السلام عليكم ورحمة الله وبركاته<<<<خاص بس للي يردون السلام
يالله حي الجميع كبير وصغير مهبول وعاقل و نحيف وسمين مع التشديد عالسمين لمراعاة الحالاة النفسية اللي يمرون به
المهم كل عام وأنتم بخير وشلونكم وشلون العيد معكم عساكن دبغتن من هالحلاو!!
والا تدرون الحلاو موب مشكله عساكن رقصتن وطلعتن اللي بكن كله بالردح اللي مابعد رقصت الله لايهينه تروح تختلي بروحه وتشغل له أنشودة ترقص عليه لين يطلع كل اللي به ترى ماعندنا عايز زار حتى اللي ماتعرف لا تعلث ترى من تالي الرقص مايبي له علم ماعليتس إلا تطلقين ارجولتس العنان وتعتبرين فنانة رقص
والله حنا يوم العيد ترجينا شغالاتنا عشان يرقصن ونعنبوهن يالله وافقن لاسحبنا وحدة رجعت الثانيه لين جمعنا لنا 4 شغالات وشغلنالهن المسجل وخليناهن يرقصن وش زودنهن الضعيفات ترى بهن زي اللي بنا واحيانا أشد من اللي بنا فقلنا نوسع صدورهن
والله ياشفنا رقص يهَوِّل طارت عيونا عين طارت من الزين وعين طارت من الشين
ووحدتن منهن وش زين رقصة وعليه ذاك الشعر اللي ودي تسلفن إياوأكشخ به بالمدرسة ووحدة الله يعفو عنا وعنه ليته قاعدة وماتميلحت قامت مسيكينه تخابط وتدابك ويما صفقت ويما مسكت ثوبه وياما نفضت إدياته وياما رافست برجوله وشوي تبدا تدور الله العالم إنه كانت حسرانه بس ميب مفلتن بالرقص لا ولو تدرون وش يرقصن عليه !!! على تقبل الله منا ومنكم عيد مبارك علينا وعليكم الله لايعاقبنا لو يدري ولد البشيري عنا كان قال الشرهه على اللي ينشد لكم النوبة الثانيه
بس والله الضعيفات إنهن استمتعن واستمتعنا صحيح إننا متنا ضحك عليهن مير الله أعلم بنياتنا لا وزيدكم من الشعر بيت من بكرة شغلنا الشريط نبي نرقص لأن أمس كله ضاع على رقص الشغالات وتونا فاتحين المسجل إلا ماندري إلا هن بالمنصة شيطان طربهن بلا مشاور دلن الدرب وقالن نقطع العنوة الله لايعافي العدو عجزنا نرقص منهن أنا ماتحسفت على شي كثر ماتحسفت على ترجيهن بيوم العيد <<<<<<شغالات آخر زمن <<<<والله الشرهه ميب عليهن عليكم اللي معطينهن وجه
المهم ياوخياتي أنا صار لي اسبوع احتري الويك إند يجي<<<< خاص للي معهم لغة
وحسَّربي ماطاع يجي كان ذا الأسبوع اطول أسبوع بالعالم شكل الوزارة دابلتن اليوم ومخليته يومين من النجاسة <<<< فاهمه خطأ
عاد أقول وأنا اللي يوم جيت من المدرسة اليوم وخمد ومن قمت وأنا مجهزة أصابعي للكتابة أوجس بي هرج واجد لا ويقالن إني هالمرة بختصر مراعاة لكن عشانكن قاريات هاليومين موضوعين كل واحد أطول من الثاني(وجه يقول مادق على أحد)
فقلت لازم ارحمهن واختصر فلذلك بدخل بالموضوع<<<<الله من زين الاختصار كل ذا ومابعد دخلتي اجل لادخلتي وش بتكتبين!!!
طبعا ايام العيد غالبا الناس تروح تعيد عند أهله يعني المرة تضف عفشه وتقش عياله وتروح تعيد عند أمه وخواته واخوانه والا وش العيد بلا الأهل<<<<معليش يامسمس لاتصيحين خيره بغيرة
وطبعا بما إني أنا عند أهلي بس امي ميب عند أهله<<<<كني حست الدعوى
برجع اشرح صدق إني معرسه بس مع وقف التنفيذ يعني قاعدتن عند أهلي وأمي أهله بالشرقيه فطبعا أنا بعيد مع أمي وأهلي وأمي بتعيد مع أمه وأهله <<<<الله يلجتس
فبما إن أهل أمي بالشرقيه لازم نسافر والسفر به فوائد كثير<<<< وجه يقول ياشين المصاله لاتخافون منيب معددة الفوائد المهم طبعا تعددت وسائل النقل اللتي تصل بين الرياض والدمام فهناك الطائرة<<<<حامض على بوزتس تركبينه
وهناك السيارة<<<<هذا حدتس
وهنالك القطار <<<<كفوتس
وللأسف الشديد أبوي وأخواني الله يصلحهم مايبون الشرقيه قالوا إن ماتعيدنا بالقصيم ماكنا معيدين فطبعا مافيه أحد يودينا للدمام فقررت أمي العزيزة إنه تركبنا القطار
وأنا اللي أترجاه ياميمتي موب لازم نتعيد دام الدعوى قطار وقالت اخسي واقطعي إذا موب عاجبتس روحي لرجلتس وأنا اللي أنطم وقول لا أصلا أنا أقول ورا مانجوب المملكة كله بالقطار <<<<إيه هينطبعا مادام قررت الوالدة الله يحفظه ضفينا عفشنا وماصارت تسع إلا حنا بمحطة القطار
