تكملة الزيارة
وجهزوا نجلاء واسمهان السفرة ونادوا الجماعة وجلسوا ياكلون وأم عبدالرحمن وسماح يتبادلون السواليف..
أم عبدالرحمن:مرة زعلت على اللي صار لتركي ياسماح شلونه هو الحين؟؟
سماح:ماشي حاله..
أم عبدالرحمن:الله يعوض عليه..اللي صار له مو شي بسيط
سماح:ماعليك الرِجال ينسون جروحهم بسرعة مو مثلنا حِناالحريم!!
وساد الصمت على طاولة السفرة وصارت رانية تناظر اسمهان وتغمز!(يعني اش السالفة!!)
دق جوال سماح إلا طلع محمد يستعجلها تنزل عشان يوديها لبيت أختها هند وكانت سماح جالسة من الأول بعبايتها..واستأذنت الضيوف وراحت.....
أم عبدالرحمن:ماشاء الله بملكة اسمهان كانت تسريحاتكم ومكياجكم مرة حلوة وين تضبطتوا؟
مرام:بصالون أختي ماجدة...
أم عبدالرحمن:ماشاء الله عندها صالون؟طيب اش اسمه؟ووين موقعه؟؟
مرام:اسمه..؟..(ماأبغى أقول اسمه أخاف تفشلوني وتروح ألف وحدة منكم وتقول أنا من طرف رماح ردينية ويصلحونكم على حسابي!!)وموقعه بحي الخالدية...
أم عبدالرحمن:خلاص أنا وجوهرة بنتقاول معاكم بدل مانروح لمشاغل يأخرونا ويصبغون وجوهنا أشكال وألوان!!
مرام:المشغل وصاحباته تحت أمرك خالتي...
أم عبدالرحمن:يسلم لي ذوقك يالغالية..وهالحين استأذنكم ودي أرجع لبيتي..أكمل أموري..
اسمهان:لسه بدري ياخالتي!!
أم عبدالرحمن:بدري من عمرك حبيبتي..والله يعطيك العافية ويكثر خيركم ان شاء الله..ماشاء الله عليك فنانة وسفرتك حلوة ماعليها قصور!تسلم أياديك..
اسمهان(بخجل):الله يسلمك ياخالتي!.
وقامت أم عبدالرحمن بتطلع وطيبتها اسمهان بتولة عود حاطتها على المدخل..
أم عبدالرحمن:طاب طيبك..وعاش حبيبك!!
وخرجت من البيت...وصكت الباب وراها...
إلا رانية قامت تطق على الطاولة وتغني:شيلوها شيلة..والليلة ليلة!
نجلاء(وهي تتريق وتقلد صوت أم عبدالرحمن):ماشاء الله عليك فنانة وسفرتك حلوة ماعليها قصور!تسلم الأيادي!
قامت مرام ترد عليها(وهي تقلد اسمهان):الله يسلمك ياخالتي!
مشاعل والشلة:هههههههه
نجلاء:يقطع أبو البكش ياشيخة!ماكأني ساعدتك في ترتيب السفرة وشفت سماح داخلة بأكلها وباقي الصحون يا مغلفه بنايلون يا مغلفة بقصدير..يعني من عند أهلك أكيد!!!
أفنان:أفاااااا..معونات خارجية؟!يامال الفلس!!
اسمهان:بسكم عاد..أهم شي إن الأكل لذيذ واستانستوا عليه!
رانية:من ناحية لذيذ..فهو لذيذ...ماتشوفيني منطمة وساكتة؟ من كثر مامليت فمي!
بس بصراحة ياحظك بأم عبدالرحمن!حرمة كشخة وذوق اللي يشوفها مايقول كبيرة!حسرة على عجايزنا الوحدة قَشْرة من برة ومن جوه!!!!!
اسمهان:ترى خالتي موب كبيرة عمرها مايتجاوز ال46 سنة..بس تزوجت وهي صغيرة..
مرام:بسرررررررعة جيبي صور الزواج!
وراحت اسمهان تجيبها وتفرجوا عليها...وبس شافوا عبدالرحمن من غير شنب ولحية فقعوها ضحك!
الشلة وهم متجمعين على الألبوم:كااااااااااااااااااااااااااااك..
نجلاء:تضحكين علينا وتقولين متزوجة سعودي؟؟أقول طلَّع الجنسية ولا بعد؟؟؟ههههه
رانية:ماشاء الله وجهه يبرق!مايندرى مين اسمهان من عبدالرحمن!!!!هههههه
مشاعل:حرام عليكم أكيد شايف نفسه كشخة!حطمتوا اسمهان!!
مرام:اسمهان صديقتي وأعرفها زين..لابدها حلفت عليه يخرب شكله عشان لاتصيده عين!!هههه
اسمهان:بلا يبلاكم !هذا صديقه لعب عليه واتفق مع الحلاق يحوسه!!
رانية:والله فلَّة زوجك..طلع حتى هو عنده أصحاب راعيين مقالب؟!عسى مو مسميين نفسهم شلة الصاعقة بعد؟!!ههههه
نجلاء:لحظة ياجماعة مالاحظتوا كلام أم عبدالرحمن مع سماح؟؟
الشلة:ايه لاحظنا!
رانية:ايه صحيح يااسمهان اش السالفة؟؟ماأسمع إلا كلمة الله يعوض عليه!!!لايكون عبير ماتت؟؟
اسمهان:لا الشر بره وبعيد..بس تطلقت!!
شهقوا الشلة بصوت جماعي!!
اسمهان:بسم الله عليكم!يعني اللي يشوفكم..يقول مساكين ماوصلتكم الأخبار!!
الشلة:فعلاً ماوصلتنا ولاندري!!
قامت اسمهان تحكي لهم بالتفصيل سالفة الحرق والسحر والسلب والنهب واستغلال تركي!
أفنان:يالطيف يارب..ياويلهم من الله وش ذنبه ولد الناس يلعبون عليه؟؟
مشاعل:أشك إني قاعدة أسمع رواية لفجر السعيد!!!
رانية:هي صدق إن البنت ذي متشربة الخباثة لدرجة الثمالة!بس ماتوقعتها تطورت لهالدرجة الإبليسية!!!
اسمهان:وشفيك تتكلمين مثل العضوات اللي يبون يسوون نفسهم مثقفات بالغصب؟!!
نجلاء:ضيقتي صدري بسيرتها!خلاص لاتجيبون طاريها..أهم شي افتكينا منها ومابنشوفها السنة الجاية!!
مرام:حكينا ياسمهونة عن شهر العسل ورحلتك لدبي وماليزيا!!
