G Libya :

السلام عليكم كيف حال الجميع ليبية 100 *100 شفتي الموضوع وين رايح ..... وان شاء الله ربي يوفقك في الحفظ . والحمد لله على سلامة ولدك سلامات

السلام عليكم كيف حال الجميع ليبية 100 *100 شفتي الموضوع وين رايح ..... وان شاء الله...

em mohamed :

السلام عليكم ورحمة الله وبركاته صبحكن الله بالخير كيف حالكن اليوم ؟ حفظتن المرسلات وألا كسلانات ؟؟؟ ليبيه 100% الله ايسلمك ياغاليه وشكرا على الدعوات الحلوه حتى انا انحب الرشده لولا سريبها مرات اندير كميه وانبوخها وانحطها فى الفريز لكن توا انحس فى روحى ما عنديش جهد للماكينه والرز المبوخ حشا النعمه انا ما انحباش لكن الكسكسو المكرونه المبوخه هذين فى بالى شكلى انرسى على وحده منهن فكرتينى بأيام التصييف فى بنغازى الله كنا انعسكروا بالشهر فى بحر بوفاخره نحن وعيت عمامى ونمشوا فى الصبح للعمل وانروحوا على البحر وامدايرين مخيم كامل بماتوريات الضى ودايرين حبيله (شبردق )حوالين خيمنا ونروحوا من البحر زى الفحمه نين نلمعوا محروقين بس روعه روعه روعه . خصوصا لما اتنوضى الصبح بدرى وتنزلى للميه وما فيه حد فى البحر ألا طيور النورس وألا اتشوفى قوارب الصيد من بعيد (ايام لا تُنسى) وفى الليل اشوايات على الشط وبعدها تمسحى كبدك بجلوف الدلاع المسقع (يم يم) نايضه نشهى اليوم,,,, وصحيتى على المساعده كأنك عاونتينى انجيمه الله يسلمك ويفرح قلبك أن شاء الله ويبارك فيك ان شاء الله العقبه لكل من يتنى ولا يحرم منه ابنيه . عيونى شنو حالك اليوم ؟ الغدا حتى انا قلت هكى كسكسو والا مكرونه امبوخه وفكرت يا اما امبطن او طاجين جبن شكله الطاجين احسن من قلى البطاطا واسهل توا انشوف والمصير يا حنا نحن امصيرنا ديما واتى بس اندير فى طريقتكم مش امصير الشرق . ومع الشوايات الطحينه والسلاطه المشويه هذين اساسيات بس العيال الصغار هم العقده شنو ياكلوا السلاطه المشويه لانها حاره ما ياكلوهش وبعدين فيها تغميس مايعرفوش ايغمسوا يبوا هكى حاجه اتشبع البطاطا المبهره قصدك هذه اللى تسلقيها وبعدين اديريلها تتبيله واتحطى عليها جبنه وفى الكوشه والا حاجه ثانيه ؟ ونرجى فى الحلويات خخخخخخ غاده ربى يشغلك فى طاعته ياحنا الله يسلمك والعقبه ما نفرحوا بيك يوم عرسك وأن شاء الله كل شيئ على البركه . امل الله يسلمك ويبارك فيك أن شاء الله وشكله الكسكسو حبيب الكل وسريع فعلاً لو تبى اديرى امعاه كم شكل ثانى واتضمى وتستعدى للضيوف والشربه صح روعه لكن ياكلوها ويسيبوا الحاجات الثانيه(الماكله الغليظه) والبيتزا حتى هى اعتمدتها خلاص بأذن الله انديرها حياة الحلوه الله يسلمك ياغاليه وربى يفرحنا بيك حتى انتِ وشكرا على عرض المساعده كأنك جيتى ياريتك اقريبه يا حنا لو كان هذا ما نطلب من اعز منك والوصفات نعرفهن بس مازال ما استقريت على انواع السلطات (انقول سلاطه مشويه وطحينه حوش وتبوله هذين ان شاء الله انديرهن ومعاهن البيتزا وتوا انشوف شنو اخرى امعاهن) ذات الهمه الله يبارك فيك يا احبيبه ويفرح قلبك بقرة عين ويجعلها ذريه صالحه عاجلا غير اجل والله ديما فى بالى وحاسه بشعورك(وخجلانه منك) ان شاء الله ربى يرزقك بالولد الصالح عما قريب وديما ادعى ربى لا تذرنى فرداً وأنت خير الوارثين ربى ما ينسى حد وفضله واسع وهو الكريم فى عطائه ويرزقك من غير ما تحتسبى توكلى عليه وتيقنى انه حيستجيب اهم شيئ لا تقنطى من رحمته وكرمه وابعدى عنك وساوس الشيطان وان شاء الله ربك يفك سحرك بس ما اتخليش حكاية السحر اتسيطر على تفكيرك واتخليك تعتقدى انها السبب فى ضيقك وتأخر حملك نبى انقولك ليش ما تمشى لأخصائى نفسى يمكن سبب الضيق يكون حاله نفسيه تمرى بيها بسبب تأخر الانجاب امشى وما اتقوليش لحد(بسبب عقلية الناس فى مجتمعنا) حتى الفضفضه اتريحك حنجيبلك اسم اخصائى ممتاز غير نسأل زوجى والطب دواء وسبب من الاسباب وبأذن الله اتفرحينا قريب ليبيا قلبى الله يسلمك ياغاليه ويفرحك ونفرحوا بيك حتى نحن ,,, وتسلمى على طريقة الحلويات أن شاء الله السله انديرها عجبتنى على الاخر بس نبى نعرف شنو نوع الشوكولاته (امتاع الكيلو قصدك ) تسلم ايديك ماشاء الله تبارك الرحمن اليوم نبى اندير معمول بالحلقوم امس لقيت حلقوم فى محل عربى وان شاء الله اليوم انديره وانصوره لكن ولو عندى وقت اندير امعاه حاجه ثانيه وربى يعاون ان شاء الله باقى البنات شنو اخباركن ووينكن اليوم غاطسات ؟

