اخواتي الغاليات :
حبيت اقترح عليكم اقتراح حلو واسال الله ان يكتب لي ولكم الاجر فيه ان شاء الله ..
لاحظت في المنتدى كثرة استخدام كلمة up لرفع الموضوعات ..
فقلت ليش مانغيرها بشئ يرجع علينا بالأجر وبنفس الوقت ينفع اخواتنا ..
بتقولون لي شلون ؟؟
انا اقولكم :)
اتمنى من كل الأخوات اذا دخلت على موضوع وحبت انها ترفع الموضوع لاتستخدم كلمــة up
لانها ماراح تستفيد من هالكلمة اي شئ .. الا لو ردت عليها صاحبة الموضوع ودعت لها والغالبيه ماترد عليها يمكن لكثرة من رفع الموضوع ..
طيب والحل ؟
الحل سهل وبسيط .. ناظري في التوقيع او بنهايه الموضوع واذا لقيتي صاحبة الموضوع تتمنى منك دعوة حلوة انسخيها والصقيها واكتبي تحتها آميــن ..
واذا مستعجله ومايمديك اكتبي بس كلمة آميــــــــــن ..
أو:
ادعي لها بالخير مثلا : جزاك الله خير / بارك الله فيك ....الخ.
واذا مالقيتيها طالبه شئ ادعي لها بالخير او اكتبي اي كلمه حلوة لها ..
اكيد بتقولون وليش نسوي كذا ؟
* الكلمة الطيبة صدقة .
اذا كتبتي كلمة حلوة راح تاخذين اجر لكن كلمة up وين الاجر فيها ؟؟
* دعاء المسلم لاخيه المسلم مستجاب .
قد تستجاب دعوتك لاختك انتي هنا كسبتي اجرين ان شاء الله ..
الأول : فرحتي اختك وفرجتي همها وهنا لك اجر .. ويمكن تدعي لك وانتي ماتدرين ..
الثاني : كسبتي اجر الدعاء ..
* قد يكون بدعائك لاختك دفع ضرر عنك او يدخرها لك الله تعالى في امر ما وتفاجئين بان ربي يسره دون معرفه السبب وهذا من فوائد العمل الصالح ..
اخر شئ احب انبهكم عليه :
ممكن وحده تكون عندها ذرية والثانيه تتمنى الذريه ممكن تقول في نفسها انا الحمدلله عندي ذريه ليش ادعي لها او تخاف ان ربي يرزقها باطفال زياده وهي ماتبي او او ......... الخ ..
لا تستغربون من كلامي في ناس يوسوس لها الشيطان وتفكر بالطريقه هذي ..
لكن تاملي معي لو انتي عندك ذريه ودعيتي لوحده ماعندها واحتسبتيها عند الله وش ممكن يصير ؟؟
* ممكن بيوم من الايام ربي يبتليك باي شئ وماتقدرين تنجبين وبسبب دعائك لاختك المسلمه ربي يشفيك ..
* او ربي يرزق وحده من اخواتك تزوجت وماعندها ذريه .. او وحده من خواتك ماتزوجت وانتي دعيتي لاختك المسلمة بالزواج وسبحان الله ربي وفق اختك او بنتك وتزوجت :)
* وحتى انتم يا بنات اللي ماتزوجتوا ادعوا لاخواتكم المتزوجات يمكن يجي يوم وربي يبتليك بنفس مشكلتها لكن بسبب دعائك لها بنيه طيبه وخالصه لوجه الله تعالى طمعا في الاجر ربي يدفع عنك ويسهل امرك من حيث لا تحتسبين ..
وطبعا كلنا نعرف اجر الدعاء ،،، وقدره الله في كل شئ ،،، وكيف ممكن ان الانسان اللي يدعي الله كثير ويدعي للناس بالخير ربي يوفقه ويوفق اهله معه ..
وبعطيكم مثال عني انا شخصيا وما كتبته الا ابي ابين لكم يابنات الصورة واوضحها لكم ومالي فيها اي هدف والله شاهد على كلامي ..
انا عن نفسي يا بنات كل ماصليت تهجد وتذكرت والله اجلس ادعي من كل قلبي لكل وحده دعت لي في المنتدى زي ما ادعي لنفسي واكثر ..
اقول يارب توفق كل اخت مسلمه دعت لي بالخير في ظهر الغيب يارب انك توفقها وتحقق لها ماتتمنى وتجزاها بالمثل وتجزاها عني الف خير دنيا و آخره ..
اتمنى يا بنات نتكاتف كلنا ونقضي على كلمة up من قاموسنا لانها لا تسمن ولا تغني من جوع ..
وندعي لبعضنا البعض ونطلع كل يوم من المنتدى بالاجر والحسنات ..
واللي بتنقل الموضوع تنقله بس الله يجزاها الجنه تكتب : منقول من لولونونو .
واللي بتنقله بدون ذكر المصدر ما احللها ..
