((نصايح وأكل المرأه أثناء فترة النفاس))
قائمة الممنوعات من الأكل والحركات :
بشكل مبسط ....يمنع الجوع منعا باتا وهذا متعارف عليه لدى الكل
ممنوع الأكلات اللزجه ملوخيه وباميه البصل والشمام والبطيخ وبعضهم يمنعون الباذنجان والجريش لانهم يسببون غازات
عدم شرب الماء بكثره ......هذي ماني متأكده منها ناس وناس على حسب الجسم
ممنوع المشروبات الغازيه والسكريات ولا تكثرين من الحلو عشان السكر وزيادة الوزن ويجيب الخمول للجسم
ممنوع الحركه العنيفه وحمل الثقيل وصعود الدرج بكثره
ممنوع المشي حافيه وخاصه على السيراميك ....والتعرض لتيارات الهواء والبرد
ممنوع التنقع بكثره وان حصل فلا يزيد عن عشر دقائق
العطس والكح ....بس هذا مالنا يد فيه خخخخخخخ
ممنوع البخور بكل انواعه بالنفاس من تعطر وغيره
الجلوس بهدوء ورويه بدون عجله ويفضل وضع المخدات خلف الظهر وتحت الركب
(( ما يفضل فعله في فترة النفاس ))
أولاً وأهم شيء أنتم تدرون اننا مالنا صلاة والنفسيه مو
شي .....فاحرصي أختي على تشغيل القران عندك ولو بصوت منخفض
احرصي على الإستغفار طول الوقت فهو يشرح القلب والصدر ويهون عليك
الأذكار لاتنسينها طول الوقت .. والتسبيح والتهليل
ثانيا لصحتك وصحة الجنين إذا صارت الساعه 9 .....افتحي الدريشه وخلي الشمس تدخل عليك وعلى ولدك وخليها على جسمك شوي هذا مهمممم لصحة عظامك وعظام الجنين كما أنه يعالج الصفار اللي يجي للأطفال
خلي لك وقت الظهريه او العصريه تحطين لك زيت بشعرك ولا خلطه بجسمك (( هذا للي موب عجازات ))
لا تكثرين من التهوله والمظاهر وتكليف نفسك فوق طاقتها ...كل وحده واللي تقدر عليه (لايكلف الله نفسا الا وسعها ) أهم شيء الإستقبال الحسن والبسمه الطيبه وقدمي اللي تقدرين عليه
وكثر المظاهر يجيب لك التعب والموضوع ما يخلى وأنتم سيد العارفين
إذا تقدرين حطي لك غساله صغيره .... حطيها بالحمام وأغسلي غسيلك أول بأول
أريح لك .....إذا عندك خدامه تعتمدين عليها خير وبركه
حاولي تنامين بدري مع طفلك أريح لنفسيتك وجسمك
((نصائح ذهبيه للراحة البدنية))
إذا كنت ممن يشكون الألم الكثير الزائد عن الحد فلا تترددي بأخذ المسكنات من بندول وغيره
إستخدمي القربه أو الكمادة الساخنة لتخفيف المغص في البطن أو من تحت تحطينها وتجلسين عليها أو على أسفل ظهرك ......تريحك
افتحي الدش على الماء الدافئ واجعليه على صدرك مع التدليك الخفيف ....وذلك لتخفيف الألم وإدرار الحليب .....وإستخدمي كريم طبي لدهن الصدر لمنع تشقق الحلمات
إذا احتقن الصدر والطفل نائم او غير جائع او رفض الرضاعه فالجئي للشفط لان احتقان الحليب يؤذي الصدر ويسبب ارتفاع الحراره
لا تنسي أهمية شمس الصباح لك ولطفلك
إذا توفر عندك أحد يمسك الطفل فاستغلي الفتره لنوم عميق لتتعدل نفسيتك ويرتاح جسمك
(( لنظام الأكل ))
الفطور ....( من 7 الى 10 )
على الر يق ....تمره مع رشاد تؤخذ مع أي شي حار ...قهوة نفاس او حليب دافي
بعد ساعه .....حلبه باي طريقه تعجبك ....وهي تؤخذ بالعشر الايام الاولى فقط
بعدين الفطور اللي يعجبك::
مصابيب مع عسل
عصيده أو محلى أو حنيني أو فريك
خبز بر مع عسل وبانكيك بر وحلاوه طحينيه لأنها تدر الحليب بس لاتكثرين عشان السمنه
الظهريه ......
