هلا أخيتي شاليمار عبادي ذيك الأيام زاحف يحب الزين والتمدن ... ولا وش اللي سبهه الا القوقو ولا اللي تحت القوقو خيره انه ماشافه ولا تسان ماحصلي جعله يسلم0



الصبيب انكانكم حولنا أكيد تعرفينه .. على كل حال عباره عن دقيق أسمر وأحسن نوع الحنطه اللي يجي من المزارع .. يعني أحسن نوعيه من الصوامع اللي يباع في السوق وأنفع ..



ضعي عليه حليب وبيضه ( للفائده ولا مو ضروري ) وملعقه صغيره بيكنج باودر + حبة طماط صغيره +بصله صغيره كلهم يقطعون صغار بالمره + ملح



تصبين معها مويه مع الخلط المستمر الين تصير العجينه شبه سائله يعني أخف من عجينة الكيك.



تسخنين الصاج وتدهنينه بالزيت بالفرشه الخاصه...وتصبينه على شكل دوائر صغيره 0



بعض الناس يصبون عليه سمنه وياكلونه وبعضهم يسوون مثل كشنة الرز ويقطعون فوق طماط حبه واحده بس ماتطبخين الطماط بالحيل بس شوي على النار تحريكه وحده وارفعيه 0

تاخذين الصبيب وتغمسين عليه وتاكلينه بالعافيه0

يا مال العافية الدافية.

والله توقيعك كدر خاطري وضيق صدري الله يفرحك عاجل غير اجل.

الله يوسع صدرك برجوع احبابك
مثل ماوسعتي صدورنا..
اسلوب كوميدي رائع .

تعالي ياحلوهههههههههه الله يقطع شرس والله اني انبسطت بالمره لا وتذكرت اني ناويه اسوي مشهد شعبي عن التمر خبرس مثل وقصه يعني قصه شعبيه ويجي فيها طاري التمر مثل قولة العجيز حمر واصفر وايدامه فيه ........ ومن هالقصص ابي منس وانا اختس تقذيني بقصة دمها خفيف لان شكلس خبره بالشعبيات واكون شاكرررررره

يخيتي ياعسيله أسأليني من حد التسعينات وفوق ولا أنا ماعندي ماعند جدتي الله يرحمها.........عن التمر الا قولت الأولين انه مسامير الركب ..... وان فيه اسم الله الأعظم 0


وان الشماريخ تغطى بشماله عشان ماينقرها الطير ...واذا بطبطت في الأرض يجمعونها ويكنزونها لمدة الشتاء كله0




لكن هذي محاوله على الطاير مني , وهي في الحقيقه سالفه واقعيه حصلت هالصيفيه 00 هديه لك وان عجبس ادعي لي :


ام سعد عندها نخله ... وتخاف عليها كنها واحد من عيالها .... وأهل البيت الباقين عندهم ثنتين يخرفون منها ...

بس ان نخلتهم سلج ومنيفي.. ونخلة أم سعد برحيه يعني أحسن أنواع التمر .. واللي يقرب من نخلتها تمصع أذانه.. مع ان تمرها واجد ويكفي البيت كله بس شي في ذات نفسها ماتبي أحد ياخذ منها0



مرة سعد جاها حريم وتبي تكرمهم وتفشخر عندهم روحت الشغاله تخرف من نخلة خالتها أم سعد وتطمر

الشغاله وتلقط الزبيل وتروح للنخله وتخرف منها اللي قدرت عليه.....


ويوم جاء تالي النهار وتفطن أم سعد ان نخلتها ماخوذ منها وأعلنت حالة التأهب في البيت وحل غضبها على

الجميع وشملت الشماريخ يعني غطتها بخيشه وربطتها عشان محد ياخذ منها شي 0



خالتي الله يرفعها بالعافيه فيها سكر وطاق ال 300 يعني مهوب زود لها هالتمر تاكله 0


ولد لسعد رجال سم الله عليه خاط شاربه بيروح للاستراحه ذاك اليوم وحب انه ياخذ من برحية جدته ... وخرف

له في قوطي حليب 00000 عاد النخله جنب دريشة حجرتها ويوم شافت ولد سعد ماخذ من النخله وهاوشيه ذاك

الهواش اللي بغى يغص بتمره كان يعلج فيها بسبة هالهواش وقالت له قل آمين جعل عدوك الساحق والماحق

والبلا المتلاحق ...... جعلك منيب قايله 0

ولا السكر يحيل الله طق معها والقطيها يامرة سعد ووديها لمستوصف جنبنا يهش الذبان محد يجيه ..

وفرحوا بخالتي ولقطوها من عند الباب ياكافي !!!! وطاروا بها من الفراغ .. فاضين ماعندهم شغل وكل دكتور

يستلمها من جهه ومهنا من ابره ماطعزوها به في ذرعانها وفي ( اللهم ياكافي ) وكل كتر تخبرونه , ثم

سدحوها على ذاك السرير وهي تحيسب عليهم وتحلطم وتسب 0




وتهاوش فيهم مسيكينه ساطوها سوط .. المهم وطاروا بالسرير وززززززز ولاهم مودينها سيده طوالي لغرفة الأكسجين

وركبوا لها غذايه .... وهي ماخلت دعوه مادعتها على هالدكاتره وشعرها كان فرقه من قدام فجأه صار فرزاتشي

مدري وراه وطاحت شيلتها قامت تسحب تحت السرير .......... ويوم لمحت مرة سعد مقبله .... قالت لها

تكفين خذو نخلتي كلها الله يحللكم ويبيحكم بس رجعوني لحجيرتي 000000













وشرايك ياعسيله 0













معاني الكلمات :




شماريخ ................ التمر في النخل يسمونه شماريخ لم يقطف بعد0
بطبطت................ تساقطت على الأرض0
ساطوها سوط........... يعني مثل قولة المصاريه أنتوا عاملين فيه كده ليه !! موديني على فين ؟؟
كتر ............. كل مكان
تخرف ...... تقطف
تحلطم ...... تبرطم على قول المصريين

سلج ومنيفي وبرحي أسماء لأنواع عديده من التمور0