لا تتخيل كل الناس ملائكة ,,فتنهار أحلامك ,,ولا تجعل ثقتك
بالناس عمياء , لأنك ستبكي ذات يوم على سذاجتك,,
ما أدري هل هو غضب من الله أم ابتلاء دايماً يشغل بالي هالسؤال؟؟
بما اني بلغت من العمر عتيا وصار عمري 31 سنه ترى توني مالي إلا أسبوع ,, وصار عندي خبره بالحياة,,
حبيت اكتب لكم عن مواقفي وتجاربي لكم بالحياة لعلكم تستفيدون منها ,,
ومن خلال كلماتي هذه أفضفض واطلع اللي بقلبي مره وحده,,
لان للأسف ما عندي أحد أحط راسي على كتفه واشكي له ,, ولو أن الشكوى لغير الله مذله,,
أبحكي لكم عن سديم البنت المثالية اللي ربتها أمها على التضحية والإيثار حتى لو على حساب نفسها ,, ربتها على حتى لو الناس يحتقرونك معليش قدريهم وهيني كرامتك واكسبي رضاهم مايهم أهم شئ أرضيهم وراعي نفسياتهم ,,
ابدأ لكم بمواقفي من داخل البيت وبالتدرج الى خارج البيت ,,
طبعا اخواني الذكور الله يسعدهم متزوجين زوجات زي العسل ينحطون عالجرح يخرب ايش حنيه وطيبه لو أقول من هنا للصبح ماراح أوفيهم حقهم,, لا كثر الله من أمثالهن,,
في المقام الأول عند إخواني الله يسعدهم زوجاتهم وبعدين أهل زوجاتهم بعدين أصدقاءهم وفي الأخير أمهم وأبوهم واخواتهم,,
ღ.¸¸.عــــلمتني أمــي.¸¸.ღ
أحب أخواني واني اهتم فيهم ولو الدنيا غدرت بهم أكون أنا المنقذ لهم ,, شوفوا كيف قلب الأم كبير,,
وعلمتني بعد إني أكون خدامه للي يسوى واللي ما يسوى ,,
في يوم من الأيام في بداية الاجازه كنا بنسافر ,, وبلغنا أخوي انه بيسوي لنا عشاء قبل مانسافر يودعنا فيه
وتعرفون الترتيب والحوسه قبل السفر وكل شئ على راسي بحكم إني المسؤوله بالبيت
وهذه إحدى نتائج العنوسه,,
دخل أخوي مع زوجته اللي للحين معتبره نفسها عروس وهي لها سنتين من يوم أعرست,, وجلسها بالصالة وقالها
لا تتحركين عشان محد يشوفها بالغلط من إخواني يخاف عليها ما ادري على ايش بالضبط هالخوف والحرص,,
عاد هي خذتها حجه ما تتحرك من مكانها يادوب بس تأكل وتغسل يدها وتروح البيت ,, المهم كنت بغرفتي ونادتني
امي عشان احضر العشاء لأبوي وإخواني اللي جايبه اخوي وزوجته ,, المهم تعشينا وعينا من الله خير وبعد ماراح
اخوي وزوجته لبيتهم المصون ,, ألقت أمي حفظها الله ,,على مسامعي قصيده تحمل كل معاني التكريم والحفاوه ,,
ليش يمه هالقصيده الرائعة نظمتيها وش السبب قالت أخوك يقول عيب والله عيب على سديم أجيب العشاء وما
ألقاها مجهزه السفرة ,,
ياليتكم تدرون وش العشاء كفتة امريكانا محروقة وبطاطس مقلية تخر زيت ومكرونه بالبشاميل,, طيب يا أخوي العزيز خلي زوجتك تكمل معروفها وتجهز السفرة والا خل عشاءك ببيتك اللي عمرنا ما دخلناه إلا 4 مرات من يوم زواجك,, هذا فيض من غيض ,, وما خفي كان أعظم,,
ღ.¸¸.عــــلمتني أمــي.¸¸.ღ
أحمل أسى وحزن غيري ,, واني أحزن مع حزن أخواتي ,,وأتعب مع تعبهن ,, وأمرض مع مرضهن,,
أهم شئ أراعي نفسياتهن,, ونفسيتي ومشاعري ما تهم,,
ماراح أقول عن مواقف أخواتي لأني ما أحب أكون ناكرة جميل ,, خليني أكون أحسن منهن وأجري على الله,,
ღ.¸¸.عــــلمتني أمــي.¸¸.ღ
التواضع والحشمة ,, وأن الحياء هو تاج البنت ,,
مره من المرات كنت جالسه مع بنت جيراننا ,, وأضحك وأسولف معها ,, وهي ماتتكلم حسيت ان في قلبها حكي
تبغى تقوله,, سألتها يافلانه ايش فيك ,, قالت بقولك ولاتزعلين,, صراحه أمي دايماً تقارني بك ,, اذا انتي مثاليه ,,
