السلام عليكم
يا جماعة انا في مشكلة كبيرة وما لي احد استشيره في حلها غيركم
مشكلتي معقدة وطويلة وماقدر اقولها لاحد لان اخاف الناس ما يصدقوني وينظرون لي اني مجنونة
بس هني كلنا نعاني من اعراض متشابهة وان اختلفت الاسباب، فاحس ماحد بيصدقني غيركم
حياتي من كنت صغيرة وهي معفوسة وكل مشاكل وايام كنا صغار كنا بين فترة والثانية نشوف بيض مكسر على باب البيت أو على الجدار ممسوح، وكان ابوي يسال واحد يعرف في هالامور ويقول له مسوين لكم سحر وهذا السحر يسوونه حريم ويجددونه باستمرار وكان يسوي لنا أوراق ندفنها بس ما شفنا منها فايدة.. بس رغم اني ما كنت سعيدة بس كان الحال ماشي، يعني يصيدني الشر اكثر من الخير بس اشم ريحة الخير احيانا.. ولما وصلت المرحلة المتوسطة والثانوية كنت كل مابي ادرس اختي تطفي عني الليت، ماحب ادرس بالنهار احب الليل لانه هادئ وهي ما تنام بالليل لكن من تشوفني حاملة الكتاب تجي تطفي الليت بحجة انها بتنام رغم انها ما تنام باقي الايام الا الصبح وفي النهاية انام بدون ما ادرس لحد ما طفشت وتهاوشت وياها ما شفتها الا تقول لي مما بتدخلين الجامعة! ان شاء الله ما تدخلين الجامعة! فعرفت من هالموقف انها حاقدة علي وتبي مستواي بالدراسة ينزل عشان ما اواصل دراستي، لكن مع مر الايام تجاهلت الموقف ونسيته.. وآخر سنة لي بالمدرسة تموا هي واختي الثانية هم ثنتينهم اكبر مني حطوا بالهم علي ودايما يرددون عبارات بما معناها اني راح اواصل دراستي واتزوج قبلهم!! انا كنت توني صغيرة ومو مثل باقي البنات ما كنت افكر في شي اسمه زواج.. في البداية ما كنت حاطة المسألة على بالي، وكانوا دايما من يصير عندي شي زين يخربونه او يطلع منهم كلام يبين انهم مغتاظين.. اختي الثانية كانت علاقتها قوية وياي وكنت اقول لها كل صغيرة وكبيرة عني وكنت استغرب انها من تعلق على شي عندي دايما اواجه مشاكل فيه، ما يقل عن 3 مواد تكون درجاتي فيها كاملة او قريبة من الكاملة وهي تقول انظلمت فيها ودايما تكرر هالكلام وبعدين ما اجي الا درجتي بالشهادة ناقصة حدود عشرين درجة وكل مرة اقول صدفة، واذا شي دايما اسويه وتقول لي لا تسوينه ماشوف الا صايدتني مشكلة فيه بمجرد ما تنهاني هي، او تقول لي معدلج بينزل ماشوف الا معدلي منقصف وطاب في الارض! او تقول لي محظوظة المعلمات ما يسوون لج مشاكل ما اشوف الا كل مشاكل مع المدرسات رغم ان قبل ما في شي! اما اختي الكبيرة تمت تحن علي تقول لي دايما تضحكين مع صديقاتج وما تضحكين وياي (وهي اصلا صاحبة فتن ومشاكل) وكل تقول لي اي الدنيا تطورت ايام كنا بالمدرسة ما كان في نت والحين انتي تشوفين صديقاتج عالمسن وتطقون سوالف على طول تكرر هالعبارة، ومرتين صار موقف اني عالمسن ويصيح الجرس والتلفون لي بنفس الوقت لكنها دايما تذكر هالشي بعين الحسد وقسما بالله في غضون اشهر من كان عندي 8 صديقات الا كل علاقاتي بصديقاتي منقطعة واكثرها انقلبت الصداقة لعداوة ما تتصورون شكثر تأثرت نفسيتي، وكنت كل ما اعلق على شي تقول لي حواسج شغالة ما عندج هموم، بالج مرتاح!! هذا رغم اني مو قوية ملاحظة ولا قوية ذاكرة، ومن ذاك الوقت للحين ودايما ما عندي