اعذرون الصورة مغبشه تعرفون مانمت إلا ساعتين ورايحتن وأنا ماشوف الدرب
عيوني عيت تفتح<<<شكلك تصورين بعيونتسالمهم ونركب اللي مايتسماش وأثرهم مطورينه عقبي مغيرين كراسيه مخلينهم زي كراسي الطيارة
مساكين يحتكون مير ليتهم خلوا الكراسي وزادو سرعته شوي عاد أنا صورت لكم صورة بس كنت مركزة على الأرضيه تعرفون التواضع ذابحن<<<الله من قله
لا عاد الصدق ماحبيت أصور أحد وأنا صايمة بعد(وجه يقول الوعد الصور الجايه)
ترى ذا الشغالة عاقلة عيت ترقص مع المهبولات اللي قلت لكن عنهن
يـــــــتـــــــــــــبــــــــــــــــــــع
كنا نتكلم عن القطار
ماش انا ماجاز لي طريقتهم وعندي اقتراح لهم المفروض يحطون مركبة خاصة للي مامعهم رجال هم صح حاطين للعوايل بس حنا وش كارنا مامعنا رجل أجل طول الطريق ماطلقت غطاي أحسه لصق بوجهي ماقد ثبت النقاب على خشتي مثل ذيك المرة يوم وصلنا الدمام جبنا زراديه عشان نفكه كله زاد من ذاك الفلبيني اللي مرتز قدامي وزيادة لابس مناظر سود يعني ماندري وش هو يناظر لا ومرته ماغير تسدح على كتفه يمال الكسر تميلح يعني اني عندي رجل أعوذ بالله مابه صبر لين تاصل <<<ماغارت ابد
أدري تبون تشوفونه ومافاتت علي صورته لكم بس ماصورت حرمته مانيب مستاثمتن به سامعتن إن به رجاجيل بالمنتدى واخاف واحدن يقزه همن استاثم فاكتفيت بالأبو الله يقلعه
ومير أنا ماغير متلصتن بهم هو ومرته تقل تلفزيون <<<<<الله يخلف ياهبله
يوم بغت بنته الحمام ويروح معه قلت فرصه اروح أنصح مرته وأدعيه إلى دين الإسلام مير طلع الحمام وزنهم(جنبهم) يعني بس خطوة ويصير واقف عن باب الحمام وانثبر بمكاني همن الولد قال يبه أنا حسران أبي الحمام <<<<< طبعا بلغتهم هالكلام
وياقف الأبو عند باب الحمام ويبدأ يوايق على ولده شيطان طربك استح وشوله تويق على الورع
يوم أخذنا شوي وتقوم الأم وياقف الأبو وأنا اللي يطير نومي حتى دليت مارمش بشوف وين ييروحون ومير تدخل الحمام وياقف هو عند الباب مدري وشو الحكمة من الوقفه عند الباب ويوم رجعو لمحلهم وقفت أنا قالت اختي وين تتروحين قلت بروح للحمام يمكن يجي ياقف لي عند الباب <<<< ماش النغر شييييييييين
وهذي صورة تفصيلية توضح موقع الحمام من الفلبلب((يعني الفلبينيين))
أعتقد عقب هالصورة كلكم توافقونن بالراي إن روحة الأبو معهم للحمام ماله سنع
المهم وقوم وروح وادخل الحمام <<<<تراي داخلته لعانه بس بشوف وش هم لاقينن به والا وععععععع ماشتهي الحمامات العامة
وليتي مادخلته حشا موب حمام جحر ضب
وماش طلعت من الحمام الله يعز الجميع وأنا بي شرهه وش كبره على اللي صانعه أجل الواحد مايقدر يفترك به من صغره الله العالم يوم يصنعونه كانوا الناس كلهم نحاف ماحسبوا حسابنا يالدببه مير برفع بهم شكوى لأنهم مايراعون الفرقات الفرديه
عاد يوم طلعت قلت بمشي إرجيلاتي وبروح للقاطرة الثانية مير إني أحرن بين الثنتين صراحة نفاهه ولاغطا ولا شي ودي إن معي بساط فارشته ومنسدحه هناك أكمل نومي مير لولا الفشيلة كان سويته<<<أشوا مير تستحين
وأنا بين القاطرتين
لقيت هناك حمام ثاني
بس ميب المشكلة بالحمام المشكلة باللوحة اللي على الحمام
ماينغفل عنهم حقين القطار وش يقصدون بهالصورة!!! يعني اللي تبي الحمام لازم تجيب رجل يدخل معه وااااااااااااااااااااخزياه ياكبره عند الله الله لايعاقبنا
أدري أنكم بتقولون يالدلخة يعني مسموح للجنسين يدخلون بس لو كانوا يقصدون كذا وشوله يحطون صورة يتركونه بلا صور أحسن عشان المداليخ مايفهمون غلط<<<منيب منهم أنا
عاد عقب ماطيرت عيوني باللوحة قلت يابنت ارجعي لمكانك قبل ماتتهورين <<<<المعنى في كرشتي
وأنا اللي أرجع والقى اختي فاتحتن لاب تبه وقاعدة تحوس بالفتوشوب وقلت اوريكم إننا كشخة حتى بالقطار نطقطق على الكيبورد
والفشيلة من مبزرتنا الله لايفشلنا
هما في القطار مقاعد<<<احلفي
وبظهر كل مقعد جيوب عشان يحطون المجلات أو الجرايد أو على الأقل شنطة صغيرة لكن شوفوا بزرانا وش حاطين
يـــــــتـــــــــــــبــــــــــــــــــــع