وينج اميره كملي ..

الجــــــــ الثامن ـــــزء
تروح ميثا عند خالتها ام كايد وتخبرها انه رقية ولطيفة بيروحون وياهم دبي ترخصهم خالتهم ... استانسن البنات وايد لانهن بيظهرن وبيروحن دبي ... طبعا عقب ما صلوا العصر كانوا كلهم جاهزين ميثا وسلامة ورقية ومحمد اخو سلامة اركبوا ويا بطي في موتره وكايد وحرمته وولده وحمدة ولطيفة ركبوا في سيارة كايد ... البنات كانن وايد مستانسات وكاشخات من اوصلوا دبي احدروا الستي سنتر الريايل احدروا ايكيا والبنات احدرن باريس غاليري واتشرن عطور ومكياجات ومن عقبها تموا يتمشون في المركز واحدرن محلات الثياب وميثا وسلامة اتشرن للتقنية خلاص لانه دوامهن في التقنية قرب بيداومن بنص شهر 8 ... وحمدة ولطيفة اتشرن بعد ملابس .. كانن وايد مستانسات من عقب ما خلصوا تسوق في الستي سنتر اظهروا وراحوا صوب حديقة الممزر وتموا يتمشون الريايل نزلوا الحريم اهناك وراحوا يشترون عشا تم محمد وياهم ...
سلامة : محلات دبي والله انها جنه وانا اشهد ..
مريم : هيه والله انها جنة على دار بوخليفة ....
لطيفة : ليش ما اتون عدنا بدع زايد والله بتستانسون وايد وانتوا تتمشون بين المزارع والله انها جنة غير والجو حلوووو وايد في المزارع في الشتاء والا في الصيف رغم انه حر بعد الجو غير وايد حلووووو .........
مريم : هيه والله حتى ليوا ومزارعها ماشي احلى عنها ....
يتمن يسولفن ومن عقبها ايوون الريايل وهم ياييبين العشا ييلسون الحريم اروحهم والريايل روحهم ويتعشون بطي كان بين الفترة والثانية يصد صوب الحريم علشان يشوف لطيفة والحمدلله انه كايد ما انتبه له والا جان سوى لهم سالفة ....
عقب ما خلصوا هموا يبون يروحون ...
بطي : الميث تعالي اباج شوي ....؟؟؟
ميثا : ليه يا عمي ....
بطي : قولي حق لطيفة اتحدر ويانا الموتر ورقية تروح عند حمدة ؟؟؟
ميثا : اشمعنا لطيفة يعني ؟؟؟
بطي : ميثووووه اسمعي الرمسة دخيييييييييييييلج ... بليزززززززززز
ميثا وهي تطالعه وبخبث : انشالله ....
تروح ميثا عند لطيفة وتخبرها تركب وياهم بموتر عمها إلا لطيفة في البداية ارفضت لكن حمدة وسلامة ورقية اجبروها المهم لطيفة في النهاية اركبت ويا بطي وميثا وسلامة ومحمد ، ميثا وسلامة خلوا لطيفة تيلس ورى بطي ... على طول .. وقدام بطي سمن عمارهن ما يعرفن شي ...
طول الطريق وهم رادين بوظبي بطي كان مشغل ميحد ويسمعون والاغاني كلها رومانسية ...
محمد : بطي بس ما عندك شريط غير .. ميحد تعبنا منه ؟؟
بطي : افا عليك بوجاسم الاغاني اللي تباها كلها عندي ...
يغير بطي الشريط ويحط لهم نوال الكويتية ومن عقبها يحط لهم شريط منوعات ... لطيفة وهي تطالع بطي من المنظرة وهو ما كان منتبه لها لانه كان منتبه للطريج " يالله يا ليت لو كنت مكان محمد الحين " يوم وصلوا الرحبة ...


ميثا : عمي وقف عند شيشة البترول نبغي نحدر الحمام الله يعزك ...
بطي : انشالله ...
يوصلون عند شيشة البترول في الرحبة ....
ميثا : سلاااااااامي نزلي ويايه ... وتغمز لها ...
سلامة : انشالله ... لطوووووف بتين ويانا ؟؟؟
لطيفة : لا لا ما بحدر ...
ميثا : براحتج ...
بطي : يله لا تتأخرن بسرعة ...
ينزلن ميثا وسلامة ومن نزلن يرن تلفون محمد وينزل من الموتر ويروح اشوي بعيد عن الموتر .. بطي ولطيفة تموا في الموتر ...
بطي : تبين ايييب لج من الكافتيريا ...؟؟؟
لطيفة : لا شكرااااااااا .......
بطي : اممممممم لطيفة ؟؟؟
لطيفة : لبيه .....
بطي : لبيتي حايه ... أنا آسف على المسج اللي طرشته البارحة لج ...
لطيفة : ها .... لا لا عادي ....
بطي : بس انتي ما رديتي عليه بمسج ؟؟؟
لطيفة : ها .... اليوم اشنالله ...
بطي : وعد ....!!
لطيفة : هيه وعد .....

يحدرن ميثا وسلامة السيارة ومن عقبهم محمد يتحرك بطي وهو مستانس هب عارف اللي سواه صح وإلا غلط يوصلون بوظبي .. على الساعة وحدة بالليل يحدرن سلامة ولطيفة ومحمد بيتهم وميثا ترد ويا عمها بيت ابوها من توصل ميثا البيت تروح غرفتها تسبح ومن عقبها تحط راسها وترقد من زود التعب .. بطي من حدر غرفته تسبح وانسدح على السرير وتم يفكر بلطيفة ..ز سلامة ورقية من احدرن الغرفة اتسبحن ورقدن ... وحمدة نفس الشي ... إلا لطيفة تمت تفكر ببطي وهب عارفة شو ترد على مسجه شوي وتمسك التلفون وتكتب له " سيدي يا زين لقياكم .. يا فريد الحسن في الكونا .. ما وجدت انسان شرواكم .. يا ذهب اصلي ومضمونا " .... يوصل المسج لبطي ويقراه وعلى طول يرد عليها " ارحموه القلب يهواكم ... في هواكم صار مفتونا ... في سكون الليل ناداكم .. قلب يخفي عنكم اشجونا .." ...
تفرح لطيفة وهي تقرى المسج اطرش له " يا كبر حظي كان مثلك عشقني .. وإلا انا لو بيدي من ولدتني امي احبك ..." ... يفرح بطي من هالمسج ويرد عليها ...

" يا هو قلبي من حبكم تعبان ... وانته المحبة تتغلى عليها ... احبك اكثر من صغير وشفقان .. لأمه اذا غابت وطول سفرها .. واكثر من اللي ينتجه حقل حبشان .. واكثر من المخزون بأسفل بحرها .. حب كبير ما شعر فيه ولهان .. ارخص عيونه لك وودع نظرها " ...
في هاللحظة لطيفة تستانس وتعرف انه بطي يحبها تستانس وايد وتفرح ومن كثر فرحتها كان ودها انها تصرخ بصوت عالي وتقول احبك لبطي بس حرام حمدة راقدة ...






يمرن الاسبوعين اللي قضوهن لطيفة ورقية في بوظبي بسرعة وإييهم جاسم اخوهن ويروحن بدع زايد ولطيفة ما كان ودها تروح لانها ما تبغي تفارق بطي لانها تعودت على شوفته وخاصة انه قالها انه يحبها لطيفة ولا مرة اتجرأت إنها تكلمة في التلفون ولا هو بعد بس مشاعرهم كانوا ينقلونها لبعض عبر المسجات ، محد كان يعرف انه لطيفة تتبادل ويا بطي المسجات غير حمدة اللي كانت قريبة منها وايد .... شاهين رد البلاد وميثا من حدر شاهين البلاد قامت ما تروح بيت خالها وايد وتمت ملازمة لاخوها سلامة حست بالفراغ الكبير لانه ميثا انشغلت عنها بأخوها في يوم من الايام وفي بيت بو شاهين ....

شاهين : ابويه تعرف انه الغربة صعبة ، وحمدة ما باقي لها غير اربعه شهور وبتتخرج من الكلية يعني ما فيها شي لو ملجت الحين والاجازة الياية اعرس فيها ...؟؟
بوشاهين : بس اخاف خالك ابراهيم ما يوافق يملج بنته الحين وان كان عليه انا .. انا موافق ...
بطي : بو شاهين يا خوي ، ابراهيم ما بيرد لك طلب انته رمسة ولا تكسر خاطر ولدك ...
شاهين : شوف يا ابويه هي بتخلص الانجاز عقب اربعه اشهور وبنعرس وبعدين تكمل الدبلوم في بريطانيا ....
بوشاهين : خلاص تم دام انها بتكمل دراستها اهناك انا برمس خالك خلاف بمر عليه عقب صلاة العشا وبنشوف شو رده ...
بطي : خلاص تم ...

في هاللحظة ميثا كانت في بيت خالها ويالسه في الصالة روحها وسلامة كانت في المطبخ راحت اتيب دلة الشاي وترجع ،وحمدة ومريم حرمة كايد كانوا في السوق رايحين ويا الدريول وام كايد كانت ويا حريم الفريج يالسين في الفريج الحريم متعودات ييلسن في الفريج يسولفن حزة العصر .. يحدر مايد الصالة وكان نازل من فوق تشوفه ميثا وهو من شافها تم يمشي لين ما وصل صوبها ...
مايد : السلام عليكم ...؟؟
ميثا : وعليكم السلام ورحمة الله وبركاته ....
مايد : اشوفج اروحج وين سلامة عنج ؟؟؟
ميثا : راحت المطبخ والحين بتي ....
مايد : زين عيل انا رايح تامريني بحايه ؟؟؟
ميثا : سلامتك .. وين بها بو سلطان ؟؟؟
مايد وهو مستغرب من سؤالها ويرد عليها رد قوي : وانتي شو لج ؟؟
ميثا وهي مستغربة من رده : شوووووو ....... لا ... بس ....
مايد وهو معصب : بس شوووه ؟؟؟ انتي شو لج تسألين ؟؟؟
ميثا ولا فجت حلجها بكلمة وكانت منصدمة من كلامه .....
ميثا : لا ماشي ....
مايد : يله انا رايح ...

يظهر عنها وقبل لا ترد عليه باي كلمة وهو في الطريج يشوف سلامة يتخطاها ولا كأنه يشوفها ويروح عنها ، تحدر سلامة الصالة وتشوف ميثا وهي منصدمة وكانت اعيونها تدمع ...
سلامة : شو فيج ميووووووود قال لج شي ؟؟؟
ميثا ودمعتها على خدها : سلااااااااااامي ميووووووود تغير وايد صار هب هو مايد اللي نعرفه هذا واحد ثاني .....


سلامة : ليش تقولين جذه هو شو قالج ؟؟؟

تخبر ميثا سلامة عن كلام مايد وياها حتى سلامة استغربت من تصرفات مايد وما عرفت شو تسوي غير انها تحاول تهدي ميثا ... من عقب صلاة العشا بو شاهين وشاهين وبطي احدروا بيت بو كايد ويلسوا يسولفون الريايل في الميلس ومن عقب ما تفولوا يلسوا يسولفون ...

بوشاهين : اخوي بو كايد انا ياينك اليوم علشان اقولك انه شاهين راد من بريطانيا ويبغي يملج على حمدة ؟؟ وانا قلت له بقول لخالك وانشالله يرد علينا ... بخير ...
بوكايد : والله ما اعرف شقولك يا خلفان البنت بنتكم وانتوا خاطبينها من متى والخطبة اذا طولت هب زينة بس البنت يا بوشاهين عندها دراسة وهو لو ملج الحين خلاف بيقول ابغي اعرس ..؟؟؟
شاهين : خالي انا بملج الحين والاجازة الياية انشالله بنعرس والبنت بتكون قدها خلصت دراسة ....
بوكايد : وتربط البنت سنة كاملة يا شاهين ؟؟؟
بطي : بوكايد .. هو الحين رابطنها من يوم هي اصغيرة يت على هالسنة يا بوكايد الله يهداك ...
بوكايد : يا بطي البنت صح اني ابوها.... بس عندها اخوان لازم اشاورهم ...؟؟؟؟
كايد : ابويه عمي خلفان وشاهين ما غلطوا.... ودام انه بيملج وخلاف عقب كمن شهر بيعرس برايه قدها البنت خلصت دراسة ....
بوشاهين : صدق كلام كايد.... يا ابراهيم ....!!!
بوكايد : عيل اتوكلوا على الله وانا بشاور البنت وبشوف اليوم اللي يناسبها علشان نملج ...
بوشاهين : تم الساع يا خوي بوكايد .....
يفرح شاهين لانه خاله ابراهيم وافق على طلبه ومن زود فرحته يوم رد البيت خبر ميثا .. وميثا استانست وايد وافرحت لفرح اخوها رغم انها كانت مضايجه من معاملة مايد لها ...

