أبي أفضفض مو شرط ألقى الحل بس أبي أحد يسمعني

مدرستي رائعة بكل ما تعنيه هذه الكلمــة لكن .....
أنا دخلت هذي المدرسة في الصف الأول ثانوي وأنا ألحين ثاني ثانوي .. ورحت لها وأنا ما أعرف أحد هناك يعني لازم أتعرّف على البنات وما كنت أبداً خايفة من هذا الشيء لأن بطبعي شخصيتي اجتماعية ومرحه ودائما عندي استعداد لصداقات جديدة.. لكن ما لقيت بنت تتقبلها شخصيتي .. يعني في البداية مشيت مع شلة بنات حبوبات وهم اللي نادوني قالوا لي احنا ارتحنا لك مره ونبيك تصيرين معانا في الشلة طبعا انا استانست ووافقت وصرت معاهم لكن مع الأيام أنا تركتهم ورحت عنهم لأني مع الأيام ما حبيتهم كان فيهم صفات ما تعجبني يحبونك اليوم بكره يحشون فيك وبعده يحبونك ؟؟!!! منهم بنتين مره صديقات ويحبون بعض وجاء يوم تهاوشوا على شيء أكثر من سخيف وقامت باقي الشلة يحاولون يراضون بينهم وتعالوا شوفوا كل وحده وش تقول عن الثانية ؟!!! هذا وهم أعز صديقتين ؟؟ والله تحسونهم أطفال ... تركتهم وأنا كلي قناعة .. أذكر وحده منهم كنا في حصة عربي الظاهر في صف أول ثانوي وقامت اللي جنبي (وهي وحده من الشلة ) كتبت لي في دفتر صغير معاها يالله تعالي نحش في البنات !! والأستاذه كانت تشرح الدرس !! أنا بصراحه ما تضايقت علشان ابي اسمع للدرس لأنها كانت حصة أدب وطفشت بس تضايقت من الجملة اللي كتبتها وشو تعالي نحش في البنات ؟؟؟ قمت رديت عليها وكتبت : لا حرام تبين يصير كأننا ناكل لحمهم وهم أموات . قامت تأففت وقالت : أستاذة معليش أغير مكاني ؟؟ وأبي أقعد جنب فلانة .. الأستاذة وافقت .. وجت جنبي وحده ثانية طبعاً مؤقتاً بس في هالحصة ..

انا ما ذكرت لكم هذي القصة الا كسبب بسيط من ابتعادي من هذي الشلة .. الله يعينهم على حالهم والله .. ووحدة منهم ما تعرفك الا وقت الامتحانات انواع المصلحة بس والله اني سحبت عليها بشكل في الاختبارات النهائية ههههههههههه ...

اسمحولي على الإطالة بس خلوني افضفض

عقبها حسيت نفسي ضايعة ما اعرف مع مين امشي صرت ابكي على نفسي لأني أنا أحب الصداقة واحب امشي مع مجموعة بنات وضحك وسواليف ومواقف في المدرسة ما فيه أحلى من ايام المدرسة لكن اني القى نفسي وحيدة .. كان فيه بنات غيرهم كثير علشان امشي معهم لكن ما حد عجبني وصرت أتحسس من أي موقف في هالموضوع لأنه شيء أبيه و أحبه حيل .. وصرت انصدم من أي تصرّف .. البنات الثانيات يا إما تلقونهم شلة خلاص متعودين دايم على بعض ويعرفون اسرار بعض ومتعودين على بعض فصعب انك تنضمين اليهم لأنه بتصيرين عقبة اثناء حديثهم .. ما يصلح ... ا

