السلام عليكم
كيف حال الجميع ان شاء الله تكونوا بخير .
ام محمد
والله نقرا في كلامك اللي زي العسل وحسيت كم نحن بنات ليبيا حب واحد كلمة وحدة وان شاء الله يجمعنا مع بعض في الديا والاخرة علي خير ..:)
خلينى انجاوب علي حلوتنا حياة حلوة
اسمعي يا حنا انا خريجة طب اسنان وتزوجت من زوجى بعد خطبة سنتين وتعرفت عليه علي مقاعد الدراسة وتزوجت وعمرى 26 وتوا عندى ولدين هم نور عيونى الاول عمره سنتين والثانى اربع شهور
و و و شنو تبي اخرى اه انا توا مغتربة في المانيا ليا سنتين و و و وانا من سكان بنغازى الحبيبة ...
و نازله ليبيا الصيف ان شاء الله....
لو ناسية حاجة عادى اسالينى مرة اخرى...
بس العمر مش مهم امتى يكون الزواج كل شخص عنده اولويات في الحياة وامتى ما يجي النصيب امتى ما ربي يسخر..
سلامات لي جميع البنات.....:26: لي عودة ونسال علي كل وحدة...

ووه معاش نقدر نكتب خلاص كتبت رد يتكون من 3000 كلمة وطاااااااااااااااااااار فى الهوا
خلاص راسى يوجع فيا ليا ساعة نكتب عالفاضى

السلام عليكم ورحمة الله وبركاته


كيف حالكن كلكن اليوم ؟
صحيتن كلكن كلكن على كلماتكن ومشاعركن الطيبه والعقبه لحمدكن كلكن بدون استثاء
سلمكن نشادات تليفوناتكن ما بطلن عليا وما عقبتن جهد
أن شاء ربى يكافيكن بالخير دنيا وأخره
وأن شاء الله كل سنه وأنتن طيبات بمناسبة المولد وجمعه مباركه على الجميع ان شاء الله (ماتنسنش سورة الكهف وساعة الاستجابه)



فى الغربه لا نحسوا بميلود لا بغيره أنا ما فطنتش ألا اخر النهار انه مولد
الله فى حوشنا كنا كلنا نمشوا لحوش جدى احنا وعمامى وانتعشوا عندهم وتقعد لمه حلوه
وبعد تزوجت فى حوش عمى نفس الشيئ كلنا نتعشوا مع بعضنا فى حوش العيله
والصغار قايمينها بهذاك الخط ولوح وشيطان الشيشه
الله ما أحلاك يا ليبيا ,,,
والحلو جو اللمه فى هالمناسبه لأنها قعدت عندنا عرف (موسم) فيه تواصل رحم
وفعلا يا بنات اقرن موضوع وردة الجورى عن حكم الاحتفال بالمولد
واعتقد المقصود والله اعلم هو المغالاه فى الاحتفال وما يصاحبه من بدع كالاختلاط والمعازف
أن شاء الله ما نكونوش درنا معصيه واحدثنا فى الدين بدعه بطريقة تواصلنا فى المولد فى ليبيا .
وغداكن عندى اليوم تفضلن لقمه على ما قوسم (خمسه مصرى)
معليش يا امشيمشه ميلود انسهفوك اشوى ,,,



وجزاكن الله خير على الكلام الطيب فى حقى وتهنئتى أن شاء الله ربى يفرحكن برؤية وجهه الكريم فى الاخره يارب ...
وربى يدوم الود والمحبه بينا
وما شاء الله امدايرات حفلة تعارف ههه

