بنت اغلى اثنين :

السلام عليكم ورحمة الله وباركاته .. لكل اخواتي الحبيبات .حبيت ننقلكم صورة الوضع الانساني في طرابلس مش نقولوا بصوت عالي الليبين فيهم الخير لكن بو شفشوفة هو اللي كان كاتم علي انفاسنا. اليوم مشيت لمستشفى شارع الزاوية مع مجموعة متطوعين .وشفت حاجات قمة الروعة. اعداد المتطوعين كبيرة جدا والاعمار من سن ال14 الى سن ال60 .وكل واحد يدير في حاجة اللي ينظف واللي يكنس واللي يحرس واللي ينظم في الحالات وماشاء الله النساوين يكنسوا وينشفوا واللي يكمل حاجة يقولك لازم تعطيني حاجة نديرها .. ولما يسمعوا ان المستشفى ناقصها تلاقيهم يتسابقوا مش يجيبوها . اما الاكل فمتوفر بكميات الكبيرة من الشربة للمسقي للبيتسا والمبطن وبكميات كبيرة ويجي ما شاء الله سخون . هدا غير التبرع بالاكل المعلب زي العصير والتن وغيره .والملابس بكميات كبيرة للجرحى من ثوارنا الابطال وفي مجموعة ثوار يقوموا بواجبهم في حراسة المستشفيات . والحمد لله الدكاترة رجعوا يمارسوا في عملهم ولكن في نقص في الممرضات الليبيات لان في نسبة كبيرة منهم طحالب مع انهم من الفئات المتملحة في المجتمع . ومع كل اللي داروه الكتائب والمرتزقة لكن دكاترتنا يعالجوا فيهم ويعاملوا فيهم معاملة كويسة وهدا كله لوجه الله لان احني الحمد لله خير منهم وقدوتنا رسولنا الكريم علية الصلاة والسلام .. اما ثوارنا الاشاوس فبالرغم من اصاباته لكن معناوياتهم في القمة ويهدرزوا ويضحكوا ووجههم كله نور ربي يحفظهم يارب .. وكل هده الاحداث خلتني نروح للحوش واني كلي فرح وسعادة واستبشار بليبيا الجديدة يملاها الحب والتفاؤل والترابط وبكل الغرور اللي في الدنيا نقول اني ليبية . سامحوني طولت عليكم لكن حبيتكم تشاركوني فرحتي وربي يكمل علينا ونشدوا الطاغية واولاده وازلامة في اقرب وقت ..

السلام عليكم ورحمة الله وباركاته .. لكل اخواتي الحبيبات .حبيت ننقلكم صورة الوضع الانساني في...