في دبي :
مايد كان يالس ويا طيف في شقتها ....
مايد : ليش ما إتين تعيشين في بوظبي احسن من اني اضرب اخطوط كل يوم ....؟؟؟
طيف : وشغلي شو اسوي فيه ؟؟؟
مايد : انا بصرف عليج واستقيلي ....!!!
طيف : انا عندي اقتراح شو رايك تتزوجني .؟؟؟
مايد : شوووووووه ؟؟؟؟
طيف : اعتقد ما فيها شي لو اتزوجتني " عرفي " على الاقل يا مايد نعيش ويا بعض بالحلال .... شو رايك ؟؟؟
مايد : والله ما ادري بفكر ؟؟؟
طيف : فكر ورد عليه خبر انا انتظرك ...

من عقبها ييلسون يشربون لين ما يسكرووون ....

طبعا بوكايد شاور حمدة وامها وخبروه انه هالخميس يناسبهم وحمدة افرحت وايد اتصل بوكايد ببو شاهين وخبره هالخميس الملجة وانها بتكون بس ملجة رياييل بس شاهين ما رضى وقالهم لازم تكون ملجة حريم وريايل يعني يبا يسوي حفلة ومن عقب مشاوره رضت حمدة اللي كانت رافضة فكرة الحفلة بس استسلمت للامر الواقع ومن كثر ربشتها ما عرفت شو تسوي بخصوص الفستان وبالاخير اجرت فستان من عند اربيعتها في الخالدية .....


تمر الايام وشاهين مرتبش وضاربنه احفوز على الملجة وحمدة نفس الشي وميثا من كثر ما شافت شاهين اخوها فرحان وايد افرحت وياه هي مالها حد في هالدنيا وهي تحب شاهين اخوها وايد ...

شاهين : يالله انشالله افرح فيج يا الميث انتي ومايد ؟؟
ميثا وهي تنزل راسها وزعلانة : انشالله !!
شاهين : رب ما شر شو فيج ميثااااني ؟؟؟
ميثا واعيونها تدمع : لا ما فيني شي يا خوي كل اللي فيني اني فرحانة علشانك وايد ....
شاهين : ميثاني قولي الصدق شو فيج ؟؟؟
ميثا وهي تتنهد تنهيدة طويلة : صدقني يا شاهين ما فيني شي ....
شاهين وهو حس انها تكذب عليه وانها مخبية عليه شي بس ما جبرها تتكلم : بخليج على راحتج يا الغالية .....
ميثا : شاهين انا رايحة غرفتيه تامرني بحايه ؟؟؟
شاهين : لا حبيبي بس اذا حسيتي انج مضايجة وتبين تقولين لي شي لا تترددين ؟؟؟
ميثا وهي تنش من مكانها : انشالله .....
تروح غرفتها وتسكر الباب على نفسها تركض صوب السرير وتحط ويها بالمخدة واتم تصيح ... ميثا زعلانة على حال مايد وانه تغير عليها وايد اتم تصيح ومن عقبها تيلس على السرير وتمسح ادموعها ... تفكر بقسوة مايد عليها واتم سرحانة وتفكر فيه ودموعها تنزل عاى خدها ....

" أبا اذرف دمعاتي ................. وأظنها ما تكفيني
أنا إللي ضاعت أوقاتي ............. أنا اللي الشوق يكويني
ترى زادت عذاباتي .................. ولا ادري الذي فيني
يقول الغير مأساتي ................... سببها في شراييني
أنا شكيت في ذاتي .................... لا .. يمكن فتكويني
وصل بي شكي العاتي ............... إلى خل مخلينـــــي
تركني أجمع أشتاتي .................. من الهموم وما فيني
انا زادت بي نكباتي .................... دخيلك لا تجافيني
ما تنفعك يا مايد آهاتي .................. خلاص ارحم وصافيني
بعدها تخف وناتـــــي .................... واحط ايديك في يديني
يا ليت تعيش معاناتي ..................... عشان تحس بما فيني ..."

تسمع صوت المؤذن وهو يأذن لصلاة المغرب تنش ميثا من مكانها وتوقف عند البلكونة اتم تسمع الاذان لين مايخلص ....
ميثا : " اللهم رب هذه الدعوة التامة والصلاة القائمة آت محمد الوسيلة والفضيلة وبعثه اللهم مقام المحمود الذي وعدته .... " استغفر الله العظيم على كل حال ....
تروح ميثا صوب الحمام تغسل ويها ومن عقبها تتوظأ وتظهر من الحمام تفرش سيادنها وتصلي ....
شاهين وبطي من سمعوا الاذان راحوا المسيد ومن عقب ما اظهروا التقوا بكايد ومحمد وسيف اعيال بوكايد وسلموا عليهم ومن عقبها كل حد رد بيتهم ... شاهين وبطي اظهروا ارباعه وراحوا يتمشون على الكورنيش ومن عقبها راحوا عند ربع بطي في مدينة خليفة وايلسوا عندهم في ميلس جمعة اربيع بطي .....
ميثا من عقب ما خلصت صلاة راحت ويلست عند يدتها ويدها وتمت تسولف عندهم علشان تفك شويه من ضيقة صدرها يدها كان يشل وميثا استانست وايد على يدها وتمت هي ويدها يشلون ويتقصدون شوي افرحت وفكت من ضيجة صدرها ....

شوي وتسمع صوت التلفون تروح تشله والا سلامة متصلة بها ....
ميثا : آآآآلوووو حي الله بنت ابراهيم اشالج فديتج ....؟؟؟
سلامة : بخير ربي يعافيج اشحالج انتي والله يا ميثوووه ولهت عليج ؟؟
ميثا : تولهت عليج العافية يطولي بعمرج شو يالسه تسوين ...؟؟
سلامة : ضايجة بدونج ... اقول الغالية انا الحين بخطف عليج .؟..
ميثا : حياج الله ..... ارقبج .. انا امبوني ضايق خلقي من كل شي ......
سلامة : افا يا الميث من شوه ضايق خلقج اكيد من ميووود صح ؟؟؟
ميثا : آآآآآآآآآآآه يا سلااااااامي من كل شي ... ليتج تعرفين باللي في قلبي .....؟؟؟
سلامة : سلامة قلبج يعلني افداه ... شوفي انا الحين بخطف عليج وبنسولف في هالسالفة .....
ميثا : خلاص الغالية ارقبج ....

تسكر ميثا التلفون عن سلامة وتروح صوب غرفتها علشان تغير اثيابها من عقب ما خبرت يدتها ويدها انه سلامة بتحدر عندهم بعد شوي ... بعد دقايق تحدر سلامة بيت عمتها وتدخل الصالة وتشوف يد ميثا ويدتها يالسين ويطالعون تلفزون ....
سلامة وهي تحب يد ميثا ويدتها على روسهم : السلام عليكم شوااااااابي ....
يد ميثا : وعليج السلام والرحمة يا بنتي اشحالج الغالية واشحال عرب دارج ....؟؟؟
سلامة : بخير يدي كلهم بخير وسهالة ويردون عليكم السلام ...
يدة ميثا : الله يسلمهم من كل شر يا رب
سلامة : يدووووه إلا ميثا وينها ؟؟؟
يدة ميثا : الغالية الميث في غرفتها روحي لها ....
سلامة : انشالله يدوووه يله عيل انا اترخص .....
يد ميثا : ربي يحفظج ....

تحدر سلامة الغرفة عند ميثا بس ميثا ما كانت في الغرفة كانت في الحمام تيلس سلامة على السرير وتشوف ألبوم الصور الخاص بميثا تيلس تطالعه تشوف صور ميثا يوم كانت ياهل وصورها هي بعد وصور مايد وصور عمتها الله يرحمه تستانس وايد وهي تشوف الصور .... تظهر ميثا من الحمام وتشوف سلامة تطالع الصور ....
ميثا : الحمدلله على السلامة متى ييتي ؟؟؟
سلامة : من شوي ....
ميثا : حياج ....
سلامة : الله يحييييج على فضله يا الغالية الالبوم حلوووو وايد ....
ميثا : اعيونج الحلوة فديتج .. إلا حمدوه وينها ما يت وياج ؟؟؟
سلامة : صدق انج ما تستحين كيف تبينها إتي ويايه وملجتها على شاهين ورى باجر اتخبلتي ....
ميثا : ههههههههههههههه هيه والله نسيت ...
سلامة : اسميج مضيعة الحية يا بنت خلفان ....
ميثا : عنالاااااااااااتج يا السباله يعني الواحد ما ينسى ....

ايتمن يسولفن ويضاحكن ويعلقن على بعض ومن عقبها ينزلن يتعشن ويا الشواب وتتصل سلامة باهلها وتخبرهم انها بتنام الليلة عند ميثا .....


بالليل يدشن الغرفة بس ما اييهن ارقاد ايبندن الليت بس يخلن الابجورة تشتغل .......
سلامة وهي يالسه على السرير : ميثووووه فكرت وايد بسالفة جسووم ولد خالتيه احس اني هب مرتاحة من صوبه .....
ميثا : انزين غناتي ليش ما تخبرين امايه عوشه وتقوليلها انج استخرتي وما ارتحتي لجاسم ....
سلامة : والله ما اعرف اخاف امايه تزعل وتقول اني قاصدة ارفض جاسم ....
ميثا : سلامة حبيبي انتي ما بتسوين شي غلط اللي سويتيه انج استخرتي وما ارتحتي لجاسم ...ما فيها شي وامايه عوشه بتتفهم الموضوع وبتقدر توصل هالشي لخالتيه رايه .....
سلامة : صح اعرف بس اخااااااف انتي اتعرفين امايه كيف ....؟؟؟
ميثا : ليش تخافين هذي حياتج وانتي من حقج تختارين اللي تبينه ما فيها شي ....؟؟؟
سلامة وهي تبتسم : فديتج ميثاااااااااااااااني ....

ايتمن يسولفن ومن عقبها يستسلمن للرقاد ميثا حست براحة لانه سلامة اليوم راقدة عندها وهونت عليها عذابها ..........

في شقة حمد اربيع مايد ...:

مايد : عبيد شو رايك باللي قلته ؟؟؟
عبيد : مايد اتخبلت واهلك لو دروا باللي تنويه شو بيسون ؟؟؟
حمد : عبيد انته كله معقد الامور اعتقد ما فيها شي لو تزوجها هي ما تبغي زواج بمعنى الزواج هي تبغي زواج عرفي يعني كلها شهر والا شهرين ويخليها....
عبدالله : حمد ... لا تزين الامور لمايد ....
مايد : عبدالله انته دوم جذه ضدنا ولا يعجبك أي شي ....
عبدالله : انتوا ربعي ومن حقي انصحكم ... حمد ، عبيد ، مايد ، صدقوني اللي تسونه ما بينفعكم ....
مايد وهو معصب : ليش احنا شو سوينا ما سوينا شي ؟؟؟ اللي يسمعك يقول إنا مجرمين ....؟؟؟
عبدالله : انتوا تمشون بسكة بضيعكم صدقوني الخمر والبنات ما بينفعونكم ؟؟؟
عبيد : اوووووووووه عبدالله اذا تبا ترابعنا حياك واذا ما تبا الدرب تندله وين وروح دور لك على ربايع غيرنا ..؟؟؟؟
عبدالله : عبيد يعني هذا جزايه اني انصحكم يا عبيد ...
مايد : ما نبغي نصايح من حد احنا ريايل ونعرف مصلحتنا .... عدل ....
عبدالله : لو انكم تعرفون مصلحتكم يا مايد جان عرفتوا انه الخمر طريجه وصخ وانه بينفدكم ...
عبيد : وفر نصايحك لك يا ولد هلال ...
عبدالله : الظاهر علاقتنا لحد اهنه وخلاص بتنتهي انا ما احب اسكت على الغلط وانتوا غلطتوا وايد وتماديتوا لين ما وصلتوا لأم الكباير وانا ما احب انلعن علشان اني اجالسكم .....
عبيد : عبدالله تبغي تيلس حياك ما تبغي ربي وياك ....
عبدالله وهو ينش من مكانه : انا بطلع عنكم ولا برد اهنه مرة ثانية لكن قبل لا اوصل عتبه الباب احب اقولكم الطريج اللي تمشون فيه بيضيعكم .. مايد اتمنى الدنيا ما تغرك اكثر عن جذه وانك تودر هالطريج لانه بيقضي عليك واتمنى تصون نفسك وصدقني شو احلى من انك ترجع لدربك وإنك اتوب عن هالوصاخة اللي بتوديك في متاهات ما بتقدر تطلع منها بعدين ..... ومع السلامة .,,,,

يظهر عبدالله عنهم ... والكل يتمون ساكتين ولا تكلموا بكلمة وحدة .....

الجـــــــــــــ التاسع ــــــزء
من ظهر عبدالله من شقة حمد حاول مايد انه يظهر وراه بس عبيد يوده وما خلاه يروح ورى عبدالله ويلس مايد في الشقة وطول السهرة ساكت ولا تكلم بكلمة كان وايد يفكر بكلام عبدالله اربيعه ...


