ياصباح الورد .. اليوم الجمعه لاتنسون يالغاليات قراءة سورة الكهف

ام حنان :انا انصحك تروحين للمدرسه او تكلفين عمتها بالمهمه بس لما تكلمين المدرسه لا تحسسينها بإنك جايه علشان رجعوا بنتك ورى ( خصوصا ان اللي صارت قدام بنت معلمه )

انتي روحي كأنك تطمنين على بنتك وتشوفين من معلمتها , وبعدين قولي للمعلمه( انك ملاحظه ان بنتك جالسه بالصف الثاني ياليت بعد اذنك لو تقدمينها لأن بنتي من النوع اللي تنشغل وما تركز لو صار قدامها احد يتحرك و... ) وبكذا تكسبين المعلمه وتريحين بنتك

لميس : ماشاء الله عليك انجزتي الكثير , بما انك موظفه انصحك تحددين يوم بالاسبوع مثلا ( الاربعاء ) للتنظيف الشامل للبيت مثل ( تنظيف المطبخ وطاولاته والثلاجه من الخارج طبعا + تمسيح اثاث غرفة النوم + تلميع الطاولات والمكتبات والتحف اللي بالبيت + بعدين شغلي المكنسه ومري على البيت كله ( الغرف والصاله والمطبخ .. ) وبعدين امسحي ارضية البييت بالكامل + وبالأخير غسلي دورات المياه ) وبكذا تكونين انتهيتي وباقي الايام خليها للترتيب السريع وغسيل المواعين وترتيب المطبخ وتمسيح طاولاته وترتيب سريع لغرفة النوم وكنسي البيت لو احتاج الامر بوسط الاسبوع , وخصصي يوم الغسيل بوسط الاسبوع او يوم الجمعه اهم شئ بيوم غير يوم التنظيف علشان ما تنضغطين

انا طريقتي كذا بالنسبه لأعمال البيت المعتاده بالأضافه للجدول الاسبوعي الخاص بالمطبخ وغرفة النوم اللي نسقته الاخت بسمات

صباح الخير اول شي اختي ام حنان انا مع الأخت كالوري برايها وثاني شي اليوم الفجر دخلت وكتبت يومياتي بس مدري شلون انمسح كل شي وزعلت ونمت والحين راح زوجي دوامه واستودعته ربي الله يحميه وانا لاااااازم *****الله ارتب البيت كامل عشان بكره مسافره زوجه ابو زوجي مسويه عمليه بجده الله يقومها بالسلامه وبنروح نزورها انا وامه وابوه ادعولها يابنات الله يشفيها والله انها في امس الحاجه لدعائكم وبالنسبه للجدول انا يمكن سفري كله يومين وارجع عشان كذا برتب حق يومين مع بعض لما ارجع *****الله عشان اكون معاكم على نفس الخط ومااتأخر عنكم

بسمات : وش دعوه لا زعل ولا شئ احنا خوات , توكلوا على الله وخلونا نبدى بغرفة النوم

اسمحولي انتم عارفين لي اسبوع احوس بمطبخي وبكره بكمل عليه التشطيبات النهائية ومن الاحد ابدأ معكم بغرفة النوم بإذن الله تعالى

السلام عليكم ورحمة الله

اخباركم يالغوالي حياالله العضوات الجدد

يالله كان ودي هالاسبوع على المطبخ بس يالله عادي نبداء بغرفة النوم مو مشكله

والصباح ان شاالله ادخل لاني بالعاده اصحى مع اولادي للمدرسه واجلس لين 10 وارجع انام

مساء الخير على الجميع

يا حلوه هالتجمع مرة مفيد

بجد الحمد لله ان في مجموعة مثلي محتاجة تشحن طاقتها عشان تفتر في شغل البيت
انا استمتع بالشغل بس احيانا امل منه

بنوتتي صغيره اربع شهور وشاغلتني اغلب الوقت
بس ناوية اشارك معاكم عشان اتحمس واسير ذربة مثلكم ماشاء الله

...
بس بصراحة ماني فاهمة طريقكم

انتو تاخذون جدول واحد ؟؟؟ ولا كل وحدة حسب ما تبي ؟؟