السلام عليكم:)
ام محمد
كيف حالك وحال الدكتور والاولاد قريته موضوعك امتع الشلالات ما شاء الله ان شاء الله نحفظ سورة الملك
ام التقى
كيف حالك ربي يعينك على الشراء ايه هذا كلير اللي امدايراته انا في بريطانيا بالضبط في الشمال الغربي مدينة اسمها ويقان في جنب مانشستر
عيوني
ان شاء الله لباس عليك بعيد السوء كيف ننسوك هذا اخر ما تفكري فيه ربينا كبيدة على بعض تعرفي بديت اليوم اللي ما نخشيش فيه يبدا قلبي معلق واول ما نفتح الكممبيوتر اول حاجة نشوفهانخش للمنتدى احنا حالنا الحمد لله
تقربصتي
سلمك كيف حالك انت والدكتور والصغار ان شاء الله بخير
قرين ستار
وينك مش مبينة كيف حال بنيتك ان شاء الله اخدت على قلة صبعها
مشيمشة
كيف حالك وربي يساعدك على حملك انت وام محمد وامواج وان شاء الله تنوضوا بالسلامة
امواج
كيف حالك وينك ان شاء الله المانع خير
وسطية
كيف حالك وشكرا على الاحكام ان شاء الله في ميزان حسناتك
ليبووالتحنو
اهلا بيك في لمتنا الحلوة
ليبية100 100
كيف حالك وحال زوجك والصغار ان شاء الله توا احسن وتمشي وتجي بالسلامة
حياة حلوة
وينك معاش باينة خوشي طمنينا واطلعي
باقي الاخوات ج ليبيا... كوكم... ليبيا قلبي... سلفية ...هناء... مرت راجلها ...ام مودي وميمي ..good life ..مرام ...ذات الهمّة ... ..لوشا..ام ءالاء..... delyon.... بهراء .... بتول...
ان شاء الله تكونوا بخير:26: :26: :26:

www.islamweb.net hda moka tane feh moshaf le dokale aalem abo sneana wa alamen gnewa

السلام عليكم ورحمة الله وبركاته كيف حالكم يا بنات ؟ وشنو اخباركم كلكم ؟
يارب اتكونن بأحسن حال

انا الحمد لله لكن مشغوله مع العيال ربى يحفظهم وما بين وصل هذا وجيب هذا واشرى هذه ...
سجلتهم فى النشاطات الصيفيه وبدوا من توا ودرتها فى روحى
حطيتهم فى كرة القدم هم الثلاثه حتى البنت خلى يلهدوا بالك يطلع واحد منهم املاعبى (مارادونا )
على الاقل انديروا طارق التايب واحد ثانى ما شاء الله عليه
السعوديين لما تسمعيهم يشكروا فيه اتخافى على ولدنا من العين ...
والحمد لله عندنا مواهب غير تبى من يهتم بس ..
اتقول قعدت رياضيه على غفله
المهم شنو اخباركن انتن ؟

امس كلمتنى امواج وراهى تعبانه هلبه من الوحم
ربى يكون فى عونها
حالها( حال الكرموس فى الغراره )ما نعرفش شنو معناها بس العزايز لما تنشديهن هذا ردهن ..
المهم الوحم امتعبها هلبه والترجيه وجنابها واجعاتها
وربى ايهون عليها ان شاء الله ويتمم حملها على خير

عيونى
لا باس عليك أن شاء الله هذا حد السو
حتى انا اليوم نايضه نعطس وعيونى يحرقوا شكله الحساسيه امس قصوا الزرع عطهالهم
بعيد السو عليك

امشيمشه
شنو اخبارك وكيف حملك وكيف حال الصغار والدكتور ؟
ايه ريتى النوم سلطان سبحان الله
البنى ادم يقضى ثلث عمره فى النوم والحوامل زيديها ثلث
معناها ضاع العمر يا ولدى ...