اليوم الثاني في بيت بوكايد ، سلامة من عقب ما تغدت الظهر ويا ميثا ويدتها ويدها ارجعن هي وميثا لبيت بوكايد ، دشن الصالة وكانت ام كايد ومريم وحمدة يالسين في الصالة ويسولفن شو بيسون حق الملجة باجر يوم الخميس ....
سلامة : اشوفكن إلا اروحكن عيل ابويه واخواني وين عنكن ؟؟؟
ام كايد : ابوج وكايد رايحين ليوا من الصبح حق عمج شامس ومحمد ظهر عند ربعه وسيفوه بعد وميووود محد يشوفه موليه ولا جنه في البلاد .....
ميثا وهي تفكر بكلام خالتها ام كايد يوم قالت عن مايد انه ما ينشاف " يالله حتى خالتيه ما تشوفه كيف انا عيل بشوفه " ؟؟؟
سلامة : امايه ابغي اخبرج عن شي ؟؟
ام كايد : عن شووووه ؟؟؟
سلامة : امايه انا استخرت علشن سالفة جاسم وشفت انه جاسم ما يناسبني احس اني هب مرتاحة له ....
ام كايد : شوووه وليش يعني ودج انتي بجاسم فديته !!
مريم : عمتيه العرس هب بالغصب ...؟؟
ام كايد : صح انه هب بالغصب لكن جاسم ما فيه منقود ....؟؟؟
سلامة : امايه والله اني ما ابغي جاسم وما ارتحت له ليش انتي هب راضية تقتنعين ؟؟؟
ام كايد : سلامة احنا ما عدنا بنات يتنقن بالريايل ؟؟؟
ميثا : امايه ... سلامة ما اغلطت هي ما ارتاحت لجاسم يعني الزواج هب بالغصب ...
ام كايد وهي معصبة : سلااااااااااااااامي الرمسة هب لج الرمسة رمسة الريايل واذا ابوج واخوانج موافقين على جاسم انتي مالج شور ....
تنش من مكانها وتظهر عنهم وهي معصبة ... لانه سلامة ارفضت جاسم ولد اختها راية ....
سلامة : الريم انا الحين قلت شي غلط ؟؟؟
مريم : لا بس انتي تعرفين انه عمتيه تحب جاسم ولد اختها وايد وكان خاطرها تيوزه وحدة من بناتها وحمدة ترى ما تنفع له لانها محيرة لشاهين ويوم يا خطبج استانست وايد ....
حمدة : وانتي بعد يا سلامة لا تنسين انه امايه عنيدة وفوق هذا تحب جاسم علشان جذه ازعلت يوم انتي رفضتيه .....
سلامة : ليش ما تفهموني انا جاسم امبوني ما ابغيه بالعكس هو ما فيه شي وعز الله والنعم فيه لكن انا من عقب الاستخارة ما ارتحت له يعني شو اسوي كفرت يوم قلت اني ما ابغي جاسم وما ابغي اتزوج الحين ....؟؟؟



ميثا : الغالية هذا من حقج وما اظن حد يقدر يمنعج من حقج .... وانشالله خالي بيتفهم وضعج وان ما قدرتي تقنعينه انا بقنعه خالي وايد يحبني وما اظن انه بيرد لي طلب ولا بيكسر خاطري .....

يرن تلفون حمدة والا لطيفة بنت خالتهم راية متصلة ....
حمدة : سكتن هذي لطووووف متصلة ما فينا تسمع هذربتكن .,..؟؟؟
حمدة وهي تشل التلفون : الووووووو ؟؟؟
لطيفة : هلا ومرحبا ....
حمدة : ملاااااييييييييين ولا يسدن حيالله بنت عمير بن حمد اشحالج الغالية واشحال عرب دارج ؟؟؟
لطيفة : طاب حالج الغالية بخير وسهالة ويردون السلام عليج .....
حمدة : حيالله اهل بدع زايد ....
لطيفة : الله يحييييييج على فضله الغالية ربج بخير ؟؟؟
حمدة : بخير وعافية .....
لطيفة : يا مرحبا والله علووووووومج العروس ؟؟؟
حمدة : والله علوم الخير الله يعافيج العلوم من صوبج يا بنت عمير ؟.؟؟
لطيفة : علوم الخير يعلني افداج ... ماشالله سمعنا امج بتملجين يوم الخميس عاد قلت اتصل ابارك لج ....
حمدة : الله يبارك فيج يا رب وعقبالج يا بنت عمير ....
لطيفة : انشالله ربيه يسمع منج ويقرب القريب يا رب ....
حمدة وهي تروح عن خواتها بعيد : إلا بطي اشحاله ؟؟؟
لطيفة : آآآآآآآآآآه يا حمدة بخير شو غادي عليه تعرفين ما بينا غير مسجات بس ننقل فيها احاسيسنا .... لبعض ....
حمدة : كان الله في عونج .... ليش تتنهدين رب ماشر شو فيج الغالية ..؟؟
لطيفة : ما فينيه شي فديتج .... لا تحاتين ...والله اني متشوقه لشوفه بطي يا حمدوووه وابغي اسمع صوته بس اخاف اتصل به لا اطيح من عينه ....
حمدة : الله يكون في عونج ؟؟؟
ايتمن يسولفن ومن عقبها تسكر حمدة عن لطيفة وتروح صوب ميثا وسلامة ومريم اللي كانن يسولفن ....
حمدة : تسلم عليكن لطااااااافي ....
مريم : الله يسلمها اشحالها ؟؟
حمدة : بخير وترد السلام عليكن ....
سلامة : ما يابت لج طاري ما قالت سلامة ليش للحين ما ردت على موضوع جاسم ؟؟؟
حمدة : لا هي متصلة تبارك بس ...
سلامة : اشووووه ما بيون الملجة ...
حمدة : اكيد بيوووون عمي عمير بيبهم وما اعرف اذا جاسم بيخاويهم والا لا ؟؟ ما قالت لي قالت انه ابوها بييي وياهم ....
سلامة : الله يحيهم لهم العين اوسع من المكان ....

من عقبها ميثا وسلامة ايروحن غرفة سلامة وايتمن يالسات ، سلامة كانت واقفة عند البلكون وتطالع برع ....


سلامة : تهقين ابويه عقب ما اخبره اني ما ابغي جسوم بيقنع امايه والا بتكون رده فعله نفس امايه ؟؟؟
ميثا : خالي ابراهيم متفهم ولا بيجبرج على شي ما تبينه وبالاخص هذا زواج وهو هب مستعد ايزوجج بالغصب ومن عقبها تردين بيته مطلقة ....
سلامة : آآآآآآآآآآآآآآآآآآآآآآآآآآآه اتمنى .......
ميثا : سلاااااااااااامي انا قررت اكتب لميووود رسالة واحطها له في غرفته , بين اوراقه ... شو رايج ؟؟
سلامة : وشو بتكتبين له ...فيها ؟؟؟
ميثا : عقب ملجة حمدة وشاهين بكتب له رسالة عتاب وبحطها له بين اوراقه في الغرفة بدون ما يدري علشان لا شاف الرسالة يعرف انه متغير عليه وانه قاسي عليه هالفترة اللي طافت ابغي احسسه بالذنب ... شويه ....
سلامة : زين ما تسوين يا ميثا ميوود صدق وايد متغير ولا ندري شو فيه حتى اليلسة ويانا نفس قبل ما ييلسها ....
ميثا : آآآآآآآآآآآآآآآآآآه يا سلامة كنت اقرب الناس لميوووووود كنت حتى اقرب له من حبل الوريد والحين صرت بعيدة عنه وهو اللي ابعدني عنه لكن والله وربيه شاهد عليه انه رغم قسوته عليه احبه للحين واتمناه ....
سلامة وهي تتقرب من ميثا وتيود ايدها : فديتج ميثااااااااااااااااني والله انج اصييييييييلة يا بنت خلفان ....

في هاللحظة مايد وعبيد ونادين وطيف كانوا يالسين في شقة نادين في دبي : ......
عبيد : مبروك يا مايد مبروك يا طيف على الزواج ....
طيف : الله يبارك فيك عقبالك ..؟؟؟
مايد : يله شد حيلك انته بعد ؟؟؟
عبيد : لا لا استريح انا بعدني ما بتزوج الحين انا بعدني ابغي اتهنى بحياتي .....
نادين : يا دلي عليك يا عبيد شو يعني ما بدك تتزوج ؟؟
عبيد : امبلا بس هب الحين بعديييييين .........
طيف : احنا سبقناك انا ومايد ولو انه زواج هب لهذاك المستوى لكن احنا لازم نحتفل بهالمناسبة ....
مايد : اكيييييييييد .........
نادين : يله الحين بيوصل العشا ومن بعدها بنعمل بارتي ... صغير ....
طيف : اكييييييييييد ....
مايد وهو يمسك بإيد طيف : فديتج والله .....


طبعا مايد اتزوج طيف هذي وهذا الزواج مثل ما هي اطلبت كان زواج عرفي من عقبها يحطون العشا ويتعشون ويحتفلون بهالمناسبة نادين كانت متكفلة بكل شي ... آآآآآآآخ يا مايد خلاص طيف نستك ميثا مسكينة ميثا والله انها ما تدري انك تسوي كل هذا من وراها ....

اليوم الخميس ......

من الصبح وبيت بوكايد مرتبشين مايد وصل بالليل على الساعة 3 ونص ون حدر الغرفة ما طلع منها غير الساعة 11 ونص الصبح ... طبعا مايد اجر شقة في بوظبي وحط فيها طيف ... لانها خلاص اتزوجت مايد ويت تعيش في بوظبي وشغلها اطلعت منه خلاص ....

بوكايد : عووووشه ... عووووشه؟؟؟
ام كايد : لبيه ....؟؟؟
بوكايد : لبيتي حايه يا ام كايد ... الا اعيالج وينهم لا يكونون راقدين ما لهم شوووووف ؟؟؟
ام كايد : لا لا شو راقدين ... محمد وسيف ظاهرين ويا شاهين .. خطف عليهم هو وبطي عمه رايحين يتشرون ذباح ومن عقبها بيودونه المطبخ حق العشا ....
بوكايد : عيل كايد مايد وينهم ؟؟
ام كايد : كايد راح اييب عمه شامس من ليوا ؟؟
بوكايد : واشله اعياله ما ايبونه ؟؟
ام كايد: سرور ولد اخوك في كسوفو مودينه دورة وخلفان مسافر العمرة ويا حرمته وراشد بعده اصغير ما بيقبضونه موتر .... وهو ما عنده ليسن ....
بوكايد : حليله اخويه شامس الله يكون في عونه ... عيل مايد وينه ؟؟؟
ام كايد : توه كان اهن راح يسبح لانه بيظهر ايييب الخضرة ويا الدريول من السوق ....
بوكايد : ايوا خير انشالله عيل عروستنا وينها ؟؟؟
ام كايد : في غرفتها بعد شوي بتي راعية الصالون علشان تعدلها للحفلة خلاف ....
بوكايد : الله يسعد حمدة وشاهين يا رب ويخليني لين ما اشوف اعيالي كلهم معاريس ... الله يرحمج يا اختي يا فاطمة كان خاطرها تشوف شاهين ولدها معرس الله ما خلاها لهاليوم ...؟؟؟
ام كايد : الله يرحمها يارب ....
بوكايد : إلا قوم ختج راية ما بيون ؟؟؟
ام كايد : اكيد بيون راية من الصبح متصلة تقولي انها هي واعياله بيون عقب ما يتغدون بيظهرون من بدع زايد ... عمير بيبهم ....
بوكايد : الله يوصلهم بالسلامة إلا يا عوشه سلامة ما ردت خبر اذا كانت تبا جاسم والا .. البارحة اتصل بي عمير واتخبرني وانا قلت له عقب ملجة شاهين بنرد عليه خبر بعدها البنت تتشاور ...؟؟؟
ام كايد : والله ما اعرف يا ابراهيم شقولك .. سلامة مسودة الويه ما تبا الولد ؟؟؟
بوكايد : شوووووووووه ليش ما تباه جاسم ماشالله عليه ما فيه منقود ؟؟؟
ام كايد : شو عرفني عن منكر البنات اونها هب مرتاحة له تقول انها استخارت وخلاف ما ارتاحت له ....
بوكايد : لا اله الا الله عيل بشووووووه بنرد على عمير الحين شو اقوله ؟؟؟
ام كايد : بوكايد عقل بنتك ولا تخليها تفضحنا عند راية ختيه وريلها ...
بوكايد : خلاص عقب الملجة برمسها ...وانشالله تغير نظرتها ورايها من صوب جاسم ...
ام كايد : انشالله ...

ميثا وسلامة كانن يالست في غرفة سلامة ويسولفن ... ومن عقبها يروحن عند حمدة واايتمن يالسات يرتبن ويا حمدة اغراضها حمدة كانت وايد فرحانة لاانها بتملج .. شوي وتحدر لهم مريم حرمة كايد ...
مريم : حمدة الغالية عمي ابراهيم يقولج البسي عباتج المليج وصل وشاهين وعمي خلفان في الميلس يوو علشان يملجون ...
حمدة : انشالله ...