بعد فتره وخصوصا الحين في ثاني ثانوي صرت امشي مع بنتين كانوا مستجدات من اول ثانوي يعني طبعا اسهل كان التعارف معهم .. بس ابدا ما ينفعون لي مع العلم ان وحده منهم تركتنا وصارت تمشي مع بنات ثانيات وصرت انا والبنت الثانية بس وهذي البنت والله أعزها وأحترمها لكن والله ما أذكر متى آخر مره ضحكت من قلب معها .. ونفس الحالة ما تسولف اصلا علشان نضحك بس نقعد في الساحه وشفتي هالبنت تريها كذا وكذا وكذ وهذيك كذا وكذا وكذا وانا ايه لا ؟ اها والله ؟؟ هههههه .. ملل احسها ما تقدر حتى لو نصحتها احس هي كذا متعودة قد مره قلت لها ترى انا مو كذا ما احب اقعد اتكلم في البنات قالت يوه يا حليلك انا شوفيني اذا اجتمعت مع بنات خالتي انواع الحش ... مع انها عاقلة والله ومحافظة على صلاتها في المصلى في المدرسة .. والمشكله الحين انها تعودت نمشي انا وهي من اول السنة وهي ما عندها احد ثاني تمشي معه لو تركتها شخصيتها من النوع اللي تعرف بنت وخلاص بعكسي امشي اكلم هذي وهذيك .. فما أقدر أتركها زكمان انا محترمه الأيام اللي كنا فيها سوى عيب اخليها .. انا ما ابي اخليها بس ابي يعد معنا بنات على الأقل .. وهي ادبي وانا علمي يعني ما اشوفها الا بالفسحات .. والله وقتي في الفصل احلى لأن فيه بنات مره طيبات وحبوبات (القليل بس) بس مثل ما قلت انهم شلل ويمشون سوى صعب تدخلين معهم .. مع العلم ان في بعضهم مثلا امها امريكية والثانية اجنبيه كمان مدري من فين .. علشان كذا اكيد بيتأثرون وصار عندهم حركات يعني تعرفون امهاتهم اجانب بيصيرون فلة بزيادة هههههه يعني ما تتأقلمين مع كل تصرفاتهم مع انهم والله احسن من احسن البنات عندي طيبااات ويحبون الضحك ووقت الجد جد (في الدراسة ) ..
الصداقة تعني لي شيء كبيييييييير وهذا اللي حاز في نفسي احس شخصيتي في المدرسة مو شخصيتي .. صرت نادر ما يسمعون ضحكي ولا هبالي ..لأني ما عندي البنات اللي نصير دايم سوى و نضحك سوى .. والمدرسة مره حلوة وتحتاج انه يكون معك صديقات انا اللي في المدرسة اعتبرهم زميلات مو صديقات يعني نشاطاتها كثيرة وهي روعه ومع الصديقات تصير اروع واروع .. صرت اقول لنفسي خلاص انتي روحي ادرسي وارجعي البيت مو لازم صديقات .. الين ما تتخرجين وتروحين الجامعه وان شاء الله تقابلين احد من صديقاتك اللي كانوا معك في الابتدائي مثلا او تتعرفين على بنات جدد .. الحين بيبدأ الترم الثاني وانا شايله هم المصالة : ) هههههههه حكيت لكم قصتي كلها في المدرسة ..

محد يشاركني فرحتي ولا حتى حزني اذا حزنت ..افرح لنفسي واحزن لنفسي محد يعرف عني أي شيء كل شيء بيني وبين نفسي ابي احد يشاركني بس ما لقيت .. تقولين اهلك والنعم في اهلي ما يقصرون بس انا ابي وحده كبري تفكيرها قريب من تفكيري .. تعيش معي لحظات حلوة .. الله يصبّرني .. والله صابره من العام ..

بنااااات حواء انا موشرط ألقى عندكم حل بس ألقى مين يسمع لي .. انا دايم احاول الهي نفسي بأي شيء علشان ما احس بإني لحالي .. ما فيه حل لأنه خلاص هم كذا البنات ما فيه امل الا اذا جو بنات مستجدات و كانوا من اللي يحبهم قلبي هههههه .. آسسسسفة على الإطالة بس والله ارتحت يوم قلت لكم ..
:27: