الله يسعدك يا شيخه مرا مرا مر مرا شكرا ع كل المعلومات
وربي انك ما قصرتي ابدا
ان شاء الله نحجز قريب واجي افرحك معي
وزي ما قلت لك الفندق مرا اعجبنا موقعه احتمال كبير يكون هو الي بناخذه
شكراا لكل شيء

احم احم

نجمة سماي و تحفه

زحفوا لي
بمسك ردودكم وارد بالدور لذلك بتلقوني شوي اتكلم عن الفندق شوي رايحه للتاكسي بعدين راجعه الفندق وهكذا

مارس بيكون ربيع اتوقع بتروحون على اجازة منتصف الفصل الدراسي الثاني
ايبيس قعدنا فيه اسبوع تقريبا وكلفنا 13 الف
عموما الفنادق كلها على بعضها لمدة 15 يوم كلفتنا 25 الف
احنا اخذنا 3 غرف ثنتين 18 متر و وحده الكبيره كانت 21 متر
وبما اني خمنت فترة سفرتكم من 22 الى 29 مارس ماراح تلقين بنفس الفتره في ايبيس غرفتين بـ7 او 8 الاف
انما بتحصلينها ب 13 الف وفيها
انت لاتبحثين في فنادق 5 او 4 نجوم ترا موب لازم 3 نجوم زينه واسعارها اقل
ايبيس على انه 3 نجوم الا انه موب رخيص لان منطقته مليانه سياح ومره خطيره كل شي فيها
عموما ممكن تبحثين في بوكنج وتختارين المنطقه ميونج دونج بتلقين فنادق غيره


من ناحية اللغه بتمشون بالانجليزي انا واختي من جنبها بالانجليزي ودجينا الحالنا وحتى بالسوق كاسرنا لين قلنا بس
ومره كانت صديقتي الكوريه معي طارت عيونها تقول شلون تقدرين تنزلين السعر كذا انا ما اعرف وهذي بلدي
غالبا الفنادق بتلقينهم يعرفون انجليزي لاتطلعون من الفندق الا ماخذين كرته ومخلينهم يكتبون لكم المكان اللي تبونه بورقه وتاخذون خريطه وشي كذا
وه بس ذكرتيني بالايام الجميله والخرايط الرايحه والجايه

من ناحية النقاب خواتي متنقبات وانا كنت متحجبه وكثير شفنا هناك متحجبات وبعد شفنا منقبات
واتوقع تحفه ماتنسى اللي بميونج دونج قاعده على درجة المحل وعباتها على راسها شكلها تستنى بناتها
يوم شفتها حسيتني بالرياض
المنطقه اللي تضايقوا فيها خواتي كانت في انسادونج .. عموما انا ما اعجبني ما ادري هو من الزحمه او ايش
حنا رحنا له كان في اجازه عندهم عيد وكل الكواريه فيذاك
القصر اللي عنده هناك احرصي تروحين له مره حلو بس الله يهديهم هم تضايقو والطقه جت براسي ماخلوني اكمل
هو اللي فيه تغيير الحرس البوابه الظاهر الساعه 3 يبدا التغيير
نسيت اسم القصر بما ان سول مليانه قصور بس هو اللي عند انسادونج

نرجع للفنادق و اقول لتس حنا حجزنا من البوكنج
طبعا ماحجزنا بسرعه قعدت يمكن شهر وانا احوس بالفنادق وابحث و ادور بالمناطق واقارن باالاسعار
لين قررنا .. خصوصا حنا تنقلنا بين ثلاث فنادق سول جيجو سول و الفتره الاخيره بسول كانت الاطول ففضلت تكون بمنطقة تسوق
عشان اذا احد تكاسل يطلع او قاموا اخواني متاخرين مايضيع يومنا
ننزل ندج تحت وهذا اللي حصل
ماعليش بس اقول لتس لاتتاملين تلقين ب7 او 8 الاف لمدة اسبوع
انتبهي تاخذين اقل من 3 نجوم الا متاكده ولاقيه احد قايل لتس عنه انه زين
صديقتي يوم اطلعت على اللي في البوكنج طارت عيونها تقول فيه اشياء كيف تنحط هذي مره سيئه ومو اي احد يجيها
طبعا هي كانت تقصد الاشياء اللي نجمه ونجمتين