وسطيه
شنو حالك وشنو حال اوليدك ؟
وبارك الله فيك على الشرح
عاد انا سمعتى عليا الملك (الوحيده اللى لاصقه فى جزء تبارك)
وبارك الله فيك على الاحكام
بس انحس اللى ما عندش فكره مش حتكون واضحه هكى ..
قصدى ابدى زى ما عطيتينا احنا الاحكام عامه وبعدين الامثله كيف ما قلتى
يعنى خشى احكام الميم والنون وكيف تًنطق وبعدها الامثله من الصور
فيه موضوع توا انحطه فيه بالتفصيل
ويا بنات فى موقع طريق الاسلام فيه الشيخ احمد عامر امداير شرح وافى حطى المحاضره واسمعيها راح تفهمى
ووسطيه الله يبارك لها فى علمها وذريتها تعطينا التطبيقات واتزيد اتوضحلنا
بأذن الله اندور لكن الوصلات

ام تقى
ربى يعينك على التسوق بالصغار
مشية ليبيا الواحد يقعد ملهوف عليها لكن لما ايجى مشروع الهدايا وحوستهن الواحد يتلخبط وما يعرف شنو ايدير ولا كيف ايرضى الاحباب كلهم
واقامه سعيده فى طرابلس
عندى اختى انتقلت الاسبوع اللى فات لطرابلس
زوجها مهندس كمبيوتر انتدبوه غادى
امى قريب تنهبل وخصوصا نحن بنتين وحده فى كندا والاخرى مشت لطرابلس
تمشى واتجى بالسلامه

تقربصتى
شنو اخبارك ؟ وشنو حال البنات والدكتور ؟
وبأذن الله نهاية الاسبوع نبعثلك ..
انا ما عرفتش توقيتكم بالضبط نبى نعرف الفرق بيش انكلمك ...

امل
شنو اخبارك ؟
ما شاء الله سلم ايديك
يا بنات واضح انه كلير
وان شاء الله اتزوروا كندا اقريب
وحتعجبكم بالتأكيد
مش قصدى الطبيعه فقط
لكن الناس وتعاملهم وحتشوفى فرق كبير بينها وبين اوروبا
افضل شيئ ما اتحسيش انك غريبه لأن الكل مهاجرين فتخشى فى الزحمه وخلاص
اضافه الى اخلاقهم افضل بواجد من اخلاق الاوربيين
يعنى ما تشوفيش مناظر فاضحه الا نادراً جداً
حتى الاماكن المشبوهه امدايرين عليها ستائر سود بيش ما اتشوفيش شيئ
ومكتوب للكبار فقط ويطلبوا فى البطاقه علشان يتأكدوا من الاعمار
اضافه الى ان الشهادات الكنديه تعتبر الافضل وتقابلها الامريكيه فقط خصوصاً فى المجال الطبى
يكفى ان كندا تعطى الاطباء فرص المشاركه وما يعطوش الطبيب الشهاده ألا بعد ما يعصروه عصر ويحرثوا عليه خمس سنيين وهو طالب وما يتخرج نين ايكون مشتغل ومارس المهنه واشتغل بأيديه.
مش مجرد امتحانات كيف اوروبا وخلاص خوذ شهاده ...
هذا غير التقييم الشهرى واللى يتأخر اشوى يطردوه
وعندهم عادى فى اخر سنه ويفصلوه من البروقرام كان مش فى المستوى المطلوب او تقاريره الشهريه ناقصه ومش امكمل الروتيشن امتاعه ...
على راى زوجى ايطلعوها بجلدتها ....
ربى يوفقكم واتجوا وتدهوروا وتشرفونا ..

يتبع

كوكم
شنو اخبارك ؟
وكيف جو موريتانيا ؟
احكيلنا عليها اشوى
انا انحس فيها صحرا موريتانيا ما نعرفش عليها شيئ الا من الاعلام وانه ديما صراعات على السلطه
وما شاء الله عليك وعلى رحابة صدرك
ربى ايزيدك من فضله
ونتشرفوا بأنضمامك لسفينة المغتربات الليبيات .

ليبيه شنو حالك ؟
وكيف حال الصغار ؟
وتمشى واتجى بالسلامه ان شاء الله

الليبو والتحنو
انستينا يا غاليه ونتشرفوا بمعرفتك
ناقص المشواش فى اسمك (على راى وسطيه فكرتينا بالتاريخ )
وفيه هلبه ليبيين فى استراليا كيف ما تعرفيش حد ؟
حتى تقربصتى مش بعيده منكم فى نيوزلندا اهو اسمها عايشه فى نفس المناخ ..

