ما شاء الله ,لا قوة ألا بالله
الموضوع عامر ومنور بوجودكن يالغاليات
أن شاء الله ديما على الخير ملتمين ,,,
معليش أنا ضعيفه فى كتيبة الواجبات ومش حنقدر أنرد عليكن بالوحده عينى ما اتضركن ,,,
سلفيه أن شاء الله ربى يسمعكم أخبار طيبه على عمك ويهدى بالكم وردى بالك من زوجك صبريه حتى هو بوه ما ابعيده ,,,,

عيونى كيف حال حناك اليوم وشن صار فى عمليتها أن شاء الله لا سو لا سويه

امواج امعرض خير يا حنا وين تلودى على الصبح اسمعى تشلدرن بليس امنزلين دبش ايهبل امتاع بنات عدى اشرى لزوبه منهم .

ليبيا قلبى تعرفى نسيت لعيت من ؟
لما انكلم امى توا نسألها أن شاء الله

جرين ستار ومرام وأم مودى (ام الصيصان) وغاده وحياه وليبيا قلبى وأم ألاء ومهاد والمصباحى وهنو (هناء) وتقربصتى وانجيمه وليبيه 100%شنو حالكن يا لغاليات وأن شاء الله ديما طيبات

خطرها نبى انبهكن أن كلمة أن شاء الله تُكتب هكذا مش أنشاء الله للفرق فى المعنى بين الاثنين

ومرحبتين بأخواتنا اللى شرفنا
سهلوله وبهراء وجارتى ريحانة السنه
بيتكن ومطرحكن وشاركونا الحفظ بأذن الله فاى فضل أفضل من الاجتماع على حفظ كتابه تعالى
نسأل الله أن يعيننا على حفظه ويثبته فى قلوبنا .
وبأذن الله الحفظ حيبدأ من يوم الاثنين القادم وخلينا فتره علشان الكل يستعد ويتهيأ وما نقبل بالكسل والتقاعص
حفظ يعنى حفظ (ما اديرنش اسبل )رانى أبله واعره
كل يوم خشن سجلن حفظكن هنا وكيف ما قلت فى نهاية كل جزء فيه أمتحان كتابى يعنى أكملى
الامتحان حيكون كتابه بخطك مش تنسخى وتلصقى
وأكتبى من راسك (هذه كل وحده وضميرها وفيه من شاهد عليها) خخخخخخ
مش قلتلكن ابله واعره
لا بجديات لازم من القشاطه اشوى بيش بأذن الله نحفظوا
لو نتعاونوا بهالطريقه مش حيأخذ منا هلبه وقت الحفظ ويقعد فيه تنافس (وفى هذا فليتنافس المتنافسون)
اليوم الحمد لله حالى اكويس وحاسه روحى ناشطه وفى نفس الوقت حاسه انى الفتره اللى فاتت قصرت واجد فى فروضى
بديت يومى اليوم بالاذكار بيش ربى يفتح عليا وانحس انى نبى اندير كمين حاجه انعوض بيهن اللى فات ....
المهم فكرت انتعاونوا مع بعضنا بيش الاجر يشملنا كلنا
مشكلتنا هى المداومه على الطاعه ومحاربة هوى النفس الاماره بالسوء
يعنى ايجن أيام الواحد متحمس وما شاء الله عليه وأيجنه أيام ينقلب شخص ثانى ويقعد يتهاون فى الطاعات وتأخذه ملاهى الدنيا وينسى أنه بكرا يبى يرقد فى اشبر
ما نبيش نقلبها غم
بس المفروض نعملوا لأخرتنا لأن الموت قريبه وأتجى فجاءه والرسول عليه الصلاة والسلام كان يتعوذ من موت الفجأه...
قال الرسول عليه افضل الصلاة واتم التسليم((افضل الجهادأن يجاهد الرجل نفسه وهواه))
ربى يقدرنا على جهاد النفس...
وأول خطوه تكون من هنا خُذي قرارا بنفسك على أن العبادة هدفك، و يجب أن تكون نيتك خالصة لوجه الله عز جلاله,,,,
أيضاً نظمى حياتك العباديه وحطى جدول لأنه حيساعدك على تحقيق هدفك .
يقولوا أن سبب الفتور فى العباده هو كثرة الذنوب (اللهم اغفر لنا )
علينا بكثرة الاستغفار والدعاء والالحاح فى الدعاء ,,,
يا بنات نحن مش مهتمين بعبادة الدعاء بس والله مفعوله قوى وسبحان الله ايقولك الدعاء يصعد الى السماء فيقابله البلاء فيتصارعا الى أن يغلب الدعاء ويرد البلاء
فلازم تكثرى من الدعاء فى السجود وبخشوع وتخيلى انك قاعده تناجى فى ربك وهو قريب جداً وبأذن الله يستجيب لك .....
وحطن فى بالكن إن الله يقبل اليسير من الأعمال، إن كان الإخلاص يتوجها..
(قليل متصل، خير من كثير منقطع)،(وإن أحب الأعمال إلى الله ما دووم عليه، وإن قل).

