السلام عليكم ورحمة الله وبركاته
انا جيتكم غير يارب متكونيش انستونى بس :) اكيد خليت مكانى وستخشتونى ههههههههههه

كيف حاللللللللللللللللللللللللللللللكم يا حلوات ليكم وحشه على الاخر اشتقتلكم واشتقت للهدرزه معاكم
طبعا الصفحات اللى فيتتنى هلبه ومنقدرش نقراها قريت الصفحتين الاخيرات بس وفهمت من الدوه انا ام محمد حامل وامواج :icon28: ااااااااااااااااااااااااااالف مبارك عليكم وربى اكمل عليكم بالخير والصحه وعينكم على الحمل :09: ويرزقكم اللى تتمنوه
خاطرى نعرف اخباركم كلكم هدرزولى على احوالكم ؟؟؟؟؟

سلامى ليكم كلكم
عيونى سهارا وامواج وام محمد ومشميشه وتقربصتى ومرام وام تقى الدين واريام الحنين وام مودى حياه حلوه وغاده وليبيا قلبى وقرين هناء ولوشا والمصباحى وليبيا 100ومرت راجلها ومدام على
وكل البنات الاخريات سامحونى مكتبتكمش

السلام عليكم

:icon28:

الحمد لله على سلامتك سلفية ان شاء الله انسجمتوا ولقيتوا هلكم طيبين طلهم وكيف ننسوك يا غالية وكيف حال العيال ان شاء الله بخير والبنوتة كيف حالها شنو اسمها ؟انسيته؟؟
:)
سلامات توا

:26: :26:

السلام عليكم ورحمة الله وبركاته
كيف حالكم جميعااااااااااااااااااااااااا
سلفيه------حمدالله على السلامه،،كيف حالك وحال اسرتك واهلك فى ليبيا واهل زوجك،،ما شاءالله مسرع ما تمشى الايام ،،،،كيف حال البنوته -----ان شاء الله نسمعوا عنك كل خير:) :26:
ليبيا قلبى ----كيف حالك ،،ان شاء الله الليله انكلمك
عيونى --ما شاء الله لا قوة الا بالله رااااااااااااااااااااااااااااااائعه ،،منظرها رقيق وحلو وفكرتها حلوة جداااا وساهله ،، بارك الله فيك يا عيونى ( لقبك ايخلى فينا اندلعوك بالسيف:hahaha: )
مرااام كيف حالك واسرتك،،،بارك الله فيك وان شاء الله نسمعوا عنك كل خير
بقية البنات ان شاء الله كلكم تكونوا بخير:) :26:

السلام عليكم ورحمة الله وبركاته

كيف حالكن يا حبوبات كلكن بدون أستثناء ...
سلفيه شنو أخبارك وكيف صحتك توا ؟
وكيف حال العويله وكيف حال البلاد والعباد ؟
روحتى وألا تكتبى من غادى ؟
وليكِ وحشه يا غاليه ربى يجمعنا بيك على خير ويوصلك سالمه وين ما كنتِ

عيونى
ما شاء الله تبارك الرحمن ,,,
عجبونى الحلويات وقررت توا توا نمشى انجيب العجينه والمكونان
بس التوت والكرز المجفف فى أى مكان محطوطات وعصير الكرز المركز حتى هو شنو شكله
نبى كل حاجه بالتفصيل وصورتها (وحده حصله طحتى فيها )
والوردات حتى هن من وين (من الدولار؟)
نبى انديرهن اليوم كان سخر ربى وتوا انزل صورتهن (وحده تحب تقلد ههههه)

ناويه على نيه
اهلين حبيبتى
واعذرينا قصرنا معك بس ظروف دخولنا للنت صارت تمنعنا
عموماً الهدايا للعرايس مثل ما عندكم بالسعوديه ممكن تهديها أى شيئ
وفى ليبيا كل شيئ موجود بس عموما العروس تهديلها اما اشياء خاصه لأستعمالها وافضل شيئ الذهب
أو تهديلها اشياء لبيتها شراشف أو مفارش أو عطور .....
بس الملابس الداخليه وفساتين النوم احسها كل وحده تحب تختار على ذوقها وخصوصا العروسه كل اهتمامها بملابس النوم فى الشراء يعنى اكيد مكتفيه ....

