعته ماهناها سعة الصدر اللي احنا فيها يعني كانت تغار والحق معها يعني رجلي شعرة قلبها والين قبل العرس بشوي وهو ينام بغرفتها ..المهم أصدرت هي قرار يقضي بتغيير مقر الغنم الى السطح يعني فوق روسنا ومادريت حول الفجر

الا ودربك...

دربك...


دربك,


فوق روسنا والبس جلالي وأرقى فوق السطح ولا الغنم تجري بكل شموخ وقد منحتها خالتي حصانه دوليه وفوق هذا تتمتع بحراسه دوليه FBI
وأقوم أجمع الغنم وأربطهن بحبل على عمود بآخر السطح على شكل دائره كنهن فتحي ياورده..سكري ياورده ,

وأنزل أكمل نومتي0



ويوم أصبحنا وأتذكر اللي حصل وأقول ياترى وشصاير تحت وألبس جلالي وأحول والقى أم سعد قاعده وحمواتي صافين وراها ذكروني بفرقة أبو سراج0 وأهزع عليها وأحب رويسها ..وشفيس ياأم سعد عسى مهيب مسخنس عساها اللي يكرهس ياخالتي وعيني على حمواتي..


وجري على المطبخ وأسنع لها ذاك الفطور صبيبات ماينشبع منها عليها شوية سمن وكاس لبن وأشوى تم الرضا والقبول عاد هي تحسبني على كل شي عليم عشان معي متوسطه وتحسب ان أنا اللي مخططه الرياض وانه أنا اللي مألفه المناهج المدرسيه !!! ماخذه فيني مقلب ورازتني فوق الجميع0



تعودت على الوضع سلكت الأمور .. والغنم تم عمل تصفيات عليها لأن الجيران اشتكوا من ريحتها وتمت مصادرتها بالرغم من حزن خالتي العميق عليها والموقف كان تراجيدي يقطع القلب 0


صحيح أحياناً مع الطقاق تشوف نعال تشوت مايندرى وين مصدرها .. ويطلع عصافير تدور فوق روسنا وانتي مجطله في ربعة المطبخ من القهر0



الا أن أحلى مافي الحموله تجمعها بين عشوين للقهوه يعني بين المغرب والعشا والتلفزيون قدامهم وماكان فيه صحوه دينيه وسميره توفيق حلال... وهيام يونس حلال وأذكر جدتي تشوش على أغاني فهد بلان وترقص عليها.. كان فيه جهل بالدين بس أهم شي ان العقيده سليمه ولله الحمد الله يعفو ويتسامح0



وأحلى مافيها بعد الين جاء تالي الليل ماجاس النوم في ليالي الشتاء البارده حولي وصلحي دلة حليب بزنجبيل وولعي الدفايه وولعي لمبه صفرا وحده بس ونادي اللي صاحي منهم يتقهوى معس0وان حصلي عبادي ياسلام ياالله من فضلك الجنه 0





















وأدرك شهر زاد الصباح وسكتت عن الكلام المباح0


أنا حاولت أختصر قد ماأقدر عشان ماتطفشون 00

يعني هي ردح من الزمان زواج ... تقريباً حول ال 20 سنه يعني أستحق الأوسكار

وأنا كنت آخر حبه مقلعه من خريجات دفعة التسعينات الى 2000 يعني زوجه مخضرمه


الله يجزاكم خير .. على صبركم وتحملكم هذرتي .... من أول الوجيه السفره اللي ردت علي الى آخرها



ونراكم على خير ولا المارية الغفله0

ياسفابكم

ياســــــــــــــــــــــــــــــــــــــــــلام :27: تجنن سواليفك
كملي ...ادري ان القصه خلصت بس( تفوء)شوفي لنا قصه وسولفيها علينا
تراك وسعتي صدورنا الله يوسع صدرك بالراحه والعافيه والايمان
بامان الله :26:

تجنن :27: تسلم الايادي
رجعتينا لايام الخير

هاااااااااااااه يسلالالالالالالالالالام
يا حلو سواليفك والله ما ودي انك سكتي ولا اقول وش رايك اصير جارتك
ولا كان فيه اخو لعبادي ازوجه اختي ههههههه الله يوسع صدرك با لعا فيه :24:

رهيييييييييييييييييييييييييييييييييييييييييييبة ما شاء الله..تكفين كبسولة دوري لنا غيرها ..بس من نفس الطقة...


ومشكوووورة...هذي لك :26: :26: :26: :26: :26: :26: