أختي جروح والله الكلمات كتعجز عن التعبير على شكري وإمتناني لك وللمجهود اللي كتبدليه باش توصلنا المعلومة الصحيحة
وما كايسعني غير ندعي معاك ربي يفرحك ويرزقك بالدرية الصالحة يارب العالمين
أختي أصبحت متفائلة شكرابزاف على الإهتمام ديالك وياربي الحبيب يعطيك ما تمنيتي
أسأل الله العظيم رب العرش العظيم أن يتمم على أختي نادية بالخير وأن يرزقنا بالدرية السليمة المعافاة إنه على كل شيء قدير
أختي أرغب في التغيير مرحبا بيك معانا والله يفرحك عما فريب

ايوا دابا نقول على سلامتي اديت الضريبة ديال عدم دخول الملف من لبارح و انا كنقرا الردود لي فاتني تقريبا شي ستين صفحة و انتم عارفين تابعنا الشغل و الطياب و ما جاورهما و الله الى اعتكفت عليه حتى ساليتهم غير دابا و خا كثار ما عندي ما ندير
لي حز في قلبي لكنه قدر الله اختي جروح الوداع و الاجهاض ديالك ربي يعوض عليك في القريب العاجل يا رب و يرزقك على قد نيتك و قلبك الكبير لانك كتساعدي البنات و تنصحيهم ربي كبير ان شاء الله يفرحك ياااااااااااااااااارب
راكيل ربي يعوض عليك بالخير و يجعلها مغفرة للذنوب يا رب
لطيفة مبروك فارس الله يخليه لك و يفرحك يا ربي
نادية ربي يفرج همك و يفرحك يا ربي
أم هبة ربي يكبر بك و يرزقك لي بغيتي يا ربي
انا شاكرة لكم بزاف لانكم عمركم نسيتوني وخا ما كنتش كندخل و الله قلبي كان معكم
البنات الجداد ان شاء الله يكون الملف وجه خير عليكم يا ربي

لي عودة نمشي نصلي العصر و نكمل شي شغل تابعني و نجي نكتب لكم قصة حياتي من قبل العملية و من بعد
تقبلوا حبي و دعواتي