وقامت اسمهان تحكي لهم عن كل شي ومواقفها الطريفة حتى بـ مكة!
الشلة:ههههههههههه
رانية:الله يقطع ابليسك ياسوسو تدلكين رجيلاتك بوسط الحرم؟صدق ماتستحين؟!!
نجلاء:أقول زين طاح حظك بأندونيسية تمسج..مو ايرانية كان دهنت سيقانك بـ تفالها!!
وطاحوا بسمهونة تريقة ومزح...
وقالت مرام:ها ياعسل بتفرجينا على بيتك ولا نسوي هجوم ورحلة استكشافية؟؟
اسمهان:لاتفضلوا أنا مخططة أفرجكم...
دخلوا مكتب عبدالرحمن..وقامت رانية تفتش بالكتب وقالت:شوف وجه العنز وإحلب لبن!!طالعوا أسماء الكتب بس ترفع الضغط وتلوع الكبد!!
ثورة في اكتشافات نووية!
ارهاصات تاريخية..مع وقفة مشرفة!
تاريخ الأدب من زبدة الحقب!
فتش عن الشخصية المغناطيسية
النظام على الطريقة الأفلاطونية
اسمهان:فعلاً توجهات عبدالرحمن في القراءة والكتابة جايبت لي الضغط!
نجلاء:رجَّال وبيتجاوز الثلاثين..وش تبينه يكتب عن آخر صيحات الفساتين والمكياج؟ولا عن خلطات التبييض والتفتيح؟؟
ودخلوا غرفة النوم وراحت رانية الملقوفة تركض على دولاب اسمهان وفتحته..وقالت:إلى الباحثات عن الكشخة!طبوا وتخيروا!!
نجلاء:ياواد يااسمهان ياحركات!اش هالترتيب والتنظيم كله؟؟
رانية:بنات تعالوا نشم ريحة ملابسها أخاف معلقتهم ومو غاسلتهم!!
اسمهان:ياشين اللقافة ياناس!وخري أشوف!
فتحت رانية دولاب عبدالرحمن ولقيت الثياب الحمراء اللي خربتهم اسمهان معلقة!!
رانية:ياويلي ويلاه الرَجَّال انهبل!حلق شواربه ولحيته وصار يلبس أحمر!!
الشلة:هههههههههههههه
المهم كان انطباع الجميع عن البيت والأثاث زين..طبعاً كل شي كان كشخة وذوق..
وماراح أكمل اليوم لأني تعبااااااانة ومزكمة.. نستكمل غداً بمشيئة الله!!!!!!!!!!!

تتمة ماحدث ودار!!
بعد ماانتهوا الشلة من جولتهم في بيت اسمهان دعوا لها بالبركة وعجبهم الأثاث والتنسيق..
مشاعل:بيتك مرتب وحلو يااسمهان ماشاء الله ..الله يهنيك فيه..
رانية:يسمونه القفص الذهبي مدري ليش!مع انه مافيه شيٍ يبرق!!
مرام:ويقولون عش الزوجية وماني شايفة بيض!!واسمهان ماتطير!
نجلاء:ههههه..أقول تعالوا نرفع الأكل من طاولة السفرة...
رانية:شمروا أكمامكم يابنيات وخربوا كشختكم شوي وخل نساعد اسمهان بغسل الصحون وتنظيف المطبخ!
اسمهان:والله ماتمسكون شي!خالتي واعدتني ترسل شغالتها ترَّفع معاي...
وثواني ودق الجرس إلا هي شغالة أم عبدالرحمن ودخلت المطبخ وبدأت التنظيف..
اجتمعوا الشلة بالصالة وقامت رانية توزع الطيران وعددها 3 دفوف عطت واحد لاسمهان وواحد لمرام والثالث قالت رانية لمشاعل:مشاعل تعرفين تطقين؟
مشاعل:أفا عليك..أعرف أطق وأكفخ بعد!!
رانية:يالله طقوا..حانَ وقت الفلَّة ياأظرف شِلة!!!
وقاموا يطقون وسحبت رانية نجلاء وقامت ترقص معاها وحطت رانية شيلة على راسها وقامت تغطرف وترقص وماخلت رقصة مارقصتها!جمعت كل ثقافات الشعوب برقصها رقص عراقي على عماني على سامري على فرعوني!!على سامبا وفلامينجو!!حتى باليه نطنطت لهم شوي وقامت ترقص باليه على طق الدفوف!!!!ههههه
وسط ضحكات الشلة!!
التفتت مشاعل خالة أفنان وقالت لأفنان:أما شلتك هذي يافنون شي ماحصل!!!
وسحبوا أفنان ترقص معاهم ورجعوا سحبوا اسمهان ودبكوا ورقصوا ورانية عاد تخبرونها كل مادبكت برجلها على الأرض سوت زلزال بالعمارة!!
وأم عبدالرحمن قاعدة بصالتها تحت تتابع برنامج وكل شوي تطالع للسقف وتقول:ياساتر يارب وش هاالرفيس؟؟؟
وشغالة أم عبدالرحمن واقفة بالمطبخ تشتغل وتتابعهم من بعيد وتقول بنفسها:مدام اسمهان وهادا ديوف واجد مجنون!!!!!!!!!
ولبسوا رانية ونجلاء على رووسهم طِرَح وقاموا يسوون نفسهم عجايز ومسكوا اسمهان بيديها وقامت رانية تقول:لاأوصيك يابنتي يااسمهان لاصفقك زوجك على خد عطيه خدك الثاني!!
نجلاء:ايه فديتك ولا ضربك زوجك بـ يد اضربيه بإيدك الثانية!
رانية:وأن مد لسانه عليك شبر..مدي لسانك شبرين!!
نجلاء:وإن قال لك يمين قولي يسار وإن قال لك فوق قولي تحت!
رانية:وخلك نشمية وشاطرة إن قمتي لاتقعدين وإن قعدتي لاتقومين!!
أفنان:ياحليلكم ياعجايز الجن!بتخربون بيت البنت!
اسمهان:هههه..كأني عاد بأسمع شي من كلام هالمهابيل الله يخلي أمي وخالتي نوال نصايحهم من ذهب...