ايبيس من ناحية نظافته فهو نظيف موقعه شي اليم خصوصا غرفتي انا واختي كانت بالزاويه قدامنا اللوتي وتحتنا السوق وفيه شاشه اعلانات وش كبرها عالسوق اللي قدامه نسيت اسمه
واذكر اختي كانت تراقب طباخ في مطعم بالسوق اللي قدامنا كل شوي طالع يتتن هههههههههه
انت بس تطلين تشوفين كل العالم تحتتس وترد روحتس
طبعا ماعندهم هناك شغل شقق الطايف تاخذين شقه وتقعد فيها عوائل
الغرفه لشخصين مايجلس فيها اكثر منهم .. اذا بيقعد شخص زياده بعض الفنادق ترضى مقابل مبلغ اضافي


من ناحية اذا تبين مترجم 250 دولار لليوم الواحد بس موب لازم ترا اذا تعرفون انجليزي استغنوا احسن لكم


من ناحية محلات الصرافه اللي بمنطقة ميونج دونج اتوقع روحي لها احسن من اللي في ايتوان
صديقتي بحثت لي عن محلات الصرافه اللي بايتوان وخذتنا لواحد تقول نتيجة بحثها بايتوان ان هذا افضل شي
لكن يوم رحنا بعدين لميونج دونج كان سعر الصرف هناك افضل و المحلات وش كثرها
فيه واحد مندس في حدا الحواري قدام مدرسة ابتدائيه الظاهر هو اكثر واحد صرفنا منه وكان سعره زين
اول ماتوصلون حولوا لكم 100 دولار من المطار ولين وصلتوا الفندق دوروا محلات الصرافه لانها ارخص بكثييييييييير من المطار

على فكره يوم كنت ابحث كثير كانوا يقولون لاتركبون تكاسي التكاسي غاليه
هذا غير اني قريت تقسيمات للتكاسي الفضي ارخص من البرتقالي والمدري ايش والتاكسي الاسود يتكلم انجليزي
ويوم رحت هناك ركبت مع كذا تاكسي اسود مايعرف كلمه بالانجليزي
ايضا ماحسيت بفرق بالاسعار لكن يمكن لاني بفتره قصيره مايمديني الاحظ الفرق لذلك سالت صديقتي وش الفرق
قالت مافيه فرق كلها نفس الشي عاد هي راعية الديره وهذا كلامها
لكن عموما اللي شفته اسعارها عاديه جدا و معقوله وانتم اربع اشخاص يعني خذوا تكاسي احسن لكم اختصار للوقت
طبعا التاكسي العادي الصغير مايركبه اكثر من اربع اشخاص ثلاثه ورا و واحد قدام .. شغل المراص ماعندهم هههههههه

احنا ركبنا كل وسائل المواصلات اللي عندهم صحيح الباص والميترو ارخص لكن اخذت كثير من وقتنا يروح نص اليوم وحنا نتنقل لين ناصل اللي نبيه
بينما المشاوير اللي نروحها بالتاكسي بسهوله ناصلها ولا لاحظنا ان سعر التاكسي مرتفع
صحيح تجربين جميع وسائل المواصلات حلو وممتع لكن المشكله الوقت قصير ودتس تستغلينه
عموما لاتنسون اذا بتحجزون من البوكنج تاكدوا بعض الفنادق عندها خدمة استقبال من المطار
تاكدوا بانكم تطلبونها عند الحجززز عشان يرسلون يستقبلونكم
لو ما طلبتوها عند الحجز ماراح يستقبلونكم
ممكن تاخذون تاكسي من المطار احنا اخذنا اول ماوصلنا بـ60 دولار بس عموما كان تاكسي خاص كبير مثل الفان الاسود
وهو نفسه اخر يوم لنا في سول حجزناه طول اليوم تقريبا بـ600 ريال لمدة ثمان ساعات لكن تراه ماكان يعرف اي لغه الا كوري بس انه كان محترم
اذا توهقنا ماقدرنا نتفاهم معه دقينا على صديقتي
جانا من الساعه 12 الظهر تقريبا وشلنا شنطنا وطلعنا نتمشى اخر يوم لين وقت اللي بنروح للمطار بالليل
عموما ذكرت شي من ناحية العفش والفنادق
اذا رحلتكم اليوم الاخير بالليل متاخر لاتغلطون وتحجزون الفندق ذاك اليوم عشان رحلتكم متاخره
حنا مثلا كانت رحلتنا 10 الليل فما حجزنا الفندق ذاك اليوم كان تسجيل الخروج الساعه 12 الظهر حجزنا التاكسي وخذنا عفشنا وطلعنا نتمشى ذاك اليوم
انتوا لو ماكنتوا بتاخذون تاكسي معكم كذا ممكن انكم تنزلون شنطكم عند الفندق هم يحفظونها عندهم لكم وتطلعون تتمشون لين يجي وقت رحلتكم ترجعون وتاخذونها منهم

