:) اهلا وسهلا بيك ليبياg
كيف حالك ياحلوة يسلمو ايدياتك على البريوش والكيكة ماشاء الله عليك شكلهم ياخد العقل ان شاء الله معرفة خير وربى يحفطك وخليك

السلام عليكم ورحمة الله وبركاته

كيف حالكن اليوم يا بنات ؟
انا اليوم احسن والصداع طار
ما تريحتش نين فشيت غلى فى العيال وبوهم وهذا اللى طير الصداع خخخخخخخ

المهم ان شاء الله كلكن حالكن باهى
مش حنقدر انرد عليكن بالوحده سامحنى نجرى جاى وغادى رايحه كيف المهبوله وزايدنى برامج العيال امتاع الكوره كل واحد وقت مختلف وملعب مختلف والملاعب بعيده عن بعضها الله المستعان ...

المهم

الليبو
سألتى على الشغل والقرايه فى كندا ...
حتى كندا من اصعب الدول اللى اتحصلى فيها قبول فى المجالات الطبيه والشغل فيها من المستحيلات لغير الكنديين
وحتى الكنديين نفسهم المهاجرين مش لاقين شغل واجدين مقيمين وقاعدين عاله على الدوله تعطى فيهم مساعدات ومنهم هلبه ليبيين يا اما يحصل شغل مؤقت وممكن يطلعوه منه فى اى وقت او يقعد فى الحوش والدوله امدايرتله معاش ضمان يعطوه له نين يلقى شغل
يعنى كندا مش بلاد الاحلام خصوصا المهاجرين الجدد
وايضاً ما يعترفوش ألا بالشهاده اللى طالعه منهم
يعنى شهاداتنا اللى جايبينهن من ليبيا ما يخدمناش هنا ولا انحصلوا بيهن قبول ألا عن طريق برامج معينه
ومنها لو فيه بعثه وقرار ايفاد وحتى هذا ما يعطيش فرصة الحصول على قبول فى الجامعه
انا قدمت فى الجامعه اللى يقرا فيها زوجى زمان وبقرار ابتعاث وما حصلتش لان ما فيش مكان ...
او فيه برنامج الاى ام جى هذا سريب طويل ايديروا فيه مجموعة امتحانات وممكن ايحصلوا لأن المتقدمين بالالاف ويختاروا فى 250 واحد بس كل سنه
يعنى انت وحظك

او فيه برنامج واحد اخر وهو الشغل فى المقاطعات البعيده (فى السميطرى)وتقديم طلبات الهجره بعدها ممكا ايحصل قبول ويبدأ فى الدراسه او الرزدنسى
والرزدنسى هذا اغلبية القرايه 5 او 4 سنين او اكثر
وفيهن الشغل ويحرثوا عليه الواحد نين يطلعن اعيونه وينسى حتى عيلته خخخخخ
بس بعد ما ايكمل يقعد اخصائى (كونسلتنت) مش زى دول اوروبا ومنهن بريطانيا (ما يعطوش الغريب كونسلتنت ويقعد كان ترقى سبيشلست بس)
وبعدها تتعدل اموره والمرتبات هنا خياليه فوق ما تتصورى .....
أن شاء الله كله فى طاعة ربى ...


سلفيه سألتِ عن الدكلكتين (دواء تنقيص الوحام)
انا نستخدم فيه من اول الحمل والحمد لله خفف عليا هلبه
خصوصا ان وحمى واعر وعلى كل حاجه حتى الميه ما نشربهاش
وياريته ترجيع لا أنا دراه كبد وكأنى شاربه زيت ونقعد امطوحه وخلاص وحتى الاكل ما انذوق فيه ...
لكن هذا فى الشهور الاولى بس
بعدها نقعد اكويسه والحمد لله حتى الولاده ماشاء الله عندى ساهله غير مشكلتى الوحم ....
بس مع الدواء ماشى الحال على الاقل نقص اشوى من دراه الكبد ونقدر نشرب مع انى ما نشربش الميه العاديه
نشرب فى المعدنيه او العصائر ...
بس امواج قلت لها عليه وما مشاش امعاها ....
كل بطن وعجبها .....

