7سنوات معاناة!!

السلام عليكم ورحمة الله وبركاته


انا عضوة جديده في عالم حواء مع ان لي فتره طويله اتابع المواضيع واتشوقت اشترك في الموقع


ببداء اطرح مشكلتي اللي لها سنين متعبتني ومادري اذا هالقسم مناسب او لا
انا تزوجت وعمري 21والحمدلله زوجي اروع انسان بالعالم عشت احلى ايام عمري معه في اول سنتين لكن بعد مولودي الثاني وبعد شهرين بالتحديد صابتني حاله غريبه ولي الان 7سنوات اعاني منها دخلت ولدي الله يحفظه المدرسه ولا زلت اعاني والصراحه تعبت وخايفه ابقى طول عمري كذا
الحاله في بدايتها صحيت في احد الايام اتذكر كان يوم خميس او جمعه لكن صحيت على حلم مفزع وقمت في هذاك اليوم مرهقه وجسمي مكسر توقعت انه من السهر مع اطفالي ونفسيتي قبل هاليوم ب3ايام فيني ضيقه مادري وش سببها واصوات ببطني وحركه مثل الغازات بعد قبل الحاله باسبوعين تقريبا
في هاليوم صحيت وسويت غداي وتغدينا وفي الليل وتحديدا بعد ماتعشينا سويت شاهي وكان زوجي جالس عالكمبيوتر وكنت اسولف معه عادي وفجاءه مدري وش حصل سالني سؤال ومادري وش قال ورجع كرر السؤال مرتين ومارد عليه وعصب ولما سالني ليش ماتردين انهرت وصرت ابكي وابكي بكاء هستيري وخاف وجاء عندي وصار يسالني وش فيك اقوله مادري واستمريت بالبكاء وصار يقرى علي ووداني دورة المياه بالقوه رحت وتوضيت وصليت ركعتين وكاني ارتحت شوي لكن دخلت بحالة غريبه صرت كاني اطير اوكاني امشي على قطن ماحس رجولي تلامس الارض وصرت ماحس بنفسي ولما اناظر المرايه اخاف وكاني ماعرف نفسي صرت ماحس بمشاعر تجاه زوجي واطفالي وكل شي احسه غريب علي حتى بيتي كاني ماكنت ساكنته من قبل وصرت منهاره ويومي كلها ابكي وخايفه وكنا في مدينه تبعد عن اهلي 1400كم وماعرف ناس كثير وماعندي احد غير زوجي اخذ اجازه اسبوعين من العمل وجلس يهتم بالاطفال وفيني لدرجة حتى الحمام كان يوصلني وينتظرني عند الباب لان كنت اخاف وخلال هالفتره رحت وسويت تحاليل واشعه في اكثر من مستشفى وكل شي سليم رحت رقيه وصرت اروح يوميا وماتغير شي وبس منهاره وابكي وفزعه واحساسي بالغربه يزيد رحت عند اهلي جلست 3شهور خلال هالفتره رحت لطبيب نفسي واعطاني علاج تعبني وزاد وزني بقوه وصرت اغلب وقتي نايمه وانام وانا وسط الناس ماحس بنفسي وكنت كل شوي اسمع براقي نروح له لكن ماتغير شي فقررت ارجع من زوجي اولا لاني ماحس بالامان الا معه وثانيا لانه تعذب لدرجة يجي خميس وجمعه ويقطع 1400كيلو رايج جاي ورجعت دخلت بيتي ياربي غريب كل شي فيه غريب وكنت اخذ معي احد من اهلي واحيانا من اهله عشان ماجلس لحالي وتعبت وحسيت زوجي بداء يضيق لانه اول ماتعبت حتى هو انهار اتذكر منظره للحين وهو يطيح على السجاده يبكي مع اني ماعمري شفت دموعه من تزوجنا هو ماكان يدري اني اشوفه صرت اذا طلعت برى البيت اختنق واطلب ارجع بسرعه وانعدم عندي احساس الامومه والاحساس تجاه زوجي وحتى اهلي لما دخلت عليهم اول مره بعد المرض كنت احسهم اغراب مع ان اللي يشوفني يقول اني طبيعية 100%وماحد يلاحظ اي شي لكن احيانا لما يكون فيه احد جالس ضيوف عند اهلي اكون جالسه وفجاءه اضيق واختنق واطلع بدون لاحد يلاحظ احيانا احس اني مو كائن بشري