هم بيملجون الحين الظهر وبالليل بيسون الحفلة .... من عقبها تروح من عقب ما لبست عباتها راحت غرفة الضيوف ويلست هي ومريم وامها وسلامة وميثا يتريون بوكايد ايي وهو يايب الكتاب علشان توقع عليه حمدة شوي وايي يو كايد والمطوع اللي بيملج ويوقف يظهرن البنات ويروحن الصالة الثانية وحمدة وابوها وامها ايتمون واقفين عند حمدة وكانت حمدة متغشية يوم كان المليج يسألها وهي تجاوب على كل شروط الملجة ومن عقبها قدم لها الكتاب اللي فيه العقد ووقعت على العقد من ظهر الموع وابوكايد من الغرفة ام كايد احضنت حمدة وتمت تصيح ومةعقبها احدرن سلامة وميثا ومريم وباركن لها وخلاف ميثا اظهرت لشاهين اخوها وباركت له ولابوها وعمومتها اللي كانوا حاضرين عمها سيف وعمها علي وعمها سلطان وعمها بطي ...

من عقبها حطوا الغدى للريايل في الميلس ويلسوا يتغدون ...

مريم : حمدة يله راعية الصالون اوصلت قومي روحي غرفتي رتبت لج كل شي اهناك ...
حمدة : انشالله ...
يروحن البنات غرفة مريم لانها اوسع علشان حمدة تتعدل اهناك
مريم : يله زهبت لكن الغرفة واخذن راحتكن ...
حمدة : عيل كايد يوم بيي وين بيروح يبا يرتاح ....
مريم : ما عليج كايد بيروح غرفة محمد وإلا مايد اهناك بيغير اثيابه ...
ميثا : فديت خالي شامس توني اسلم عليه ما عرفني ومن عقبها خالي ابراهيم خبره اني ميثا تم يصيح يوم ذكر امايه الله يرحمها ...
مريم : فديت ابويه والله اكيد ما بيعرفج من زمان ما شافج ما تروحين له ولا جنه خالج ؟؟
ميثا : والله لو كان بيدي جان كل يوم رحت له بس ليوا بعيد .؟؟؟

ترى شامس ابو مريم يستوي خال ميثا بعد لانه شامس اخو ابراهيم بوكايد وميثا عندها بس خوال اثنين ابراهيم وشامس اللي ساكن في ليوا وما عندها خالات ....
تمن البنات يالسات عند حمدة وراعية الصالون أول شي بدت بسلامة تعدلها .. عقب صلاة العصر كانوا اهل بدع زايد واصلين ومن اوصلن مريم خذت لطيفة ورقية وودتهن عند البنات غرفتها سلمن عليهن ومن عقبها يلسن يسولفن ...
لطيفة : والله اني ولهت عليكن ....؟؟؟
ميثا : توله عليج العافية لطااااااااافي .....
لطيفة وهي يالسه عدال ميثا ...
لطيفة : ميثااااااااااااني عمج بطي اهنه والا في العين ؟؟؟
ميثا : عيني على الحب ؟؟؟
لطيفة : عنالاااااااااتج قولي ما شفت موتره برع .؟؟
ميثا : اهنه في بوظبي اكيد ظاهر ويا شاهين ما اعرف وين راحو ... يمكن راحو الحلاق ....
لطيفة : آآآآآآآآآآآآآآآه يا الميث والله عمج معذبني بحبه ....؟؟؟
ميثا : فديتج لطاااافي انشالله ربي يسعدج ويا عمي ويكون من نصيبج ...
ومن قالت ميثا هالرمسة لطيفة جنه حد صاب عليها ماي بارد وتمت اعيونها تدمع وميثا حست انه لطيفة فيها شي هب طبيعي .,,,
ميثا : شو فيج لطافي رب ما شر ؟؟
لطيفة : هاااااااا ..... لا الغالية ما فيني شي .....
ميثا : متأكدة لطااافي انه ما فيج شي ...؟؟؟

لطيفة : هيه متأكدة .....

تنش لطيفة عن ميثا وتروح تشرب ماي وميثا تمت تطالعها وهي مستغربة " يا ربي شو فيها جنه حد صفعها " هذا ما كانت تفكر فيه ميثا وهي تطالع لطيفة .........
عقب العصر البنات تمن يالسات في الغرفة وراعية الصالون تعدلهن وكانن مستانسات من الخاطر وميثا من زود فرحتها بملجة اخوها حطت لهن شريط وتمن يرقصن في الغرفة وراعية الصالون مستانسة عليهن ... الحريم كانوا مرتبشات في المطبخ ويا البشاكير والريايل مرتبشين برع عند الخيمة .... اللي مسوينها قدام البيت حق الملجة ...
مايد كان يصور كل شي وشاهين وبطي كانوا يباشرون الطبابيخ ومحمد وسيف كانوا ويا اصحاب الخيمة يعابلون يواهم الطاولات ويشرفون على كل شي وجاسم وكايد كانوا يشلون الخضرة ويحطونها في المطبخ علشان الحريم والبشاكير يغسلونها ...
الجو كان وايد رهيب في البيت ....
ام كايد : ختيه ام سرور عطيني دلة القهوة علشان اصب القهوة فيها ...
ام سرور هذي ام مريم حرمة كايد ...
ام سرور : انشالله ختيه .......
ام جاسم : إلا المصرية حرمة خلفان بعدها ما يت من مصر ؟؟؟
ام كايد : هيه بعدها ...
ام جاسم : والقوم من مت مسافرة من عقب امتحانات اليهال بشهر ستة للحين ما رجعت كم من الشهر اليوم ....؟؟؟
ام سرور : احنا اليوم 27 من شهر 8 ... ليش متى بترد من مصر اسميها خذتها سحبيه ....
ام جاسم : هذي سواياهن المصريات ما يسدهن شهر يوم يسافرن ....
ام كايد : عاد كله ولا هدوووه حرمة خلفان ,... ما ترج الا على فتح المدارس ...
ام سرور : خلكن من هالسوالف الحين وخلونا انخلص القهوة والشاي ...
ام جاسم : هيه والله عن الهذربة الزايدة .....

عقب ما خلصن الحريم القهوة والشاي وسون القيمات ورتبن الخضرة راحن وتسبحن وغيرن اثيابهن علشان الحفلة وعقب صلاة العشا الخيمة انترست .. الحريم من كل مكان اهلهم وجيرانهم من كل صوب الجو كان وايد رهيب البنات عقب ما لبسن فساتينهم احدرن الخيمة .. ميثا كانت لابسة فستان ذهبي وايد حلو عليها وكانت محطيه ميك اب ذهبي بعد وايد حلو وشعرها رافتنه فوق مسويه تسريح وسلامة لابسه فستان بنفسجي وايد رهيب وبعد الميك اب من نفس اللون وكانت فانحه شعرها ولطيفة لابسه فستان احمر وكانت رافعة شعرها فوق وايد حلوة مستويه بالفستان الاحمر ، ورقية لابسة فستان برتقالي وايد حلو طالع عليها ماشالله عليهن البنات كانن رهيبات من الخاطر ....
سلامة : ميثووووه يله لطااااافي والرقي سبقونا راحن الخيمة ...
ميثا : انزين سلاااامي ترى انا كتبت الرساله حق ميوود وخلاف عقب الحفلة بحطها له في غرفته ...
سلامة : انزين بس يله إلبسي شيلتج خلينا نروح ....
ميثا : يله ...

تلبس ميثا شيلتها ويظهرن من الحجرة ينزلن تحت وإلا مايد في ويهن كان شكله وايد متبهدل بعده ما سبح ولا غير اثيابه ...
سلامة : ميوووووود شو فيك جذه امبهدل ؟؟
مايد : عنالااااااااااااتج توني ياي من عند القدور انا وجسوووووم كنا نباشر الطبابيخ ....

سلامة : زين روح اتسبح وغير اثيابك .,...
مايد : انشالله ...
يلتفت صوب ميثا وكانت ميثا منزلة راسها ويرمسها : ميثااااااااااني حبيبي اشحالج ؟؟؟
ايتم قلب ميثا يدق بقو : بخير طاب حالك ....
مايد وهو يتقرب منها : ماشالله عليج اليوم وايد رهيبة طالعة ...
ميثا وهي مستحية : شكرا ..
مايد وهو يهمس بإذنها : احبج ....
سلامة : احم احم انا اهه تراني ....
ميثا من سمعت كلمة مايد تم قلبها يدق بقو ونزلت راسها وهي مستحية
مايد : يله عيل انا بروح اسبح وخلاف بشوفكن ....
يروح مايد عنهن وميثا استانست من كلمة مايد وتمت تمشي عدال سلامة وهي فرحانة ...
ميثا : سلوووووووووووووم قالي احبج .....
سلامة : كم مرة قلت لج انه ميود يحبج بس هو يتغلى علييييييييج ..
ميثا : سلااااااااامي تعرفين اني حساسة وما احب ميود يوم يسوي جذه فيني ....
سلامة : والحين بتحطين له الرسالة والا لا ؟؟؟
ميثا : هيه بحطها هب كلمة تخليني انسى قسوته لي ....
سلامة : زين خطفي قدامي يتريونا في الخيمة ....
ميثا : هههههههه يله .....
يحدرن الخيمة ومن راحن افصخن عبيهن وشيلهن وتمن يتمشن في الخيمة ويسلمن على الحريم سلامة راحت عند اهل فيصل وتمت تسلم عليهم على خوات وام فيصل ومن عقبها راحت عند ميثا اللي كانت تسولف ويا اربيعتها موزة ...
سلامة : مويز انتي اهنه اشحالج ؟؟؟
موزة : طاب حالج الغالية مبرووووك عليكن ملجة حمدة ....
سلامة : الله يبارك فيج
موزة : ما قلتن لي مبرووووووك ......
ميثا : على شووووه عرستي ....؟؟؟
موزة : لا للحين ما خبرتكن ملجت الاسبوع اللي طااااف ...
سلامة : يعلها بذمتج مبروك منوه خذتي ؟؟ امممممممم اكيد عوض ولد عمج شوقج صح .....؟؟؟
موزة : هيه عوض ولد عمي ناصر ....
ميثا وهي تحب موزة على خدها : مبرووووك الغالية عيل ما عزمتينا على ملجتج ..؟؟
موزة : ما سوينا حفلة بس كانت ملجة ريايل والعرس عقب رمضان انشالله ...
ميثا : انشالله الله يسعدج يا رب ...
موزة : وانتي الميث متى ملجتج انتي ومايد ؟؟؟
ميثا : هاااااااا .... انا ومايد بعدنا تعرفين انتي مايد توه مشتغل ليم ما يكون عمره وعقب يمكن على السنة اليايه نعرس ....
موزة : يله انشالله الله يسعدكم يا رب وانتي سلااااااااااااااامي محد خطبج ...
سلامة : لا لا للحين محد ........ منوه من بنات صفنا انخطبت غيرج ..؟؟
موزة : عويش خطبها واحد من العين يوم الخميس اللي طاف ومريوم املجت على ولد خالها ووووو ليلوووه العيمية خطبها ولد عمها من دلما .....
سلامة : حليلهن البنات اكبرن بتكملين دراستج والا عقب العرس ؟؟؟
موزة : هيه تراني سجلت بجامعة الامارات .. زين بعد عقب العرس بسكن في العين في بيت عمي ... وبروح وبرد الكلية ....
ميثا : يله الله يوفقج يا رب
موزة : الله يوفق الجميع يا رب ....
من عقبها يروحن سلامة وميثا عنها وييلسن عند لطيفة ورقية على الطاولة ويتمن يسولفن وياهن ....
لطيفة : انا بروح عند حمدة توها متصلة فيه تباني ما اعرف شو فيها حد بيي ويايه ؟؟
ميثا : لا رووووووحي روحج ....
لطيفة وهي تنش من مكانها : عنالااااااااااتج يا السبالة برايكن .....
تروح لطيفة داخل الفلة من عقب ما البست عباتها وشيلتها كان الحوش فاضي ما فيه حد .. تمشي في الحوش وهي تمشي تسمع صوت صوب المطبخ " منوه يقرقع في المطبخ بروح اشوف ؟؟" تروح لطيفة صوب المطبخ ,,, ادش ...
لطيفة : منووووووووه اهنه ؟؟؟
وقبل لا تكمل كلامها تسكت وهي مصدوومة كان بطي هو اللي في المطبخ كان ياي يشرب ماي ومن شافها نزل كوب الماي وتم يطالعها ....
لطيفة : انا اسفة ..... عن إذنك ...
وقبل لا تظهر يركض بطي صوب الباب ويسكره ويوقف عن الباب ...
بطي : اصبري وين رايحه ما صدقت اشووووووفج ؟؟؟
لطيفة : خلني اروح عن يشوفنا حد ؟؟؟
بطي : لطيفة انتي زعلااااااااااااااااانة مني ؟؟؟
لطيفة وهي تنزل راسها : وليش ازعل منك ؟؟
بطي : وليش ما تردين على مسجااااااااااتي ...؟؟؟
لطيفة : بطي خلني اروووح ....
تمشي لطيفة صوب الباب وما عرف بطي شو يسوي وبدون سابق انذار يمسكها من ايدها : يعني زعلااااااااااااانة صح .....
لطيفة : دخيلك هدني ايدك تعور .....
بطي : ما بهدج لين ما تقولين لي شو صاير ما احيدني زعلتج بشي .....
لطيفة وعيونها تدمع : بطي دخيلك خلني اروووح ما ابغي اتم واقفة اكثر عن جذه ؟؟؟
بطي : ليش اعيونج تدمع حد مزعلنج انا قايل لج شي فهميني دخيلج ريحيني يا لطيفة ؟؟؟
لطيفة : بطي اذا انته تعزني وتحبني صدق ابتعد عني وانساني دخييييييلك خلني اروح الحين وارجوك لا تحاول اطرش لي مسجااااااات لاني ما برد عليك ......
ايتم بطي يطالعها وهو منصدم ويهد ايدها : شووووووووووووه لطاااااااااااافي حبيبي شو صاير اتكلمي فهميني انتي تحبيني وانا احبج مستحيل انسااااااااااااج بهالسهولة .......... خبريني شو سويت لج انا ........
لطيفة وهي تمشي عنه : بطي دخيلك خلني اروووووح
بطي : شو اللي غيرج عليه ابغي اعررررف انا شو سويت ؟؟؟
لطيفة : شو تباني اسوي شو تباني اقولك انه مسلم ولد عمي محمد خطبني الاسبوع اللي طاف وانه اهلي موافقين عليه ...... شو تباني اقوووووول شوووووووه
بطي : شووووووووه وليش ما قلتي لي ... حرام عليج يا لطيفة انتي تبينه من وين ظهر لي هذا مسلم بعد ؟؟؟

لطيفة وهي تصيح : بطي شو تباني اسووووووي انا ابغيك انته ولا ابغي ولد عميه بس ما اقدر اسوووووي شي .....؟؟؟؟
تركض عنه وتروح داخل الفة وهي تصيح وبطي تم واقف وه مصدوم ما عرف شو يسوي ........

