سن العشرين , سن الزهـــور مثل مايقولون .. والأنوثه الطاغيه ..
سن الشبــاب المُفعّم بالحيويه والنشاط ..
أغلب البنات نلقاهم في سن العشرينات , يتزوجون , يحملون وينجبون ..
والســؤال هنا ..
لو عدّت هالبنت سن العشرين ودخلت الثلاثين أو الأربعين ولاتزوجت ؟
ولادق بابها أحد ؟
كيف بيكون حالها؟
كيف بيكون تفكيرها؟
هذا والله اللي دفعني أكتب الموضوع بصدق ومن قلب نااااصح
حاولت أكتب وأبحث وأوجد الحلول .. لو حل واحد ..
الموهم :
راح يكون الجواب على سؤالنا السابق كالآتي ..
1- تشعر باليأس والقنوط ..
2- تفقد الثقه بنفسها ..
3- تعتزل المجتمع ..
4- تفقد المتعه والرغبه بالحياه ..
5-تشعر بأنها منبوذه .. (محد يبيها) ..
6- تقارن نفسها بالأخريات ممايزيد الطين بلّه ..
كيف يتعالج الوضع ؟
أولاً .. لازم يكون هناك قنااااااااااعه وقناعه تامّه .. بأن مسألة الزواج قسمه ونصيب , انا مالي يد فيها ..
فالله سبحانه وتعالى مُقسّم الأرزاق , فالزواج إذن رزق والرزق يأتي من الله وحده سبحانه وتعالى ..
إذن الله هو المتكفل بتوزيع الأرزاق ..
متى ماكان هناك يقين وايمان وقناعه في هالأمر بذات ..
راح تحس هالإنسانه براحه نفسيه تامه ..
هذا أولاً ..
ثانياً .. مايكون جل إهتمامي هو الزواج .. يعني مايكون هاجس , مايكون هم أفكر فيه ليل ونهار ..
أنا شخصياً أشوف إن الزواج مهم جداً بالنسبه للبنت لكن هذا مو يعني اني أخليه أكبر همي ..
وأفقد الرغبه بكل الأمور وأهمل كل الأشياء وأصب كل إهتمامي بالزواج ..
صحيح الزواج مهم مثل ماقلت لكن مهو هدفنا الأوحد بالحياه ..
البنت الموظفه تكمل وظيفتها ..
واللي تخرجت تكمل دراستها .. أو تاخذ دورات , أو تدخل دار تحفيظ قرآن كريم ..
ممكن تثقف نفسها عن طريق الكتب , النت , المعرفه بحر واسع ..
تحاول تشغل نفسها بشي مفيد .. رياضه , زيارات وصلة رحم , قراءه .. هوايه معينه ..
رسم , خياطه وتصميم , تعلم طبخات جديده , مكياج .. .. .. الخ
ثالثاً .. الأخذ بالأسباب ..
مثل ماقلت بالبدايه إن الزواج مكتوب وقسمه ..
ممكن وانتي قاعده ببيتك , ماتروحين ولاتجين وسبحان الله يجيك نصيبك !
وممكن زياره لقرايبك او صديقاتك او حفله ويكون هالتجمع سبب مُسبب لزواجك .. صح ولا لا ؟
المقصود :
لاتحكرين نفسك بالبيت ..
ماأقول إعرضي نفسك .. لاا .. أبدا
بس انتي أول تكشخين وتزورين أهلك ورفيقاتك وتطلعين واللحين خلاااص هوّنتي !
قلتي راحت علي .. ماراح البس واتكشخ واتعطر .. ماله داعي ..
إهتمي بنفسك لنفسك وإطلعي وزوري الناس , لاتنعزلين عن العالم ..
إذا عزمك أحد لاتقطعين فيهم
إختلطي بناس جديده , إدخلي دوره مثلاً ..
رابعاً .. خلّي عندك ثقه بنفسك ..
أدري إن فقدان الثقه بالنفس مهو أمر سهل , لكن كيف نقوّي ثقتنا بأنفسنا ؟؟
عن طريق تقوية ثقتنا بربنا ..
والتقرب من الله أكثر وأكثر ..
الثقه بالله سبحانه والإيمان به سبب للثقه بالنفس ..
خامساً .. طبعاً أقصر طريق للفشل هو المقارنه بالآخرين ..
يعني لاتشوفين فلانه وفلانه .. ولسان حالك يقول :
فلانه إنخطبت وفلانه تزوجت .. كلهم تزوجوا إلا أنا .. إنتي شعليك من الناس ..
إنتي عليك من نفسك وبس , نصيحه لوجه الله إذا قعدتي تقارنين نفسك باللي حولك ..
بتفشلين بحياتك كلها مو بس بالزواج ..
خليك بحالك وأعيد وأزيد إن الله هو مقسم الرزق وكلّن ياخذ نصيبه من هالرزق .. وإنتي ماجا دورك
كل شي بوقته حلو ..
ماتدرين سبحان الله يمكن تاخذين في هالفتره إنسان مافي قلبه رحمه ومليان عيوب , إذن
ضروري يكون عندك وعي بأن :
ماأصابك لم يكن ليُخطئك ..
وماأخطأك لم يكن ليُصيبك ..!!
(وعسى أن تحبو شيئاً وهو شرٌ لكم , وعسى أن تكرهو شيئاً وهو خيرٌ لكم )..
سادساً .. إلزمي الإستغفار , والإستغفار يفك الأقفال ..
ولاتفكرين بالزواج كثير لايكون أكبر همّك ..
عيشي وإنبسطي وماعليك من كلام الناس وأشغلي وقتك ..
وإذا جاء الوقت المُناسب , راح تتزوجين ..
أخيراً ..
عسى الله يرزق كل بنت ماتزوجت .. بالزوج الصالح ..
إللي يسترها ويصونها ويحطها بعيونه .. آمين ياااارب العالمين ..
حقوق الطبع محفوظه لــ أم ماسه :rolleyes:
أي أخت عزيزه تستفيد لو بشي بسيط او تقتنع بالكلام اللي قلته تدعيلي دعوه حلوه ..