ܔೋ҉ܔقصة ولادتي ... للي تحب البربره تدخــل ܔೋ҉ܔ

السلام عليكم ورحمة الله وبركاته

كيفكم يا غوالـــي إن شاء الله تمام ....

أنا وعدتكم اني أكتب لكم قصة ولادتي وهذاني أوفي بوعدي .... يوم السبت الموافق 15-11-1431هـ صحيت الساعة 7 الصباح كالعاده أفطرت وعينت من الله خير وماكان معاي أي بوادر او علامات ولادة بس كان قلبي منقبض وكأني حاسه بشي بيصير بس ماحطيت في بالي أبد ان هالشي راح يكون ولادتي قمت وكلمت أمي وجلست أسولف أنا واياها وأقول لها يمه خلاص أنا تعبت ومليت وخايفه من موعد الطلق وامي تقول ابد توكلي على الله وهونيها وتهون .. قفلت وانسدحت ابغى النوم يجي مافيه أمل الى أذان الظهر صليت وجلست أقرى سورة مريم ثم غيرت ملابسي ونزلت عند خالتي >> == عند حموله ... قالت فيك شي ؟ قلت لا بس ماجاني نوم وطفشت بلحالي قلت بنزل أسولف معك وأغير جو ونجلس ونسولف وبديت أحس بمغص بس خفيف ولا يذكر قالت بنادي الجيران العصر .. وأقوم ياعمري وقلبي وأصلح لها حلى وكيك للعصريه .. صليت العصر ورقيت انام شوي .. عاد يوم رقيت صار اللي صار بيني وبين زوجي ونمنا .. صحيت المغرب على مغص قوي يدف على تحت كأنه شي يبي يطلع .. بس ماجا على بالي انه طلق .. واقوم وأتروش بمويه شبه حااااااااره واصلي المغرب والالم نفس قوته بس يجيني على فترات متباااااعده يعني كل نص ساعه كذا واذن العشا وصليت .. واطلع الا خالتي مولمه طوفرية القهوه والتمر عند باب جناحي .. دخلتها وتقهويت انا وابو حمودي:arb: .. سبحان الله من كلت التمر والمغص زايد وصار المغص يجيني كل ربع ساعه .. هنا عرفت انه طلق وانسدح بس ماش اذا جات الطلقه احس اني ماقوى اتنفس قلت لزوجي ترى يمكن اروح المستشفى يعني لاتروح للاستراحه :35:... هو أنخرررررش ماصدق على الله قال يالله يالله اوديك الحين ؟ قلت لا مابي اروح بدري اخاف يحوسوني ابصبر على الاقل ساعتين وادخل تكرمون الحمام وأشيل شوي الا اشوف قطعة دم متجلط صغيررررررة مره قلت بس ولاده لامحاله .. يوم جت الساعه 10 ونص الا انا مستويه من الألم والبس ملابسي وأشرب لي كأس موية زمزم انا قاريه فيها ادعية تسهيل الولادة وامسح باقيها على بطني واخذت لي كسرة حلتيته عشان اشمها بالسيارة واتوكل على الله وانزل الا خالي وخالتي يتعشون .. سلمت عليهم قلت خالتي بمر محل اخذ لي غرض ثم بروح انام عند اهلي بكره عندي موعد الصباح قالت الله يحفظك واطلع وانا فيني مافيني ... ركبت السياره واتصلت على امي وقلت اني طالعه أمشي وبعدها برجع انام اخاف تتصلين على غرفتي ما ارد وجوالي مافيه شحن وتشتقين >> ما ابغاها تدري اني بروح اولد ياعمري يا أمي .. قالت بسلامتك اجل تصبحين على خير
وننطلق الى مستشفى قوى الأمن وأدخل الطوارئ انا دخلت عادي بس يوم سمعت صرااااااخ ذا الحريم عشان الكشف ياربييييييييييه مت مكاني قلت هذا وهو كشف اجل شلون الولادة ؟؟ واجلس استغفر الين نادتني الممرضه وكشفت علي >> البكرية تكفين لا تشيلين هم الكشف ترى والله ما تحسين فيه بس ارخي اعصابك وغمضي والله قاست لي الممرضه ماحسيت الا بشي بسيط يعني مايستاهل صراخ ونياح .. قاست قالت خلاااص ولادة انتي مفتووح 5 سم .. من الفرحه دمعت عيوني الحمد لله بفضل دعواتي ودعوات من يحبني ورقوني غرفة الولادة على الساعه 12 وجهزوني وأعطتني الحقنه الشرجيه ودخلوا علي زوجي ركبوا لي المغذي واستودعت الله زوجي واهلي وبديت بمصارعه مع الطلق اذا جت الطلقه تعطيني الممرضة الكمام واشفط