وقضوا الزيارة بتنكيت ووناسة..وشوي وراحت أفنان وخالتها..وبعدهم راحت نجلاء..وبعدها راحت رانية..وآخر وحدة خرجت كانت مرام ونازلة من الدرج وماغطت وجهها لسه وسواقها وشغالتها ينتظرون برة بهالوقت كان عبدالرحيم أخو عبدالرحمن توه واصل من السفر ومسوي مفاجأة لأمه وماخبرها..ويوم شاف السيارة اللي فيها سواق وشغالة ظن إن أمه عندها ضيوف فقام يلف بالحوش بانتظار يخرجون الضيوف من عند أمه..وهو واقف كانت مرام نازلة من الدرج وماهي منتبهة له أما هو تسمرت عينه عليها وفجأة جات عينها بعينه فارتبكت البنت وغطت وجهها وراحت للبوابة بسرعة وركبت سيارتها!!!أما هو من الاحراج لف وجهه بسرعة وراح يدق الباب الرئيسي وفتحت له أمه...
أم عبدالرحمن:هلا عبدالرحيم..ياحيا الله من جانا!!ادخل ادخل..وقامت تسلم عليه..
أم عبدالرحمن:وش هالمفاجأة الحلوة؟لاخبرتني بحضورك ولاشي!
عبدالرحيم:ماصدقت انهم عطوني اجازة قلت إلا أجي وأقضيها معاكم..وجايب لك أخبار حلوة معي!!
أم عبدالرحمن:بشرني..هات!!
عبدالرحيم:أخيراً وافقوا بالعمل على طلب النقل اللي صار لي سنين مقدم عليه..وبينقلوني من محطة أرامكو اللي بأبقيق..هنا عندكم بجدة!!
أم عبدالرحمن:صحيح؟؟؟؟الله يسعد أيامك ويبشرك بالخير ياولدي قول آمين!!
وقامت أم عبدالرحمن تدمع عيونها
عبدالرحيم:وش فيك يمه؟ظنيت هالخبر بيسعدك مو يخليك تبكين!
أم عبدالرحمن:أبكي من فرحي!ماتتخيل ياولدي كم صار لي أدعي إنكم تتجمعون حولي وماتفارقوني أبد..وهذا أخوك عبدالمجيد صار له مدة من يوم نقل جدة وصار ساكن معي..وأختك أحلام كلها شهر بالكثير وبتسكن مع زوجها بجدة!وعبدالرحمن الله يحفظه هو الوحيد اللي ماابتعد عني منكم الحمدلله على كل نعمة..عسانا مجتمعين على الخير دايماً..
عبدالرحيم:يمه بغيت أسألك سؤال؟
أم عبدالرحمن:اسأل!
عبدالرحيم:شفت سيارة واقفة بره فيها سواق وشغالة..منهي سيارته؟؟
أم عبدالرحمن:أكيد سيارة وحدة من ضيوف اسمهان زوجة أخوك..
عبدالرحيم:أهلها كانوا عندها؟؟
أم عبدالرحمن:لا..هذول صاحباتها بالمدرسة..يازينهم ويازين جلستهم كلامهم يونس..كنت عندهم فوق بس حسيت انهم يبون ياخذون راحتهم بالسوالف فاستأذنت ونزلت...
عبدالرحيم:طيب يمه ماتدرين سيارة مين فيهم هذي اللي كانت بره؟؟
أم عبدالرحمن:لا مدري..بس انت وشفيك تسألني من أول؟عسى ماشر؟؟
عبدالرحيم:بصراحة؟انتي تعرفيني ماأحب ألِف وأدور..أنا ظنيت الضيوف عندك وبيطلعون استحيت ورحت للحوش الخلفي بانتظار يخرجون من عندك وبعدين أدخل أنا!بس تفاجئت إن فيه وحدة نازلة من فوق في الدرج وناظرتها من غير قصد..وكانت حلوة يمه..حلوة مرة!!!!
أم عبدالرحمن:يوووووه الله يلعن ابليس!عسى شافتك وانت تناظرها؟الحين وش يقولون عنَّا الناس؟عيال أم عبدالرحمن عيونهم زايغة؟؟؟
عبدالرحيم:يمه الله يهديك لاتفهميني غلط أنا ناظرت بدافع الفضول لأني أسمع صوت بالدرج بس عيوني تسمرت عليها والنظرة الأولى لي..وبعدين غضيت بصري!بس يمين ماقصدت آآذي بنت الناس وأتمقل فيها!!والصراحة هي حياوية أول ماشافتني غطت وجهها وراحت تركض بسرعة للباب
أم عبدالرحمن:الله يغفر لك ان شاء الله...
عبدالرحيم:يمه ماتدرين ان كانت متزوجة أو مخطوبة؟؟
أم عبدالرحمن:أقول؟أشوفك كثرت أسئلة حول بنت الناس؟لايكون معجبتك؟؟
عبدالرحيم:حيــــــــــــــــل يمه!أقول لك حلوة حلوة وحشيمة!!!!
قالت أم عبدالرحمن بنفسها:فشيلة لاتكون نجلاء وينصدم إنا مابنقدر نخطبها له لأننا سبق وخطبناها لعبدالمجيد!!!!
قامت أم عبدالرحمن واتصلت على اسمهان وبعد السلام:اسمهان حبيبتي الشغالة انتهت؟ ولا لسه؟
اسمهان:ايه خلاص انتهت بس واقفة تكنس مجلس الحريم..تبينها الحين خالتي؟؟
أم عبدالرحمن:لا بس أول ماتنتهي خليها تنزل لأن عبدالرحيم توه واصل من السفر وأبيها تجهز لنا العشا..ماشاء الله ضيوفك راحوا؟؟
اسمهان:ايه راحوا من أول..آخر وحدة خرجت من عندي قبل شوي كانت مرام..تأخر عليها السواق..بس أشوى ماجاء عبدالرحمن وهي موجودة كان انحرجت مسكينة..
أم عبدالرحمن:ياحليلهم صاحباتك انتي أول وحدة تزوجتي فيهم وأشوفهم فرحانين فيك.. بس مافيه وحدة منهم زواجها قريب؟؟
اسمهان:لاااا..ولاوحدة مخطوبة منهم أصلاً!!!
أم عبدالرحمن:يلا الله يكتب لهم اللي فيه الخير..
===========
قامت اسمهان وعبت صحنين كبيرة من كل الأشكال والأصناف الحالية والمالحة اللي عندها وعطتهم الشغالة تنزلهم لأم عبدالرحمن على العشا..وراحت الشغالة وقامت اسمهان تغير هدومها وتستعد لحضور عبدالرحمن من العمل..ورتبت الأكل على طاولة السفرة وحطت معاه كاستين عصير وجابت الشمعدانات الجديدة اللي أهدتها اياها نجلاء وولعت الشموع اللي فيها وجابت باقة الورد اللي جابتها مرام وحطتها بعد على طاولة السفرة وطفت الأنوار وجلست على ضوء الشموع تنتظر عبدالرحمن..