ما أحب أكون مثلك مثاليه,, سكت وبلعتها ,, وقررت إني ما أروح لها مره ثانيه ,, المهم قابلتها بعرس مره من المرات
وكنت أنا جالسه بعيد عنها ,, تخيلوا تلف القاعة كلها عشان بس تمر من عندي
وتجي عينها بعيني وماتسلم ,, مو مره ولامرتين ,,
ياحياتي رحمتها والله ,,هاللفه كلها عشان توريني انها لابسه عدسات ملونه وقميص نوم من نعومي ,, الله يرحم أيام
الكرته والزم اللي كنتي تلبسينها تطورت منفوحه,,
ღ.¸¸.عــــلمتني أمــي.¸¸.ღ
أسامح وأعفي وأكون أنا الغلطانة ,, حتى لو كنت مظلومة ,,
كنت أدرس دبلوم حاسب ,, وكنت فلتة زماني بالمعهد اللي أنا أدرس فيه ,, كنت المميزة بينهم بجرأتي ,, وأسلوبي ,,
والحمدلله كانوا بنات المعهد كلهم يحبوني وهذه نعمه من الله,, هذا غير المدرسات والطاقم الإداري ,, كانوا يتضايقون
إذا بيوم غبت وما داومت,, تعرفت على بنت معي بالفصل أو بالأحرى هي فرضت نفسها علي,, تقربت مني وصرت
على قولتها صديقتها اللي ما تستغني عنها,, سنه كامله تمشي معاي وتأكل معاي وأثاريها حربه تتلون لها عشرين
لون وسبعه وسبعين وجه,, كانت لما تسمع أحد يمدحني ,, تسب فيني من ورى ظهري وتقول كلام يمس سمعتي
وشرفي ,, عشان ما أكون أحسن منها ,, سنه كامله وأنا ما أدري عن حقارتها ,,
وسبحان الله ربي نصرني عليها من غير حتى ما أدعي عليها لأني كنت أعاملها بحسن نيه,, ما عمري حقدت عليها ولا
حسدتها,, وبعد هذا كله سامحتها لأني اعتبرها مريضه نفسيه تحتاج علاج,, وإنسانه ناقصة ,,
ღ.¸¸.عــــلمتني أمــي.¸¸.ღ
الصبر ,, واني أكون واثقة من نفسي ,, حتى لو أحد هانني احتسب الأجر عند الله سبحانه وتعالى,,
تعرفون اني بنت تاخر زواجها ,, وأنا الوحيدة من بنات جماعتنا وجيراننا اللي باقي ما تزوجت,, وقدر الله إن حماة أختي
الصغيرة اللي عمرها 27 سنه ,, تنخطب وأروح لملكتها وأطلع لها وهي بالكوشة بسلم عليها وأبارك لها ,,
واقفة قدامها وماده يدي عشان أصافحها خلتني ومدت يدها للي وراي ,, كل هذا تسوي نفسها ماشافتني ,,
مشيتها قلت يابنت ما صدقت تنخطب وفرحانة وعيونها أنعمت من زود الفرحة مع إن عيني جات بعينها و شافتني ,,
جاء يوم زواجها وأول ما دخلت القاعه أخت العروسه لما شافتني انقلب لون وجهها وهي تسلم علي ,,
أحس بقلبها ماتبيني أحضر العرس,,
المهم دخلت القاعه جلست ,, كنت أنا وأمي وأختي اللي العروس تصير حماتها ,, وفيه جنبنا كراسي فاضيه
جات أخت المعرس وبنتها ووحده من جماعتهم جلست جنبي ,, تصدقون بالله ان أخت العروس مخليه العرس والناس
وجالسه تراقبني وبالأخير قامت ونادت أخت المعرس وجلستهم على طاوله ثانيه كل هذا عشان مايجلسون جنبي,,
جاء وقت العشاء وكنت أنا وأختي جالسين على طاوله ,, وكان نفس الشئ فيها كراسي فاضيه ,, جات أخت المعرس
وحمواتها وجلسوا معي انا واختي ,, وتعرفون الحريم لازم يسألون انتم ايش تقربون للعروسه ,, ياعمري عليها أخت
العروسه ذيك الليله صايره كانها الحرس الشخصي لي ,, جات وجلست جنبي وقامت تسال عن ايش تسولفون؟؟
والله أخوات المعرس استثقلوا دمها باقي شوي ويقومون يسطرونها,, سحبتني أختي من عالطاوله وقالت قومي
عشان تحس على دمها ,, بس بأسلوب طبعا,, ليتها حست على دمها ,, رحت أتفرج على الطق وموسعه صدري
وناسيه الحارس الشخصي ,, شويه التفت وراي إلا ألقاها واقفة لابسه عباتها ,, ابتسمت لها بدل ما تبتسم
تأشر لي بيدها بصراحة أنا ما فهمت ايش تبغى!!
