السلام عليكم ورحمة الله
كيف حالكم يابنات ...بلادى ....شن اخباركم شوركم قاعدين مختفيين ...حتى التجمع لقيته فى اخر الدنيا
سلامات توا ....المهم تكونوا بخير
:26: :26: :26:

السلام عليكم و رحمة الله و بركاته

كيف حالكن يا بنات

ان شالله تكونن بخير يااربـــ :26:

بالله ادعن لي يكون معدلي عــــــــــــالي

انا شهادة ثانوية :(

السلام عليكم ...
كيف حال بنيات بلادي ان شاالله كلكن اموركن طيبة وبخير ...
اليوم ويك اند وراجلي طلع توا عنده كورة ياحنا قال سمنت وكرشتي بانت !!! اشترك فى كورة وقالي يسد انتِ كرشتك مترو قدامك ... قتله اصبر عليا ان شاالله انجيب بخير ونكونو طيبين توا انوربك الرشاقة شنو شكلها :) ...
ومعلش كنت مغطسة واخد بردة محترمة مع كحة والنية طايرة من الكتيبة والتعبير والحمدلله حالي احسن لكن جونا ربيع والدنيا كلها بيضة من الدندي لاين واللهِ مانعرف شنو اسمه بالعربي ثقافتنا قعدت نجليزية خخخخخ هذه صورته :

تعرفو في الاول يكون وردة صفراء زي هذه :

وبعدين يتحول الي بذور بيضة كيف الصورة الاولي ...
المهم مدينتنا مليانة به لدرجة مغطي الارض كيف الثلج "سبحان الله" ومديريلي حساسية رهيبة مع كحة قريب تقتلني وشينة الكحة مع الحمل لنقنها سخيفة مافيش تحكم اكرمكن الله علي البول بكل :) ...

ياهلا بالجدد وهذه لكن :icon28: وصلتكن ولا لا !!!

ام عبدالمعين ورؤي الحسناء ...
ياهلا ببنايتنا وشنو حالكن وحال العويلة كلهم ان شاالله اموركن بخير وانستنا فى اللمة ...

احلي دلع ...
كيف حالك ياغالية وان شاالله بالنجاح ومن المتفوقين يارب ... صار كنتِ غاطسة فى امتحاناتك ... :)

قرين ستار ....
خخخخخخخخخخخ قاعدة ترفعي فى الموضوع بارك الله فيكِ وشنو اخبارك واكيدة قربت المرواحة والعقبالنا يارب ... ربِ يوصلك طيبة وكيف حالها ابنيتك ... وبنتي قاعدة فى صراع معها بس الحمدلله خف مصانها لصبعها عن قبل وااااااااجد ... واهي فرحانة كملت الحضانة امس اخر يوم وتقولي انا نبي نخش للروضة انا سمحة وكبيرة :) ...

اطفالي حياتي ...
كيف حالك ياغالية والعويلة ان شاالله كلهم بخير شنو ماعندكش نزلة لليبيا السنة !!!

عيوني ...
خخخخخخخخخخخخخ ماشاء الله تبارك الله تبيديه بعرق العافية جهازك الجديد بس ركبيله عاد عربي بيش تهدرزي باهي ولو ان انا وياك كل يوم الووووووووووووو خخخخخ ...
ومبروك للدكتور نجاحة والعقبال لحمودي وعموري :icon28: ... ومشكورة ياغالية على المقروض والكعك المالح وصل تمام الا الكعك مدقدق لكن حطيته فى تبرويرة وناكل منه حتي هو مدقدق يهبل طعمته وبذات انه مالح ... ان شاالله اندروهلك وانتِ جايبة بنية تهبل ...

امولة ياغالية ...
الحمدلله كلنا بخير وفوفو بنت خوي كويسة ماشاء الله تبارك الله عليها شكرت العروسة امها وخلتها وعمتها خخخخخخخخخخخخخخخ ...

مدام علي ...
ربِ يتمم بالخير ان شاالله والعقبالك انت وغادة وكل البنات يارب ...

ام الاء ...
ماشاء الله تبارك الله ...
صار فى الثامن ... يارب ان شاالله تجيبي على خير وسلامة ويارب يرزقك بوليد بصحته يونس خواته يارب قولي امين ياغالية ... وبوسيلى الاء ومنال ...

ام محمد ...
ماشاء الله تبارك الله ...
مبروك للدكتور النجاح :icon28: ويارب لعقبال لعويلتك تشوفينهم بشهادتهم ياقادر ياكريم ...
وبيش تمشي تاخدي امانتك من عيوني ولقيت مكالمتك ليا بس واللهِ هذك اليوم نجري برا وامس نبي نكلمك قعدت من حاجة لحاجة ولما قرب المغرب قلت واللهِ ماني رانة توا خليها ان شاالله الاثنين نرن عليكِ ... ومشكورة على الموقع بس خشيت عليه مالقيتش سعر ليبيا المهم توا انقول عليه لراجلي ويشوف دوته ...