أهوا جبتلكن بانر


أنا وأعوذ بالله من كلمة أنا
ام محمد ,خريجة طب بشرى جامعة العرب الطبيه (توا سموها قاريونس ) من بنغازى
زوجى لا نعرفه لا يعرفنى هو من طرابلس وانا شرقاويه غير جابه النصيب سبحان الله
انخطبت وعمرى 24 سنه وقعدنا سنتين مخطوبين بس كل واحد فى مدينته مره مره ايجى ايزورنا وهلى مش من النوع اللى يخلونى نطلع امعاه او نقعدوا ابروحنا فيها قطع رقبه خخخخ
لكن عاد انهدرزوا فى التليفون خخخخخخ
وتزوجنا فى 28 شهر 6 سنة 1996 فى عز الصيف يا حناتى والمشكله الضى ديما هارب يعنى لا تكييف لا غيره
وزفتى كانت ابروحها قصه حاجزين لى فى الطياره يوم الاربعاء الصبح (داروه يوم راحه) وعلى اساس ننزل فى حوش سلفى وانتريح والخميس الزفه
هذاك اليوم تكنسل الطيران (كان فيه وفد افارقه جايين لليبيا وسكروا المطارات )
عروسه نحس وبعدك هذاك اليوم كانت الدنيا مقلوبه وعجاجات (بذمتك هذا يوم حد يتزوج فيه)
المهم حجزولنا باص واسقدنا يوم الاربعاء فى العشيه وهذاك الباص يدق بينا فى الطريق الساحلى
والبنات يقوللى ارفعى رجليك فوق بيش ما ايتنفخنش واتجى عليك الكندره
بعيد عنكن الرحله كلها رجليا فوق وراسى لوطه
مشى وجهى هو اللى تنفخ هههههه
المهم خشينا طرابلس الساعه 7 الصبح وما غمضتش حتى غمضه (تخيلتن شكلى)
وبدل ما يرفعونى لحوش سلفى مشوا بينا لحوش العرس وانا امبهدل وامشفشه فالوا الجماعه مشغولين عليكم وخلونا انطمنوهم زمان ما فيش موبايلات
المهم خشيت على هل العريس وحسيتهم انفجعوا :hahaha: :hahaha: :hahaha:
يسلموا عليا واكيد ايقولوا من هالغوله
والمشكله خواته اول مره ايشوفونى (ايقولن هذا ما جاب من الشرق خخخخ)
وبعدها درت حمام وقالوا هيا للكوافير
الكوافيره اسمها نبيله كانت فى حواء 2000 اكيد تعرفنها يا بنات طرابلس
المهم قالت لا ما نقدرش نشتغل على وجهك خشى ارقدى وانا عيونى زادن تنفخن من البكا والمواقف اللى صارت لى والغربه الجديده والحوسه اللى صارت ,,,,
ما جانيش نوم بس تمددت فى الكوافير وارتاح جسمى اشوى
لكن بعدها طلعت ما شاء الله وقعدت غير مشكلة الكندره اللى ما حوتك خشت من الرجلين المنفخات نين عبيناها بودره ,,,,
يا والله عليك ذكريات حلوه ألا ليت الشباب يعود يوماً ,,,,
وسكنت فى طرابلس احنا ساكنيين كلنا خمس سلفات وحوش عمى فى مزرعه(حوازه) وحده كل وحده حوشها .
وما شاء الله لمتنا حلوه وعيلتنا تبارك الرحمن متضامنه وقلوبهنا على بعضنا ولازم يومياً ننزلوا كلنا لحوش الحاج لوطه بيش نشربوا شاهى العشيه مع الحاجه وانهدزوا اشوى وصغارنا يلعبوا مع بعضهم
وعمرها ما جت بينا موجعه ولا سيه ولله الحمد
اللهم احفظ اهل زوجى وبارك لهم فى رزقهم وذرياتهم
والله ام زوجى لما انروح واتسلم عليا كأنى بنتها وحتى سلفاتى وحمواتى لما ايكلمونى فى التليفون مرات يبكوا لما ايقولوا استاحشناكم ...
المهم جبت محمد فى 28 اكتوبر 1997
ورويدا يا حناتى فى 10 اكتوبر 1998
يعنى قبل ما خوها ايصكر السنه (ست منتجه)
وبعدها جينا لكندا فى نهاية 99
وقاعدين فيها للان
وفى 7 2002 جبت ياسين
وهذا كل قصتى على الملأ
وكيف ما قالت ام تقى الدين التجمع كل الناس تقرا ومتابعه تجمعنا ,,,,
اللهم أسترنا فوق الأرض وتحت الأرض ويوم العرض ,,,,

خذنا التهدريز وما حطيتش الامتحان

أمتحان الجزء الاخير من جزء عم
أكملى رعاكِ الله

أعوذ بالله من الشيطان الرجيم
بسم الله الرحمن الرحيم
فأنت عنهُ تلهَى .............أولئك همُ الكفرةُ الفجرةُ
قالوا تلك اذاً كرةٌ خاسرةٌ .........عشيةً أو ضُحاها
عمَ يتساءلون ...........الا عذابًا

السلام عليكم و رحمة الله و بركاته

كيف الحال و الاحوال
جمعة مباركة باذن الله عليكم
ما تنسوش سورة الكهف و الدعاء
و علي فكرة ايضا ما تنسوش صيام الايام البيض يوم الاحد و الاثنين و الثلاثاء

و كل سنة و انتم طيبين بمناسبة المولد النبوي
و كل وحدة غدوة تنزل صورة عصيدتها

ام محمد
صفرة دايمة و صحتين

سامحوني اني توا مشغولة , لكن ليا رجعة بعدين
تحياتي للجميع

بسم الله الرحمن الرحيم
(( فأنت عنهُ تلهَى * كلا انها تذكرة*فمن شأ ذكره فى صحف مكرمة مرفوعة مطهرة بأيدى سفرة كرام بررة قتل الانسان ما أكفره من أى شئ خلقه من نطفة خلقه فقدره ثم السبيل يسره ثم أماته فأقبره ثم اذا شأ انشره كلا لما يقض ما أمره فلينظر الانسان الى طعامه انا صببنا الماءصبا ثم شققنا الارض شقّا فأنبتنا فيها حبا وعنبا وقضبا وزيتونا ونخلا وحدائق غلبا وفاكهة وأبا متاعا لكم ولأنعامكم فاذا جأت الصاخة يوم يفر المرء من أخيه وأمه وأبيه وصاحبته وبنيه لكل امرئ منهم يومئذ شأن يغنيه وجوه يومئذ مسفرة ضاحكة مستبشرة ووجوه يومئذ عليها غبرة ترهقها قترة أولئك هم الكفرةُ الفجرةُ))

لاحول ولا قوة الا بالله بعد ماكملت كتابة السورة الثانية طارت كلها