السلام عليكم ورحمة الله وبركاته

صباح الرضا والرحمه عاى الجميع 

كيف حالكم يا اخواتي مشتاقة لكم كلكم والله بس كنت تعبانه طول الاسبوع هذا
شاكره لكم دعواتكم والله يبارك فيكم جميعايارب

فطوم حبيبتي الف مبروك الافراج عن الاسرى والفال لبقية الاسرى الله يفرج عنهم ويحرر ارض المقدس من المغتصبين يارب العالمين
وماشاء الله تبارك يومياتك ممتعه مره والصور طالعه وواضحه ماشاء الله عليك اعجبتني جدا صورة حبال الغسيل بين الاشجار ذكرتني بحوش بيتنا القديم كان فيه نخل واشجار وننشر الغسيل بينهم اما الان الحوش بلاط وانواع الغبره الله المستعان بس

ثمار وام ذكرى والشمس المشرقه اخباركم حبيباتي والله مشتاقه لكم

يومياتي لهذا الاسبوع

من السبت وانا حاسه ببرد وصحتي مو طبيعيه ومن يوم الاحد وانا على فراشي الضغط واصل الخمسينات وعظامي مكسره وحيلي مهدود رغم اني ولله الحمد لاحراره ولا انفلونزا ولا لوز ولاشي بس مدري وش الاسباب رحت المستشفى حطو لي مغذي الاثنين والثلاثاء وصرفو لي فيتامينات مكملة والحمدلله الضغط احسن بس الالم للحين بالعظام والحيل مهدود

بالنسبة ليومياتي السبت كان شغلي خفيف المحافظة على نظافة المطبخ من مسح الفرن وطاولات وكنس الارضيه لكن ما مسحتها وترتيب الصالات وطبخ يومي والتجهيز لدوامات الغد
من ليلة الاحد اشتد التعب علي وما قدرت اداوم رغم اني ارسلت كل الاطفال للمدارس بس ما قدرت اكمل يومي بس صلحت غدا وتغدو هم وانا خلاص رحت في خبر كان وماني داريه عن البيت ولا احد الاثنين مادرس الا ولدي الكبير وانا رحت للمستشفى ومع المغذي حسيت اني شوي صحصحت والدكتور قال لي راحة تامه بس يوم جيت البيت لقيت الفوضى بكل مكان تخيلو اطفال واخذين راحتهم يعني بصراحه حال البيت يرثى له المهم حاولت اني ارتب شوي ولوالصالات والمطبخ بس ماش مافيني حيل والشغل كبير غسلت دورة المياه وانخفض الضغط زياده فكان القرار اني ارسلت كل الاطفال للمدارس يوم الثلاثاء واخذت مغذي وجيت للبيت تقريبا الساعه تسع الصباح وبديت ارتب بس وارجع كل شي مكانه ورتبت الثلاجه ونظفتها لان حالتها يرثى لها كل شي فيها معفوس واللبن والزبادي مكبوب وش اقول وش اخلي وماسويت غدا كان من برا وبعدين نمت الظهر والحمدلله صحيت العصر وانا انشط ونظفت المطبخ كله ولو انه تنظيف بس اهون من الفوضى اللي كان عايشها
الاربعاء ارسلتهم للمدارس وغسلت دورات المياه كلها وكنست الصالات وغرفة عيالي وغرفتي بعد ما رتبتهم ترتيب سريع جو من المدارس وتغدينا وكان من برا لاني كنت ابي ارتب اكثر شي اقدر عليه بعد الغدا كنت خلاص منتهيه ولا قدرت حتى انام الظهرمن التعب العصر ريحت وما سويت شي والعشا كان خفيف ونمنا وبس
اليوم صحيت ست ونص احس بتعب غير طبيعي وعظامي مكسره مره كنست الدرج وانا نازله وصلحت القهوه والفطور وغيرت لعيالي  وبعد ما افطرنا رتبت المطبخ وهو مافيه زيادة حوسه وطلعت للحوش وغسلته ورجعت حيلي مهدود يادوب وصلت الارض وتمددت لي ساعه وانا متمدده وجا ولدي معه الايباد واخذته منه اكتب لكم وناويه ان شاء الله اقوم اشغل الغساله واتروش واروش عيالي لانا بنزور اهلهم اليوم وبصلح شي خفيف للغدا اخذه معي 
 على فكره من الاحد وانا مجازه مرضيا

والحين استودعكم الله الذي لا تضيع ودائعه







  

السلام عليكم ورحمة الله وبركاته

صبـــــــــــــاح الخير ... صباح السعــــــــــــــــــادة ... صباح الرضــــــــــا

صباح مشرق بالتفاؤل والأمل .. صباح يعبق بالخير .. صباح يزينه عمل مثمر بأيدي أخواتي المسلمات في كل البلاد.. صباح يزداد فيه الذكر للرحمن أصبــــــــــــــــــحنا وأصبح الملك لله

ياهلا بأم ميس دخلت وتركت الشغل الي بيدي كله عشان أقولك (( سلامات يالغالية )) وأجر وعافية يارب ..
ريــــــــحي نفسك حبيبتي أهم شيء صحتك ولا الشغل ملحقين عليه ..
وكمان إنتي وحشتينا وكل يوم ندعيلك ماهي من عوايدك الغيبة ,, والله يقويك حبيبتي.

بدأت العمل من الساعة السابعة والنصف كنست الحوش بخرت مجالس الرجال وشغلت الفواحات
سويت الفطور والقهــــــــــــــوه عشان نعدل الرآس
رتبت غرفة النوم ومســــــــــــــــحتها ,, وغرفة بناتي كمان ,, وغسلت الحمامات وانتم بكرامة .

جــــــــــدول اليوم عندي تنظيف الثلاجة والفريزر والفرن وغسل المطبخ وكوي نصف الملابس لســـــــــــاع مامسكت من الجدول شي الحين إن شاء الله أبدأ فيه ولنا لقاء عن قريب بإذن الله ..

الله يسعدك يافطووم
وربي يحق أمانيك ياالشمس المحرقة
والله يحفظك ياأم ميس
والله يسدد خطاك ياأم ذكرى
وبقية الأخوات أسأل الله العظيم أن يبارك لهن في أعمارهن وأوقاتهن ..

الف
الف
الف
الف
مبرووووووووووووووووووووووووووووووووووووووك للشعب الليبي إنتصارهم ونسأل الله العظيم أن يوحــــــــــــــد صفهم ويولي عليهم من يخاف الله فيهم .. وعقبال الشعب السوري .. آمين يارب العالمين
ونسأله تعالى أن يقر أعينناا باستعادة المسجد الأقصى وتحريره من يد الصهاينة الطغاة وانتصار أحبابنا في فلسطين عاجـــــــــــــــــــــــلا غير آجـــــــــــــــــــــــــــــــــــــــــــــــــــــــــــــــــــــــــــــــــــــــــل

اللهم انصر الإسلام والمسلمين ,, اللهم انصر الإسلام والمسلمين ,, اللهم انصر الإسلام والمسلمين

أخواتي في الهمم
الحمد لله خلصت جدولي من التنظيف لليوم
وعندي الليلة زواج ابن خالتي حبيت أمر وأسلم عليكم قبل ماأنشغل
وخليكـــــــــــــــــن شاطرات ونبي إبداعاتكن لا أجي إلا وانتن كاتبات وش أنجزتن اليوم
مانبي كســـــــــــــــــــل ولا تأجيل أعمال ..

وإلى لقاء إن شاء الله