غادة ...
كيف حالك ياغالية صار نو عندكم هلبة ربِ يعينكم عليه وعلى وجيج المكيفات "اكره حاجة عندي" السنة يلى فاتت لما مشيت انا وخوتي عركة عليه هم ياحنا مايرقدو الا عليه وانا من حسه مانعرفش نرقد ويركباني ابراد :09: ... وسلمي عليها حياة كثير السلام ...

مشيمشة ...
كيف حالك ياغالية والحمدلله يلى طيبة ...

ليبيا قلبي ...
بعيد السو عليكِ ياغالية ومعلش هذا حالنا كلنا مرات تقولي من يدف في دفان علشان نقمعر على النت ومرات تلقيني ساكنة فيه المنتدي ... وكيف حالها اختك وبنيتها ان شاالله كلهم كويسين ...

ليبية ...
تي كيف حالك ياغالية وماشاء الله تبارك الله ربِ يتمم عليكم بالخير وتروحي طيبة ان شاالله ...

لوشا ...
تي وينك يابتي وشنو اخبارك واخبار العويلة ان شاالله كلكم بخير ...

وسطية ...
وينك ياغالية ان شاالله خير ...

كل البنات ان شاالله اموركن طيبة وفى امان الله ...

وعليكم السلام ورحمة الله وبركاته ...
كيف حالك ياغالية كيف حال حملك ان شاالله امورك طيبة ...
:26:

السلام عليكم
كيف حالكم يابنات ليبيا الحلوات, شكرا لكل من سأل عليه والله انكم في البال لكن الله غالب كان الجهاز عاطل وراجلي كان مهناش كنهادا صلحه وبمجرد ما وصل خديت الللاب توب متاعه واقعدت نكتب منه وهو عيونه مفتوحات علي وسعهم ويقولي هادا شن سماه ادمان والا شنو قلتله سميه الي بتسميه هلبة عليه اسبوع مانخشش.
نبدوا بالجدد انرحبوا بيهم - ام عبد المعين وروًئ الحسناء اهلا وسهلا بيكم ومعرفة خير ان شاء الله وهاتو السي في متاعكم بسرعة من غير تعطيل يالا خخخ خخ(بوصارة راهو).:)
ام محمد- الف الف مبروك علي النجاح وعلي حصولكم علي هاديكا الحاجة وسمعنا بديرونا زردة هنايا في لندن ، ان شاء الله ديما في النجاح والافراح ,وردي بالك علي روحك من هالحساسية وحاولي تنقصي الطلوع كانا جو الربيع يأثر فيك والا البسي كمامةخخ خخخ .:)
امواج- سلمك نشادة ياغالية وردي بالك من روحك حتي انتي ونقصي الطلوع (وصفة اليوم خخ خخ) ، نشدتي علي عمر ولدي عمره ياطويلة العمر سنتين الا شهر وفطمته علي الشيشة مشي انفطم علي الحليب مرة وحدة وتوة قد ماحاولت معاه يشرب الحليب في الطاسة شي مسكر دماغه هالور.:angry2:
انجيمة - صار ليه ليه توتي في روحك ،مشناها الحوسة متاع الشناطي لكن تهون لما تفكري انك مروحة ليهاديكا البلاد السمحة، الله يكون في عونك وسلمينا علي اهل ليبيا (تلقي حتي حد خاطم في الشارع قوليله تسلم عليك وسطية خخخ معليش وحدة تخفف في دمها.:42:
مشيمشة - كيف حالك وحال الصغيويرة وبوهم ، صار ماتسكنيش في سسكاتون ، ربي كريم ان شاء الله يجوك عائلات ليبية ويونسوك ويوسعولك خاطرك.
عيوني- كيف حالك وحال التجهيزات معاك ومبروك عليك الجهاز الجديد وعلي فكرة اتلاقيت مع صاحبتك تسكن مش بعيدة عليه ،اتلاقيت معاها وقالتلي علي اسمك وانك تسكني في هاملتون وانك تعرفيني مشي استغربت قلتلها لو تسكن في اوتاوا ممكن لاني قعدت فيها عامين لكن ياودي هاملتون ما نعرف فيها حد لين بعدين اشتغل عرق الذكاء وقلتلها هيه مشتركة في عالم حواء قالتلي ايه مشي زبطتك :) .
باقي الحبوبات ان شاء الله اموركم تمام وتوة بالسلامة.
استودعكم الله الذي لاتضيع ودائعه