آآآآآآآآآه يا أخواتي شوفوا بلوتي،، وعطوني رايكم شاسوي؟؟

السلام عليكم ورحمة الله وبركاته


شلونكم اخواتي؟؟ ان شاء الله مرتاحين؟


اخواتي حبيت استشيركم في مشكلتي مع أهل زوجي ،، انا متزوجه من 8 سنوات وبالبدايه كنت انا وزوجي ساكنين بببيت أهله ،، بس حصلت مشاكل عديده والله يا أخواتي الى اليوم لا اعرف سبب كرهمم لي ،، يمكن تكون اخته الكبيره اللي ما تزوجت لي اليوم (( اسأل الله ان يرزوقها الزوج الصالح)) ،، والله ما ادري يا اخوات شنو السبب ،، بس حصلت مشاكل كثيره جدا حاولت اتحمل بس ما قدرت ،، لدرجه اني كنت حامل وقتها وللأسف الجنين توفى في بطني وانا في الشهر السابع ،، ولما فحصوا الجنين بعد الولاده وعملوا لي التحاليل والفحوصات ما كان في سبب طبي ،، لكن الأطباء قالوا لي ان الحاله النفسيه تؤثر على الحمل وربما يكون هذا السبب ،، ولكن قدر الله وما شاء فعل والحمدالله انا عندي اليوم بنت وولد .

اللي فجر الخلاف اني لما كنت ساكنه عندهم ،، اخو زوجي الكبير عقد قرآنه ، ولكن ام زوجي قالت لي ما راح نسوي حفله ولكن للأسف بعدين عرفت انهم عملوا حفله وعزموا الكل بس انا ما عزموني ،، تعرفون اخواتي احسست بإهانه كبيره وكأنني لا اشرفهم ، والا ليش ما عزموني وانا كنت معاهم بنفس البيت ؟
آآآآآآآآآه صج اني انجرحت ،، وتوالت المشاكل مع اني وقسما بالله اني ما عمري رفعت صوتي ولا رديت عليهم بس كنت انقهر واسكت وابكي وابكي وانا كنت حامل ،، زوجي كان واقف معاي وكان يقولي لو جفتج غلطتي على اهلي ما راح اسكت عنج بس انا ما كنت اتكلم ،، وكان يكلم والدته وكانت تصرخ عليه بدون اي سبب حاولت اني اتقرب لهم بس كانوا رافضييني بالمره مع انهم اهم اللي خطبوني وكانوا عاديين ،، المهم يا اخوات كانت ظروف زوجي الماديه متواضعه وما كنا نقدر نطلع بسكن خاص ،، وهذا اللي كان مشجعهم انهم يغلطون ،، بعد اللي صار لي وانا حامل ما قدرت اقعد معاهم وانتقلت للسكن انا وزوجي إلى بيت أهلي ،، آآآآآآه يا اخواتي تدرون اني لما ولدت الجنين المتوفي اهل زوجي ما كلفوا نفسهم انهم يسألون عني او يزروني او حتى يواسوون زوجي .

بعد انتقالنا لمنزل اهلي انقطعت علاقتنا معاهم ،، وكنت اقول حق روح زورهم واهوا كان رافض يقول اهلي ظلموني ،، واللي زاد الطين بله ان امه الله يهداها كانت تتصل باصدقائه وتشتكي لهم ان زوجي ما يزورها ،، فتخيلوا مدى الحرج لزوجي أمام اصدقائه اتذكر انه كان يقولي ليش ما تتصل لي انا وتقولي ياولدي تعال زورني يقول انا ازورها بس اهي تكون ناقمه علي ،، تصدقون انهم قالوا للناس اني انا واهلي اللي مانعينه من زيارتهم ،، يعني معقوله امنعه وحتى لو منعته كان ممكن ان يزورهم من وراي بس اهو اللي كان رافض