حواس ومانتبه لشي والناس دايما يتطنزون علي ويسموني المفهية او يقولون اني اضحكهم لاني انسى الاشياء بنفس الوقت والله احيانا اقعد اصيح صرت مسخرة ومهرج للناس عقب ما كنت عادية كل بسبب عينها.. وشفت منهم مضايقات شكثر لما هجيت من الحجرة وصرت انام بالمجلس رغم اني ادري انه مسكون عندي اخت غير كانت تنام فيه وشافت فيه مواقف واضحة انه مسكون بالجان وبعدين صارت ما تنام فيه، انا صرت انام فيه مضطرة تعبت كل ما يعلقون على شي ينقلب 180 درجة هذا غير اني وين ما اروح يلحقون وراي او اذا استخدم شي يستخدمونه بنفس الوقت عشان ماقدر استخدمه، واختي اللي كنت اقول لها عن كل شي يخصني صارت تتقرب من كل البنات اللي اعرفهم وبمجرد ما تتقرب منهم ماشوفهم الا منقلبين علي ما يعطوني وجه ومصادقينها يعني تخيلوا وحدة ضافتها عالمسن وصارت كل تسولف وياها وترسل لها ملفات وانا كنت اسولف وياها بالساعات صارت ما كأنها تشوفني وما يقل عن خمس مرات اكتشف انها مسويتني بلوك بمجرد ما ضافت اختي.. وبنات غير كانوا يجون لي البيت صاروا اذا يجون يسولفون وياها واذا اكلمهم يتجاهلوني ولا كأني موجودة ومرة وحدة جت قعدت مع اختي وانا نايمة ولا ادري لو ما قعدتني اختي الثانية من نفسها ولا كانت مهتمة ولا قالت لها تصحيني..
من صرت انام بالمجلس كل شي في حياتي انقلب زيادة نوم الليل ما اتهنى فيه كل كوابيس ليليا اصحى من النوم فزعانة.. وكل مابي ادرس ماقدر بمجرد مافتح الكتاب احس نفسي تعبانة وانام بدون مادرس شي، او ما تتم مشكلة الا وتجي على بالي وتنسد نفسي او احس بصداع كبير وكنت ماادرس الا بالجامعة وكل امتحان تصيدني مشكلة ادرس معظم المنهج والدرس الوحيد اللي مادرسه يجيينا سؤال او اسئلة منه عليها معظم الدرجات او يجينا سؤال خارجي او انسى اشياء سهلة او اخلط الاجابات رغم اني ما كنت جذي ايام المدرسة بالاضافة لهالمواقف اللي تاثر على الدرجات دايما اجي لدرجاتي اقل من حقي، صديقاتي بعد كانت درجاتهم اقل من حقهم بس احيانا مثل حقهم او اكثر الا انا الوحيدة كل اقل من حقي، واذا احصل حقي دايما بادعية ونذور وفوقها لازم تصيدني مشكلة مثل اللي ذكرتهم، وكانت اختي الكبيرة كل تقول اني بالمجلس وكل ادرس.. وكنت دايما اجي لاغراضي وثيابي مخربة او احطها بمكان وارجع لها ما القى لها اثر وهالشي خف لما اختي الثانية بدات الدراسة رغم انها دارسة من قبل بس يوم درست حطت البال علي وكل تقول ان مستقبلها مظلم وانا المستقبل قدامي والناس بيشوفوني وهي ماحد بيشوفها وانا الناس بتشوفني وبتزوج وهي لا.. وعقبي بفصل واحد هي درست دراسة ثانية اما اختي الكبيرة درست عقبي بسنتين منها ما صرت اشوف اغراضي مخربة او مفقودة!!! وهاي دايما كانت تكرر ان الرجال ما يبون الا وحدة جامعية! صار لها سنين تكرر هاي العبارة لحد ما زفيتها، في دراستي الجامعة تميت سنتين ونص كل ادعية ونذور عشان يمشي حالي وبمجرد ما ياست وتركتهم شفت اشوف رسوب بالهبل كل فصل ثلاث مواد ارسب فيها كنت كل مابي ادرس ما اقدر كل صداع او مالي نفس حتى بالجامعة وجبت علامات خيالية حتى الدكاترة كانوا يستغربون من درجاتي اول مرة تمر عليهم حالة جذي.. وفي