وآثاري عبدالرحمن يوم جاء شاف سيارة عبدالرحيم واقفة عندالباب وفرح ودخل على أمه وسلم على أخوه وعبدالمجيد وكانوا جالسين يتعشون وقعد يتعشى معاهم..!
وبعد وقت درى من أمه ان ضيوف اسمهان راحوا!!!!واستأذن وطلع لزوجته اللي زهقت من الانتظار وحطت راسها على الطاولة و غفت!!!!
وفتح الباب ولقي الدنيا مظلمة!ومافي نور إلا نور الشموع واسمهان رايحة فيها وحاطة راسها على الطاولة ونايمة!!!!
وراح عبدالرحمن يتسحب لغرفة النوم وغير هدومه وجاء سحب كرسي وجلس قدام اسمهان..وهي مو حاسة فيه!
وقام يغني:
سمهونتي خبريني
سمهونتي خبريني
بـ......................
وفزت اسمهان من الخرعة وقالت:بسم الله!!!!!
وطاح الشمعدان وولعت الشمعة بمفرش الطاولة وقام عبدالرحمن يركض يبي يطفي النار اللي شبت واسمهان تصرخ!!
وطفى النار وولع اللمبة وقام يهَّديها!!
اسمهان:حسبي الله على ابليسك!ليش ماطقيت الباب قبل لاتدخل؟ومتى مداك تغير هدومك؟
عبدالرحمن:وش أسوي لك؟قلت أبي أفاجئك بحضوري لقيتك حاطة راسك على الطاولة وتشخرين!!
اسمهان:زين إقعد نتعشى!
عبدالرحمن:لا..الحمدلله تعشيت تحت مع أمي وأخواني!
اسمهان:ياشينك! وأنا اللي ماحطيت بفمي لقمة مع الضيوف قلت أنتظرك وناكل سوى!!
عبدالرحمن:مايخالف..تعشي انتي بالعافية..أنا ظنيت ان ضيوفك لسه عندك!!
وقامت اسمهان توريه هداياهم اللي جابوها,,,
عبدالرحمن:جزاهم الله خير ماقصروا..مو هم نفسهم اللي جابوا لك الصندوق الوردي الكبييير اللي معبى هدايا بيوم عرسنا؟؟
اسمهان:ايه..هُم..
عبدالرحمن:ماكان له داعي يكلفون على أنفسهم اليوم بعد ويجيبون شي ثاني..الله يعوض عليهم ان شاء الله..
وشوي قال عبدالرحمن:يووووه تذكرت!!
ونزل للسيارة وجايب معاه باقة ورد كبيرة وكيس!
استغربت اسمهان وقالت:وش هذا؟
عبدالرحمن:اليوم الزملاء في القسم احتفلوا فيني احتفال صغير بمناسبة الزواج وجابوا جاتوه وعصيرات وباقة الورد هذي..
اسمهان:حلوة ألوان الورد مرة...
وأخذتها وحطتها على الطاولة..
وقام عبدالرحمن ناولها الكيس وقال:هذي هدية بسيطة مني ان شاء الله تعجبك!
فتحت اسمهان الكيس وطلعت منه علبة كبيرة مربعة وفتحتها لقيت بداخلها دفتر كبير سماوي وصفحاته فيها رسومات ورد شفافة!!
وقالت:اش هذا دحومي؟؟جايب لي أوتوجراف؟؟
عبدالرحمن:هو صحيح شكله أوتوجراف..بس أنا جايبه لك تستخدمينه استخدام ثاني!!
اسمهان:شلون يعني؟
عبدالرحمن:الصراحة قلت بنفسي بدل مايمر عليك اليوم بغيابي وتقضينه على النت في هواشات ومناقر مع العضوات وماتثمنون كلامكم ولاتحسون إنكم محاسبين على كل كلمة تلفظونها..أجيب لك هالدفتر وتخلينه مُذكرة للفوائد!
اسمهان:أكذب عليك لو قلت لك إني فاهمة شي!!
عبدالرحمن:يعني كل يوم من باب اثراء حصيلتك اللغوية والمعرفية قبل ماأروح العمل بآخذ هالدفتر وأكتب لك فيه كلمات وانتي عليك تدورين معانيها في النت وتسجلينها بخطك في الدفتر!
اسمهان:وليش عاد فرة الراس هذي؟ بأطبعهم لك بورق وأعطيك اياهم!!
عبدالرحمن:ياحياتي أنا عارف معانيهم ومو محتاج لهم!أنا متعمد أطلب منك تكتبينها بخط يدك بهذي المذكرة عشان تثبت المعلومة بذهنك وتسير هذي المذكرة مرجع لك بعدين وبتلاقين إنك بفترة بسيطة اكتسبتي عدد كبير من المعلومات بطريقة سهلة بالإضافة إلى إنها وسيلة مفيدة لشَغل وقت الفراغ وتثقيف نفسك دينياً ودينيوياً!!!!
اسمهان:بس إنت كأنك تحسسني إني ماأعرف شي!
عبدالرحمن:مو بس انتي اللي ماتعرفين كل البشر مهما تعلموا يظل هناك فيه أشياء مايعرفونها..الله قالها بكتابه(وماأوتيتم من العلم إلا قليلا)..والشافعي اللي كان من علماء المسلمين وفقهائهم قال:
كلما ازددت علماً...ازددت علماً بجهلي!!
وراحوا العروسين غرفة نومهم يتسامرون إلى أن غلبهم النعاس!
=============
نجي لسماح اللي لما خرجت من بيت اسمهان راحت لبيت أختها هند وكان عند هند عدد كبير من الضيوف وأمها(أم تركي)...وبعد ماراحوا ضيوف هند بقي عندها سماح وأم تركي بس..فقاموا يسولفون....
أم تركي:شلون اسمهان ياسماح يوم شفتيها؟عساها مبسوطة؟؟
سماح:ايه ماشاء الله..مبسوطة..
هند:ومين كان عندها؟أهلها؟
سماح:لا ..أم زوجها وصاحباتها..بس تتذكرين يمه البنت اللي كانت لابسة وردي بملكة اسمهان وحاطة شال على كتفها؟
أم تركي:لا نسيت!وشفيها؟؟
سماح:يمه لاتقولين نسيتيها..انتي بنفسك قلتي لي:لو عندي ولد ثاني غير تركي كان خطبتها له!صح؟؟؟؟
أم تركي:ايه ايه ذكرتها..
هند:أكيد ياسماح تقصدين انك تبين نخطبها لتركي صح؟؟
سماح:ايه والله ياليت.. عجبني هدوئها..مافيها جراءة عبير..وأهلها حسب ماأعرف من اسمهان انهم ناس ملتزمين يعني بيخافون الله في تركي موب مثل أم عبير الله يصلحها..
