💛🧡❤️ يوم 27 رمضان 1441 هجري ❤️🧡💛

السلام عليكم ورحمة الله وبركااااته
ورجعت اخيرا بموضوع غيررر
باركوا لي باركوا لي باركوا لي
الله رزقني ب ابني الغالي (عمَّار) يوم 27 رمضان
انتظرته خمس سنوات واخيرا جاء لحضني وحضن ابوه واجداده واعمامه وخواله واخوانه 💛❤️💛
هذا الطفل غيررررر عن كل الاطفال طفلي حبيبي من دار الايتام بعد طووول انتظار مرررة ايأس ومرة يتجدد الامل عندي وعند ابوه ب استلام طفل او طفله من عندهم والحمدلله كان في وقت غير متوقع ابدا وقت كورونا ووقت العشر الاواخر حتى يوم سلموني الطفل بيدي ما كنت مصدقة او مستوعبة انه لي وب اخذه معي البيت
شعور غريب احساس عجيب يوم ركبت السيارة وحطيته بحضني اناظر عيونه ويناظر عيوني واقول الحين انت لي وطول العمر يارب تكون معي ومع ابوك ..
حبيبي عموري صار عنده 3 اخوان من جهتي و و5 اخوان و3 اخوات من جهة زوجي
يارب ارزق كل من تتمنى بمثل فرحتي واكثر وكل من قال امييين 💛💛
طبعا تسجيلنا لطلب احتضان من دار الايتام كان ب اتفاق وتفكير طويييييل بيني وبين زوجي كنا نفكر ب اهلي واهله هل بيتقبلون فكرة طفل مجهول الابوين او لا ما كان يهمنا المجتمع الخارجي ابدا وكلامهم لنا ولطفلنا ..
بعدها فكرت اسأل امي سؤال حتى اعرف هي متقبلة الفكرة او لا ...
هذا الكلام قبل 5 سنوات سألتها يمه لو مشيتي بعد الفجر بالشارع تسوين رياضة او تروحين لاقرب بقالة ولقيتي طفل ملفوف بقطعة قماش و بالارض ويبكي ايش بتسوين ؟!
قالت والله لاخذه والله لاخذه وماعلي في الناس الطفل مظلوم وبريء وعالفطرة اخذه و اربيه و اعيشه احسن حياة . قلت لها وكلام الجيران والاهل والاقارب انه لقيط قالت مايهمني كلام احد همني الطفل بس .. بعدها تيقنت ان امي تتمنى هالشي من زماااان واكتفيت بباقي الاهل ما سألتهم ..
مرت السنوات الخمس بسرررعة وجاء يوم 27 رمضان 1441 هجري وجاني اتصال بالظهر من مدير جمعية الايتام بجدة .
المدير : الو فلانة
انا : هلا مين معاي
المدير : انا فلان الفلاني
انا ؛ 😳
المدير : الو الو انتي تبغين بنت ولا ولد
انا : ايًّا كان ما فيه فرق كلهم سواء اللي موجود اللي موجود .
المدير : ابنك عمار ينتظرك تاخذيه اليوم له ثلاث شهور مالقينا له اسره مناسبة واخيرا اليوم جاء من نصيبكم ..
انا : 😭😭😭😭😭 وكورونا 🤭 يادكتور كورونا عادي اخذه في ظل هالازمة ؟!؟ قال عادي عادي يابنتي ماخالطتم احد عادي خذيه لا تتاخري عنه 😭😭
نصحني كثير ودعا لي بالتوفيق وتسخيرنا للطفل وتسخير الطفل لنا 🧡🧡🧡
وقفللللت المكالمة .. وقلبي طاااااير
كلمت الموظفة المسؤولة عن الطفل واستلامه .. قلت لها متى اجي استلمه قالت الساعة 12 ظهر بكرة لازم عندنا..
جاء الفجر وصلينا و تجهزنا وافطرنا وانتظرنا الساعة 8 ومشينا واقتربنا لمقر سكن الطفل وباقي الوقت مبكرررر مرررة .. من الفرحة ما شرينا ولا ملابس له ..
رحنا لاقرب محل ملابس نزلنا خذينا كل لبسه قدامنا مو عارفين كم عمره بالضبط ولا حجمه حتى نشتري اللبس المناسب ..
رحنا للصيدلية وخذينا رضاعات و كل مستلزمات الطفل .. ومشى الوقت بسرررعة ونركب السيارة ونتجه لمقر سكن الطفل ونوصل الساعة 11:59 بالضبطططط
دخلنا غرفة كبيرررة قالت انتظروا..
10 دقايق وجات معاها اوراق للطفل نوقع عليها .. و راحت لمكتبها وتاخرت يمكن اكثر من نص ساعة ..