وأيضاً نوعى فى العباده وأبدأى باليسير منها
يعنى لو تبى تقيمى الليل ما تثقليش على روحك وترهقيها لأنك حتملى بسرعه والشيطان حيقعد يوسوس لك بالتكاسل ويصور لك الركعات اللى تبى تصليهن انهن جبل لعند ما اتبطلى
فخوذى بالتيسير حتى لا تملى وتنقطعى .
وصدقينى لو صليتى ركعتين بس فى جوف الليل وبخشوع وبكيتى حتحسى بلذه وحتابعى الصلاه كل ليله
وسبحان الله تقعدى كأن حد اينوض فيك من النوم والله احيانا نسمع فى حد ينادى اسمى وانا راقده نين انوض ونفتح عيونى ,,
ايقولوا ان الملائكه هى اللى اتنوض فى العباد والله اعلم
شكلى بنبدأ فى الطقربه
خلى نمشى اندير برمه ونرجع نحكيلكن على حاجه أخرى
مش قلتلكن متحمسه
ورانى يا ما يطلع منى لما انتحمس فاستغلنى قبل ما تفتر الهمه ,,,
فى امان الله توا

الله يسعدكم على ترحيبكم الغالي على قلبي والله يبارك فيكم خواتي بس حبيت اسال الي عندها خبرة اني الحمد لله حامل بنهاية الاسبوع السابع بس معدتي ذبحتني طول اليوم بشكي منها ايش هو الحل فيه شي يخفف الالم:09: لو سمحتم مشكورات

السلام عليكم ورحمة الله

شو هاد يا ام محمد مواضيع وعناوين وحركات واكسسوارات شي بياخد العقل ....

خلص أنا غرت منكم كتييييييييير ورح اعمل موضوع أحلى من هاد


ههههههه


حبيت سلم عليك انت واخواتي الليبيات الحلوات .. وبدي قول

الله يديم المحبة والمودة بيناتنا دائما على الدوام

أحبكن في الله ......

مبروك بهراء ربى يتمم لك على خير ويثبت حملك ويرزقك الذريه الصالحه .
ما فهمت معدتك تألمك يعنى تشتكى من الغثيان وألا مجرد ألم بالمعده
لو عندك غثيان وقئ بيسبب وجع بالمعده ويمكن تستخدمى دواء اسمه Diclectin
بس لازم من وصفه طبيه روحى لطبيب العائله ويكتبه لك
وعلى فكره الدواء غالى بس ممكن الطبيب يكون عنده سامبل ويعطيك ببلاش
لكن الدواء مفيد جداً جداً اضافه الى انه امن للحوامل
وكمان لازم تأخذى حبوب حمض الفوليك تلاقيها جهة الفيتامينات بالصيدليه ومو محتاجه وصفه بس لازم تاخذيها لانها تمنع التشوهات فى الجهاز العصبى لللاجنه ,,,
ويارب يتمم حملك على خير ويقوم سلفيه بالسلامه ويرزق ذات الهمه بالذريه الصالحه

مين ؟؟؟
شامو عندنا ؟؟؟
أحبكِ الله الذى أحببتنا فيه يالغاليه
وأنا اقول ليه الموضوع منور ؟
اتاريك عنا
كيفك؟ وكيف أخبارك ؟ وكيف الاولاد أن شاء الله امنيحه (اشلونى معك ؟)
وياستى لا حركات ولا شيئ مجرد أنتوا سبقتونا بموضوع السوريات
قلنا نعمل اشوى لفت انتباه ههههههه
لتكونوا غرتوا من حلاوتنا ؟ يخزى العين انتوا كمان ينغار منكم (نتغزل فى بعض)

بس يا خوفى يقلب القسم كله تجمعات وبلاها مواضيع غربه

ونورتينا بمرورك