هند:ياليت تركي يوافق كان أخطبها له الليلة!!
أم تركي:أنا أقول العجلة مالها داعي!مشكلته مع عبير ماصار لها شهر..خليه يرتاح شوي وعقبها يصير خير!
============

#جزء آخر#
صحيت اسمهان ثاني يوم من النوم على آذان الظهر ومالقت عبدالرحمن جنبها وفتشت عنه ولقيته قاعد بغرفة المكتب ومقابل اللاب توب طالعت بالشاشة وقرأت عنوان الموضوع اللي جالس يكتب فيه وكان بعنوان(تاريخنا الإسلامي والتأرجح بين الضعف والقوة!!)
عبدالرحمن:بسم الله الرحمن الرحيم!!لا إحم ولادستور؟؟
اسمهان:قاعدة أطالع وش كاتب!بالله اش دَخَّل المراجيح بالتاريخ الإسلامي؟
عبدالرحمن:أقول يازين المطبخ!روحي اطبخي لنا غداء لذيذ من يدينك الحلوة!
خرجت اسمهان من المكتب وهي تفكر بنفسها:متعب نفسه عبدالرحمن مدري هل هو يفهم اللي يكتبه والا يكتب اللي يفهمه؟
وطبخت اسمهان ايدام خضار+رز أبيض..ومعاها سلطة..
وقعدوا يتغدون..صار عبدالرحمن يطالع باستغراب في الإيدام..
اسمهان:خير؟أول مرة تشوف ايدام؟؟
عبدالرحمن:الصراحة خليتيني بـ حيرة!هذا ايدام ولا مرق لحم؟؟
اسمهان:لا إيدام!
عبدالرحمن:ايه.. بس ياقلبي أنا شايف ماي مخلوط معاه صلصة والخضار قاعدة تسبح!!
اسمهان:ياخي ماتعرف تمدح؟
عبدالرحمن:و ربي لو قدامي شي يستاهل المدح كان مدحته!يعني أقدر أقول لك السلطة طعمها حلو!
اسمهان(باستهزاء):ههههههه
وانتهوا من غداهم وراح عبدالرحمن يتجهز للعمل واسمهان تنظف المطبخ...
عبدالرحمن:إذا شفتي نفسك زهقانة من البيت انزلي عند أمي تقهوي معاها..
اسمهان:ان شاء الله..بس تصدق إني مليت من القعدة بالبيت؟؟
عبدالرحمن:مايخالف..مدام بكرة الأربعاء بآخذك معاي وأنا رايح للعمل وأوديك عند أهلك وأنا راجع أمر آخذك...
اسمهان(بحماس):خوش فكرة!
وبعد ماراح عبدالرحمن للعمل دخلت اسمهان تنظف غرفة النوم ولقيت الدفتر السماوي على التسريحة ومكتوب بأول صفحة..
زوجتي العزيزة...مامعنى المصطلحات الآتية:الإحصار-الترجيع-الإضطباع-العج والثج؟؟؟
قالت اسمهان:يمه!وش هالكلمات الغريبة أول مرة تمر علي!أخاف أبحث عنها بالنت وتطلع لي مواقع للجن وأروح فيها!!!
وبعد ماانتهت من شغل البيت قعدت على النت وبحثت عن معاني هالكلمات وكانت الإجابة:
الإحصار:هو عدم التمكن من أداء أو إتمام مناسك الحج أو العمرة بسبب مرض ونحوه...
الترجيع:أن يقول المرء الشهادتين سراً في نفسه ثم يقولها جهراً..
الاضطباع:هو طريقة لبس المحرم للرداء...بأن يلبسه تحت منكبه الأيمن ويلقيه على عاتقه الأيسر ويبقي كتفه الأيمن مكشوف..
العج:هو رفع الصوت بالتلبية باعتدال..
الثج:هو إسالة دماء الهدي(الذبح)
=======
وعن طريق البحث في معاني الكلمات السابقة اكتشفت اسمهان انها قابلت كلمات كثيرة أول مرة تعرف معانيها..
بعد المغرب اتصلت أم اسمهان عليها وبعد السلام..
الأم:انتي ببيتك يااسمهان؟؟
اسمهان:ايه يمه..
الأم:وش قاعدة تسوين؟؟
اسمهان:أبد ..رتبت البيت..وقرأت مواضيع بالنت وهالحين دخلت المطبخ أسوي شاي وأجلس أشربه على رواق!
الأم:طيب اش رايك لو نمر أنا وابتسام عليك؟..من العصر وحِنا بالسوق..وتونا خلصنا وشفنا نفسنا قريبين منك قلنا نمر عليك شوي!
اسمهان:ياهلا ويامرحبا..تعالوا أنتظركم!
الأم:خلاص ربع ساعة ونكون عندك..
وقامت اسمهان تبخر البيت وتسوي القهوة وتجهز الأكل والحلى اللي بقى من أمس...
وغيرت ملابسها..وشوي ودق الجرس عليها...
رحبت بأمها وابتسام وبناتها الصغار
اللي من يوم مادخلوا قاموا يستكشفون البيت ويعيثون في الدنيا فساداً...
واسمهان قاعدة مع أختها وأمها وقلبها على بيتها اللي قاعد ينعفس!
وبعدالسواليف..قالت ابتسام:ماباركتي لي ياسوسو؟؟
اسمهان:مبروك..بس على إيش؟بتشترون بيت تمليك؟؟
ابتسام:لا..أنا حامل!
اسمهان:مبررررررررروك...
ابتسام:ادعولي بس أجيب ولد وأفتك من لسان أم زوجي!!
أم اسمهان:يابنتي البنت والولد صاروا مثل بعض بهاالزمن أهم شي الصحة والعافية..والله يامحبة ولدي محمد ماتتخير عن محبتي لكم..
وشوي وسمعوا صوت تكسير!قامت اسمهان تركض ولقيت بنات ابتسام دخلوا غرفتها وكسروا لها لمبة الأبجورة اللي على الكومادينة!!!
مسكتهم فرصت أذانيهم وطلعتهم من الغرفة!!
ورجعت لابتسام وأمها تصب لهم القهوة إلا بنات ابتسام سحبوا كل الشوكولاتة اللي بالسَبَت وأكلوها!وناولت اسمهان أختها ابتسام فنجال القهوة اللي صبته بس بنات ابتسام كانوا يدورون بالغرفة فكبوا الفنجال على المفرش وتوسخ!وطاح الفنجال وانكسر...
خاصمتهم اسمهان..