المهم يا اخواتي اني يعد ما حملت ببنتي كلمت زوجي وقلت له لي متى ما راح نزور اهلك وزرناهم وكان الوضع متأزم في البدايه وكانوا شايليين علينا وايد بس كنت اصبر زوجي واقوله اصبر ان شاء الله يتعدل الوضع،، بس تدرون شنو اللي كان يحز فيني انا وزوجي ان ام زوجي لما نزورها تروح لغرفه اخو زوحي وزوجته وتقعدعندهم وانها تمدحهم جدامنا وخصوصا زوجه اخوه امه تقعد تمدحها لي يعني بالأصح تبي تقهرني واحنا على هالوضع من 8 سنوات لي اليوم ،، صار عندي عيال بس اهم يفضلون اخوه وزوجته واولاده علينا انا وزوجي واولادي ،، بنات حطوا انفسكم مكاني والله اني انقهر واقول ليش بس لاني ما اعرف انافق ما اعرف اجامل انا احاول اجاملها واهديها الهدايا بس يت بنات ليش ما تحبني ليش رافضتني ؟؟؟ لي متى راح نكون على هالحال.؟؟ كل ما ازورها تحاول تقهرني تخلي الخدامه تنظف غرفتهم وتكوي ملابسهم جدامي ليش؟؟ اتذكر اني لما كنت ساكنه عندهم كانت تطرش الخدامه عشان تاخذ سله الملابس اللي حق الغسيل اتذكر انها كانت تغسل ملابس زوجي بس اما انا فكانت ترمي ملابس في الارض حتى ولو منشفه لي ,, والحين تخلي الخدامه تغسل حتى الملابس الداخليه لزوجة اخوه؟؟؟ ليش لأن حالتنا الماديه اقل من اخو زوجي؟؟ طيب احنا شنو ذنبنا والله اني ليما الحسن ساكنه بييت أهلي وليما الحين ما سوينا شي لسكنا الخاص ومستقبل اولادنا (( يا حي ياقيوم اسألك الفرج يارب يا رب توسع علينا باب رزقك يا رب)) وبالعكس اخو زوجي ما شاء الله حالته الماديه ممتازة والحين يجهزون منزلهم الخاص .

من فتره وانا ما ازورهم بس زوجي و عيالي يزورونهم انا ما اقدر اتحمل شلون ام زوجي تفرق في المعامله بينا وتمدح زوجة اخو زوجي جدامي وتحاول انها تغيظني بمحبتها لها ،، يمكن غيري يتحمل بس انا ما اقدر والله ما أقدر بس ساعات اجلس ابكي واقول طيب لي متى راح نكون على هالحال ،، يعني افكر في عيالي لازم يكون عندهم أهل ،، الواحد ما يضمن باجر شنو يصير له،، شنو الحل برايكم اني اروح واتحمل وانقهر مع اني مصابه بالربو والمشكله اني لما تضايق يزيد الربو علي ،، طيب شلون اتحمل ،، حتى لو تحملت راح يبيين علي رده فعلي اني متضايقه ،، وآخاف ما ازورهم وربي يعاقبني على قطعي لصله الرحم ،، انا الحين من عيد الفطر ما زرتهم ،، تدرون اني البس وانوي اني ازورهم بس بعدين اخاف اروح ويتكرر الموضوع المعتاد فأقول لزوجي روح انت والعيال بس ،، زوجي يسكت بس تدرون احسه انه يتضايق اني ما ازورهم ،، بس في نفس الوقت اذا زرتهم ارجع مقهوره واكلمه فيتضايق،، بنات تصورو اهل زوجي يعني عماته وخالاته واهله ما شافوني الا مره وحده في حفله زواجنا لأن ام زوجي ما تعزمني على مناسباتهم او احزانهم بس تاخذ معاها زوجه اخو زوجي ،، اخواتي تخيلوا الحزن والقهر اللي انا فيه اهي معاها في كل المناسبات وانا لا وكأني ما اشرفها مع اني من عائله محترمه وانا محترمه نفسي وهادئه وساكته لأقصى الحدود ،، والله ان الكل يشهد لي بطيبتي وهدوئي وخجلي.


آسفه يا اخواتي على الأطاله بس بغيت مساعدتكم؟ واذا كان احد منكم يعرف احد المشايخ يا ريت يسأله هل تعتبر عدم زيارتي لأهل زوجي (بسبب مضايقتهم لي في كل مره ازورهم ) من قطع الرحم؟

تدرون انا ما شفت زوجه اخو زوجي الا مره وحده من مده 8 سنوات ،، لأني اذا ازورهم اهي ما تطلع من غرفتها ،، واحنا ما نزورهم الا يوم الجمعه واهي تكون عند أهلها ،، بنات احس اني رخيصه او سيئه في عين أهل زوجي ،، يعني اي احد ما يشوفني معاهم في المناسبات لان امي زوجي ما تعزمني ما راح يقول ان ام زوجي ماتعزمني راح يقول اني انسانه سيئه


اخواتي اتمنى انكم تحسون باللي انا فيه ،، الحمدالله زوجي يحبني وايد ويراعيني والبعض يقولي هذا كفايه ،، بس يا اخواتي اذا اشوف شلون البنات علاقاتهم مع اهل زوجهم طيبه احزن على نفسي واتمنى هذي الشي ،،والله اني ابغي تصير علاقتي زينه معاهم بس شلون؟ اني اتحمل وانقهر وامرض؟ يعني ليش ما تعاملني ام زوجي مثل ما تعامل زوجه اخو زوجي ؟ راح يكون الكل مرتاح،، بعض الاحيان لما اكلم زوجي يقولي اهمه ما يحبونج والله اني انجرح انا اعرف ان الحب مو الغصب بس انا اتمنى انهم يحبوني لأنهم اهل زوجي وابغي علاقتهم زينه معاي ومع عيالي


الله يخليكم ساعدوني ،، ما الحل؟