©¤][¤©

طالبه في التقنيا جتني تشتكي وتقول اسمعني

اكتب اشعارك في موضوعي داخله بالله لا تردني



عبر انت بالحكايه وقول اللي يصير عدنا مب معقول

حاول انت قد ما تقدر وصل اشعارك لأي مسؤول



انت كل حد صار يسمعلك وانت وضعك ادري يسمحلك

وصل الموضوع يا الشاعر ومن صميم القلب اشكر لك



قلتلها قولي ويش الموضوع ليش عينج تمتلي دموع

طالعتني بنظرة وقالت ان خافقي موجوع



جيت انا ادرس بمجهودي مب وساطه وكثرت وعودي

نسبتي تسعين وشويه هذا زرعي وهذا محصودي



الله خالقني على قد حالي ما ادري مال العالم ومالي

صح فقيره لكن باخلاقي صرت اغنى الناس يا الغالي



عندنا اللبس ما هو موحد وعلى كلامي كل حد يشهد

واللباس اليوم عالموضه وكل احد يكشخ على حد



وفي بنات الي انا منهم والدراسه بس تشغلهم

ليش ما عندي ثياب كثير صرت انا لا ما اشرفهم



يطالعوني بنظرة ما تسوى يعاملوني دوم بالقسوه

لو اسلم ما في حد يرد في نظرهم صرت ما اسوى



من اجي كلهم يخلوني لو اسولف ما يكلموني

ليش البس نفس ثياب الامس كلهم صاروا يلوموني



في بنات الله يا ساتر ما يهمهن شي سوى الظاهر

خقه ورزه عالفاضي شايفات النفس عالاخر



طبعا المكياج في الشنطه والحكل في عينها تخطه

في كل دقيقه قامت فلانه دوم تتخشش وهي تحطه



والعطر غربي ودهن عود وفيها يكون هو موجود

كل ساعه وقامت ورشت صارت الريحه بليا حدود



والله اني ماني غيرانه بس باللي يصير حيرانه

ليش كلهم صاروا يقولون لابسه لبس امس هالفلانه



كم بشيل بخاطري همي كم شكيت وقلت ياعمي

انت تدري عدنا في البيت ما يكفينا معاش امي



بس احمد ربي مستورة واللي تضحك قلت مشكورة

عايريني لو تبي اكثر وانا من جواي مقهورة



كم شكينا بس من يسمع وغير هذا الحل ما نطمع

وحدوا اللبس يا ادارتنا شوفوا صارت عيننا تدمع



راح نفرح لو توحدونا مع بعضنا راح تساونا

الفصل صاير محل ازياء انتوا هذا الشي ترضون؟



بعد ما شرحت لي وقالت وافضحتها الدمعه وسالت

قالت الموضوع بين ايدك واتركتني حاير وراحت



يا جماعه شوفوا هذا الحل واعتقد امره تراه هو سهل

وحدوا اللبس بس مب اكثر يكفي معاير ويكفي ذل



كلنا من طين مخلوقين وكلنا يجمعنا هذا الدين

في احد عنده فلوس كثير وفي احد ظهره كسره الدين





الله يطول عمر زايد ويبقى لبلاده ذخر قائد

الرساله اليوم قلناها والكم انتوا هالامر عائد



شكر خاص لصاحب القصيده