هيفاء:مالك شغل!نبغى نلعب!
سارة:أنا أقول لبابا إنك قرصتي إذني قبل شوية!!
اسمهان:وتبين تخلفين ياابتسام! اللي عنده عيال من هالشاكلة المفروض يسوي عملية ربط!!!
ابتسام وأمها:ههههههه
ابتسام:حرام عليك ياالظالمة والله هالعصفورتين هم نور البيت!!
ودارت شوية سواليف وجاء زوج ابتسام وأخذهم ورجعوا البيت وقعدت اسمهان ترفع البيت من جديد...عقب بنات ابتسام مارموا الخداديات على الأرض ونزلوا التحف من أماكنها..وحالة!!
قالت اسمهان بنفسها:مرة ثانية بأعلق لوحة على الباب مكتوب فيها(ممنوع اصطحاب الأطفال!)
ومرت عدة ساعات وجاء عبدالرحمن من العمل وظل يتناقش مع اسمهان بمعاني المصطلحات اللي جمعتها...
=====
اليوم الثاني وعبدالرحمن رايح للعمل في الظهر أخذ اسمهان معاه ووداها لأهلها وكانوا ينتظرونها تتغدى معاهم..أما عبدالرحمن تغدى في العمل..
وفي العصر جات أسماء واستمرت الجلسة بالسواليف إلى الساعة 11 بالليل وحكت لهم اسمهان يومياتها وعن فشلها في الطبخ..
الأم:وعلى ايش خليتينا نخسر ونشتري لك كتب بذيك الحسبة؟؟
ابتسام:صادقة أمي..لو تطبقين الوصفات بحذافيرها تنجح الطبخة معك..
أسماء:تستاهلين بقوووووووة!!ياما ترجيتك تدخلين المطبخ وتتعلمين لك شي مفيد وترفضين..البلا لو بكرة فكر زوجك يعزم أمه وأخوانه عندك كيف بتكون سواتك؟؟
اسمهان:تصدقون مافكرت فيها؟؟
ابتسام:وترى الرجَّال بيجاملك بأول شهرين وممكن يجيب من مطاعم بس عقبها بيمل وبيعطيك من النقد والخصام على راسك..بصراحة الواحد يحق له هو ماتزوج عشان يقعد ياكل من مطاعم ياعالم شلون نظافة أكلهم!!!
أسماء:زيدي على كذا إنه أكل المطاعم مو بلذة أكل البيت أبداً..ببيتك تقدرين تتفننين بأحلى وصفات حلى وموالح..مو مثل الأكلات الجاهزة الخيارات محدودة وماهي بذاك الزود...
الخ........
وبعد نهاية عمل عبدالرحمن أخذ اسمهان للبيت..
وقبل ماينامون قال عبدالرحمن:
اش رايك بكرة الخميس نعزم أبوك وأخوك محمد وأزواج أخواتك وأهلي وأهلك عندنا..إلى الآن أبوك مادخل بيتنا!
اسمهان:فكرة حلوة..بس أنا نفسي أطلع أتمشى.!!!
عبدالرحمن:ملحوقة الخرجة ان شاء الله..نطلع الجمعة..وبكرة خلينا نسوي عزيمة بالمرة يفرح عبدالرحيم بمناسبة نقل عمله لجدة...اتفقنا؟؟
اسمهان:اتفقنا...

=========================
بوووووووووووسة لكل عضوة أمتعتني بردودها,,,,,,,,

*جزء اليوم يالغاليات*
جاء يوم الخميس واسمهان من أول اليوم وهي تفتح كتب الطبخ وتحوس بين الوصفات عشان تسوي حلى مع القهوة!!
جاء عبدالرحمن وقال:كلمت الجميع وعزمتهم وبإذن الله بيجون بعد المغرب..وعلى فكرة أمي عرضت علي ترسل الشغالة لك عشان تساعدك في الشغل..
اسمهان:إيه تكفى أنا بحاجتها..حتى أمي كلمتني وقالت لو تبين كاتيا؟ نرسلها لك...بس انحرجت وقلت لها:شكراً الله يعطيك العافية....
عبدالرحمن:أهم شي عندنا بن وهيل وتمر ولوازم الشاي من سكر ونعناع وغيره؟؟
اسمهان:إيه..بس الورطة واش أطبخ على العشاء؟ماشاء الله أهلي وأهلك قبيلة!!!
عبدالرحمن:ايش..ايش؟؟ماسمعت!انتي من صدقك بتطبخين لهم العشا؟؟...حبيبتي هذول أهلنا وعزوتنا حرام نخليهم فيران تجارب لطباخك!!!أنا هالحين رايح أحجز كوزي فاخر في أحسن مطبخ ذبايح..
اسمهان:أشوى!الله يطمن قلبك!كنت شايلة هم من الليل..وماعرفت أنام زين!!إذن بأسوي كم صنف حلى مع القهوة وأقدم معاها سبتات الشوكولاته اللي عندنا...والتمر..
خرج عبدالرحمن..وجات (سيري) شغالة أم عبدالرحمن تساعد اسمهان..وكانت واقفة تغسل مواعين بالمطبخ وتنظف..وكانت الشغالة تراقب اسمهان وهي تسوي حلى وتخبص خبيص!!
سيري:مدام اسمهان أنا يئرِف يسوي هلى كويس مرة!!
اسمهان:صحيح؟مثل إيش؟
سيري:ماما أم أبدورهمان لما في إيجي ديوف أنا أسوي كله هلى..أنا يئرف سوي(تشيزكيك-هلى كيري-هلى كورن فليكس-قوالب بسكوت بالتوفي-بسبوسة-كنافة).....
اسمهان:الله أكبر عليك!كل هذا تعرفين تسوينه ومخليتني أحوس من أول؟!!!زين افتحي دولاب المعلبات وسوي الحلى اللي تبينه ومقاديره متوفرة..
وبدأت الشغالة تسوي أكلات ودق تليفون اسمهان وراحت ترد..إلا طلعت المتصلة ابتسام...
ابتسام:هلا سمهونة..شلونك؟
اسمهان:ماشي الحال...
ابتسام:طبعاً من غير ماأسألك..أكيد حايسة؟؟
اسمهان:نوعاً ما...
ابتسام:طيب بغيت أقول لك..اش تحتاجين مساعدة؟؟تبين أسوي لك حلى؟؟
اسمهان:لاتسلمين..دبرت نفسي
ابتسام:زين..جهزتي السلطات؟؟
اسمهان:يووووه تصدقين ماخطر في بالي؟!!