ايضا شي ثاني ذكرته اذا حجزتوا في ايبيس فكل غرفه فيها جوال تطلبونهم يفتحونه لكم وتصيرون تستخدمونه
حنا استخدمناه كثير هناك واستفدنا منه اذا افترقنا و كذا نكلم بعض ونكلم صديقتي
وماكان غالي صراحه نسيت كم بالضبط اخذوا منا على الجوال بس ابد ماكان غالي على استخدامنا له حللنا ابوه
فيه ارقام تتصلين عليها للمساعده باللغه الانجليزيه ترجمه وكذا وفيه بعد شي بالعربي على اللي فهمته اثناء بحثي قبل نروح
لكن حنا ما احتجناه لانا ندق على صديقتي


البرج اللي ضيعت اسمه تحفه هو برج نامسان..رحنا له بالليل وتمنيت لو رحنا له بالنهار بس المره الجايه ان شاء الله
طبعا مثل ماقالت القريه صراحه نسيت اسمها ولو ببحث بحوستي بلقاني مسجلته بس ماعندي وقت
بس الاكيد انها خارج سول تقريبا 3 ساعات الطريق لها لكن من جد ممتعه وهي من احلى شي هناك
وبتلقين مصورين درامات فيها وحاطين في بعض الاماكن اللي مصورين فيها صور الدرامات اللي مصوره
ويسوون فيها استعراضات مرررررره خطيره القريه ان رحتي كوريا ومارحتي القريه فتراتس فوتتي عمرتس كلنا على اختلاف الاذواق انبسطنا فيها

وايضا شي مهم لاتفوتين العروض .. الجمب وفيه ثاني النانتا وفيه عروض غيرهم بعد
العروض هذي عروض كوميديه موسيقيه صامته موجهه للسياح وتلقينهم فيها بكثره لانها ماتحتاج للغه
الجمب عباره عن عائلة كونغ فو شي كذا مره خطير ويجيهم ضيف وبعدين يطبون عليهم حراميه هبااال
والنانتا عباره عن طباخين تجيهم وليمه الظاهر او شي فجأه وينقصهم طباخين ويجيب المدير قريب له نسيت بالضبط خصوصا اني ماحضرته
وكانكم جلستوا بايبس ماراح تعانون هناك الموظفين يعرفون انجليزي وممكن تحجزون للعروض من عندهم بسعر مخفض
ومكان عرض النانتا عند الفندق مره قريب خطوتين
والجمب كان قريب رحنا له بالتاكسي
انا حضرت الجمب بس ومرررررره خطير وان شاء الله احضره ثانيه
اختي حضرت الاثنين وانهبلت عليهم تبي تروح كوريا مره ثانيه عشان تحضرهم وكانها تقول الجمب احلى
ودي احط لتس روابطهم من اليوتيوب بس اخاف يقشعوني
عموما اسماء العروض jump و الثاني nanta طبعا ماراح تلقين العروض كامله انما مقاطع منها فقط تعريفيه



ياربي انا وش يدخلني هالموضوع يذكرني بالماضي الجميل وه بس يازين ذيك الايام الله يعيدها
احس عندي اشياء كثيره ودي اقولها بس ما ادري وش اقول وش اخلي
عموما اي استفسار انا بالخدمه

نجمة سماي ..

الله ييسر لكم ويكتب لكم الخيرة في أمركم .

وهذي متخفية ما قصرت أخيرا انفرطت السبحة وطلعت اللي كانت كاتمته بقلبها هههههههههههه

انتم الثنتين
ياااااااااحبيلكم حبااه
وقسم بالله دعيت لكم من قلبي جعل ربي يسعدكم ع كثر ما فرحتني ردودكم
والله مادري وش اقول مرا مرا مرا اشكركم من كل قلبي
ياا جعل ايامكم كلها عاده والله يكتب لكم سفره لكوريا عاجلا غير اجلا يارب
والله احس انكم جاوبتو ع كل شيء ببالي
مرااااااااااا احبكم ومراااااااااا شكرا
الله يسعدكم وقسم مو لاقيه كلام اشكركم فيه

شلونكم صبايا؟؟؟

يا ليت تشاركونا بالموضوع
•´`•. كوفي شوب المغتربات#2 موضوعنا(اذا وعـــــــــــــــد اخـــــــــــلف)