ليبيا قلبى بالعكس ليبيا مليانه محلات ملابس العرايس وعندهم تشكيلات روعه واسعارها رخيصه
وفيه الايطالى والفرنسى والسورى خامات حلوه
المدينه القديمه فيها محل فى وسط الزناقى عنده تشكيلات روعه
انا لما نزلت شريت كم حاجه منهم وراجلى واقف قدام المحل ايعيط هيا سقدى روحك (لأن المحل زحمه نساوين وهو تحشم يخش امعايا جوا وأنا انقطعت رقبتى جوا وقعدت انهدرز مع النساوين ونختاروا فى الفساتين ونحساب روحى عروسه قعدت انمارى فيهن اللى يشرنها نشريها )

ام تقى الدين
كيف حالك وحال اوليدك ان شاء الله احسن توا ...
وربى ايخليلك اصغارك ويقدرك على تربيتهم
وصدقتى التربيه مسئوليه وكل ما يكبروا كل ما ايزيد الحمل والتخميم .
والله أنا عايشه فى كابوس وكل ما انشوف حاجه نقعد ماسكه قلبى
امس بنتى طولت ما طلعت من الفصل وخوها طلع قبلها وجانى قال لى يا ماما رويدا ما لقيتهاش
انا وين تلقينى ؟
وشويه البنت طلعت تمضغ فى مستكه قريب زقبت عليها وقطعتها فى الشارع
اتاريها الابله شدتهم اتهدرزلهم على مدرسة المتفوقين هى والاثنين اللى نجحوا فى الامتحان وقعدوا ايهدرزوا ويرتبوا فى الفصل وعطتهم مستكه ...(قابلت اابله فى العشيه وقالت لى على اللى صار)
انا عاركت بنتى وقلت لها اول ما يضرب الجرس اطلعى مع انها ما قعدتش خمس دقايق ومعش دخلك فى الفصول اتضمى شنو خصك أن شاء الله ايدودن
وعاقبتها فى دارها بالحبس
بوها قال لى خفى على البنت مش هكى ما دارت شى توا اتعقديها فى عيشتها واصلا ما تأخرتش غير انتِ اللى شهداره وولدك اشر منك والمدرسه مليانه طلبه ..
لكن والله الواحد مش بأيده كل حاجه اتخوف فى هالوقت .
ربى يسترنا ويستر اعويلتنا ويحفظهم ...
يا بنات انحس فى روحى قعدت قالقه على العيال اكثر من قبل وطول الوقت وانا انفكر كيف انتعامل امعاهم وكيف انفهمهم
راسى قريب ينفجر
انشوف فى المراهقين هنا وفى ليبيا ويدى على قلبى كيف عيالى حيطلعوا ؟
اللهم انبتهم منبتاً حسنا ...
عارفه انى امكبره القصه وامحبكاها بس بجديات متخوفه وديما ندعى لهم بالصلاح والتقوى

هذا غير مازالوا صغار امالا بعد يكبروا اشوى شنو ايصير فيا

فعلاً يا ويلنا من ولدينا زى ما ايقولوا الليبيين ....

ليبيه شنو حالك ؟
ويا حنا انا امنزله كم موضوع صور
السنه اللى فاتت مشينا ندهوروا فى مقاطعه على المحيط الاطلسى اسمها نوفا سكوتيا ونزلت صورها فى موضوع توا اندوره لكِ وتفرجى على جمال كندا ...

امواج
شنو حالك وشنو صحتك ؟
اسمعى نبوا انجوا لألبرتا فى شهر سبعه (زوجى قال لى البرتا وألا بريتش كولومبيا اختارى )
انا خاطرى انشوف بانف والروكى ماونتن وجاسبر ....
المهم اقترحى علينا المكانات الحلوه عندكم
والسكن سألنا قالوا احسن حاجه الكوتج
نبى اندير برنامج سياحى حلو خلينا نشوفوا جمال الخالق وروعة تصويره سبحانه .
انراجى فى اقتراحاتك
على فكره رحلتنا بأذن الله تبدأ يوم 25 يوليو وعندنا 10 ايام ....

اريام
كيف حالك وحال الاولاد؟
ممكن الخيره فيما اختاره الله
وممكن البيت اللى انتوا فيه الان افضل لكم وربى منع عتكم شر البيت الثانى ما تعرفى ؟
المهم تكونوا مرتاحين الحين
ربى يطوى غربتكم على خير

مرام
شنو اخبارك وشنو حال العيال
وبشويه على حموده الاولاد بسلامتهم كلهم حركيين
وبعدين الواحد لما يكون عنده عيال يقعد عارف فما عندك عليش متحشمه من صاحباتك اكيد امهات وعيالهن نفس الشيئ ...
ربى يفرج همك وكربك ويجبر بخاطرك ويفرحك ..

حياة
وينك مش باينه أن شاء الله ما فيش حاجه
تعودنا بدخولك المتواصل
ما تحرميناش من مشاركاتك وسؤالاتك
ربى يوفقك ان شاء الله

باقى البنات أن شاء الله كلكن بخير

أمتحان الاسبوع هذا فى سورة المرسلات

أكملى رعاك الله
فاذا النجوم طُمست ......فبأى حديث بعده يؤمنون .


الاسبوع الجاى سورة الأنسان (ساهله)

موفقات

السلام عليكم

كيف حالكم يا بنات ان شاء الله تمام

انا اعذروني على غيابي ماهو عندي التهاب جيوب انفية وحساسية
امس مشيت للدكتور عطاني دواء نحس في حالتي زايدة تاعبة ,, اليوم جايتني كحاحة ونحس في رقبتي كأنها مخدشة من داخل

سلامي للجميع