قلت لاختي شوفي حماتك تبغاك لفت اختي عليها قالت لها في شئ؟؟
ردت وبكل وقاحه قالت ايه قومي يالله روحي البيت ليش قاعده أنتي وأختك,, سبحان الله اثاريها ماسكه نفسها لو عليها
طردتني من أول ما دخلت القاعة ما قصرت صراحة خلتني لين أتعشى وبعدها طردتني,,
تدرون ليش كل هذا عشان أخت العروس أخو زوجها خطبني !!!
ღ.¸¸.عــــلمتني أمــي.¸¸.ღ
الوفاء والإخلاص ,, وأن من لا يشكر الناس ,, لايُشكر الله ,,
بعد تخرجي من المعهد ,, كنت أدور لي على وظيفة ,, وسجلت بمنتدى يحط إعلانات عن الوظائف ,, وكان من أقسام
المنتدى ,, قسم خاص بتطوير الذات ,, كانت المشرفة عليه بنت حاصلة على بكالوريوس علم اجتماع ,, تعرفت عليها
عن طريق المسن ,, وما شاء الله عليها كانت بالفعل إنسانه راااائعه كلامها ,,وتوجيهاتها ,,ونصحها ,, كنت أقولها
الدكتورة لأنها بصراحة تستاهل هالكلمه وبجداره,, علمتني أشياء كثيرة كنت ما اعرفها ,, بالكمبيوتر وبالنت وبكل
المجالات ,, خلتني أحب القراءه مع إني ما كنت أحب اقرأ,, علمتني كيف أحب نفسي بس وما التفت لأحد ولا يهمني
أحد طول ما أنا ما أسوي شئ يغضب الله سبحانه وتعالى ,, علمتني أعشق كل لحظه في حياتي ,, علمتني أن
الحياة لي وحدي أنا..علمتني ما أفكر بالغير حتى ما أضيع وقتي ..علمتني أعشق نفسي ,,
كانت تقول لي كل ماقمتي الصباح قولي أنا إنسانه جديدة ,, أنا أحب نفسي ,, ماراح أسوي شئ يزعل نفسي
مني ,, بعد كلماتها هذه صارت نفسي أغلى شئ عندي ولقيت إني مقصرة ومذنبه بحقها ,,
ومفرطه في جنب الله ,, وكل إنسان يخطئ ,, وخير الخطائين التوابون,,
مانسيتك يا دكتوره بدريه,, أسأل الله العظيم كما جمعني بك في دنيا فانية،,, أن يجمعني بك في جنة عالية,,
بعد هالتجارب والأحداث اللي مريت فيها تعلمت أن الحياة ممكن تنتهي بأي لحظه ونحن بغفلة لاهين,,
تعلمت أقول الحمدلله على الصحة والعافية,, وأن أغنى إنسان هو اللي يملك الصحة وراحة البال,,
تعلمت أسوي خير وما أنتظر مقابل عشان ما أنصدم بعدين بالجحود,,
تعلمت أن الكلمة الحلوة والابتسامة ,, رأس مال النفس الطيبة,,
تعلمت أن من يزرع الثوم ما يجنيه ريحان,,
تعلمت أن النصر هو الصبر,,
تعلمت أن رضا أمي وأبوي علي أعظم قوه لي في هذه الدنيا,, لأنها من رضا الله سبحانه وتعالى,,
هذه خلاصة تجاربي لكم ,, اكتبها وأنا بكامل أناقتي وقذلتي مسيحتها على جنب ,, وهذه مني لكم
ღ.¸¸.مـــــخـــرج.¸¸.ღ
فمن يغتر بالدنيا فإني لبست بها فأبليت الثيابا
جنيت بأرضها وردا وشوكا وذقت بكأسها شهدا و صابا
فلم أرى غير حكم الله حكما ولم أرى غير باب الله بابا
وأن البر خير في حياة وأبقى بعد صاحبه صوابا
سديم الشوق ,,
قرأت بقلبي قصتك رأيت فيها نموذج وآقعي ,,
لعزه الفتاه,, لشموخهاا,, لحبها لنفسها دون تعاظم ,,
غاليـه ,,لا أجد كلمات تعبر عما في دآخلي ,,
قطرات دموع مني تساقطت على مشارف قصتكـ ,
العتيـده ,
آحـــترآآمـي , غاليه آحترآآمي ,, ,