مادة كنت متحمسة كلش لدراستها لانها سهلة عندي واحبها قسما بالله ثلاث مرات اخذتها ولا نجحت فيها هاي زيادة على غيرها كل ما احاول ادرسها ماااقدر عجزت، لما في فصل كلمت رئيس الجامعة قلت له انها متطلب سابق لمقررين ومضطرة اخذهم مع بعض لان كورس تخرج وبالغصب وافق طولت الساعة اسبوعين يوميا امشي مسافات طويلة من قسم لقسم يالله وافق، والمنتصف ما قدمته، قدمت مال المادة اللي وراها شرحتها لي بنت في بيتهم وحسيتها سهلة ولما دخلت الامتحان كل شي طار وحسيت نفسي مو عارفة ولا شي، وعقب ما طلعت من الامتحان تميت افكر في حالي وفجأة ذكرت اني تكلمت عدة مرات قدام اختي مستانسة اني بدرس المادة ومن جبت سيرة هالمادة وهي كل تقول لو هالمادة تخصصها جان انفصلت من االجامعة لان هالمادة عقدتها ما تفلح فيها وظلت كل تكرر هالكلام! وعلى طول تصير مواقف بمجرد ما يعلقون على شي ينقلب 180 درجة، في نهاية الدراسة بالجامعة قلت لازم اتخرج واحلامي لما افسرها دايما يقولون لي عندج تابعة وانا متاكدة ان السالفة بعد فيها حسد وسويت كشف بالقران مرتين وقالوا لي عين قوية، وتميت اتعالج بالقران عند شيخ واحلم بناس تموت بس ماشوف تغيير.. لحد ما اختي الثالثة طرشت لي الرقية الشرعية صرت اقراها ما شفت تغير في الوضع تميت ماعرف ادرس بس شفت قفزة واضحة كلش في الدرجات والحمد لله لو لا قراءة االرقية ما كنت تخرجت. ومن ذاك الوقت اذا اقرا الرقية تتعدل حياتي وبمجرد ما اتركها ترجع معتفسة اكثر من قبل
بس كل تصيدني عراقيل تمنعني من قرائتها، بس قبل سنة تميت اسبوع مريضة عالفراش واسمع رقية الصاعقة ما كمل الاسبوع الا وانا محصلة وظيفة، كانت بسيطة كلش كلش والكل يقول لي بكالوريوس تشتغلين هاي الشغلة بس اشتغلتها مضطرة، ومن اشتغلت على طول اشغل سورة البقرة كل ليلة واطلع صدقات، كنت كل الاقي مشاكل بالشغل بس علاقتي مع الاكثرية فيهم زينة، وتعدلت علاقتي مع الاهل بشكل جدا جدا ملحوظ وما صارت تصيدني مشاكل معاهم، بس بعدين طلعت من الشغلة وسافرت فقطعت سورة البقرة والصدقات ومن رجعت بمجرد ما دخلت البيت اسودت الدنيا في عيني ونفسيتي معتفسة وكل معصبة ومن مشكلة لمشكلة واذا مو مشكلة اتم مريضة او امر بكآبة حادة رغم اني رجعت لتشغيل سورة البقرة بس مثل الحال وكل مرة يخترب لي شي، بعدين قمت اطلع صدقات وخف الوضع وقلت المشاكل وقل المرض رغم انهم لا زالوا موجودين، والكوابيس قلت بس مرة حسيت كأن احد ماسكني من راسي ومن رجولي وحسيت فيها تذوب وانا بين النايمة والصاحية لما سالت شيخ قال احتاج جلسة قران واخذت جلسة قران والحين صرت اسمع الرقية احيانا.. انا من رجعت من السفر كل ما اقرا قران او ادعية امر بحالة كآبة احس نفسي كارهة كل شي وتمر فترة عقب زين مني اصلي استغفر الله، ورجعت انطوائية وماحب اشوف احد.. واختي الكبيرة كل مرة تحط عينها على شي ويخترب وينقلب 180 درجة، ومن امر صوبها تحدق فيني من فوق لتحت والمشكلة ان عينها كلش حارة، مو بس وياي.. قبل كم سنة حطت البال على وحدة من الاهل كبيرة في السن تقول معمرة وبنفس الاسبوع مرضت وتوفت، ومرة علقت على عايلة عددهم كبير بالليل ويوم ثاني الصبح توفت منهم وحدة، ومرة علقت على واحد تقول كل ما تطلع من البيت دايما تشوفه يشتري وخلال اسبوعين تفنش من شغله وانسجن، وهي واختي الثانية دايما حاطين العين على الاوادم ما يحبون يشوفون خير عند احد اذا احد صاده شي زين يشهقون فيه ولا يرضون يصلون على النبي ودايما يغتابون الناس حاقدين على الكل من داخل البيت او برى البيت
