وعليكم السلام ورحمة الله وبركاته
فرولة..
أسفة ياعُمري..
الحين أنتبه لردج:(
سعيدة بتواجدج :) والحين بأرد عليج..


هذا كان قبل ويعبر عن براءتك أختي..
لكن بعد إتغيرت نظرتك لأنك صرتي تنظري للأمور بعمق أكبر وبتفكير أشد.. خاصةً إنه بتكون أمامك نماذج مختلفة منها الناجحة ومنها الفاشلة..
إنشاءالله ياعزيزتي الله يرزقك الزوج الصالح إلي يسعدك دنيا وآخرة والأبناء والبنات الصالحين إلي يخلون حياتك فرح ورضا وراحة بال:)

وبتكوني أختي أول المدعوين لكن بعد كم سنة لأني أدرس الحين :rolleyes:

وينكم خواتي:35:
شاركونا لحظاتكم وذكرياتكم يالله:26:

من الضرورى اخذ راى البنت فى زواجها بس هذا الكلام مايمشى على ابويا اللة يستر علية خطبنى واحد فى عمرة وبوى ماصدق جاب المملك وملك وانا عمرى عشر سنوات طفلة صغيرة تصدقون وزوجنى لما صار عمرى اربعة طعش بدون علمى مادريت الا يقول زواجك اليلة وبكيت الين تعبت ويش يفيد البكا اصلا وماعشت معاة لانة زواج صار غصب عنى ورجعت لبيت ابوى وعذبنى وتدهورت دراستى اللة يسامح ابوى بس وجلست خمسة سنين معلقة مافكر يطلقنى منة المهم طلبت الطلاق بالقوة وحصلت علية وبعدها بكم شهر ربى رزقنى بابن الحلال وتزوجتة وعايشة معاة اجمل ايام حياتى 0000وانتى عزيزتى احلام مشرقة اتمنى لك التوفيق والسعادة انشا اللة

سمورة جدة..
قصتك والله تقطع القلب:(
الله يهدي والدك ويهدي جميع الأباء والأمهات إلي يغصبوا بناتهم وأولادهم على زواج ماهم راضيين في..:44:
عموماً الحمدلله إنه الله عوضك بإبن الحلال وإنشاءالله يسعدك دوم يارب..
وتكون أيامك بعد كذة كلها أفراح في أفراح وهنا في هنا..
الله يوفقك غاليتي ودعواتنا الخالصة لكِ:)

سُررتُ بمشاركتك:27:

هلا أحلام مشرقه.. فكرتج حلوه واببدا في حكايتي..

ناداني ابوي في الميلس.. انا وياه بروحنا :29: كنت ماخذه السالفه مزح واقوله بعدين بعدين ابا آكل الحين.. كنت اتشرد منه افكره يبا يكلمني عشان يوديني اسوي فحوصات في المستشفى.. لاني كنت اعاني من مغص ذيك الايام (الله لا يراويكم)

قالي.... جا الاسبوع الماضي بو فلان ويا فلان عشان يخطبونج ل........

وهو وصل لهالحرف وانا دشيت غيبوبه... لا ما اغمى علي.. بس غيبوبه فكريه :23:

ومديت البوووز (ترا يوم استحي امد البوز :( ) ولفيت ويهي..

تكلم وايد بس ماعرف شو كان يقول.. وكنت ماسكه دمعتي.. ويوم خلص قام وقال خذي راحتج في التفكير.. وقال قومي كلي مب قلتي تبين تاكلين ولا انسدت نفسج :31:

وانا اول ما طلع من الغرفه انفجرت :06: ماعرف ليش يمكن من الصدمه.. وعلى قولت الخوات اخر واحد كنت متوقعه اني اتزوجه!! سبحان الله الظاهر كل وحده تاخذ اللي ما كان ابالها انها تاخذه..

المهم... يتني حالة اكتئاب.. وصارت تقلبات عديده في نفسيتي وبالتالي صحتي في هالفتره.. فترة التفكير.. صرت استحي من اخواني واخواتي وكل اهل البيت.. واصيح لاتفه الاسباب :44: صرت وااايد حساسه.. وكله حابسه نفسي في الغرفه..

وبصراحه انا في نفس اليوم اللي كلمني ابوي فيه.. مع اني كنت تعبانه وايد ومصدومه مسكت ورقه وقلم وكتبت كل السلبيات والايجابيات لهالزواج.. عشان ما اتخذ اي قرار بتهور..

خذت مدة شهرين في الاستخاره اليوميه والدعاء والتفكير.. واختراع مجموعة اسئله اعطيهم عشان احصل الأجوبه..

كان همي الأساسي دينه وخلقه.. عشان يوفقني الله.. سألت عن صلاته.. اخلاقه ويا اهله.. يدخن ولا لا.. اخلاقه في بيته.. ما قدرنا نعرف عن اخلاقه من اصدقائه او من محيط الشغل.. بس عرفنا اخلاق اصدقاءه.. بصراحه انا كنت اتمنى زوج مطوع.. يعلمني ويوجهني.. لهالسبب احترت وايد.. بس طمنوني انه يحافظ على صلاته في المسجد وانه بادي في طريق الهدايه ان شالله.. وطبعاً سألت عن وظيفته عشان اعرف مقتدر على الزواج ولا لا.. اقصد مستقر ما اقصد غني.. لانه مستقر مادياً.. وتقدرون تقولون انه في بداية حياته العمليه بس مقتدر..

ونسيت اخبركم.. سألت هل هو اللي طلب الزواج مني او اهله طلبوا منه.. لأن بعض الأهل الله يهديهم يجبرون عيالهم.. بس طلع هو اللي طلب..

كنت مواضبه على الاستخاره مع كل سنن الصلوات تقريباً.. والدعاء في الثلث الأخير من الليل.. وكنت احرص اني اخذ آراء جميع اهل البيت.. ووضحت لهم انه موافقتي تعتمد على موافقتهم.. حتى لو كنت قلبياً متوكله على الله.. بس بغيت الكل ياخذ الموضوع محمل الجد ويفكرون وياي ويسألون.. وحبيت احسسهم بأهمية رايهم عندي.. وعشان اذا مشى الموضوع يفرحون لي لاني خذت بشورهم وان ما مشى يفرحون بعد لان ما طلعت عن شورهم..

وبعد هالحيره كلها.. توكلت على الله.. وقلت .................................. "كيفكم"

الله يسامحه الوالد.. كان مصمم اني ابينله موافقتي بصريح العباره.. جزاه الله خير كان خايف يفهمني غلط.. وانا اقول كيفكم.. وكل ما سألني رديت وقلت كيفكم... يقول مب احنا اللي بنتزوج انتي.. وانا اقول كيفكم.. اللي تشوفونه.. شوي كنت بنضرب على هالجمله
:21:

طلبت من الوالد انه يستخير بعد.. وقلتله اني استخرت وان تيسر الموضوع معناه فيه خير ان شالله وان ما مشى معناه ما فيه خير..

وسبحان الله ابوي كان متردد في بداية الموضوع.. وواحد من اخواني.. بس مع الاستخاره حسيتهم مقتنعين فيه ومنجذبين له.. سبحان الله اذا بغا شي يتم يسهله وايسره..

المهم تم الموضوع.. وملجت.. وها انا الآن بعد مرور شهر على الملجه اروي قصتي
:02:

واسمحولي على الإطاله.. وأي سؤال أنا حاضره