6 سنوات ..ولكن ..!

السلام عليكم
شلونكم ؟

انا متابعة لهذا القسم من فترة طويلة واقرا مواضيعكم ومشاكلكم ..كذا مرة افكر اكتب مشكلتي لكني اتردد ..
اتمنى القى ردود تريح قلبي ..وتتفهمون وضعي
انا عمري 24 سنة ...ولله الحمد جامعية وما ينقصني شي ...قبل 6 سنوات كنت في سنتي الاولي بالجامعة ...
كنت مقبلة على الجامعة برغبة كبيرة وخاصة بمجال تخصصي ..انهيت السنة الاولى بتفوق ..سنة خالية من المشاكل ...في السنة الثانية ...وبحكم ان انا في دولة جامعاتها مختلطة ...في يوم من الايام لاحظت بشخص يتردد على قسم تخصصي برغم ان هو تخصصه مختلف تماما عني ...مرت الايام مو مبالية لهذا الشخص...
مع الايام ..اقامو فعالية بالجامعة وجميع الطلاب سجلنا لهذه الفعالية ..وفي اثناء الفعالية ...كنت جالسة مع صديقتي الوحيدة بالقرب من قاعة الفعالية ...جاتني بنت سالتني انتي فلانة قلت لها اي نعم ..قالت لي اقدر اكلمج في موضوع قلت لها تفضلي قالت لي يفضل يكون على انفراد ..خبرت صديقتي ان راح ارجع ...جلسنا في مكان بعيد عن الازعاج...قالت لي راح ادخل بالموضوع على طول ...قالت لي انا جاية من طرف فلان ...( الشخص اللي كان يناظرني من بعيد ويتردد على القسم ) قلت لها ليش ...انتي تقربين له ؟ قالت لي انا خالته ..( خالته بنفس عمرنا تدرس بغير جامعتنا بس كان حاضرة للفعالية في ذاك الوقت )
قلت لها والنعم بس انا شقدر اساعدج فيه...؟ قالت لي هذا الشخص ولد اختي معجب فيج صحيح ما يعرفج بس سبحان الله اعجب بمظهرج والتزامج بحجابج شافج غير عن البنات كلهم ...قالي انا مابي اضايقها ولا ابيها تاخذ عني فكرة مو حلوة ..عشان جذي قالي اتكلم معاج ...انا ماعرفت شقول وقتها ..ولاني مالي تجارب ولاعلاقات مع شباب حتى ايام مراهقتي ...انسانة خجولة اخاف من ابسط الاشياء ..على نياتي ..ملتزمة للله الحمد ولا لي بخرابيط البنات ...قلت لها انا مافكر ارتبط الان بعدي صغيرة وبداية مشواري بالجامعة وابي اركز على دراستي...قالت لي وهو بعد بنفس عمرج وببداية مشواره ومايقدر يرتبط الان ...قلت لها عيل شنو نستفيد من كلامنا الحين ...قالت لي الشخص يبيج ..,مستعد يسويلج الا تبينه بس ما تضيعين منه ...قلت لها ما بيدي شي ...قالت لي يكلم اهلج .؟ يحجزج له ....( اهلي من عائلة ملتزمة جدا ..وماعندهم استعداد تقبل مثل هذي المواضيع مع ان هذي الحالات منتشرة في بلدتنا يحجزونها له بعلم العائلتين ...بس اهلي مستحيل يتقبلون مثل هذا الشي ..وراح يفكرون فيني شي غلط وبيشكون فيني ..وانا اموت ولا اهلي ينظرون لي هالنظرة ...) رفضت رفض تام الفكرة وقلت لها الله يوفقه ويشوف حياته ...وانا مرتاحة بحياتي ...انهينا المحادثة وقالت لي على خير ...مرت الايام وشهور وبدا الكورس ينتهي ...وفي ايام الامتحانات النهائية ...جاء هذا الشخص بنفسه يكلمني وجه لوجه ...انا انصدمت وانحرجت وتوترت ...قالي السلام عليكم قلت له عليكم السلام ...قالي اعتذر لاني جاي اكلمج بهذه الطريقة ..بس انا تميت فترة طويلة افكر وانا اخاف ربي بس مشاعري ورغبتي ان ما اخسرج ماقدرت اتحكم فيها ...اتمنى تتفهمين الوضع وتفكرين بالكلام الا قالته لج خالتي ..وانا مستعد ما اكلمج ولا اتعرض لج بس تخلين اهلي يكلمون اهلج لين اقدر اكون نفسي واتقدم لج رسمي ...ماجذب عليكم بنات ..اذا قلت ان انا ما تحركت مشاعري تجاهه ...