عزيزتي لولاتو كل يوم بعد الافطار وصلاه المغرب افتح النت علشان اشوف يومياتك عن جد ممتعه مو بس بالاكلات ولكن بكل شي عنك وعن بناتك الله يفرحكم فيهم ويرزقك اخ صالح لهم.
فرجاء لا تحرمينا من يومياتك واخبارك بأسلوبك الممتع وربنا يهون ويقصر ايام غربتك ويردك لاهلك وبلدك سالمه واحنا كلنا اخواتك وقلوبنا معك في غربتك.
اختي بنت الرياض الله يشفي لك بنتك وتخرج من المستشفى بالسلامه وتجتمعي مع اهلك بالسلامه.

يارب يشفي بنتك يابنت الرياض وتفرحي فيها وتشوفيها عروسه يارب.
وكلكم الله يسلمكم ومشكورين تشجيعكم ليا بيرفع من معنوياتي ويصبرني على غربتي والله يعطيكم العافيه ويجمعنا على الخير يارب.

بسم الله الرحمن الرحيم
اليوم 15 من شهر ومضان المبارك اتخيلو انو عدى نص من شهر رمضان المبارك والله مرت زي الصاروخ أعاده الله علينا وعليكم بالخير والبركه.
اليوم سبت يعني ويك أند بس مافي جمعه مسلمين لانو مافي مكان نتجمع فيه والجامعه مقفله فخرجنا قضينا وفطرنا بره.
ولما رجعت طبعاً جري صليت ورتبتت الأغراض وسويت التعميرتين (فنجانين الشيشه)الأولى القهوه العربي والتانيه تصبيره القهوه التركي عبال ماتخلص القهوه العربي .
اليوم كان موعد ترتيب مخرن الملابس لانو انا محدده كل 3 شهور أرتب الملابس وأندر الصغيره والطيبه والجديده وأرفعها في أكياس ضغط مشفوط منها الهواء علشان تحتفظ بالملابس نظيفه وبعيده عن الحشرات والغبار والتراب والمويه وطبعاً أكتب على كل كيس أيش خزنت فيه كم نوع الملابس ومقاسها وتاريخ التخزين وألي أبغاه وندرته أكيد نظيف وريحته داوني بس انا شكاكه رجعت شطفتها بالمويه أضمن وأحسن.
وبعد كدا بالصدفه فتحت دولاب المخزن الصغير ألي عندي في الدور الفوقاني الله لايوريكم أيش لقيته يضرب ويقلب بس باقي يركبله رجول ويمشي من كتر النكته والقرمبع ألي فيه .

وطبعاً دمي فار وتوترت وسويت تحقيق مع بناتي من تحقيقات المحقق كونون وعرفت أنهم يفتحوه وينغبرو فيه يدورعلي طراطيع الثوم لاني بأدسها هنا.

وأنابرتب المخزن حبيت أوريكم ديه أنا استخدمها لو الله يكرمكك في أحد تعبان ويبغ (يرجع) فهذه أنظف وأريح من الأكياس العاديه أو الحمام الله يكرمكم.

ونقدرو تتحكمو فيها ولونها غامق علشان الريحه والأشكال والأحجام ألي بتطلع معليش قرفتكم سامحوني بس حبيت أفيدكم بالي أعرفه وأستفدت منه في غربتي..



وطبعاَ لانو ماكان يوم ترتيب المخزن الصغير رتبتبه بسرعه بسرعه ألطش وأمشي لآني ما حأرتاح نفسيناً وهو منكوت وأقعد أهري وأنكت في نفسي وأوترها وأشغل بالي وأنا موناقصه.

طبعاَ مشاء الله التبرويهات المقاسات الكبيره والوسط خرجت من المخرن في مهمه فرزنه رمضانيه ويتمركزو في مواقعهم وأن شاء الله يخلص رمضان على خير ويرجعو لبزورتهم ويتلم شملهم من جديد.

ورتبت التبرويهات كل واحد وغطايته وقوارير الفمتو الفاضيه للشيره والمرق الزايده.

يتبع

وصحون وزبادي وملاعق وكاسات بلاستيك حطيتها إحطياطي لومشاء الله جوني ضيوف كتير وعلى غفله.

وعرايسي وتحفي الي لسع ما انصادت.

وهنا مناشف وشراشف ومفارش طربيزات.

شفو ايش سويت لابتاه لما جات تبغ تقربعلي وتنكتلي فجعتها .


وأن شاء الله ماعاد ينكتولي شي بعد كدا.
حطيت الوجهه دا علشان يخافوويحرمو ينغبرو و يقربعولي وينكوتولي الدنيا .
ومع أني ما أحب أخوفهم وأفجعهم وأخلي عندهم عقد نفسيه من صغرهم بس والله مضطره أربيهم وأعلمهم الترتيب والنظافه من الصغر علشان مايتعودو على القربعه والنكته.

ونزلت موضوع كابلي ماما للولاتو خطوه بخطوه وبالصور لعيونكم:
http://forum.hawaaworld.com/showthread.php?t=1905004
ونشوفكم بكره ان شاء الله على خير.

روحي يالولاتو الله يهديلك بناتك وتفرحي بيهم ويسخرلك جوزك ويريح بالك ويديكي الصحه والعافيه على كل ألي بتقدميه من طبخ وترتيب ونظافه ومعلومات وأن شاء الله كلو في ميزان حسانتك ..
وأحسنكم من تعلم خير وعلمه ...
وأنا من أشد المعجبين بمواضيعك وطبخك وطريقه كتابتك العفويه والنياتيه وشرحك بالتفصيل الدقيق والمصور..
الله يحميكي ويحفظك من الحسد ومن شر كل عين ماتصلي على النبي صلى الله عليه وسلم.