ممكن ترسلين لي الصور للعطور ومن اي شركة ؟؟

السلام عليكم ورحمه الله وبركاته

اختي ام السعف واليف السعر مره حلو ولو ان الحرمه ماهي محتاجه ماباعتها
السعر """""" 1500 علمنا ان المبلغ الحقيق لها 3000 وشكرا لكي

اختي الشاي الاخضر
ام حسن انا وديت ولدي لها ايام العيد وعطته علاج كويس تقول عن الشمم

ولكن للحريم مادري وش الدواء الا ادتك
وان شاء الله خير

جزا الله خيرا كل وحده شاركت في موضوعي وبصراحه كل وجهة راي لها قدرها من الاحترام والصواب بل اكثرها من القلب بوركتن اخواتي ماقصرتن ..
شاهي اخضر
تقصدين ام حسن العلام اللي في المنارات انا مجربتها لعيالي صراحه من ناحية الاطفال ممتازه اما انا ماسوتلي شي قالت روحي المستشفى

ياااه وحشتوني وربي

ياحبيبتي ياسبيكه امس على بالي .. صار كل مازعلوني اهلي اتذكرك اقول ياحليلها تقول طلباتي اوامر هههههه
بس امس كان غير زعلت وصحت وكتبت رساله لابوي 4 صفحات كلها عتاب
عارفه ليه لان ابوي ماعمره قالي لا وانا اكبر عياله وقريبه منه حيل ماني مستوعبه انه يطفشني وينكد علي انا قلت خلاص بحجز لمسات اوكي تصوير فوتغرافي والفديو قلت واحد من اخواني يصورني بس على اخر لحضه غيرت رايي وقلت بحجز فيديو وقلت لامي تقول لابوي ببساطه يعني من يوم انخطبت من اكثر من سنتين ما اتكلم مع ابوي بهالموضوع مع اني اجرأ وحده بالبيت الا هالموضوع حتى يوم قلت بروح لريم الرياض مسويه انه غرض عادي مو عشان ملكه او شي والتفاصيل هذي والحجز عادي اقول لامي وتقوله المهم راحت قالتله غيرت رايها وبتحجز فيديو مادريت الا اللي طلعلي وانا بالصاله (يازين شكلي ببجامتي الحمرا) الا يقول تبين تصوير فيديو ؟؟ وانا ساكته ما اطالع فيه عيوني بالجدار وشكلي بلها قام نفخ بقوه قال مافي تصوير ومافي شي استتمي عافيتك تراني على طريف لا الموضوع كله مايصير
انا مدري شفيه هو صايم بس عمره بحياته ماكلمني بهالاسلوب شكيت اني مسويه شي المهم راح وانا دمووووع ودخلت غرفتي وانا ابي افسر الكلام وش قصده طيب ليه ؟؟ واقول بكيفه التصوير انا اصيح لان ابوي اللي ماعمره نقص علي حنان ولاعمره نقص علي فلوس الحين كذا يسوي
جات امي تقول تستاهلين هو زهقان وانت كل شوي طالعه بسالفه ويقول انا ماني مصدق ان فيه بنت تتطلب هالسوالف قبل ملكتها اللي اعرفه ان البنت تستحي وماتتكلم (ياحليله على باله بالعصر الحجري) مع انه جامعي ومثقف وصاحب مكتبه بعد (ماراح اقولكم اسمها)
المهم ماطلعت طول العصر لييين العشا ونمت وقمت عالفجر وطلعت بدخل الحمام وما انتبهت ان امي تصلي قبل الفجر بالصاله اللي بين غرفه النوم وانا اغسل وجهي اتذكر الموقف واصيح وتعرفين الشهقه يبان صوتها مع صدى الحمام ياسلااام بس الناس نايمه مادريت الا باب الحمام يدق مين هنا ؟؟ اثرها امي سمعت صوتي قلتلها انا قالت افتحي قلت ماني فاتحه وش تبين قالت افتحي لا اصحي ابوك فتحت الباب وانا وجهي مو وجهي مدري شلون صرت كوريه مدري فلبينيه عيوني الواسعه صارت منفخه وخشمي متنفخ قالت خير ان شالله كل هذا عشان قالك مافي فيديو ودوريييني طلعت الصاله وصوتي عالي (الله يسامحني) فيديو وربي ماهمني بس انا اللي المفروض ارتاح نفسيا هالفتره كل شوي احد مزعلني وابوي ماعمره كلمني بهالاسلوب اصلا خلاص ما ابي منكم شي سوو اللي تبون لو ماتبون ملكه عادي بس خلوني بحالي لحد يكلمني ودخلت غرفتي وكتبت الرساله بس قبل ما احطها له جات امي وقالت تدرين ان ابوك من امس مانام يعني على بالك انه مبسوط يشوفك متنكده وكل هذا لان شفنا شي ماله داعي شوفيه تو قال بكره بنزل واسحبلها الفلوس واحطها بيدها تنزل تشتري اي شي بس منظر المصوره بكاميرتها غلط والملكه بالبيت والجلسه بسيطه قلتلها انا كتبتله رساله قالت خلي رسالتك عندك مو ناقص هم .. وباستني وقالت لا ينفخ راسك بليس ابوك يغليك بس كان متضايق
المهم الرساله عندي لو تشوفين الكلام اللي كتبتله تصيحين بس الحمد الله مارسلتها لاني الحين اقراها احس فيها قله احترام وكلام ماله داعي قلت انا مااب شي مو لاني زعلانه لانه بجد مالي نفس بشي عمرك ماقصرت معاي وطول عمرك حنون مدري شفيك بس تزعلني لكن من جد خلاص خلي حنانك لاخوانك واهلك وامي نفس الشي
لو المسأله فلوس بقولك انصرف على اخوانك سيارات واكثر وانا بنتك واذا مسأله مبدا صورك انت وامي ملي الشناط .. وقد ما قهرتني مستحيل ازعل عليك ولا اقدر ازعل او اشيل بخاطري
انقهر واموت من القهر وبس لو تدري البنات يفكرون وش يحطون اغنيه بملكتهم وانا مابقيت منتدى ادور انشوده الهاشمي النبي صلو عليه بس لانك تحبها وعلى بالي بسويلك مفاجأه وافرحك وفرحانه انه بيجيني مهر عشان اقدر اردلك شوي من حقك وبالاخير تنكد علي على اشياء تافهه انت تحسبها عاديه ماتدري شتسوي فيني وكلااااام
من جد الحمد الله انه ماشاف الرساله لاني قمت اليوم لقيته جايبلي فطور من بيت الدونات (مسوي بيراضيني ياحبي له) والعصر اعطاني الف وخمسميه ..(كل يوم بزعل)

وبس يالله عاد قولوا ماشالله لا قوه الا بالله لا يجيني اليوم بساطور
وادعوا ان ربي يعني على برهم ويحببهم فيني زود
نسيت اشترالي انبولات اكرنال لاني من كم يوم اقول ابي اشتريها عشان شعري بس محد نزلني
الحمد الله يارب
قاعده افكر الحين شدخلكم اغثكم بهالسوالف بس وحده تحب الثرثره الله يعينكم اهم شي الدعوه الحلوه.. باقي كم اسبوع.