ام تقى هذين القبائل الليبيه القديمه
التحنو والليبو والمشواش
نتفكر فى الصوره فى كتاب التاريخ القديم (مش تحسابنى عزوز راهو غير انحب الاطلاع هههه)
امدايرين صور اجدادنا الليبيين زى المومياءات ...
خطرها المفروض انعرفوا بتاريخنا ...
تبيلنا كتاب الدكتور اخشيم للقبائل ...

اريام
كيف حالك وكيف الاولاد
وما شاء الله حارسه الموضوع
علشان كده احنا نايمين تاركينه فى عهدتك
الله يوفقك ويبارك لك بوقتك

اطفالى حياتى
كيف اخبارك ؟
وكيف حال اصغارك ؟
ربى يعينك ويقدرك
نبى نسألك قداش اعمارهم ما شاء الله وكيف امدايره امعاهم
انا بسلامتهم صغارى نجرى طول اليوم وحاسه روحى امقصره خصوصا فى حكاية تعليمهم العربيه
مع انهم الحمد لله يعرفوا يقروا ويكتبوا اكويس بالعربى
لكن لما نحكى لهم باللغه العربيه والا يتفرجوا على التلفزيون يقعدوا ينشدوا هذه شنو معناها ؟
لازم ما انترجم بالعاميه الليبيه بيش يفهموا
العويله تلخبطوا ثلاث لغات وزيديها بدوا لهم فرنساوى فى المدارس ...
يا بنات نصيحه اللى اعيالها مازالوا اصغيرين ركزى على العربى خبر ما يكبروا واتضيع اللغه ...
انا الحمد لله اعيالى افضل من واجدين هنا لكن مش مبسوطه بدوتهم وخصوصا كان لعبوا مع بعضهم بالانجليزى بس ...
مع انى من مرواحتى السنه من ليبيا مانعه الانجليزى فى الحوش لكن لازم يغلبونى ...
خاطرى نحشيلهم العربيه فى دماغاتهم حشى
وخاطرى يعرفوا كيفنا زمان كل حاجه
زمان كنا نقروا فى قصص يوسف السباعى وديكنز وفيكتور هيجو فى الابتدائى والاعدادى
توا حتى امتاعين الجامعات ما يعرفوش من هذوم ؟

ليبيا قلبى
الحمد لله على سلامة اختك
وربى ايطمنكم على المولوده ويكتمل نموها ان شاء الله
وتطلع سليمه ويحسن خلقها وخُلقها ...

حياة
كيف اخبارك وكيف حال امك ؟
وكيف ما قالن البنات وينك معش باينه ؟

غاده
شنو اخبارك ؟
وان شاء الله نفرحوا بيك قريب
بشرينا

ام على
كيف حالك وكيف حال بنغازى وعربها ؟

omalaa2005
كيف حالك ؟
مش حطيتلك لوحة المفاتيح
كيف ما عرفتيش تستخدميها وألا شنو ؟
جربيها بيش تكتبى بالعربى
راهو المعنى ما يوصلش الا لما تعبرى بلهجتنا
ومشكوره على المواقع .

نجمه.. وقود لايف .. .. سلفية ...هناء... مرت راجلها ...ام مودي وميمي ....مرام ...ذات الهمّة ... ..لوشا.... delyon.... بهراء .... بتول...انا اعتزلت الغرام ..
وكل البنات ان شاء الله حالكن باهى
وان شاء الله ما نسيتش حد ...

السلام عليكم و رحمة الله و بركاته

كيف حالكم اليوم و ان شاء الله كلكم كويسين

بارك الله فيكم علي السؤال و سلمكم نشادات
اني توا الحمد لله لكن المشكلة ان صوتي قاعد هارب و بعد غدوة عندي امتحان قبول ادعولي ان صوتي يرجع قبل الامتحان و ان الله يوفقني و يفتحها قدامي و يسرلي امري

تحياتي ليكم كلكم وحدة وحدة