انا الحين حياتي كلها معفوسة ما ادخل البيت الا اذا كلش مضطرة كل حابسة نفسي بالمجلس وهو مسكون وعدة مرات من قبل اشوف احلام تهديد من الجن، وكل كوابيس ودايما اشوف ناس او اشياء مو واضحة او احيانا حيوانات على جنب ومجرد ما ارفع راسي ما اشوف لهم اثر! واذا اغمض عيوني اشوف ناس سمران او ناس مشوهين او حشرات او حيوانات.. القران دايما مشغل ودايما احط عطور واحيانا اطلع صدقات واسمع رقية الصاعقة مؤخرا
بس حياتي لا زالت معفوسة.. من هالايام اتصلوا ناس في امي قالوا بيجون البيت يشوفوني عشان يتقدمون لي ومنها لا في حس ولا خبر وانفتح لي موضوع الزواج، عمري 25 وما تقدموا لي الا مرات كلش كلش قليلة ادخل المقابلة وبعدين ما يرجعون او يقولون بيتقدمون ولا يتقدمون، صادني احباط وتعقدت من نفسي دايما اقول ليش الله خلق شكلي اقل من غيري، رغم ان مو كل البنات اللي تزوجوا حلوين وشكثر بنات تزوجوا صغار وشكلهم جدا عادي، نفسيتي حدها تعبانة خواتي حطوا البال علي وانا كنت صغيرة مو مهتمة في الزواج والحين اشوف بنات قدي واولادهم دخلوا المدرسة او عقب اشهر يدخلون المدرسة وانا للحين حتى ما انخطبت وشكثر ناس ينظرون لي على اني عانس وبنظرات شفقة، من اختي ظلت تقول لي مستانسة وبالج مرتاح ما عندج هموم وكل شي في حياتي متوقف لا دراسة (تخرجت متاخرة سنة ونص والناس صارت تتشمت ومعدلي عالحافة رغم ان ايام المدرسة كانوا ناس وايد يقولون لي من مدرسات وطالبات انتي لو تهتمين تجيبين في التسعين وناس وايد منهم كانوا يقولون لو تهتمين تجيبين اعلى معدل) ولا شغل ولا زواج ولا رخصة سياقة ولا عندي اي شي مثل باقي البنات، احيانا اتذكر قبل سنتين تقدم لي شخص الا اختي تقول لي حلمت انج محتارة بين فستانين وترجحين واحد على الثاني اكيد بيتقدم لج واحد ثاني قريب.. وفعلا عقب 3 اشهر (بالنسبة لي فترة قصيرة كلش لان ماحد يتقدم لي) تقدم لي واحد وكنت ارجح الاول بس ثنينهم دخلت مقابلة ولا رجعوا كان الرفض منهم عقب فترة سالت شيخ يفسر الاحلام قلت ليش تحلم فيني وهي اساسا ما تبيني اتزوج وكل خايفة اتزوج قبلها عادة اذا احد يحلم عن احد يكون من كثر ما يعزه بس هي ما تحبني، الا يقول لي اذا احد كل يفكر في شي يحلم فيه.. يعني من كثر ما خايفة اني اتزوج حلمت فيني وانا ما حلمت عن نفسي ، وقبل كانت تخرب علاقتي بصديقاتي وبالناس عشان يكرهوني وماحد يتقدم لي شوفوا النذالة لاي درجة..
يا جماعة اسفة طولت كلش عليكم بس والله نفسيتي كلش كلش تعبانة وما عندي احد اشكي له او اخذ رايه غيركم
شنو تتوقعون، تتوقعون اقدر اجتاز الحالة اللي اعيشها؟ سحر + مس + حسد قوي كلش .. كلهم بنفس الوقت !
وفي طريقة عشان اشغل خواتي عني واعيش بسلام؟!
M S N @m_s_n
عضوة
يلزم عليك تسجيل الدخول أولًا لكتابة تعليق.
