أريد حلاً

اخواتي العزيزات

السلام عليكم ورحمة الله وبركاته


حبيت آخذ رايكم بموضوع صار له فتره طويله، ومب عارفه كيف اتصرف فيه.

في شخص حقير يطرش لي مسجات جنسية على موبايلي ويتكلم فيها كأنه يعرف شكلي ويعرفني، وأنا مب عارفه كيف اصرف معاه.

الحل الطبيعي لها الشي اني اعطي اخواني موبايلي وهم يصرفون فيه، المشكله انه اهلي مب من النوع الي يتفاهم في هالمواضيع يعني عادي يذبحونه لمجرد اني اقول هالشي وهو يستاهل اشد من هالشي، في بداية الأمر قمت ابعث له ادعية وأحاديث نبويه شريفه كنت ابغيه يصد او يذكر ربه، لكن للأسف ماشي فايده بالعكس يزيد، بعدها قررت اني مااطرش شي.

وقمت اطلب من الله انه ينقذني من هالشي اللي مالي ذنب فيه، قام بعدها يقطع بين 5 الي 8 شهور مايطرش شي وفجأه اتيه الحاله مره او مرتين.

لاتقولون انه عاجبني الوضع، بالعكس الوضع مقرف لكن مااقدر اسوي غير اني اصبر وأسكت، لأني جربت هالشي من قبل ايام ماكنت صغيره وكانوا على وشك انه اخواني يذابحون مع واحد غبي متصل على خط البيت يخربط وسمع صوت بنت.

والدتي الله يجزاها خير من بعد هالسالفه قالت لي لا تقولين لأخوانج وانا بأدبه وفعلا من يومها اي حد يسوي هالحركات هيه الي تردهم.

لكن المشكله احينه على الموبايل وانا استحي اقول لوالدتي هالكلام اللي ينكتب

بتقولون الحل بسيط غيري تيلفونج، ماراح اقدر اغيره لأنه رقمي جديم وما اراح اتنازل عنه لشخص تافه مثل هذا انا بندته فتره طويله ورجعت فتحته والحمدلله خف الموضوع بس مثل ماقلتكم شيطانه يذكره فيني بين فتره لفتره.

ابا اقتراحات عمليه فكروا ويايه لو سمحتوا.