تحت بشرتكم الحلوه توجدخلايا تعطي جلدكم اللون اللي تشوفونه – Pigment Cells واسمها بالتحديد melanocytes، مرات تتجمع هذي الخلايا في مكان واحد ويزيد تركيزها تحت الجلد وطبعاً لما يتركز أي لون يصير أغمج، وهكذا تصبح الشامة شامة.
وليش عاد تتركز وتصير الشامة؟ شنو السبب؟
أغلب الشامات تتكون بعد الولادة وخلال مراحل الطفولة والعشرينيات من الخصر وطالع، وماكو شي محدد يسبب تكوينهم إلا يمكن التعرض للشمس، الأجزاء الظاهرة من الجسم واللي تتعرض للشمس تطلع فيها شامات أكثر من الأجزاء الثانية.
أغلب البالغين عندهم بين 10 إلى 40 شامة عادية، يعني لا تستغرب اذا لقيتوا لك شامة جديده على جسمكم، بس عاد انتبهوا عليهم.
شنو يعني “شامة عادية”؟ وشلون يعني انتبه عليهم؟
الشامة العادية يعني اللي ما يزيد عرضها عن راس مساحة قلم رصاص (5 ملم)، إذا كانت أكبر من چذي تصير.. شامة مو عادية
الشامات العادية مــــــمممممممككككنننننننن في حالات نادرة تتطور إلى نوع من سرطان الجلد أعاذنا الله واياكم منه ومن كل مرض، ويقولون اللي عنده أكثر من 50 شامة عادية يكون معرض لهالخطر أكثر من غيره.
زين يعني شلون انتبه عليهم؟
- انتبه إذا تغير لون شامة.
- إذا كبرت أو صغرت بشكل غريب غير متناسق.
- إذا تغير شكل، ارتفاع، نسيج الشامة.
- إذا تصلّبت وصارت قاسية.
- إذا قامت تحكك بصورة ملحوظة.
- إذا شفتها تنزف أو تفرز شي غريب.
وشلون على الشامة المو عادية؟
يكون حجمها أكبر من الـ 5 ملم وحدودها غير متناسقة واللون متغير،
هالشامات حالها من حال الشامات العادية بس نادر حيل انها تتطور إلى نوع من سرطان الجلد، ويقولون اللي عنده أكثر من 5 شامات غير عادية شوي وضعه أخطر من غيره ولازم ينتبه على روحه
لما يصير في مشكلة مع الشامة نفسها الدكاترة يشيلونها بدون تردد :cool:
وصراحة تقهرني الشامات
نفسي اتخلص مننها
الحمدلله على الصحة والعافية والله يجيرنا ويحمينا من شرها