تشربين شاي أعشاب اللي يعجبك ( كمون – قرفه – يانسون – شمر – زنجبيل .........الخ )وممكن تخلطينهم لو حبيتي ..............تجنبي الميراميه لانها تنشف الحليب
اللهوم ....أو السفوف :
يابنات أهم شي باللهوم إنه يؤخذ مع شيء دافىء قهوه أو حليب دافئ .....لأنه إذا كان بارد يلصق بالفم وجدارالمعده وما يصير له أي فايده .....خاصة الرشاد
اللهومات كل وحده وطريقتها بس هي تؤخذ في الصباح والمساء
فيه نصيحه لكم ياحلوين ....إذا تأثر الطفل باللهوم اقطعيه فورا ......يعني مثلا يسبب له مغص او استفراغ او سهر وعدم نوم
الغداء......
مرقة اللحم ....مهمة جداا ترم العظم وتقوي الظهر وتدر الحليب ....يخلط معها شوي لهوم او حلب
ممكن مطازيز او مرقوق او قرصان
صحن سلطه خضرا
ممكن مرقة لحم او دجاج مع خضار منوعه من كوسه وجزر وبطاطس وبازلاء يعني مرق بس بدون
طماطم....ترشين عليه ماش مطحون او تطبخين معه شوية حلبه وتاكلينه مع خبز بر....أو شوية رز للي يموتون بالرز وما يستغنون عنه خخخخخخخخ....لاتطالعون فيني أنا ما احب الرز
بس ابتعدي عن الممنوعات
العصريه والمغربيه :
اشربي شاي الأعشاب
اشربي عصيرات بس لاتكون بارده
اكلي فاكهه بس لا تقربين المحظورات
ممكن قهوة قشر او قرنفل مع تمر ..................حطي مع القهوه اول فنجان مره بس لاتكثرين
العشاء :
مثل الفطور ......أو إذا حابه شوربة من أي نوع مع سلطه وكاس حليب منزوع الدسم
ممكن دجاج مشوي مع الشوربه .....وحطي مع الشوربه ملعقه صغيره لهوم حق الشوربه ,, لحم مشوي ,,, مرقوق او قبوط ...
ممكن حنيني أو فريك .....اللي تشتهيه نفسك
ممكن وجبه سريعة بس لا تعلمين أحد اكليها بالدس بدون ماحد يدري خخخخخخخخخخخخخ
((المغاطس والمره والتحاميل))
المره ...
مع القهوه احسن شي كل صبح وعصر .....بس بالفنجان الاول ولا تكثرين
المغاطس تجلسين بالماي الدافيه مع الملح لمده لاتزيد عن 10دقائق
التحاميل :
كل وحده وراحتها ,,,,,,,
فيه ناس تفضل الشعبيه يعني اللي يسونهم الحريم ,,,
وناس تفضل الطبيه
وناس ما تستخدمها ابدا
كل وحده ورغبتها ......
الغسول .....
.....يغلى الماء مع الارطا مع ملح خشن ...بكميه تكفي اسبوع مثلا
وبعدين يصفى ويوضع في الحمام وتتشطفين فيه مره الصبح ومره بالليل
وممكن تستخدمين الجفت وتلقينه عند العطار ويغلى بالماء ويصفى
وتخلينه بالحمام وتتشطفين فيه ,,, لكن لا تكثرين منه لأنه يسبب سواد
للمنطقه الحساسه ,,, وفي ناس تغلى المره و اذا صارت دافيه تتشطف فيها ,,, مره وحده باليوم ...
منقول بتصرف،،
فأعذروني على نقل المعلومات من التجمع القديم لأن مايمديني أدور شيء جديد
وإللي عندها اضافات أو معلومات حلوة تفيد النفاس تضيفها
والحمدلله على سلامة الجميع والله يطلعكم بصحة وسلاااامه وأجمل عرايس؛)