الجـــــزء العاااااااااااااااشـــــــر
من عقب ما روحت لطيفة عن بطي وراحت لحمدة فوق بطي ما عرف شو يسوي ظهر من الفلة وراح صوب الشباب وهو مضايق لطيفة من اوصلت عند حمدة تمت تصيح وخبرت حمدة عن كل اللي صار بينها وبين بطي ....
حمدة : لطوووووووووووف لا تصيحين وانشالله بيصير خير ؟؟
لطيفة : حمدوه انا انصدمت يوم خطبني مسلم ولد عمي وانا يوم وقفت قدامهم وقلت ما اباه جاسم قام يهازب وابويه قالي ان ما خذتي مسلم لا انا ابوج ولا اعرفج حمدوووووه شو اسوي الحين ....
حمدة وهي تهدي لطيفة : لا تزعلين ولا تكدرين خاطرج يا الغالية انشالله بنحصل حل للمشكلة ....
وتحضن لطيفة واتم لطيفة تصيح وحمدة تهديها ...
من عقبها إتي مريم حرمة كايد علشان اتظهر حمدة للخيمة ومن احدرت حمدة الخيمة الكل افرحوا واستانسوا حمدة ماشالله عليها كانت وايد حلووووة اليوم كانت لابسه فستان عنابي وايد رهيب عليها الحريم من احدرت حمدة تمن يكبرن ويذكرن الله عليها ميثا ورقية وسلامة راحن عند حمدة وتمن يتصورن وياها ولطيفة من كثر ما كانت مضايقة إلا من شافت فرحة حمدة والبنات نست همها وتمت تتصور وياهن عند الريايل شاهين كان ضاربنه احفوز يبغي يدخل يشوف حمدة وجاسم ومايد ومحمد وسيف كانوا فرحانين وايولون حق شاهين كايد كان ماسك الكاميرا ويصور ... إلا بطي كان واقف ولا بطل حلجة بكلمة كان باله عند لطيفة هب عارف شو يسوي ...
يتقرب كايد من بطي وكان بطي واقف ومستهم ...
كايد : رب ماشر بوحامد شو فيك اشوفك مستهم ؟؟؟
بطي : لا يا بو بدر ما فيني الا الخير ....
كايد : يله خلنا نروح توه ميثا متصلة حق شاهين تقوله بيحدرونه الخيمة ...
بطي : يله خلنا نروح ...
من عقبها يحدر شاهين الخيمة ويدخل وياه كايد ومايد ومحمد وسيف اخوان حمدة من يوصل على الكوشة يحب حمدة على راسها وعقبها يسلمون عليها اخوانها ويوقفون يتصورون وياهم ميثا من شافت اخوها عدال حرمته على الكوشة اتذكرت امها وتمت تصيح ...
سلامة : فديتج ميثوووه شو فيج ...؟؟؟
ميثا : اتذكرت امايه الله يرحمها ....
سلامة : الله يرحمها ....
من عقبها يظهرون اخوان حمدة ويروحون ميثا وسلامة على الكوشة وتسلم ميثا على شاهين اخوها وتبارك له من عقبها ايبون طقم الملجة وشاهين ايلبس حمدة الطقم وتساعده ميثا اخته الجو كان وايد حلو وحمدة وشاهين ماشالله عليهم كانوا غير فرحانين واخيرا حمدة غدت حرمة شاهين تمر اللحظات حلوة ومن عقب الملجة الحريم روحن والكل راحوا داخل الفلة علشان يغيرون اثيابهم ويسبحون ....
ميثا كانت واقفة ويا بطي عمها ...
ميثا : عمي شو فيك اشوفك مستهم ؟؟؟
بطي : لا ما فيني شي بس انا لازم ارد العين الحين ...
ميثا : شوووووه الحين قدها الساعه وحدة بالليل وش عندك في العين ؟؟؟
بطي : عندي شغل من الصبح لازم اخلصه سلمي على ابوج وباركي لشاهين ...
ميثا وهي حاسة انه عمها فيه شي : عمي شو فيك ؟؟
بطي وهو يتنهد : آآآآآآآآآآه ما فيني شي بس اباج توصلين شي حق لطيفة ...
ميثا : شو هو ؟؟؟
يناولها ورقة ويعطيها اياها : سلمي عليها وقوليلها هذي من عمي وهي بتعرف شو فيها اما الحين انا اترخص بخطف على اميه وابويه قبل لا اروح .....


ميثا : خلاص ربي يحفظك اول ما توصل اتصل بي على رقم حمدة ....
بطي : يصير خير ...

يظهر بطي من بيت بوكايد ويروح بيت اخوه خلفان ويسلم على امه وابوه ويروح يبغي العين بطي كان وايد مضايق من كلام لطيفة ... ميثا من عقب ما روح عمها راحت ادور على لطيفة بس ما حصلتها لانه لطيفة كانت تسبح اظهرت ميثا كانت تبا تروح تغير فستانها وهي تمشي بين الغرف اتذكرت مايد راحت صوب غرفته ودقت الباب بس محد فتح لها لانه مايد من عقب الحفلة راح شقته عند طيف تفتح ميثا الباب بس ما قدرت ادش لانه الباب كان مقفول " غريبة هب من عوايده يقفل الباب ؟؟" تروح ميثا صوب غرفة سلامة وادش ، سلامة كانت واقفة عند البلكونة وتطالع برع من دشت ميثا التفتت سلامة صوبها
سلامة : من وين يايه ؟؟
ميثا : كنت واقفة ويا عمي بطي .. تخيلي سلووووم عمي روح العين توه !!
سلامة : شووه ليش شو عنده في العين ؟؟
ميثا : يقول عنده شغل في العين ولازم يخلص من الصبح باجر ؟؟
سلامة : غريبة يعني باجر الجمعة اعتقد ما فيه اشغال يوم اليمعه ....؟؟؟
ميثا : ما اعرف
سلامة : غريبة وشو هذا اللي في ايدج لا يكون الرسالة اللي كاتبتنها لميوووود ؟؟؟
ميثا : لا هذي الورقة عطاني اياها عمي بطي وقالي اعطيها لــ لطيفة !! اللي مستعيبة منه يا سلامة انه عمي كان مستهم .. يوم عطاني الورقة ؟؟
سلامة : ما حاولتي تسألين شو فيه ؟؟
ميثا : سألته وقالي بعدين بتعرفين رحت دورت لطاااافي ما حصلتها كانت تسبح بروح اغير اثيابي وعقب بروح لها ...
تروح ميثا تسبح وسلامة ترد توقف عند البلكونة وتفكر بفيصل وبجاسم ولد خالتها " آآآآآآآآآآآآآآه يا فيصل ليتك تعرف اني احبك واموت عليك ... يا ربي ليش انا يعني شو ذنبي اتزوج جاسم وهو شو ذنبه يآخذ وحدة ما تباه ؟؟؟"
تظهر ميثا من الحمام ومن عقب ما تحط الكريم على جسمها تلبس شيلتها وتظهر هي وسلامة رايحات صوب غرفة حمدة وقبل لا يدشن يسمعن حمدة وهي ترمس لطيفة ...
لطيفة : حمدووووووه قولي لي شو اسوي الحين اتصلت به ما يرد عليه ؟؟
حمدة : ردي اتصلي مرة ثانية ... وثالثة ...
لطيفة وهي تتصل : حمدوووووه تلفونه مغلق .....
ادش ميثا وسلامة من وراها ....
ميثا : لطوووووووووووف عمي بطي شو فيه ؟؟؟
حمدة : ميثااااااااااني شو فيج عمج ما فيه شي ....!!!
ميثا وهي تطالع لطيفة : شو اللي بينج وبين عمي ممكن تقولين ؟؟
لطيفة وهي ترمس ميثا : ليش عمج شو قالج ؟؟
ميثا : عمي ما قالي شي بس انا ابغي اعرف شو اللي صاير ...؟؟؟
حمدة : ميثوووووووووه اذكري الله ما فيه شي ايلسي خل نتفاهم ...
ميثا وهي تيلس : لا إله إلا الله محمد رسول الله ... يله قولي شو صاير ....؟؟؟
لطيفة وهي تنزل راسها : ميثوووووه .. مسلم ولد عمي محمد خطبني الاسبوع اللي طاف بس للحين ما رديت عليهم وخبرت عمج وهو زعل مني .....
ميثا : علشاااااان جذه عمي كان مستهم وروح العين زعلان ....

لطيفة : شوووووووووه روح العين ... متى ... ميثووووه ليش خليتيه يروووح حرام عليج ...
ميثا : انا شو عرفني هو قالي انه عنده شغل في العين وعلى فكرة عطاني هذي الورقة علشان اعطيج إياها ....
تآخذ لطيفة الورقة من ميثا وتفتحها ...
كان كاتب فيها : " باعني وما اقوى على الصد ........ وثارت الاشواق فيه
بيني وبينه باني ســــــــــــــد .......... وهذي هي اكبر قضية
درب الشقا قدامي امتـــــــد ........... وصرت انا فيه الضحية
وا عوق قلبي بصدري اشتـد .......... قلب مطعون وحاله رديه "

تقرى لطيفة الورقة وتدمع اعيونها : والحين شو اسووووووي شو الحل يا ميثا والله اني احب بطي وانا ما ابغي مسلم ولد عمي شو اسوووووووي ...........
وتخر لطيفة على الارض وهي تصيح تتقرب ميثا منها وتيلس عدالها على الارض وتحاول ترفع راس لطيفة عن الارض : لطااااااااافي قومي انشالله ما بيصير إلا كل الخير ....
لطيفة وهي ترفع راسها ودموعها على خدها : وين هالخير يا ميثااااا وابويه واميه موافقين على مسلم وشكلهم بيغصبوني عليه ......
حمدة : اذكري الله يا لطووووووووف انشالله ما بتاخذين مسلم ...
تنش ميثا وتآخذ تلفون حمدة وتتصل بعمها بس تلفون عمها كان مغلق ولا فتح تمت ميثا ولطيفة وحمدة ورقية وسلامة خايفات على بطي تم تلفونه مغلق لين الساعة 3 وهن يتصلن وكله مغلق خلاف على الساعه 3 وربع رن التلفون ويشله ...
بطي : الوووووو
ميثا : عمي انته وين ليش تلفونك مغلق ؟؟؟
بطي وهو يتنهد : انا في العين يالس افتر في الشوارع ليش ؟؟
ميثا : عمي ليش ما خبرتني عن السالفة ليش ما قلت لي كنت يمكن اقدر احل الموضوع ؟؟؟
بطي : ميثوووه شو تبيني اقولج شووووه ... لطوووووف باعتني علشان ولد عمها وهي ما تقدر توقف في ويه اهلها وتقولهم انها ما تباه الظاهر انه مكتوب لي الشقا كل ما حبيت وحدة الحب ما يكتمل .. ميثووووووه لو كانت لطوووووف تحبني جان وقفت بوي اهلها وقالت ما ابغي مسلم ....
تآخذ لطيفة التلفون عن ميثا وترمس بطي وهي تصيح ...
لطيفة : والله يا بطي اني احبك ولا اتمنى غيرك يكون لي .. وان كان على مسلم ولد عمي انا بحاول اقنعه ولو كلفني هالشي حياتي ...
بطي : يعل روحي تفدى روحج يا لطيفة ويشهد رب العالمين اني ما اتمنى حرمة ثانية غيرج في هالدنيا ....
لطيفة : ورفقة بوخليفة يا انه ما يلمسني ريال غيرك يا بطي ...
يستانس بطي وهو يسمع كلام لطيفة ومن عقبها ييلس يرمسها من عقب ما تصافت القلوب ويوعدها انه يروح لاهلها ويخطبها من عقب ما ترد ولد عمها محمد ... وتهدى السالفة ....
مايد هذيج الليلة من عقب ما ظهر من البيت راح شقته عند طيف ومن عقب ما يلس وياها وسولفوا ؤقد اهناك في شقته وما رجع البيت ....
في اليوم الثاني ...
من نشوا الصبح عقب الريوق ام جاسم واعيالها روحوا بدع زايد وميثا من نشت الصبح راحت ويا سلامة بيت ابوها عند يدها ويدتها لانهم اليوم بيردون العين بيوديهم خلفان وشاهين .. تمر الايام حلوة بين حمدة وشاهين ويقرب موعد سفر شاهين بريطانيا خلاص اجازته خلصت وحمدة اضايجت وايد لانه شاهين بيسافر وسلامة من عقب ملجة اختها اقنعت ابوها برفضها لجاسم ولد خالتها وابوها اقتنع من عقب ما خبرته سلامة بكل شي وفي يوم اتصل بعمير بن حمد ابو جايم وخبره وهو مستحي منه انه سلامة هب من نصيب جاسم ولده وهذا نصيب في البداية عمير اتضايق وايد الا خلاف احترم راي البنت وجاسم بعد من عقب ما خبروه انه سلامة ارفضتته اتضايق في البداية لكن مع الوقت نسى كل شي ، لكن لطيفة حليلها حاول تقنع ابوها وعمومتها بانها ما تبغي مسلم لكن ابوها جبرها على الزواج من مسلم ومن ضيجتها ما عرفت شو تسوي غير انها اتصلت ببطي وخبرته علشان ايي يرمس مسلم ولد عمها وبطي وعدها ايي يرمس مسلم ...

