السلام عليكم ورحمة الله وبركاته
كيف حالكن اليوم ؟
وشنو اخباركن ؟
انا اليوم من الصبح فى العياده...
الحساسيه ما خلتنيش نرقد امبارح من العطس وعيونى ياكلوا فيا اتقول فيهم فلفل واتصدقوا حتى سقف فمى ياكل (راجلى يضحك عليا قالى وانتِ ديما تشكى خلاص ضاقت معش لقيتى ما اتقولى ألا لهاتى تأكل فيا ههههه)
بس والله بجديات من حساسية الربيع ومع العطس لو كان نلقى ما انبطلش هرش فى وجهى وخشمى
المهم عطونى بخاخه واهوا قاعده نستخدم فيها ...
تعرفوا حتى عيونى تنفخوا بس الحمد لله توا احسن من الصبح بواجد ...
سلفيه شنو اخبارك وشنو حال الصغار ؟
مشيمشه شنو الجو عندكم ؟
نحن اليوم الحراره 30 والناس معش فيه ما ساترهم , ربى يهديهم ان شاء الله
وسطيه
ايه البنات كانوا عندنا فى الويكند اند وخساره يبوا يتباعدوا ونفقدوهم ..
ويا حنا اتفضلوا مرحبتين فى اى وقت ما نلاقوا أعز منكم ايجونا ...
وما اتخليهاش اوصايه لما اتجوا لتورنتو اتخطموا علينا ...
و بهدلتيه اوليدك فى غيبة بوه ...
مستغله ان الولد ابروحه يا شريره هههههه
ربى يقدرك عليه بس راهو اشوى وينسى المهم ما تضعفيش وتعطيه الشيشه (شريره تنصح فى شريره)
اليوم قبل نبى انجى للندن بس ما قدرتش من الحساسيه ...
امشى بو الصغار للمة الرجاله(العشاء) ابروحه وسيبنى ...
يلا خيرها فى غيرها ...
ان شاء الله انشوفوكم اقريب ...
باقى البنات شنو حالكن وشنو الاخبار؟
ان شاء الله ديما طيبات ومتهنيات
فى امان الله توا
G Libya
•
السلام عليكم
كيف حالكم
ام محمد لاباس عليك يا غالية
عيوني ربي يونسك بأحبابك
ام الاء كيف حالك ان شاء الله تمام
اليوم اتصلت بيا حياه حلوه وصلوا بالسلامة الحمد لله
سلامات يا غاليات
كيف حالكم
ام محمد لاباس عليك يا غالية
عيوني ربي يونسك بأحبابك
ام الاء كيف حالك ان شاء الله تمام
اليوم اتصلت بيا حياه حلوه وصلوا بالسلامة الحمد لله
سلامات يا غاليات
الصفحة الأخيرة
جمعة مباركة للجميع ، ان شاء الله حالكم كلكم كلكم باهي ، اني كنت في معركة ضروس مع ولدي علي تسييب شيشة الحليب، ثلاتة ايام بلياليهم لاكل ولامل وهو غير عياط سليمته واني موسعة بالي معاه وفرحانة انه بوه مهناش مسافر اربعة ايام لتورنتو كنهادا راهو ماخلانيش نفطمه علي الحليب ، واليوم الحمد لله اهدا شوية من الايام الي فاتو وهادا علاش لقيت وقت وخشيت .
ام محمد - الله يمتعك بصحيحتك ويقويك ويرزقك بالخير كله ، ما شاء الله صار عيلة ام عبد الرحمان وعيلة ام رضوان كانوا عندك ربي يدوم الصحبة والونس بيناتكم.وياريتني كنت معاهم.
امواج_ سلمها ياربي وسلم كلامها اللي احلي من العسل بالنسبة للدعوة من فمك ياربي لباب السماء ،تفكري تدعيلي وانت تجيبي قالوا دعوة المراة في حالة المخاض مستجابة مش بعدين تقولي انسيت ومانسيت خخ خخ(ما فضاني انت في هادكا الوقت لاهية بية والا بغيري خخ خخخ)
مشيميشة - كيف حالك وحال صغيويرتك ان شاء الله باهيين ، صار تسكني في سسكاتون عندي صاحبتي وجارتي في اوتاوا تسكن غادي هيه طبيبة غير البعثة لراجلها يحضر في علم التغدية وعندها زوز بنيات ووليد اكيد متعارفين لان الليبين غادي شوية.
باقي الاخوات توة كانا حصلت فضوة توة انرد عليكم بالوحدة غيرولدي ناض وبدي يعيط
استودعكم الله الذي لاتضيع ودائعه