ابتسام:زين إني ذكرتك!بس انتي سوي على قد الخضار الموجودة عندك وأنا بأسوي نوعين سلطة وأجيبهم معاي..وعلى فكرة أسماء كلمتني بتجيب معاها ترمس قهوة وسماح بعد بتجيب..انتي سوي واحد بس...
اسمهان:الله يسعدكم..تسلمون..
وبعد ماانتهت المكالمة راحت اسمهان بالخضار المتوفرة عندها سوت 3 أنواع سلطة..
================
في بيت أبوعبير كان الأخوين سعد(بأول ثانوي) وسامي(بثاني متوسط) جالسين وهم بقمة الزهق والملل..ينتظرون أبوهم..
ولما رجع من عمله...
سعد:أبوي نبي نتكلم معاك..
أبوسعد:تفضلوا اش عندكم؟؟
سعد:الصراحة يبه..إحنا مو مرتاحين لهذي الحياة في البيت!
أبوسعد:و ليش؟؟
سعد:يبه كل يوم نتغدى ونتعشى من مطاعم وملابسنا نغسلهم ونكويهم برة..وانت طول اليوم برة البيت أو مسافر..ومافي أحد يراعي أمورنا!!!
أبوسعد:والمطلوب؟؟
سامي:إنت أدرى يبه!!!
أبوسعد:مو أمكم لو فيها خير كان صانت بيتها وحافظت عليه وماوصلتنا لهاالمواصيل!!!
سامي:يبه اللي صار صار..إحنا نفكر باليوم...
سعد:يبه..احنا قررنا إننا نروح الرياض ونعيش مع أمي وعبير!!!
أبوسعد:ايـــــــش؟؟انتم ماتستحون؟أمكم وأختكم قاعدين ببيت خالكم عثمان..وخالكم عثمان عنده فرقة بنات!ناقصينه انتوا؟؟
سعد:يبه..إنت ربي فاتحها عليك وتقدر تجيب لنا أحسن بيت في الرياض!
أبوسعد قام يطالع بـ سامي وقال:وإنت؟اش رايك بكلام أخوك؟
سامي:يبه..أنا رايي من رايه!إنت سفرياتك كثيرة ومافي أحد يداري أمورنا ويراعيها..ومومتفرغ لنا مثل أمي..يكفي إنها من يوم ماطلقتها ماوديتنا نزورها ولامرة!!!!
أبوسعد:خلاص أفكر بالموضوع والله يعين!!
ودخل أبوسعد ينام لكن الموضوع ظل شاغل باله..وقرر إنه يحزم الأمر ويكلم عثمان الأخ الأكبر لأم عبير!
وبالفعل اتصل عليه وسلم...
أبوسعد:الحقيقة ياعثمان أنا بغيتك بموضوع..
عثمان:تفضل ياأبوسعد..
أبوسعد:عمارتك اللي انت ساكن فيها..هل متوفر فيها شقة فاضية؟
عثمان:حالياً لا..بس عقب أسبوعين فيه شقة بيطلعون المستأجرين منها..بس إنت ليش تسأل؟؟
أبوسعد:الحقيقة أنا مقدر ان وضع أختك وبنتي عبير عندك بالبيت صعب!
عثمان:أفا عليك وش هالكلام..أم عبير أختي ومن لحمي ودمي وعبير مثل بناتي بالضبط!
أبوسعد:بس أنا محتاج الشقة عشان أولادي بعد يبون يعيشون مع أمهم..ومو معقول بأخليهم يشاركونكم بنفس البيت!وأجار الشقة بتاخذه مني مثلي مثل أي مستأجر يجيك!!
وبعد أخذ وعطا وافق الخال عثمان على هالاقتراح ووعد أبوسعد إنه إذا طلعوا المستأجرين يكلمه عشان يجي يستأجر ويجيب الأثاث
وراح الخال عثمان وفاتح أخته أم عبيربفكرة أبوسعد..
أم عبير:وسعد وسامي اش اللي يجيبهم يعيشون بالرياض؟؟أكيد هالخبيث سواها وراح خطب ووده يطردهم عشان يخلى له الجو!!!
عثمان:اتقي الله ياشيخة..هالفكرة أصلاً مو فكرته!الأولاد هم اللي أصروا يجون هنا وبالذات إن أبوسعد سفراته كثيرة والأولاد لاتنسين انهم مراهقين ويبي لهم من يهتم بأمورهم!!!
أم عبير:وهالأنذال توهم يعرفون قيمتي؟؟وأنا من يوم تطلقت وجيت الرياض ماواحد منهم رفع علي سماعة!!خلهم ينطقون ببيت أبوهم!أنا ماأبيهم!!!
عثمان:لاحول ولاقوة إلابالله..الظفر عمره مايطلع من اللحم!وهذا بدل ماتفرحين إن شملكم بـيلتم مع عيالك؟؟
عبير:يمه...هذي فكرة زينة..وبيسير لنا بيت بروحنا وأبوي بيتكفل بكل شي من ايجار وأثاث واش تبين أحسن من كذا؟؟
أم عبير بداخلها صارت تفكر وتقول:شلون مافكرت فيها هذي؟فرصة أرجع كل قرش سحبه مني!!!!
=========

نستكمل ياصبايا
بدأت عزيمة اسمهان بحضور الضيوف أخواتها+سماح+أم زوجها+أم تركي وهند
والرجال أبوها وأخوها وأزواج أخواتها وأخوان زوجها وتركي...
وأهلها كانوا جايين ومحملين بالهدايا لبيتها...
ولما دخلوا بنات ابتسام مسكتهم اسمهان على جنب وأعطتهم كاتيا وقالت:هذول الثنتين تربطينهم جنبك ولو خربوا لي شي بالبيت انتي اللي بتتسطرين بدالهم!!!
كاتيا:ههههه..أوكيه مدام..
أما سماح جات هي وهند من غير عيالهم لأنهم خلوهم بالبيت نايمين ومعاهم الشغالة...
اسمهان:ليه ماجبتي أولادك ياسماح؟؟بنات ابتسام هنا خل يكمل الطقم مرة وحدة!!!
سماح:لاياحبيبتي!أنا أدري إن العرايس يتضايقون دايماً من الأطفال الصغار!!
وكانت الجلسة حلوة والكل يسولف وشافوا أهل اسمهان أنواع الحلى مزينة الصحون واستغربوا!!
أما أم عبدالرحمن عرفت انه شغل خادمتها سيري!!
أسماء وهي تهمس لاسمهان بوسط المجلس:بِس بِس!
اسمهان:خير؟؟
أسماء(بصوت منخفض):هالحلى شغل مين؟؟
اسمهان:شغل إيدي طبعاً!