دق باب الغرفة دخلت موظفتين مع المربية والطفل على كتفها مغطيته بقطعة قماش ونا وزوجي جالسين عالكرسي نناظر فيهم ويناظرون فينا مو مستوعبيييييييين ابد
قالت الموظفة .. فلانة مو مصدقة 😿
قومي شوفي الطفل 😭
و افزز واقترب منه وياااااجماله ياهدوءه يا براااااءته سبحان الله ❤️
خذيته وضميته لصدري بقوة وابككككي واحضنه وزوجي يقول يلا جيبيه جيبيه ويشوفه ويذكر الله ويسمي عليه
ويحضنه ويستقبل القبلة ويسجد شكر لله 🧡🧡
ياااا جمال هاللحظات ياجمالها ❤️❤️
الطفل يناظر فيني مرة وفي زوجي مرة فديت روحك ياحبيبي 💛💛
ركبت السيارة وخذيته بحضني ومو مستوعبة اني ب اتجه فيه لبيتي اقصد لمقر سكنه الدائم وبيننا 💛💛
خذيت له صورة وهو بحضني وارسلته لقروب فيها امي واختي ..
اختي ارسلت مين ذا ؟
قلت ولدي !!
قالت بلاكذب من الصباح
قلت ولدي ولدي يابنت هذا ولدي توي طالعة من دار الايتام 💛💛
امي ارسلت صوت ياجماعة فهموني ايش هالصورة وايش ولدك ماني فاهمة عليكم شي
قلت يمممه هذا طفل خذيته ماله لا ام ولا اب طفل من دار الايتام ...
ولا عاااااد ردت علينا امي 😭 ادق عليها ماترد ادق على اختي ردت وهي تبكككككي تبكي 😭 وتقول لا تكلمين امي لين تهدا 😭
بعد ساعة ارسلت لي امي والله العظيم ما قد ذقت دموع الفرح بحياتي الا اليوم الله يسعدك يابنتي ويوفقك ويرزقكم والله لو بشرتينا بحملك او طفل من بطنك ما فرحنا هالفرحة ابد .
كان خبر بالنسبة لهم اسعد خبر بهالدنيا ..
وصلت بيتي بدلت ملابس صغيري ونومته وارسلت لابوي بشرته وكان نايم وصحى ولا اتصل علي 😂
اتصل على امي واختي يبشرهم مايدري ان الخبر وصلهم قبله ..
اختي تقول والله ابوي يوم اتصل يبشرني بولدك ماقد سمعت صوته كذا طااااااير من الفرحة بحياتي ..
ارسل لقروبات اخوانه واخواني وبلغ الاهل كلهم كان من جد مبسووووووط وكأنه اول حفيد بينهم .. سبحان الله ❤️❤️
جاتني اتصالات كثيرة من اعمامي وعماتي وخالاتي طايرين من الفرحة يباركووون و يرسلون هدايا العيد لعموري حبيبي
نمنا ببيتي واليوم اللي بعده دخلت على اهلي فجأة و صادروا الطفل مني 😂 حضنوه ضمووووه اللي يبكي واللي مو مستوعب بس يضحك في الزاوية
جاء ابوي من دوامه وشاف حفيده قدامه وخذاه وضمه وسلم عليه ومسح راسه وحنكه بالتمر واذن باذنه و اعطاه هدية العيد مقدما قبل عياله واحفاده ❤️❤️
جلست عند اهلي اسبوعين كاملة بحكم عمل زوجي المفاجيء نمت بغرفة ( العزوبية 😍) وعموري نايم معاي يارب تحفظه وتحميه ..
غرفتي جنب غرفة امي وابوي كل ما صحى ابوي من نومه دخل غرفتي وجلس جنب عمار لين يصحى وياخذه للمجلس ..
امي اذا صحت قبل ابوي و قبل عمار تاخذه من سريري بكل خفه وهدوء وتصحيه من عز نومه وتجلس معاه بالحوش وتروشه و تبدل ملابسه وترضعه وتسولف معاه 😍😍
اختي جات متأخر عند اهلي .. اذا رحت للمطبخ او اي شغله برى الغرفة ارجع ولا الاقي عموري عالسرير تاخذه خالته بغرفة ثانية وتقفل على نفسها وتجلس تسووولف معاه بعيد عن بنتها الغيورة فديتها وفديت عموري 💛💛
وقبل الاخير كنت ب اقول لكم سبحان الله جاتني عدة رؤى تكررت بنفس الشهر والاسبوع اللي جاني فيه اتصال وكلها رؤيا تبشر بشي حلوووو بس ماكنت اعرف ايش ويوم وصلت لموظفة المسؤلة عن الطفل وهي تسلمني الطفل تقول يافلانة تدرين اني حلمت فيك حلم قبل اسبوع انك حاضنة على صدرك هذا الطفل ونازلة من درج الدار وانتي فرحاااانة ..و نفس الشي اختي تقول حلمت انه فيه مناسبة سعيدة ببيت اهلي ولا ادري ايش هي بالضبط .. والحين عرفنا الحممممدلله من قبل ومن بعد ..
واخيراااا عسى الله يرزقكم اضعاف مضاعفة من السعادة وتحقيق الامنيات يارررب ياكريم ❤️💛❤️
واي استفسار حطوه بنفس الموضوع لان اظن عندي مشكلة بالرسايل الخاصة ماتوصلني منكم ولا عرفت حل لها ..