مايد : طيف وينج ؟؟
طيف : شنو انا اهنه شنو تريد ؟؟
مايد : شو فيج ترمسين جذه بنفس خايسه ؟؟
طيف : البيت خالي وابغي فلوس اشتري اغراض للبيت ؟؟
مايد : اول البارحة عاطنج الفين درهم وين وديتهم ...؟؟
طيف : لا والله ... والشراب اللي تشربه هذا من وين ايييب له بيزات اشتريت فيهم شرابك شو بعد ومن غير جذه اشتريت لي اثياب ....
مايد : اممممممممممم خلاص باجر بشتري لج خلاص فكيني من الحشرة ...
طيف : اوكي ....

في هاللحظة ميثا وسلامة كانن يجهزن للكلية خلاص باجر بيداومن في التقنية اول يوم لهن في الكلية ومانن مستانسات وايد .... حرمة ابوها ردت من مصر وانشغلت بعيالها تفصل لهم للمدرسة وتشتري لهم حاجات المدرسة باجر بعد اول يوم للعام الدراسي الكل كانوا مستانسين لانه الفصل الدراسي اليديد قرب خلاص ..............
في بدع زايد انت لطيفة يالسه في غرفتها وترتب اغراضها لانها بتطلع بعد شوي العين ويا جاسم اخوها بتروح الجامعة ....
رقية : لطوووووف تعالي ابويه يباج ؟؟؟
لطيفة : شو فيه ؟؟
رقية : ما اعرف ؟؟
تروح لطيفة عند ابوها اللي كان يالس في الصالة من دشت الصالة سلمت على ابوها وحبته على راسه ويلست عنده ......
بوجاسم : لطيفة طبعا انتي تعرفين انه مسلم خاطبنج واني رديت عليه وخبرناه انا موافقين والحين هو اتصل بي وقالي انه يبغي يملج ويعرس قبل رمشان ...
تنصدم لطيفة من رمسة ابوها : ابويه بس انا ما ابغي اعرس الحين ؟؟
بوجاسم : هب على كيفج انا ما عندي بنات يتشرطن والجامعة خلاص مالج روحه وبتوقفين ....
تنش لطيفة وتروح غرفتها وهي تصيح ادش الغرفة وتتصل ببطي وتخبره عن كل شي ...
بطي : احلفي انه ابوج قال لنه مسلم متصل به ؟؟
لطيفة : والله .. بطي كيف تقول لي انك رمست مسلم وقالك انه بيتصرف انا خبرتك انه اعيال عمي مقلع وما بيسمع رمستك ...
بطي : لا مستحيل تكونين لواحد شرات مسلم .. انا الحين بظهر من العين وبييكم بدع زايد وبرمس ابوج وجاسم وولد عمج ظهر هب ريال ...
لطيفة : اخاف عليك يا بطي اخاف انه هذا كمين مسونه لك مسلم علشان اتي اهنه ...
بطي : يا لطيفة هب بطي بن حامد اللي يتهرب من الريايل وانا ما غلطت يوم حبيتج ...
يسكر التلفون عن لطيفة ويروح عند اخوه سيف ويخبره عن كل شي ويهديه سيف ويقوله انه بيروح وياه باجر بدع زايد علشان يرمس بو جاسم لانه الحين الوقت متاخر كانت الساعة 8 عقب العشا هذيج الليلة بطي ما بات وضاربنه احفوز وهب عارف شو يسوي لطيفة من عقب ما ابوها خبرها عن قرار مسلم ما عرفت شو تسوي ومن ضيجتها اتصلت بمسلم ولد عمها ورمسته ...

مسلم : لطوووووووف انا ابغي اعرف شي واحد انتي ترمسين بطي ؟؟
لطيفة : لا ما ارمسه بس والله يا مسلم اني ما احبك وكيف تبغي تعيش ويا وحدة ما اطيج طاريك ....
مسلم : شووووووفي يا لطووووف انا قبل قلت انه بتزوج قبل رمضان لكن الحين لا .. الاسبوع الياي بملج عليج وبآخذج البيت بدون عرس سمعتي ومحد ايروم ايردني عن شي اسويه ...
لطيفة : هب على كيفك منوه بيخيلك تسوي جذه ؟؟

يسكر عنها التلفون وهو معصب يركب موتره ومن زود عصبيته يشل الفرد وياه ويظهر ويروح يبغي العين وهو في الدرب يتصل ببطي ويقول له انه يبا يشوفه ويتواعدون في الخزنة على طريج بوظبي العين ... بطي حس من كلام مسلم انه فيه شي يتصل بـ حسن اربيعه راعي الخزنة ويخبره يترياه عند شيشة البترول ... لطيفة اتصلت ببطي وخبرته انها اتصلت بمسلم وان هددها يملج عليها بالغصب الاسبوع الياي ... بطي يضايج وايد ويسكر عن لطيفة من عقب ما خبرها انه مسلم اتصل به وانه يسير صوبه واتواعدوا في الخزنة المهم بطي يظهر ويروح صوب الخزنة .. لطيفة ما عرفت شو تسوي غير انها راحت لجاسم اخوها بس ما شافته في غرفته واتذكرت انه جاسم بسويحان في الدوام وما عرفت لطيفة شو تسوي ... غير انها بين الفترة والثانية كانت تتصل ببيط تتطمن عليه وفجأة قام ما يرد عليها
بطي وصل الخزنة وتم واقف عند الشيشة ويا اربيعه حسن كانت الساعة تشير لـ 2 الصبح ومحد بين للحين ...
حسن : ما شفت حد يا للحين ؟؟؟
بطي : غريبة اتصل بي وقال لي اترياه عند الشيشة ...
شوي ويرن تلفون بطي والا مسلم متصل به ...
بطي : الو وين انت ؟؟
مسلم : انته اللي وين ؟؟
بطي : انا ارقبك عند الشيشة .....؟؟؟
مسلم : تعال لي عند الجسر قبل قصر الخزنة ....
بطي : تم الساع الحين ياي ....
يركب بطي موتره ويركب وياه حسن ويتحركون صوب الجسر ويوم وصلوا المكان عن السيارة يشوفون مسلم واقف عند موتره من برع ويدخن يتوقف بطي ويحدر من الموتر ويحدر وياه حسن .. اربيعه ...
بطي وهو يسلم على مسلم : السلام عليك ...
مسلم : وعليك السلام والرحمة ...
بطي : انته مسلم ..؟؟؟
مسلم : هيه نعم أي واحد فيكم بطي ؟؟؟
بطي : انا ..............
مسلم وهو يطالع بطي من فوق لتحت : ايواااااااا ........... اعتقد انه السالفة يا بطي بيني وبينك وتخصنا احنا الاثنين ماله داعي وجود الاغراب ....
حسن وهو يروح صوب الموتر ويمسك بطي من كتفه : بطي انا يالس بالموتر ارقبك ...
بطي : خلاص اوكي ...
يروح حسن الموتر ويسكر الباب عليه وايتم بطي يسولف ويا مسلم ... وحسن يراقبهم ...
مسلم : بطي ... يوم انك بغيت البنت ليش ما خطبتها ؟؟
بطي : انا كنت بيي اخطبها بس تفاجأت انك سبقتني ؟؟
مسلم : وولد العم أولى ببنت عمه من الغريب والا كلامي غلط يا ولد حامد ....
بطي : رمستك على العين والراس يا مسلم بس لطيفة ما تبغيك وانت وابوها غصبتوها والزواج يا مسلم هب بالغصب ....؟؟؟
مسلم : بس انا بنت عمي ابغيها وهي مالها كلمة من عقب رمستي ورمسة ابوها ....
بطي : مسلم اذكر الله ولا تخلي اعنادك يخسرك اشياء وايدة ....؟؟
مسلم : شو يعني بيخسرني ؟؟
بطي : مسلم البنت ما تباك ويشهد رب العالمين انه لطيفة بنية حشيم وعمرها ما رفعت سماعة التلفون علشان ترمسني الا يوم حست بالقطيعة وشافت انه الرمسة ما فادت لا ابوها ولا اخوها ولا حتى انته وخبرتني انها رافضة الزواج منك والله يا مسلم انه بنت عمك اشرف من أي بنت في هالبلاد واني ما اتمنى وحدة حرمة لي كثر ما اتمنى لطيفة ....
مسلم وهو يظهر الفرد من مخباة ويطحه في ويه بطي : اسمعني بنت عمي ما يخصك بها وانا بآخذها غصبا عن أي حد سمعتني .....
هاللحظة حسن شاف الموقف ونزل من الموتر بطي انصدم من ردة فعل مسلم
حسن : مسلم اذكر الله
مسلم وهو معصب : خلك بعيد انت ...
بطي وهو يرمس حسن : حسن خلك بعيد انا اعرف احل الموضوع
مسلم : شو قلت رمسني انا ؟؟
بطي : مسلم خلنا نتفاهم ونزل الفرد واتعوذ من ابليس الشيطان في الارض .؟.؟؟
مسلم : بطي والله ثم والله انه محد بياخذ لطووووووف غيري انا ولو السالفة اوصلت للدم ...
بطي وهو معصب : ورفقة بو خليفة يا انه محد يحدر على لطيفة معرس غيري انا وانا عند كلمتيه يا مسلم ...
مسلم وهو معصب وبعده محطي الفرد بويه بطي : هب على كيفك وصدقني بتشتهي حياتك قبل لا يحدرونك معرس على لطووووووووف والله الشاهد عليه انك ما بتاخذها دام انه راسي يشم الهواء ...
بطي : اذكر الله ولا تقول هالرمسة ...
مسلم وهو معصب : عنالاااااااااااتك يا الخاااااااااام ما بقى الا انت ترفق عليه امففففففففففففف ...
بطي وهو معصب بس يعطي اظهره لمسلم ويمشي صوب الموتر : راجع نفسك وروح بلادك قبل لا تفقد اعصابك ....
يركض مسلم ويوقف بويه بطي : منوه انته علشاااان تعطيني ظهرك ...؟؟؟
بطي وببرود تام : بطي بن حامد منوه بكون يعني ؟؟؟
مسلم وهو معصب من برود اعصاب بطي : والله على الحركة اللي سويتها ما اخلي راسك يشم الهواء عقب اليوم ....
بطي : شو بتسوي يعني روح بيتكم وانا ورايه شغل من الصبح ولازم اروح ارقد وبنتفاهم باجر يوم بيي انا وسيف اخويه بدع زايد
ويعطي مسلم اظهره وقده بيركب الموتر هو وحسن والا يسمع حسن طلق نار وما حس الا وطبي يصرخ ويطيح على الارض ويركض صوبه مسلم من شاف بطي طاح على الارض ركب موتره وروح .........