أسماء:الله أكبر!والله لو تفحطين ماسويتي مثله!!
اسمهان:عبدالرحمن سوَّاه!!
أسماء:ياشيخة؟؟الرِجال حطيهم عند الشوي..وش فهمهم بالحلى؟
اسمهان:يختي شغالة خالتي سوت الحلى..ارتحتي؟؟
أسماء:آه يالخايبة!تعزمين خالتك أول مرة على أكل شغالتها؟؟
اسمهان:أوووف!!!
وقامت تباشر على الضيوف..
وقبل العشاء راحت تعبي صحون الفاكهة وتغرف السلطات..وتجهز السُفر..
وانحطت تباسي الكوزي الفاخرة على السفرة وهي مزينة باللحم والمكرونة والمكسرات والبيض المسلوق والخضار..بالإضافة للسمبوسة..وصحون ايدام بامية وايدام رجلة من المطعم...والسلطات والفاكهة وقوارير موية الصحة والمشروبات الغازية...
أم تركي:الله يعطيك العافية يابنتي..ماشاء الله بنات هالزمن مرتاحين بعزايمهم..مو مثلنا قبل كان أبوتركي يذبح الذبيحة في البيت ويصلخها ويعطيني اياها أطبخها!!
أم عبدالرحمن:لاالحمدلله ماقد طبخت ذبايح بس أبوعبدالرحمن الله يرحمه زمان كان يطبخها بنفسه ومع الوقت صرنا مانجيبها إلا من برة..بيني وبينكم ألذ وأريح..الواحد وده يقابل ضيوفه لازاروه..مو يقضي ليله بالمطبخ!
أم تركي:صدقتي ياوخيتي..أصلاً الناس اختلفوا وظروف الحياة ماهي بمثل أول..الناس تدور على الشي السريع والراحة..أنا لو يصير ببيتي عزيمة هالحين ماعرفت أتصرف من دون بناتي!ولاكأني ذيك اللي كنت أحط وأشيل من قبل!!
أم اسمهان:ومين سمعك!بعد كل زواج أو ملكة لأحد من عيالي رجولي تظل تآلمني أسبوع..الصحة صايرة يارب لك الحمد..يالله حسن الختام بس!
أم عبدالرحمن:صراحة مافي أزين من القعدة بشمس الصباح وشمس العصر...تنعش القلب وتشد العظم..والهوا الرباني أحسن من هواء المكيفات اللي يدخِل علينا غبار..
أم اسمهان:ماشاء الله تبارك الله ياأم عبدالرحمن إنتي أحسن مني ومن أم تركي!أنا حاطة حيلي بالأكل عشان كذا منتفخة!وأم تركي حارمة نفسها لين ماصارت مثل العود!
أم تركي:أنا هذي طبيعتي أكلي قليل وجسمي ضعيف..ماتشوفين عيالي كلهم طلعوا لي..
وقاموا يتناقشون عن الأجسام والأكلات ولما انتهوا من الأكل وقاموا يرفعون السفرة جت سماح تساعد اسمهان في رفع تبسي الرز بس صاحت فيها هند:سمـــاح!لاتشيلين شي ثقيل حرام عليك!خلي الشغالات يشيلون!
سماح:يوووه نسيت!
اسمهان:خير؟اش السالفة؟
سماح:أنـــــــا...عقبال عندك حامل بشهرين..
اسمهان:مبروووك..اش سالفتك انتي وابتسام تتنافسون؟؟
سماح:لا تنافس ولاشي..السالفة جت كذا من غير تخطيط!وبيني وبين ابتسام أسابيع بس أناسابقتها..
اسمهان:يالله ان شاء الله ربي يرزقكم بنية حلوة مثلي!!
سماح:هههه لو تدرين ياسمهونة عن أخوك محمد..أول ماعرف إني حامل قال ان كانت بنت بأسميها اسمهان!وإن ولد بأسميه عبدالرحمن!!!
اسمهان:فدييييييته هالحمود كله ذوق..
ورجعت اسمهان خلت شغالة أهلها وشغالة أم عبدالرحمن يرتبون المطبخ وجلست مع ضيوفها!!
وناداها عبدالرحمن....
اسمهان:نعم؟
عبدالرحمن:وين الشاي الله يهديك؟صار لنا ربع ساعة من يوم قمنا من فوق العشا!!
اسمهان:ماسويت!!بس اش تبون؟شاي أخضر ولا أحمر؟؟
عبدالرحمن:الله يصلحك يااسمهان المفروض مويةالشاي تكون على النار من قبل العشا وعلى نار هادية ومواعين الشاي زاهبة بالصينية!!هيا بسرعة عجلي علينا!
ودخلت تسوي الشاي للرجال والحريم ونست تحط سكر!
وصب عبدالرحمن الشاي لضيوفه ويوم جاء يشرب لقي الشاي مُر!
ودق على اسمهان وطلب سكرية!
ومرت العزيمة على خير الأمهات الثلاث يسولفون سوى وهند وأسماء سوى واسمهان وسماح وابتسام سوى!!
أما في مجلس الرجال كان الحوار يدور عن أشياء مختلفة منها...
أبواسمهان:ياولدي ياتركي الشباب هالحين صاروا يتأخرون عن الزواج بسبب الظروف الاقتصادية والمعيشية الصعبة..بس انت ماشاء الله عليك مو قاصرك شي..ليش قاعد تِضيعْ الأيام؟؟خل أمك تفرح بعيالك على الأقل!!
تركي:كل مافكرت بالموضوع تراجعت عنه..ان شاء الله الأيام الجاية بتتيسر!
عبدالرحمن:مدري ليه عندي احساس إنه لاجانا بنت وكبرت بنلاقيك جاي تخطب!أخاف صدق يجي ذاك اليوم وإنت ماتزوجت!
محمد:خله يصف جنب ناصر ولد عمه!مضرب عن الزواج ويبيله ضرب على أفكاره المتشائمة عن الحياة الزوجية!!
الجميع:ههههههه
محمد:إلا صدق وش أخباره ناصر ياتركي؟؟سوى جريمته بأشكالكم ولازدنا شفناه!!
تركي:إلا جاء زواجنا بس كان متلثم!
محمد:ليييييييش؟
تركي:لأني حلقت شنبه وسكسوكته!!
الجميع:هههههههه
===========
وخرجوا كل الضيوف وهم يدعون لاسمهان وعبدالرحمن بالبركة..
اسمهان:ها اش رايك في العزيمة يادحومتي؟؟
عبدالرحمن:حلوة..بس الشاي اللي جبتيه ماعرفنا الأخضر فيهم من الأحمر!كلهم نفس اللون!!