السلام عليكم البنات كيف صبحتوا
حكايتي و ما فيها يا سيداتي اني متزوجة منذ عشر سنوات و خمس شهور و لله الحمد عمري ما حملت طول هذ المدة فالعامين الاولين كنت كناخذ حبوب منع الحمل ثم جربت اني احمل طبيعي مدة سنة لكن ما فيش لذلك دخلت باب الاطباء منذ سنة 2002 كل طبيب و طريقته و كلهم تقريبا كانو كيقولو الحمد لله التبويض عندي جيد و ما عندي مشكل و كذلك زوجي اول دكتورة فاول زيارة دارت لي سونار عادي جدا قالت لي ما عندك حتى مشكل و اعطاتني كثرة الدوا منهم دواء ديال البرد قالت عندك البرد فالوالدة و قالت لي الى ما حملت خلال هذ الشهر راجلك خصو يدوز و يدير التحاليل سبحان الله ما طلبات مني تحاليل ما طلبات مني نقوم بحتى حاجة لانه الاصل ما كيبان العيب عند المراة الا باجراء التحاليل الهرمونية و اشعة الصبغة المهم ملي داز الشهر الاول طبعا ما فيش حمل مشا راجلي لعند الدكتور ديالو طلب مني ندير اشعة الصبغة كلكم عارفين عذابها ربي يجعلها مغفرة للذنوب تمحنت بزاف لدرجة الطبيب تعذب معيا و ما قدرش يدوز الدوا المهم ما كانت حتى نتيجة قررت ننسى الموضوع ما نمشي عند اي دكتور بقيت مدة سنة و غيرت الدكتور و مشيت عند اختصاصي احسن من السابق طلب مني ثاني اشعة الصبغة قال لي انه النابيب حجمها متوسط لكن ماشي مانع ديال الحمل اعطاني المنشطات كان الدكتور كيقول لي هذ الشهر غتقولي انت حاملة لكن طبعا ربي ما كتبش بقيت معه مدة سبع شهور و انا مع المنشطات كملت مع الدكتور سنة و لا نتيجة غيرت طبعا جربت طبعا التلقيح الاصطناعي خمس مرات و لا نتيجة رغم انه الحمد لله كانت البويضات الحجم ديالها مزيان و حجم بطانة الرحم حتى هو مزيان و دخلت بعالم اطفال الانابيب كان كلشي كيكون مزيان لكن لا نتيجة يعني كيتم تلقيح البويضات و كتكون الجودة ديالها جيدة جدا لكن لا نتيجة و الحمد لله
ما ننساش نقول لكم انه اغلب الدكاترة انا لي كنطلب منهم نقوم بالتحاليل الهرمونية و تحليل ما بعد الجماع يعني الى ما فرضت عليهم انا ما يطلبوش الله يهديهم
طبعا درت المساخن و القديدة درت الرقية الشرعية تكرفصت فيها حيث غبت في اول جلسة شدني بحال انهيار الاعصاب برودة في الجسم و رعدة الله يحفظ و خلاص تبعت الرقية مدة ثلاثة شهور قال لي عندي السحر الاسود و العين و الله اعلم
طبعا عانيت مع زوجي مسكين هو في الحقيقة صابر لكن احيانا كيعذبني بالسكوت ديالو وقتما جاتني الدورة و هدشي كان كيعذبني بزاف لكن كيبقا بانه صابر معيا
ملي كتناقشو كيقول لي ما كاين حمل يعني ضروري كاين مشكل و الاطباء ما كيكونو واضحين كانت الجملة لي على فمو دايما 1+1=2 و الحمل ما كاينش ضروري كاين مانع المهم بعد ما ابتعت عند دكتور معروف هنا فاكادير درت التلقيح الاضطناعي و اطفال الانابيب كثر من مرة و لا نتيجة قال لي زوجي هذا كيبان فيه تاجر فقط كيلعب بنا و ياكل فلوسنا
سبب تغيري للدكتور و زيارتي للرباط هو واحد النهار صافي اتعصبت على راجلي حيث حسيت به كيحملني المسؤولية قلت له صافي نتفارقو تخلع و طرح على الفكرة ديال الرباط و ساعدتوني انتما بزاف خصوصا اختيTifa لي كتبات لي على اسماء العيادات المختصة

المهم بعد اول زيارة للدكتور صنديد ارتحنا ليه انا و راجلي بزاف كان منطقي بزاف في التحليل ديالو لحاالتنا قالنا ملي شاف التحاليل ديالي و ديال راجلي انه الحمد لله ما عندنا حتى مشكل بكن من العيب انه طول المدة لي اتبعت فيها مع السابقين ما طلبو مني ندير عملية المنظار حتى يوصلو للسبب الحقيقي لتاخر الحمل
طبعا طلب مني مجموعة من التحاليل الهرمونية كلها و تحايلي اخرى خاصة بالبنج المهم كان مجموع التحاليل هو 2700 درهم كان من بينهم تحليلة مهمة جدا كتبين الجودة و عدد البويضات في المبيضين يعني واش ياقي عندي مخزون ديال البويضات
المهم كان كلشي الحمد لله مزيان قمت بالعملية في احسن الظروف فكلينك العاصمة نعمة الخدمة و الاهتمام ثاني يوم ملي زارني الدكتور قال انه كان عندي كيس في المبيض الايسر لي كيفسر الالام لي كنحس بها في جنبي و كنت كنحس برجلي مشدودة ثم لقا عندي مرض البطانة المهاجرة و الحمد لله كانت في بدايتها لذلك كتب لي على حبوب الياسمين ثلاث علب دون انقطاع و حبوبDanatrol لمعالجة مرض البطانة و من بعد نرجع لعندو و نشوف اشنو هي الخطوة القادمة
سمحوا لي اتكلمت بزاااااااااااااف
ربي يفرج هم الجميع و يرزقني و يرزقكم يا ربي بالذرية الصالحة يااااااااااااااااارب