تم بطي يتويع وحسن ما عرف شو يسوي شله وحطه في الموتر وتحرك يبغي المستشفى تلفون بطي كان يرن وحسن هب عارف شو يسوي وبطي يصرخ من الالم واثيابه كلها دم وحسن اعصابه مشدودة وكان يسوق بسرعة علشان يوصل المستشفى بس العين بعيدة عن الخزنة ....
• شو بيصير لــ بطي ولطيفه يا ترى بتعرف بالسالفة والا لا ..؟؟؟ ومنوه اللي كان يتصل على تلفون بطي ؟؟؟
• ومسلم يا ترى وين بيروح من عقب ما ثور ببطي ؟؟
• وميثا شو بيصير لها .؟؟.؟؟ \
• شو بيصير لــ بطي ولطيفه يا ترى بتعرف بالسالفة والا لا ..؟؟؟ ومنوه اللي كان يتصل على تلفون بطي ؟؟؟
• ومسلم يا ترى وين بيروح من عقب ما ثور ببطي ؟؟
• وميثا شو بيصير لها .؟؟.؟؟ \

الجزء الحادي عشر
لطيفة في هاللحظة كانت تتصل على تلفون بطي لكن محد يرد عليها ومن زود خوفها اتصلت بمسلم ولد عمها بس تلفونه كان مغلق ما عرفت لطيفة شو تسوي غير انها تتصل بحمدة بنت خالتها ، في السيارة حسن كان يسوق بسرعة فايقة وبطي يصارخ من الالم وحسن يهديه وحسن يسمع التلفون بس هب قادر يرد لانه يحتاي اربيعه وايد ....
لطيفة في هاللحظة اتصلت بحمدة على الساعة 3 بالليل وحمدة كانت راقدة وما سمعت التلفون تمت تتصل لين ما وصل اتصالها الــ 11 وعقبها انتبهت حمدة وردت على لطيفة وهي دهمانة ....

حمدة : آلوووووو ....
لطيفة : حمدووووووووووووه انتي راقدة ؟؟؟
حمدة وهي تطالع ساعتها : عنالااااااااااااتج يعني الحين الساعة 3 فليل شو بسوي يعني اكيييييييد راااااااقدة .....؟؟؟
لطيفة : حمدووووووة قومي اغلسلي ويهج اباج بسالفة ضرورية ....؟؟؟
حمدة : بلاج روعتيني خالتيه فيها شي حد فيكم فيه شي اتكلمي ؟؟؟
لطيفة : ما فينا شي بس بطي اللي فيه قوووووومي دخيلج حمدووووووه سمعيني عدل ....؟؟؟
حمدة وهي تنش مفزوعة وتحك اعيونها : بطي ... شو بلاااااااااااااااااااااه ؟؟؟؟
وتخبرها لطيفة بكل شي وحمدة تتروع على بطي وتسكر عن لطيفة وتروح غرفة سلامة كانت سلامة ذيج الليلة واعية وهب ياينها ارقاد لانها باجر بداوم في الكلية وكانت وايد اتحاتي ، ادش حمدة عليها .....

سلامة : بسم الله شو فيج ؟؟؟
حمدة : سلوووووووووم ابااااااااااااج بسالفة.....!!!!!
تسكر حمدة الباب وراها ... ميثا اليوم ما رقدت ببيت خالها ... تخبر حمدة ، سلامة عن كل شي وسلامة ما تعرف شو تسوي ...
سلامة وهي خايفة وتيلس على الكرسي : انزين لطووووف محد رد عليها للحين ؟؟؟
حمدة : لا محد رد عليها للحين من متى هي تتصل فيه وما يرد عليها ومسلم غالق تلفونه سلاااااامي والله خايفة لطوف قالت لي انه مسلم شري وايد وحد يقدر يوقف بويهه ليعصب ...؟؟؟
سلامة : الله يستر يا رب شو نسووووووي الحين ... بعد ما اقدر اتصل بميثوووه الحين بيتروعون لو اتصلت بها على البيت وهي ما عندها موبايل ؟؟؟
حمدة : برد اتصل بلطووووووف يمكن اتصل بها .... الله يستر يا رب ....
وقدها بتتصل وإلا لطيفة متصلة ... ترد حمدة على طووول عليها ....
لطيفة وهي تصيح : حمدووووووووه الحقي ...؟؟؟
حمدة : شو صاااااااااااار ؟؟؟
لطيفة وهي تصيح : مسلم تهازب ويا بطي وثور به ؟؟؟
واتم تصيح ...
حمدة : شوووووووو منوه اللي ثور بالثاني ارمسي هدي لا تصيحين هب قادرة افهم منج شي .؟...
لطيفة وهي تمسح ادموعها : مسلم اللي ثور ببطي اتصلت على تلفون بطي ورد عليه اربيعه وخبرني انه مسلم ثور ببطي والحين بطي في العناية ومسلم شرد ....

حمدة وهي تحط ايدها على راسها : والقوووووم واربيع بطي هذا كان وياه يوم الحادثة ....
لطيفة : هيه والحين الشرطة ادور على مسلم واربيع بطي اتصل باهل بطي وقدهم في المستشفى عند ولدهم واااااااااا لقعتيه يا حمدووووووووه انا السبب كله مني انا اللي حطيت بطي عدال النار والا مسلم مقلوووووووع محد يبتلي به ... واتم تصيح ....
حمدة : لطووووف اسكتي واذكري الله قومي اغسلي ويهج وانا بشوووف شو نقدر نسوي ...
لطيفة وهي تصيح صياح مضيع اهله : حمدوووووه ، بطووووووي راح عني ، ذبحه مسلم حسبي الله ونعم الوكيل فيك يا مسلم وااااااااا خراب بيتج يا لطوووووف والله يا حمدوه لو دروا هليه بالسالفة بيقصبووووني ...
حمدة : لطووووووف قومي لا اتمين اتصيحين اذكري الله ...
لطيفة وهي تمسح ادموعها : انشالله بنش ...
تسكر حمدة التلفون عن لطيفة وتخبر سلامة عن كل شي ...
سلامة وهي تسكر على ثمها من الخوف : والحين شو بيصير ؟؟؟
حمدة : ما اعرف يا سلوووووم والله ما اعرف قلبي معورني على لطوووووف ما سمعتيها كيف تصيح واااااااااااااا لقعتيه عليج يا لطوووووف لو دروا اهلها بيقصبونها انتي تعرفين عمي عمير وجاسم كيف عصبيين ...
سلامة وهي متروعة : شو نسوي الحين احنا ما نروم نقول لاحد شي ...
ايتمن خايفات وهب عارفات شو بيصير شوي ويسمعن اذان الفير ...اينشن يتوضن ومن عقبها يدورن يصلن ويدعن لبطي انه الله يكون في عونه وفي عون لطيفة المسكينة ....
في العين وفي مستشفى توام اهل بطي من اتصل فيهم حسن اربيع بطي كلهم احدروا المستشفى والشرطة كانت تحقق ويا حسن وتحقق ويا اهل بطي .. هذيج الليلة الجو كان معتفس في العين والشرطة كانوا في كل مكان وبالذات صوب رماح والخزنة والختم لانه حسن خبر الشرطة انه مسلم ما ظهر من هالاماكن لانه من عقب ما ركب موتره روح صوب الخزنة داخل يعني ما يمديه يكون ظهر من هالمناطق وكانوا يدورون عليه في الخزنة ورماح والختم ومن صوب المزارع يمكن يحصلونه ، بطي يته الضربة صوب القلب ، وحطوه في العناية من عقب ما سوا له العملية علشان يظهرون الرصاصة من صدره ،
سيف : والحين يا دكتور شو الحال على بطي ؟؟؟
الدكتور وهو يهز راسه : حالته صعبه وايد يا سيف واحتمال ما يعيش العملية صح انجحت وهو تحت الملاحظة الحين بس شكله ما يستجيب للعلاج الله يكون في عونه ...؟؟
سيف : لا يا دكتور لا تقول هالكلااااااااااام بطي ما بيروح عنا لاااااااااااااااا ...
وايتم يصيح ....
علي اخو بطي وسلطان كانوا واقفين عند الشرطة وسلطان يصيح على حال اخوه الساعة كانت خمس ونص الفير ...
سلطان وهو يمسح ادموعه : علي اتصل بخلفان خل إيينا الحين ...؟؟؟
سيف : لا لا تتصلون به هذاك بروحه فيه السكر ولو درى يمكن يروح فيها خله لين ما تظهر البهره وخلاف انا بتصل به .....
يدة ميثا " ام خلفان " : سيف قول لي شو الحال على ولديه شو فيه ؟؟؟ وكانت تصيح ...
سيف : امايه اذكري الله بطي ما فيه الا الخير ؟؟؟
يدة ميثا " ام خلفان " : سيفووووه قول لي الصدق بطووووووي غاااااااااب؟؟ لا تقصووووون عليه قولي انه بطي بخير دخيييييييييلك لا تقول انه غاااااااااااااااااااب عني ؟؟؟
سيف وهو يصيح على حال امه : اماااااااااايه بطي بخير لا تحاتينه ....
يدة ميثا " ام خلفان " : ويوم هو بخير ليش ما اشوووووووفه امبينكم يتمشى ليش احنا اهنه في المستشفى واااااااااااا لقعتيه عليج يا علياء بنت سيف ولدج بيروح عنج وانتي يالسه تطالعين وااااااااااا حرة افواااااااادي عليك يا بطوووووووووووووي .....


علي وهو يمسك ايد امه : امااااااااااايه اذكري الله بطي ما فيه الا العافية ....
يدة ميثا : ودني عنده لو هو بخير ابا اشوووووووفه دخيييييييييلك يا علي .... واااااااااااااا حرة افوادي وين خلفان اخوكم اتصلوبه خل ايي يشوووووف مصيبتيه .....
يحضن علي امه ويهديها بو خلفان يد ميثا كان يالس على الكرسي ويستغفر ويدعي ربه انه يشافي بطي ويعافيه حمدان ولد سيف كان واقف عند يده ويذكر الله ...
"عبيد وراشد وحامد" اعيال سلطان كانوا واقفين عند غرفة العناية ويتريون الدكتور يظهر من داخل ... وعيال سيف " حمدان وفهد وعبدالرحمن " واقفين عند يدهم ويهدون يدهم اللي كان مرة يستغفر ومرة يصيح ، وعيال علي " سعيد ومطر " واقفين عند الشرطة وابوهم وحسن اربيع بطي كانوا واقفين ويا الضابط ...

عند طلوع الصبح على الساعة 7 ونص سيف اتصل بخلفان اخوه وخبره وخلفان من زود خوفه على اخوه على طول ظهر من البيت هو وخالد اولده ...وروحوا صوب العين يبون المستشفى ...
ميثا من درت بالسالفة تمت تصارخ في البيت ولا راحت الكلية والريم وايمان بعد تموا يصارخون .. ميثا من زود ما هي تصارخ تمت تركض لين ما وصلت عند باب الحوش وما كانت لابسه شيله على راسها وتمت تصيح الحقت بها حرمة ابوها ....
ام خالد : ميثا تعالي اذكري الله عمج ما فيه الا العافية ؟؟؟
ميثا وهي تصيييييح : أي عااااااااااافية عمي بين الحياة والموووووت ...
ام خالد وهي تمسك ميثا من ايدها : تعالي ادخلي مب زين اللي تسوينه ....
ميثا وهي تخر على الارض وتصيح : خالتيه عمي رااااااااااااااااح راااااااااااااااااااح ...
تآخذ ام خالد ميثا لداخل ومن يدشن الصالة يشوفن الريم وهي يالسه على الكنبة ومحطيه ايدها على ويها وتصيح وايمان كانت واقفة عند الدري وتصيح .... اتم ام خالد تهدي البنات مسكينة هب عارفة تهدي منوه والا منوه .....
على الساع 8 كانت ام كايد ومريم وسلامة وحمدة في بيت بوشاهين
سلامة وهي حاضنه ميثا : ميثوووووووه اذكري الله عمج ما فيه شي ؟؟

ميثا وهي تصيح : سلاااااااااامة كيف تقولين ما فيه شي والضربه يايتنه صوب القلب عمي هب بخير انا ادري ... سلاااااامي قولي انه عمي ما فيه شي وااااااااااااااحرة افوادي عليك يا عمي كله ولا عمي يروح عني يا سلامة لاااااااااااااااااااااااااا لاااااااااااااااااااااااااااا .....
الريم من سمعت ميثا تصيح وتصارخ تمت تصيح وايمان تمت تصرخ ولا قدرن سلامة وحمدة يسكتنهن وتمن يصيحن وياهن ....
خلفان وولده خالد راحوا العين ومن اوصلوا المستشفى خلفان راح عند امه وابوه يهديهم وشاف حالتهم صعبة وايد ويصيحيون يدة ميثا من شافت خلفان تمت تصيح وايد بس خلفان تم يهدي امه كلهم كانوا في المستشفى حتى خوات بطي " طريفة وموزة " واعيالهم وريايلهم ... مساكين حالتهم تعور القلب ...
موزة وهي تصيح : خلفان الحق اخوك بطوووووي اذبحووووه عني واااالقعتيه على اخويه ...
خلفان وهو يحضن اخته موزة : اذكري الله يا ام ناصر انشالله بطي ما فيه الا العافية .....
موزة : حالته وايد صعبة صح العملية انجحت بس بطي ما يستجيب للعلاج بسرعة .....
خلفان وهو يمسح ادموعه : لا اله الا الله محمد رسول الله اذكري الله يا ام ناصر ....
من عقبها يروح بوشاهين عند اخوه سلطان ويوقف احذاله ....
بوشاهين : شلحال على بطي الحين يا بوعبيد ؟؟؟
سلطان وهو يصيح : ما اعرف شقولك يا بوشاهين بطي خلاص ما بنشوفه مرة ثانية بطي حالته وايد خطيرة ...
خلفان : وليش ما تنقلونه المفرق يا بو عبيد وينك عن اخوك شو تترياه يموت ....؟؟؟

سلطان : خلفان محد يتمنى الموت حق اخوه بس الدكتور خبرنا انه ما يقدر ينقله لاي مكان لين ما يشوفه يستجيب للعلاج وبعدين يصير خير ....
بو شاهين : يا الله يا كريم ترحم حالنا وتشوف حالة امي وابويه المساكين كله ولا امايه .....آآآآآآآآآآآآآآه يا بوعبيد .....
سلطان : اذكر الله يا خلفان انشالله ما فيه الا الخير ...
بوشاهين : لا اله الا الله محمد رسول الله .....