المهم بعد 10شهور استخرت وقررت ارجع لطب النفسي ورحت عند طبيبه في البدايه شخصت الحاله اكتئاب مابعد الولاده وصرفت لي علاج تحسنت بعد اسبوعين صرت قادرة اهتم باطفالي وبيتي صرت اطلع بدون خوف شوي شوي بداء يخف اختلال الانيه لكن بالمقابل صابني وسواس بالدين وصرت ماقدر اقرى قرآن وتركت الاذكار والدعاء لما اجي ادعي احس شي يستهزاء بدعائي وان حتى الاطفال يدعون احسن مني وان دعائي مو مرتب لاني قريت ان الدعاء يبداء بالحمد والثناء لله والصلاة على الرسول فصرت اتجنب الدعاء وتركت صلاة السنن والنوافل واكتفيت بالصلاة المفروضه بس خف الاحساس بالفزع واصبت باللامبالاه وزاد تبلد المشاعر لكن مع ذالك كنت تحس اني مرتاحه ومبسوطه ولما رجعت لدكتورة وقلت لها ان مزاجي صار متقلب قالت معك اضطراب وجداني ثنائي القطب وصرفت نوع ثالث من الادويه واخذتهن مثل ماقالت سنه ونص وخلصت الكورس ولكن ولامره حسيت اني رجعت طبيعيه مثل قبل المرض ومشاعري تجاه زوجي واطفالي تجي لمدة اسبوع ممكن مره بالسنه افرح وقتها وحتى هم يفرحون لانهم يشوفون كيف مهتمه فيهم لكن ترجع تختفي المشاعر ويرجع التفكير والتعب وزوجي طفش وصار يشتكي من اهمالي له وان اذا استمر الوضع كذا راح اخسره واحيانا يقولي انه مستحيل يتخلى عني مهما كان انا زمان طلبت منه الطلاق ورفض وقال لاعاد اسمع منك هالكلام واحيانا اذا قام يشتكي من اهمالي له اقوله خلاص مابغى اظلمك معي اتزوج وعيش حياتك يقول حياتي معك بس انا والله احسه مو فاهم وضعي لانه احيانا يضرب لي امثله بحريم يقول شوفي فلانه كيف ظروفها وفلانه كيف حياتها ومع ذالك باسطين انفسهم اقوله انا طيب لو مافيني هالمرض كنت راح اكون احسن منهم نفسيه وانبساط ولان حتى خواتي لما تعبت انهاروا يقولون الا انتي احنا نحس الحياه حلوه لما نشوفك وكيف حبك للحياه
طول ها7سنوات وانا عايشه بين شد وجذب تزيد على الاعراض قريب موعد الدوره اتعب واحس اني بنجن او بيجيني فصام واحاول اهدي نفسي واطمنها شوي شوي ارجع لحياتي
انا تاركه العلاج من 4سنوات ولا ودي ارجع له لكن من كم شهر تعبت من معدتي ورحت المستشفى ولما قالوا منظار وتحاليل واشعه خفت ان يكون فيني شي خطير وسوست اني بموت وتعبت خصوصا ان وزني قبل سنتين نزل فجاءه وحملت وولدت ووزني مازاد فقلت اكيد في هذاك المرض الله يكفينا شره خصوصا ان ابوي الله يشفيه يتعالج منه حاليا فاقبل شهرين سويت منظار وقالوا لي فيه التهاب واخذو عينه من المعده والى الان مارحت اخذ النتيجه انتظر الموعد اخر الشهر الجاي
بس بعد هالشي اللي صار ومشكلة المعده احس تعبت وانتكست وصار يجيني خوف كبير من الجنون وفكرت ارجع اخذ علاج وفكرة اروح معالجه شعبيه مع اني رحت قبل وكويت كم مره وسويت صبخه ولا استفدت شي ورحت رقاه كثير وقت ماكنت اخذ علاج نفسي وارتحت واخر راقي جانا في البيت وقرى علي وقال مافيك شي يمكن اكتئاب مابعد الولاده
اسفه طولت لكن اعتبروها فضفضه واللي حابه تفيدني وترد علي حتى لو بدعوة بكون شاكره لها والله يجعله في ميزان حسناتها