فله شمعة منورة
•
الله يعينك اختي خدي من اثرهم
M S N
•
الله يعينك اختي خدي من اثرهمالله يعينك اختي خدي من اثرهم
مشكورة اختي على ردج والله فرحت لما شفت رد على موضوعي
انا اخذت حاليا اثر من وحدة فيهم بس ماعرف الخطوة الثانية شسوي فيه، أحرقه او شي ثاني؟
اما اختي الكبيرة اللي سدحت الاوادم هاي ماقدر اخذ من اثرها لانها تلاحظ اي تحرك في اغراضها حتى لو كان بالمللي فاي شي اخذه بتلاحظ مباشرة، لكن قبل ايام كانت مستخدمة الحنفية وهي دايما تجي وراي مكان ما اروح فقلت ليش ما استغل هالشي، عقب ما استخدمت الحنفية وهي رطبة مباشرة مسكتها ومسحت على وجهي والكفين وماعرف هاي الطريقة صح لو غلط؟ وفي طريقة احسن؟ بحيث اني اخذ شي ما تحس فيه رغم انها دقيقة؟
انا اخذت حاليا اثر من وحدة فيهم بس ماعرف الخطوة الثانية شسوي فيه، أحرقه او شي ثاني؟
اما اختي الكبيرة اللي سدحت الاوادم هاي ماقدر اخذ من اثرها لانها تلاحظ اي تحرك في اغراضها حتى لو كان بالمللي فاي شي اخذه بتلاحظ مباشرة، لكن قبل ايام كانت مستخدمة الحنفية وهي دايما تجي وراي مكان ما اروح فقلت ليش ما استغل هالشي، عقب ما استخدمت الحنفية وهي رطبة مباشرة مسكتها ومسحت على وجهي والكفين وماعرف هاي الطريقة صح لو غلط؟ وفي طريقة احسن؟ بحيث اني اخذ شي ما تحس فيه رغم انها دقيقة؟
M S N
•
جميلة44 :
يختي قوليلها في وجهها انت عينك حااااااااااااااااااارة خافي الله ترا تؤثمينيختي قوليلها في وجهها انت عينك حااااااااااااااااااارة خافي الله ترا تؤثمين
قلت لها ان عينها حارة من قبل بس تنكر!
وثانياً أتوقع انها تدري بس تتعمد هالشي لان قلبها أسود وتتضايق لما تشوف عند احد خير
وكل ما ارد عليها تتمسك بموقفها اكثر طول وقتهم هي واختي الثانية يتكلمون على الناس ويحسدونهم اذا شافوا الله عاطنهم نعمة.. حتى اذا قلت لهم صلوا على النبي ما يرضون ويقولون لي لا تتدخلين
وثانياً أتوقع انها تدري بس تتعمد هالشي لان قلبها أسود وتتضايق لما تشوف عند احد خير
وكل ما ارد عليها تتمسك بموقفها اكثر طول وقتهم هي واختي الثانية يتكلمون على الناس ويحسدونهم اذا شافوا الله عاطنهم نعمة.. حتى اذا قلت لهم صلوا على النبي ما يرضون ويقولون لي لا تتدخلين
khazna
•
الله يعينك بالمسبه لطريقتك يوم اخذتي وراها من الحنفيه ومسحتي وجهك صح هي كذا تاخذي من الاثر وتحطيه بمويه وتمسحي جسمك كله
طيب مافكرتي تتقربي لاختك مثلا قوليلها اهتمي بنفسك انتي حلوه عدلي شعرك وملابسك مثلا من هالحكي علشان تحس انك تهتمي فيها
اطلعي معها مشوار لمطعم مثلا على حسابك
جيبي لها هديه مميزه
هي اكيد حاسه باللي فيك زمنفرها وانتي بدون ماتحسي تعطيها اشارات انها شخص غير مرغوب فيه
فهمتي علي
وش رايك تجربين
وشوفي يمكن قلبها يحن وتتغير
الله يوفقك
توني اشوف ردك اللي فوق
اذا هم قاصدين هالحسد وعارفينه هذي سالفه ثانيه
خلك لحالك وخصوصياتك حاولي لايعرفون فيها ولازم عندك احد في العيله تثقين فيه يساعدك على اللي انتي فيه
واوصيك بالاول الدعاء الدعاء الدعاء ان الله يسهل عليك امورك كلها
طيب مافكرتي تتقربي لاختك مثلا قوليلها اهتمي بنفسك انتي حلوه عدلي شعرك وملابسك مثلا من هالحكي علشان تحس انك تهتمي فيها
اطلعي معها مشوار لمطعم مثلا على حسابك
جيبي لها هديه مميزه
هي اكيد حاسه باللي فيك زمنفرها وانتي بدون ماتحسي تعطيها اشارات انها شخص غير مرغوب فيه
فهمتي علي
وش رايك تجربين
وشوفي يمكن قلبها يحن وتتغير
الله يوفقك
توني اشوف ردك اللي فوق
اذا هم قاصدين هالحسد وعارفينه هذي سالفه ثانيه
خلك لحالك وخصوصياتك حاولي لايعرفون فيها ولازم عندك احد في العيله تثقين فيه يساعدك على اللي انتي فيه
واوصيك بالاول الدعاء الدعاء الدعاء ان الله يسهل عليك امورك كلها
الصفحة الأخيرة