السلام عليكم ورحمة الله تعالى وبركاته

اختي بعمرانية الله اكبر يا اختي هادشي كلشي هازاه في قلبك وساكتة والله حتى ضرني قلبي وانا تنقرى القصة ديالك
يارب يا اختي يعوض صبرك خير ويأجرك على العذاب الي دوزتي فعلا الاطباء الله يسامحهم كيساهمو في بعض الاحيان بالمعاناة
الله يهديهم يارب
ما عرفت يا اختي اش غادي نقول لك والله حتى احتقرت راسي ومشكلتي قدامك بصح كما تيقول المثل الي شاف هم ناس هان عليه همو يارب يا اختي يكون المنظار فيه شفاء ليك يارب وتبعي مع الطبيب لعل وعسى ربي يرزقك على يديه

سمحيلي اختي نقولك بان بما انك في بداية مرض بطان المهاجرة ما تهمليها وبسرعة استعملي ادوية
راه هي ما صعيباش غير خصها متابعة خاصة ربي يا اختي يرزقك بلا ادوية ولا كشف عورة انه على كل شئ قدير

فافيتا العفو يا اختي احنا اخوات وكان نعيشو نفس المعاناة وما اجتمعنا غير باش نخفو على بعضنا ونساعدو بعضنا بالي كنعرفو
نتمنى فعلا يكون شرحي كان واضح ووصلت لك الفكرة
وعلى كل حال كما قلت لك انساي تحليل استراديول لان احنا متكيسات ما تيكون عندنا تبويض وتيكون ضعيف
لذلك البويضات ما كتنضج باش توصل مرحلة الي تفرز فيها الاستراديول
وشكرا على الدعوة الزوينة بحالك والله يرزقنا اجمعين يارب

حبيبة اختي ملي الكينة الثمن ديالها 86 درهم غير اشري يا اختي الشهر الجاي دوفاستون duphaston راه احسن منها
وما عندو حتى اعراض ابدا وهاذي الميزة ديالو وانا متاكدة كاين في المغرب لاني سبق وشريتو شحال هادي
بالنسبة للتحليل ديال الدم والله ماعندي خبرة انا غير الهرمونات وتخربيق ديال تاخر الحمل وشي لاخر خاطني خخخخخخخ
المهم سمعيني مزيان تبعي البرنامج غادي نقول لك عليه وسيمانة وانتي تنوضي بصحة وعافية
ديري عصير التمر والزبيب المهم رقديهم في الماء هي الاول ولكن كل واحد بحدو لان في السنة غير مستحب يتخمرو مع بعض
والي عندك من مكسرات خلطيه معاهم وفطري بيه على الصباح
شري الباربا وسلقيها وديري منها شلاظة وكولي فيها مزيان او شدي الباربا وحكيها بالحكاكة وطحنيها مع البنان او التفاح او الليمون
المهم الي لقيتي من الفواكه خلطيه معاهم باش تقدري تشربيها لانها ماسخة شوية بحدها
الصباح فطري بالبيض البلدي وطيبيه بزيت زيتون ورمي عليه السانوج راه مزيان بزاف
ما تنساي ثاني العدس ضروري تاكلي فيه ها الايام لان الحديد ممتاز في فقر الدم
واخر حاجة نوصيك بالفوه راها عجيبة لفقر الدم وسولي عليها العطار المهم طريقتها سولي عطار خير
انا عقلت على مرت خالي كانت تعطيها لولدها ملعقة مدقوقة في كاس حليب سخون
وما عرفت طرق اخرى ليها غير شفت نتيجتها على ولد خالي سيمانة ورجع بصحة وعافية
هاذا الي نقدر نفيدك به ازين وطمنيني عليك