يا بنات بالنسبه للحفظ أن شاء الله فى القسم امدايرين حمله لتحفيظ سورة البقره (عن طريق محجبه)
أن شاء الله حتكون شهور الصيف وحيكون فيها حماس اكثر فشنو رأيكن مادامكن امكسدات هنا فى حفظ تبارك وما فيش تشجيع
خلونا انتابعوا مع محجبه
ولما يرجعن الغايبات ان شاء الله انعاودوا لبرنامجنا وبعزيمه اقوى وانشط ...

وشيئ اخر
حملة تنظيم القسم ما شفتش وحده منكن أبدت المساعده يا بتى اللطف البرانيات ايعاونن وأنتن حتى كلمة ربى ايعاون ما قلتنها ههههههه
لا بجديات محتاجين نشاطات صيفيه خلونا نستفيدوا من اوقاتنا خصوصا البنات اللى مش نازلات لليبيا
توا فتاه سوريه تبى اتحط برنامج بأسابيع النشاط وياريت اتابعن او اتحطن افكار لو عندكن

اسمعن انبصر عليكن راهو
اللى عندها وقت وتقدر اتشارك مرحبتين واللى ما تقدرش اتخش وتستفيد
وربى ايعاون الجميع ...

فى امان الله توا

:) اهلا وسهلا بيك ياحبيبة
كيفك وكيف اهل كندا معاك الله يسلمك على مرورك وان شاء الله معرفة خير عليا الله يحفطك يا غالية

السلام عليكم ورحمة الله وبركاته
كيف حالكم اخواتي ان شاء الله الجميع بخير .....آسفة معاش كتبت ومعاش خشيت للموضوع لأني مش في حوشي لأني اجرته وعندي مشكلة في التليفون ....المهم اختي ليبيا قلبي شكل الكيكة اكثر من رائع لكن الشرح ناقص ارجو ان تكملي الشرح شكلي تشجعت نبي نديرها ...وسؤال ثاني هل جربتي تديريها بالزيت بدون زبدة؟؟؟؟

سامحوني بعث الرد الاول خفت يطير
يالله انكمل الردود

مشيمشة
كيف حالك و حال عويلتك
و شن اخبار الحمل معاك, ربي يكملك علي خير و تنوضي بالسلامة
ما شاء الله عليك و علي لسينك
تعرفي اني سعيدة اني سمعت صوتك و ان شاء الله الاتصالات بينا مستمرة

ليبو و التحنو
كيف حالك و حال عويلتك
و شن اخبار استراليا معاكم
صار حتى انت طبيبة ما شاء الله
الله يسرلك امرك و يفتحها قدامك و ينولك الي في بالك و اتحصلي القبول و الله يجعل في وجهك القبول
حبيبتي ما تأيسيش اني توا ليا ثلاثة سنين انقدم كانت هادي اخر فرصة , صديقيني الله كريم و اعلم بالحال بس انت ديري الامتحانات المطلوبة و المواد الاضافية الوقت قاعد يمر انت استفيدي منه و كثري من الدعاء الله سميع مجيب الدعاء
و الله يوفقك و يفتحها قدامك المهم استمري بالمحاولة

وسطية
كيف حالك و حال وليدك و راجلك
سلمك نشادة , اني غاطسة في الاوراق و التجهيزات للشغل
ما شاء الله عليك, باين بنت اصول و صاحبة واجب , الله يعاونك
و هذا حال الدينا فرح و حزن , الله يرحمه والد صاحبتك و يصبر اهله


حياه حلوه الحلوة
كيف حالك و حال ماما و باقي العيلة
شن دايخة في الشوبنق و التجهيزات لمرواحة ليبيا الله يعاونك
و شن اخبار امتحانات خوتك , ان شاء الله جاوبوا كويس


اطفالي حياتي
كيف حالك و حال عويلتك
و شن اخبار عرب بريطانيا

كوكم
كيف حالك و حال العائلة
شن اخبارك, ان شاء الله امورك تمام

تقربصتي
كيف حالك و حال الدكتور و عيوشة و شيماء
ان شاء الله كلكم كويسين
وين مغطسة

مدام علي
كيف حالك و حال العيلة
و كيف حال بوك توا , انشاء الله افضل

ام تقي الدين
كيف حالك و شن اخبار
الي لقي احبابه نسي اصحابه
وقت ممتع وسط الاهل و الاحباب