يروح بوشاهين صوب الدكتور ويحتشر وياه بس الدكتور يخبره انه حالة بطي ما تسمح انه ينقلونه لاي مستشفى لين ما اطوف عليه الـ 24 ساعة وانه بينها وبين القلب كمن انش بس .... يخر بو شاهين على الارض ويصيح على حال اخوه يتقرب اولده منه وايوده وايلسه على الكرسي .........
في بوظبي :
وفي بيت بوشاهين ميثا من كثر الصياح انهارت وشلها مايد وسلامة وام كايد وودوها مستشفى خليفة وحطوا لها مغذي كايد ومحمد راحوا العين علشان يطمنون على بطي ....
حالتهم وايد تعور القلب مسكين يا بطي ....

في بدع زايد :
ياهم الخبر والشرطة احدروا عندهم ايدورون مسلم ولطيفة من درت انه بطي في العناية وحالته خطيرة اغمى عليها للحين اهلها ما يعرفون شو السالفة ولا يدرون ليش مسلم ثور ببطي اهل لطيفة تحروا انه لطيفة اغمى عليها لانها انصدمت من تصرف مسلم وانه الشرطة ادور عليه بوجاسم من درى بالسالفة اتصل بجاسم ولده اللي كان في سويحان في الكلية وجاسم من عقب ما اتصل ابوه فيه خذى رخصة من الدوام وروح صوب توام علشان يطمن على حال بطي ...

ذاك اليوم الكل في حاله اهل بطي في المستشفى ويصيحون وميثا في المستشفى وسلامة ومايد وام كايد عند راسها ولطيفة من عقب ما صحت من الاغماء اقفلت على عمرها الباب وتمت تصيح وفي نفس الوقت احمدت ربها انه للحين اهلها ما دروا ليش مسلم مثور ببطي ولو دروا انه السالفة هي وراها جان اقصبوها ... مسكينة يا لطيفة الله يكون في عونج .....

العصر وفي المستشفى في توام :
خلفان : والحين شو الحال على بطي يا دكتور ؟؟؟
الدكتور : حالته استقرت عقب العملية بس يبالنا انباشر حالته لين عقب العشا اذا شفناها استقرت بننقله المفرق ... واعتقد يا بوشاهين ماله داعي تيلسون كلكم في المستشفى ....
خلفان : خلاص يا دكتور بروح اخبرهم ...
يروح خلفان ويطمن اهله عن حالة بطي ويقولهم يروحون البيت ...
خلفان : سعيد خذ يدك ويدتك وردهم البيت ....
سعيد : انشالله عمي ...
يدة ميثا وهي تصيح : خلفان ما ابغي اروح بعيد عن بطي هذا نظر عيني اللي اشوف بها ما ابغي ارووووووح واخليه ....
يد ميثا : خلفان قول لنا انه بطي ما فيه شي وانه بخير قوووووول ..... وايتم يصيح ...
خلفان وقلبه معورنه على حال ابوه وامه ويصيح : ابويه ، امايه اذكروا الله ... بطي ما فيه الا العافية ....
يدة ميثا : خلني اشووووفه يا خلفان ابغي اشوف اخوك اخذوا عمري كله وعطوه لبطي بس رجعوه لي .....
علي : امايه اذكري الله .. بطي بخير ...

يدة ميثا : ابا اشوف ولدي يا علي حرام عليك خبر الدكتور قوله اني ابا اشوفه ....
علي وهو ايود ايد امه : انشالله امايه انشالله ....
يد ميثا وهو يطالع خلفان : خلفااااااااااااان انته اكبر اخوانك وما بتكذب عليه صدق انه بطي بخير وما فيه شي انزين اذا هو بخير ليش للحين ما ظهروه من العناية ... ليش ....
خلفان وهو يصيح ويمسح ادموعه : صدقني يا ابويه بطي بخير توني مرمس الدكتور ....
يد ميثا : عيل خلني اشوفه ودني عنده ابا اشوووووف بطي يا خلفان ....
خلفان : انشالله ابويه انشالله ....
من عقب ما رمس بو شاهين الدكتور وعقب ما شيمه رضى الدكتور انه يد ميثا ويدة ميثا هم بس اللي يحدرون على بطي غرفة العناية من عقب ما تعهدوا للدكتور انهم ما يصيحيون عند راسه ... ويوم دشوا الشواب شافوا ولدهم وهو منسدح على السرير والوايرات بكل مكان بجسمه من شافوا ولدهم بهالحالة ما قدروا يتحملون يدة ميثا تمت تصيح ويد ميثا تم يستغفر ويذكر الله على كل حال وتم يقرى قرآن عند راس اولده ....
يد ميثا وهو يطالع اولده ومن عقر ما قرى صورة الفاتحة عليه : يا رب ترحم بطي وتشافيه وترده لي سالم من كل شر واشوفه يمشي على ريوله مثل قبل واحسن يالله ترحم حالي وحال امه احنا مالنا عقبك غير هالولد يا رب تبارك فيه وتشافيه ...
وتخر دمعته بس يمسحها قبل لا توصل لحيته ....
ومن عقبها يظهرون الشواب من غرفة العمليات وام بطي تمت تصيح وما استحملت تشوف ولدها بهالحال .... بطي عمره ما غضب خاطر امه وابوه ومراضنهم بكل شي ومحطنهم في عيونه حسوا بالقطيعة وبطي على السرير منسدح في المستشفى والوايرات بكل مكان بجسمه مسكين بطي حالته وايد تعور القلب ، وحالتهم تقطع الفواد ....

في بدع زايد من عقب ما عرفوا اهل لطيفة بالسالفة وانه مسلم سوى كل هذا علشان لطيفة ابوها احتشر من عقب ما خبره اخوه بو مسلم انه لطيفة عاشقة بطي وانه مسلم راح لبطي علشان يدافع عن شرف بنت عمه ، ابوها حدر عليها البيت وضربها ضرب اليهد وخبر عليها اخوها جاسم اللي عصب ومن زود عصبيته روح يبا بدع زايد ومن وصل جاسم البيت دش على لطيفة وتهاد وياها وضربها ومن عقبها خذى عنها التلفون والكمبيوتر ....
لطيفة وهي تصيح : جسووووووووم والله العظيم انه ما بيني وبين بطي شي .....؟؟؟
جاسم وهو معصب ويرها من شعرها : لطوووووف احنا وثقنا فيج واخرتها عشقتي بطي وشو استفدتي الحين مسلم وبينسجن من تحت راسج وبطي يحتضر في المستشفى شو استفدتي سودتي ويهنا في بدع زايد حسبي الله عليج من بنت ...
ام جاسم وهي تيود ولدها : بسها يا جاسم ذبحتها .... بسها ضرب ....
جاسم : خليني اذبحها ليتها تموت سودت ويهنا شو واويوهنا الحين قدام اهل بدع زايد قولي .... ويرفس لطيفة ببطنها ...
اتم لطيفة تتويع وهي طايحة على الارض وحلجها يخر دم .: جسووووووم والله ما بيني وبين بطي شي ... حرام عليك ....
ام جاسم : الشيمة يا جاسم هدها ارحمها بسها ضرب كفايه اللي ياها من ابوك .....
جاسم : ليته ذبحها وفكنا منها .... الحين اعمومتي شو بيقولون ... منوه يباها الحين بنتج سودت ويهنا قدام العرب .......
ام جاسم وهي تهدي ولدها وتيود لطيفة من ايدها : خلها واظهر من الحجرة انا بعرف منها كل شي وخلاف بخبرك ....
يظهر جاسم وهو معصب من غرفة لطيفة من عقب ما خذى عنها التلفون وزين من لطيفة انها كانت ماسحه كل مسجات بطي لها وماسحه رقمه من التلفون ومن ظهر ام جاسم احضنت بنتها وتمت تصيح ويا لطيفة ....

اليوم الثاني الدكتور من عقب ما شافا حال بطي استقرت قرر انه ينقلونه مستشفى المفرق ونقلوه ميثا وسلامة وحمدة وام كايد ومريم حرمة كايد والريم وايمان وام خالد يو المفرق ويا مايد وسيف وراحوا عند اهل بطي اللي كانوا في المستشفى وبطي من حدرته الطيارة اللي انقلته المفرق حطوه على طول في غرفة العناية علشان يطمنون على حالته اكثر ....
ميثا كانت وايد تصيح تبغي تشوف عمها ومن شافت يدتها لوت بها وتمت تصيح ، الشرطة للحين ادور على مسلم ... اهل بطي من عقب صلاة العشا اطمنوا على بطي وباتوا هذيج الليلة في الوثبة في بيت طريفة اخت بطي ...
في الوثبة وفي بيت طريفة
كانت سلامة وميثا يالسات ويسولفن في الغرفة :
ميثا وهي تصيح وتمسح ادموعها : سلااااااااااااامي كله من لطووووووووف ليت عمي ما حبها ؟؟؟
سلامة : ميثووووه اذكري الله لطوووووف مالها خص باللي صار وكفاية اللي ياها من ابوها وجسووووم اذبحوها من الضرب ...
ميثا : تستاهل وكيف تقولين مالها خص هب مسلم ولد عمها هب هو اللي ثور بعمي علشانها اضغطت على عمي وخلته يروح يقابل ولد عمها لو انها رضت بولد عمها وما تمت تصيح وتقول لعمي ما ابها جان عمي ما راح وكلم ولد عمها صح والا لا ... انتي بس ادافعين عن بنت خالتج ....؟؟
سلامة : ميثووووووووه انا ما ادافع عن لطوووووف بس هذا قضاء وقدر والله رايد هالشي ....
ميثا : والنعم بالله آآآآآآآآآه يا سلامة اعذريني من حرقة افوادي على عمي يالسه اقول هالرمسة حسبي الله عليك يا مسلم جانك بغيت تحرمنا من بطي فديته .....
سلامة : الله يشافيه انشالله .... ويخليه يا رب ...
ميثا : انشالله ....
في هاللحظة اتحدر عليهم " مها " بنت طريفة عمة ميثا وهذي عمرها 25 سنة كانت متزوجة من طحنون ولد عمها اللي توفى من سنتين في حادث طيارة كان ملازم طيار في الكلية الجوية واثناء
العرض الجوي انفجرت فيه الطيارة ومن عقبها عرفوا انه كان مضارب ويا واحد من مهندسين الصيانة وهو اللي كان ورى حادثة الطيارة وتعاقب من عقبها عندها بنت اسمها فاطمة وعمرها سنتين ، وولد اسمه زايد وعمره اربع سنوات ....
مها : شو بعدكن واعيات ....
ميثا وهي تمسح ادموعها : هيه بعدنا ...
مها : ارقدن هب زين عليكن السهر واعيات للحين خطفت صوب غرفتكن وشفت الليت شاب قلت خل احدر واشوف شو السالفة ....؟؟؟
ميثا : مهايه ادعي لعمي بطي الله يشافيه انشالله ويعافيه لنا يار ب
..
مها وهي تيلس عدال سلامة : انشالله ,,, خالي بطي بيتعافى ونشوفه مرة ثانية بينا فديت خالي والله يا ليت لو عايلتنا فيها عشرة من امثال خالي بطي ....
ميثا : فديته والله ....
مها وهي تيلس عدال سلامة : الا بتخبركن منوه هذي لطيفة اللي خالي بطي يحبها قالوا انها تقرب لمسلم اللي ثور بخالي ...؟؟؟
ميثا وهي تطالع سلامة : هذي بنت خالوه رايه بنت عمير بن حمد اللي ساكنين في بدع زايد ...
مها : بنت اخت خالوه عوشة ....؟؟؟

سلامة : هيه بنت خالتيه رايـــة ؟؟؟
مها : هيه ......
ويخبرنها سلامة وميثا عن قصة حب بطي لـ لطيفة ويتمن يسولفن لين قراب الساعة 2 ومن عقبها يرقدن من زود التعب لانهن طول اليوم كانن واقفات على اريولهن في المستشفى .....
• يا ترى بطي بيتشافى والا لا ؟؟
• ولطيفة شو بيصير عليها عقب الضرب اللي ياها ؟ وبتنسى بطي خلاص والا ؟؟