فيه لييين تروح الطلقه صح انه يدووووخ وكني سكرااانه بس يخفف عني والحمد لله ربي مسخر لي الممرضه اذا شافت دموعي تجي تمسحها .. خلاص اختي مافي ابكي انتي اقري قرآن قولي ياااااالله مافي ابكي بعدين انتي تعبان ... طلعوا زوجي من عندي ثم كشفت على الساعه 1ونص قالت 7 ونص سم .. وأنا منصدمه وبنفس الوقت بس ابكي واحمد ربي واشكره اللي رحمي انفتح بسرعه ( الدعــــــــــااء الدعــــــــــــااء يابنات والاستغفار بنية تسهيل الولادة ) وتسوي لي قسطرة للبول الله يكرمكم بصراحه وللأمانه القسطرة مؤلمـــه ‘ خلصنا من القسطرة قالت يالله أنا سوي افتح مويه حق بيبي ماهي مؤلمـه بس عشانها تدخل يدها الى اقصى شي هذا اللي اتعبني وفكت المويه شوي وتمر دكتورة سوريه الله يسامحها قالت تبغي ابرة ظهر ؟ قلت لا مابي قالت ليه ؟ قلت ابغى أتعب تكفير لذنوبي ان شاء الله قالت عادي الالم اللي انتي فيه الحين ماراح تحسين به قلت عادي يعيني ربي .. قالت انتي بكريه وترى ولادتك بتتاخر يعني ماراح تولدين الا على الساعه 8 او 9 الصباح وانا اطالع الساعه تونا 2 ونص ... آه يابنات سببت لي احباااااط قعدت دموعي تبطبط من غير رايي ياااربي بجلس على هالالم الين الصباااااح .... واجلس استغفر وادعي ربي .. وتجلس ذا الدكتوره عندي بسم الله علي صااااايله وكل ما تالمت صكتني بنظره ولسان حالها يقول أحسسن >> ليتني في حالها بس .. شوي دخلوا زوجي الا ياعمري وجهه كأنه عبايه والدموووع ماليه عيونه ويجلس يهون علي ويمسح على راسي ويهديني شوي وتكشف الممرضه الا الرحم 8 ونص على طول طلعت زوجي قالت خلاص خلاص قريب ولاده سبحان الله الساعه 3 بالضبط قالت مداااام خلاص الحين 10 سم ولادة يالله يالله ادفع ادفع ويااارب تعيني وادفع وادفع وليدي ماطلع وادفع ماااااش مافيه أمل يطلع 3 وربع ياااربي ساعدني مافيه أمل يطلع شوي وتجي دكتوره ثانيه شكلها أمريكيه وتحاول ماش شاااقص ابن الاكابر 3 ونص 4 الا ربع .. 4 .. يااااربي خلااااااااص جلست أتشهد الراس مو راضي يطلع 4 وربع دخلت دكتورة حجازيه وتناظرني قااالت حراااام عليكم من هذيك الساعه الى الان ما طلع الراس ساعدوها البنت تعبانه شكلها بتدوخ وهي صادقه ماعاد قدرت ادفع مات حيلي .. شوي وتلبس القفازات وتدز هالثنتين قالت خلاص أنا بولدك بس ساعديني قلت دكتوره تكفين تكفين عمليه انا تعبت والله تعبت قالت ما اقدر بداية الراس متوجهه صعب عمليه حاولي قلت اشفطيه الا واسمع صوت أذاااااااان الفجر .. قالت خلاص اسمعي الفجر اذن ادعي ربك انه يسهل لك وانا ادعي وهي يالبى قلبهاا تدعي لي ... ياااارب سهل على فلانه ياااارب قومها بالسلامه ياخالق النفس من النفس يااامخرج النفس من النفس يااامخلص النفس من النفس خلصهااااااا واصررخ ذيك الصرخه الا حمودي بين يدي يوم الاحد 16-11-1431هـ ......... يارب لك الحمد والشكر كما ينبغي لجلالك وعظيم سلطانك,,, واتصلت وبشرررت اميمتي وابوي وخالتي .... ونسيت كل هاللي صااار وقلت لكم يوم شفت عيونه يالبى عيونه يارب خله لي واحفظه من كل شر ..

نصيحتي لكل بكريه لا تسمعين كلام الحريم ولاتتشربين هالخلطات وكلي امرك للي خلقك وتاكدي ان له سااااعه مايتعداها ... عليك بالدعاء والاستغفار واحسني الظن بالله وتاكدي وخلي هالشي داااايم قدام عيونك لو فيك اللي فيك ( لا يكلف الله نفسا الا وسعها )

:39:

وانتهت قصة ولادتي يا اخواتي العزيزات بحلوها ومرها والله يهون عليكم ويرزقكم ويسخر لكم ازواجكم :arb: