مراحب يا حلوات لسى رجعت من تركيا رحت على الخطوط التركية
وكان مسار الرحلة يتجنب المرور في سوريا فعبرنا الأجواء المصرية والعودة كانت عبر العراق ..
عيب الخطوط التركية هو الموسيقى ..

طبعاً تركيا غاااااالية جداً وتحتاج ميزانية لا بأس بها كل شي فيها غالي مواصلات مطاعم تسوق ترفيه !!!
وعندهم الاكرامية يعني اخدمك بس عطني فلوس !! وتعاونهم قليل جداً ما يحملون الشنط عن النزيل
ولو حملها أحد يقول اعطيني اكرامية كل شي بفلوس ... متفاوتين في تعاملهم مع العرب بعضهم ودود
وبعضهم له نظرة خاصة عنا يعني فوضويين ولا نحترم الوقت مثل ما قال أحدهم .. وعموماً يميلون للجدية

مطار اتاتورك تفتيش دقيق جداً وحازمين ، وللأسف ضيعوا شنطة لنا في العودة فانتبهوا وراقبوهم وقت
شحن الشنط أحياناً ينسون يضعون اللصقة على الشنطة وتدخل السير من غير أي علامة تدل هي تابعة
لأي طيارة وهذا اللي حصل ...

الشمال التركي جنة من جنان الدنيا لا تفوتوه ( اوزنجول ـ ريزي ـ ايدر ـ طرابزون ) ازنجول 3 ليال ريزي ليلة
ايدر 3 ليال أما طرابزون فكنا نتردد عليها وقت اقامتنا في اوزنجول ... وأنصح باستئجار سيارة للتنقل سعر
السيارة الصغيرة 90 ليرة في اليوم والاستئجار من مطار طرابزون ... والله يعينكم على البانزين وسعره الخرافي
( صدق إحنا في نعمة في وطنا ) 100 ليرة = 200 ريال تقريباً تعبي أقل من نصف التانكي !!! وإذا فل بما يعادل
400 ريال ... في السعودية سيارة زوجي يعبيها فل بـ20 ريال اللهم لك الحمد !! وكان هذا سعر الديزل مو البانزين

لا تفوتكم حديقة الشاي في مدينة Rize

اسطنبول أنصح بالسكن في منطقة السلطان أحمد قريبة من الآثار ومنطقة مستقرة ، وفي اسطنبول مافيه داعي
لاستئجار سيارة ولا حتى سائق فيه مترو وترام بسعر لا يقارن بأسعار التاكسي المبالغ فيها ...
لو حصل واضريتوا لأخذ تاكسي اتفقوا على السعر قبل الركوب وارفضوا انو يكون الحساب بالعداد لأن ممكن يحصل
تلاعب يوصل لارقام عالية ..

التسوق في اسطنبول متعة سواءً في الاسواق الشعبية أو الحديثة وأنصح ( وبشدة ) بأخذ شنطة صغيرة تحت
العباية فيها الفلوس لأني تعرضت للسرقة في جواهر مول اتسرقت محفظتي كاملة من الشنطة من غير ما احس
وللأسف ما كان فيه تعاون من أمن المحل ولا أمن السوق واضطرينا نكلم القنصلية ووفروا لنا مترجم حتى نبلغ في
مركز شرطة شيشلي ( منطقة السوق ) وحتى الشرطة كانت مستهترة .. فتجنبوا هذي المواقف بالحرص على
أغراضكم لأن بعضهم وللأسف فيهم عرب من غير الخليج ينظرون للخليجي على أنه بنك متنقل وإنه غير محتاج
وكأن سرقته حلال !!!

وإن شاء الله لعلي أفيدكم أكثر بس أفضى ..

ورحلة سعيدة يارب للجميع ...

بالنسبة للجو هناك هذي الأيام /

طرابزون
في النهار الجو معتدل يميل أحياناً للحرارة وبإنتصاف اليوم تبدأ تتجمع الغيوم وتمطر
اواخر العصر وبالليل يميل للبرودة لكن يحتمل ..

أزنجول
باردة وأجوائها غيوم وأمطار وضباب لكن برودة لطيفة ومنعشة يتحملها الكبير أما الأطفال
لابد من جاكيتات

ريزي
في النهار حارة ومشمسة وفي الليل معتدل

ايدر
باااااااردة جداً
وقت الضحى تكون مشمسة لكن جوها لطيف ومنعش ثم على الظهر تبدأ الغيوم والأمطار والضباب والبرد
وفي الليل تزداد برودتها وماء الحنفيات من غير سخان ممكن يخليك ما تشعري بيدك من شدة البرد
ماء هذي المدينة عذذذذبة بشكل أعذب ماء في تركيا ، وخضارها أشد من خضار اوزنجول

اسطنبول
حاااااارة مشمسة في النهار وفي الليل الجو لطيف
وفيها ميزة رغم إنها على البحر لكن ما فيها رطوبة ..

فالملابس لازم تكون منوعة ثقيل وخفيف وأهم شيء ملابس الأطفال يحتاجون كمية لا بأس بها لأن اسعار
غسيل الملابس مرتفعة وأنصح بأخذ كرتون تايد ولو احتجتي اغسلي أول بأول بيدك الأشياء المهمة والغير
ضروري في كيس ...

اخواتي حابه استفسر

اليوم قرات ان فيه صاروخ اطلقوه على مركز الشرطه في انقره ...وبصراحه خفت لاني كنت بحجز على شهر ياناير

مدري هل تتوقعو تتحسن الاوضاع اولا؟؟

السلام عليكم اخواتي انا يوم العيد ان شاء الله حكون في اسطنبول ممكن اعرف كيف الاجواء والاماكن اللي اروح لها على ماسمعت ان يوم الوقفه كل شي مسكر يعني ما في مولات مفتوحه اوبازارات ويوم العيد كيف الوضع مع جزييييل الشكر

صباح الخير اخواتى ..

ابشركم وصلت البارح من تركيا .. وتمنيت انى اطول فيها .. بصراحه بلد خيال .. مهما رحت لها مااشبع منها .. ابشركم الاوضاع الامنيه عاديه مافيه شى ..

سكنا بالسلطان احمد وبعدها رحنا لبورصا .. ورجعنا لاسطنبول .. مرينا سباناجا يوم ..

اى سوال انا بالخدمهـ خواتى ..

"