بس انا حذرة لابعد درجة وخاصة مع مواضيع الشباب ...قلت له اخوي ما راح يجيب نتيجة الكلام وابتعد عني ...مابي اجرحك ولا ابي اتكلم في اشيا وهمية ومالها نتيجة في الوقت الحالي ...دار بينا كلام ما اتذكر تفاصيل الكلام وانتهى كلامنا....ومرت ايام الامتحانات علي ثقيلة ...اي كنت افكر بنات بكلامه افكر بشخصه افكر باخلاقه افكر باحترامه لي ...شخص مختلف عن كل الرجال ...نظرته لي محترمة...انتهت الامتحانات ومرت العطلة ودخلنا بالكورس الا بعده ...وفي يوم من الايام جاء هذا الشخص وقالي انا راح اغير الجامعة ...بسبب ان غير مرتاح بتخصصه والتخصص الي يبيه في جامعة ثانية ...دعا لي بالتوفيق وراح ...مرت فترة اسابيع ...بعدها تفاجئت برسالة من هذا الشخص ! ....وانا تميت افكر شلون ومن وين خذا رقمي ...بعد ما ارسلت له هالسؤال ...قالي اعتذر وايد لاني تصرفت هذا التصرف ...عرفت ان اخذ رقمي يوم تسجلينا للفعالية ...كان مطلوب باللستة اليي مرروها علينا ان نكتب اسمنا ورقم الهاتف والرقم الجامعي ...قالي ما تحملت فكرة ان تضيعين مني ...وقعد يحلف لي ان ما قصده شي ولا بيتصرف تصرف مو زين ...قالي انا ابي اسال عنج اتطمن عليج لا اكثر ولو ابي اضرج جان صار هالشي من زمان ...وماطول عليكم ..وراح اختصر القصة ...طوال فترة الجامعة كنا نتواصل وبكل صراحة صار بينا مكالمات هاتفية ...لكن والله يعلم ان ماتعدينا الحدود ...ولا بيوم ضرني ولا قلل الادب معاي ...تعلقت فيه وتعلق فيني حسيته نصفي الثاني حسيت ان ربي ارسله لي ...خمس سنين كانت مدة دراستي وطوال هالفترة كان معاي ولا احد يعلم عن اللي بينا غيري انا واختي الكبيرة المتفهمة ...وخالته وامه ...كانت خالته تكلمني واصبحت صديقتي ونتواصل شبه يومي ....وبعد انتهاء الجامعة دخلنا في سنة 2014 ...هو تخرج وانا تخرجت والان يشتغل صار له كم شهر ...وعلاقتنا مثل ما هي ...وقالي اصبري هالفترة اضبط بعض الامور لاتقدم رسمي ....ولكن...جا الخبر اللي صعقني وصدمني ...من كم يوم قالي يلا فلانة بغيتج بموضوع قلت له خير شموضوعه ...( للعلم ابوه انسان شخصيته متسلطة سئ الطباع لا يملك لغة حوار .. وهو وحيد امه وابوه...ابوه وامه منفصلين من سنتين ...عانو مع ابوه المعاملة الجافة وقلة المسؤولية والاهتمام ماحس بمعنى الابوة الحقيقية ....) وكلمني وقالي ( فلانة ابوي مو موافق على زواجنا !!) وكانه صاعقة نزلت علي ...قلت له السبب قالي ماعرف قلت له السبب قالي يا فلانة ماعرف انا نفسي مصدوم ...

بكيت بنات من حر قلبي بكيت قهر وصدمة ...بكيت لاني بخسر اعز انسان عرفته وشخص احترمني وما ضرني ولا بيوم وقف معاي بظروف قاسية ...ما تقبلت الفكرة...وقلت له اذا لي معزة عندك تعرف السبب ...وما تتركني ...قالي انا ما بتركج وما بخليج ...ومعاج وراح احل هذي المشكلة ..( للعلم ان ابوه مهملهم ومو داري عن هوا دارهم وبيوم وليلة يبي يفرض رايه على ولده من غير اي مراعاة للمشاعر ) لكني خايفة من النتائج ...يابنات مو سهل علي بعد هالسنين افقد هالشخص

انا اشتغل بنات وصار لي كم يوم اداوم وضيقة بقلبي ...الحمدلله على كل حال ...والله ادعي ربي ليل نهار ان ربي يجمع بيني وبين هذا الشخص بالحلال ويجعله من نصيبي ...راضية بقضاء الله وقدره واحمد ربي في جميع الاحوال

بس املي بالله ما يخيب والله عالم نيتي ..شورو علي بنات بدون ردود جارحة..