السلام عليكم ورحمة الله وبركاته صبحكن الله بالخير كيف حالكن اليوم ؟ حفظتن المرسلات وألا...

G Libya :

السلام عليكم كيف حال الجميع لقيت الموضوع في الصفحة الثانية قلت نرفعه بالك لبكرة يريح في الغريق ويبقى بعيد بكّل هيا توا تصبحوا على خير

السلام عليكم كيف حال الجميع لقيت الموضوع في الصفحة الثانية قلت نرفعه بالك لبكرة يريح في...

G Libya :

السلام عليكم ورحمة الله وبركاته كيف حالكم اليوم يا بنات ام محمد كيف حالك اليوم , وشنو صار في العزومة حتى نحن اليوم كان عندنا عزومة توا بس كيف كملت عازمين خالي اللي وصل من السفر الاسبوع اللي فات وبيسافر بعد 3 أيام ومعاه خوالي اللي قاعدين هنا درنا العشي شربة وعصبان وبيتزا وطاجين جبن ودجاج مشوي وبالنسبة للحفظ الحقيقة انا ماحفظتهاش سورة المرسلات وان شاء الله نحاول نحفظها بكرة او السبت اذا حصلت وقت فراغ و لكن الحمد لله راجعت جزء عم كامل مع بنات حافظات الربع وسمعوا عليّا حياه اهلا يا غالية توا فتحت الياهو لقيت منك اوف لاينز ولكن الياهو باين عليه فيه مشكلة عندي لأن طلع لي رسالة خطأ بكرة ان شاء الله او في احد الايام القادمة انعاود تحميله عالجهاز توا وانا نكتب طلع لي تحديثات والله ماني عارفة شنو قصته أمل كل عام وانتِ بخير وربي يطول عمرك في طاعته ذات الهمة كيف حالك ربي يرزقك الذرية الصالحة والدكتور اللي قالت لك عليه ام تقي الدين (المحيشي ) اللي في مصراتة كان تبي رقم الهاتف والا العنوان قولي لي وانا نبعته لك ماهو امي دارت عنده عملية العام اللي فات لكن الموعد كيف ماقالت ام قي الدين ايضا يتأخر تبي تراجي فترة بيش تحصلي موعد معاه ام تقي الدين كيف حالك . وكيف حال اهلك وعائلتك ليبيا قلبي كيف حالك يا غالية , وعاش من شافك وتسلم ايديك عالحلويات الروعة ماشاء الله تبارك الله تعرفي ذكرتيني بالكعك متاع الجلجلان المعسل درته في العيد اللي فاتت هههههههههه حصلت فيه وماعرفتش نتفاهم معاه ماهو انا مانعرفش نبرم الكعك هههههههه لكن قاومت وكملته وطلع حلو هو الكعك بجميع اشكاله عندي معاه مقالب الايام اللي فاتت خاطري في كعك درت كعك اللي يطلع من القمع بيش مانتعبش في البرم هههههه ليبية 100*100 كيف حالك وكيف حال ولدك توا ان شاء الله احسن اريام كيف حالك يا غالية و ان شاء الله عتبة مباركة وسلامي للجميع .... سامحوني مانقدرش نكتب بالاسم ماهو مستعجلة سلامات

السلام عليكم ورحمة الله وبركاته كيف حالكم اليوم يا بنات ام محمد كيف حالك اليوم , وشنو...