مرحـــــــــــــــــــبا
بيوم من الأيام وأفنان مازالت بلبنان وبعدها مارجعت من السفر...
كان الوقت صباح وأهل أفنان نايمين..وتفاجئوا بممرضة سندس تدق عليهم الباب دق عنيف!!!
صحيت أم أفنان مفزوعة وقالت:خير..اشفيك ياماري؟
ماري:مدام ....سندس تئبان واجد!!
وصحي أبوأفنان وراحوا يركضون على غرفة سندس اللي كان وجهها أزرق وتغرغر..أخذوها بسرعة وراحوا المستشفى..وبالمستشفى لفظت أنفاسها الأخيرة..على إثر انقباض رئوي حاد!!!
وحاولت أم أفنان تتماسك وبس تردد:إنا لله وإنا إليه راجعون اللهم أجرني في مصيبتي واخلف لي خيراً منها
وأبوأفنان بس يستغفر..وكانت حالتهم صعبة..
أبوأفنان:اسمعي..بنتك أفنان ماأبي يوصلها شي عن وفاة أختها..مفهوم؟؟إنتي أدرى بمحبتها لها وتعلقها فيها مانبي ننكد عليها الله يرضى عليك!!
أم أفنان:ابشر..ابشر..
وبالفعل مر على وفاة سندس 10 أيام وأفنان ماتدري عن شي!!وكل مااتصلت على أهلها يطمنونها إن أوضاعهم بخير..حتى أم تركي يوم جات تعزيهم وصتها أم أفنان إنها ماتبلغ تركي بـ شي ولارجعوا مصيرهم يعرفون!
وبما إنه أفنان ماعندها جوال ماكانت على اتصال بأي أحد غير أمها وأبوها ومن جوال تركي..
عرف الجميع بالوفاة وأقبل يعزي وأولهم مشاعل وأهل زوجها كلهم ورانية بعد......
وبعد مارجعت أفنان من السفر مروا يسلمون على أم تركي بالأول وبعدين يطلعون فوق لبيتهم..
وسلموا وشربوا القهوة...واستأذنت أفنان في الطلوع فوق لشقتها..أما تركي جلس مع أمه..
مسكته أمه وقالت:ياولدي.. فيه موضوع لازم تقول لزوجتك عليه..قبل لاتعرف به من الناس!!
تركي:خير يمه؟لهجتك ماتطمن!!
أم تركي:سندس إخت زوجتك..الله يرحمها ويغفر لها ان شاء الله..
تركي(بفزع):لااااا..مصيبة لو تدري أفنان..أغلب كلامها عن إختها دايماً... حتى بالسفر مانستها وجابت لها أغراض طبية تفيدها..شلون بأعلمها؟شلون؟
أم تركي:إنت زوجها وأدرى بها أنا قلبي مايطاوعني..ماودي أكسر خاطر البنية..
وطلع تركي لأفنان وهو مو داري شلون يعلمها..وتوكل على الله..وكلمها..
تركي:أفنان؟؟
أفنان:يـــــاهلا..
تركي:تعالي اجلسي جنبي شوي..
جلست أفنان..
تركي:ياترى مين اللي رضاه مقدم عندك على أي مخلوق؟؟
أفنان:ربي سبحانه..
تركي:ولو ربك أراد إنه ياخذ منك شي بتوافقين؟؟
أفنان:طبعاً شلون بأرفض؟هذا ربي وخالقي..إنت تقصد أتصدق بمالي؟؟؟
تركي:لا ..ربي وهبنا هِبات واستأمنَّا عليها ولو أراد يسترجعها مننا نرضى؟؟
أفنان:طبعاً نرضى..شلون مانرضى؟؟أرواحنا وهي أرواحنا هبة من الله ومتى أراد أخذها منَّا..
تركي:إذن احتسبي إختك سندس عند الله..وادعي لها بالرحمة...!!
أفنان:لاااا لااا تقول!!!!!!
وقامت تبكي بكاء مريـــــــــر
حضنها تركي بحنان وقال:انت انسانة مؤمنة ومافي انسان تدوم له نعمة..ماأبي أسمع منك إلا كلمة إنا لله وإنا إليه راجعون اللهم أجرني في مصيبتي واخلف لي خيراً منها..
وظلت أفنان ترددها..وشربت كاس موية..
تركي:هالحين الواجب نروح لأهلك ونعزيهم..
وانطلقوا للعزاء وكان الكل مجتمعين...أهل وأقارب أفنان..
غداً موعدنا بإذن الله

أهلاً وسهلاً
لما كانت أفنان بوسط العزاء..
انسحبت بهدوء ودخلت غرفة أختها المتوفاة سندس..وفتحت دولاب الملابس وظلَّت تتأمل ملابسها وأغراضها وتذرف دموعها..
وجات عينها على الكرسي المتحرك اللي كانت تستخدمه سندس وانهارت من البكاء..وظلَّت تتذكر أحلى أيامهم مع بعض..وراحت لسرير سندس وحطت راسها عليه وانخرطت في البكاء..
افتقدتها أمها وتوقعت وجودها بغرفة سندس..ودخلت عليها..
أم أفنان:أفنان؟؟اش تسوين هنا؟
رفعت أفنان راسهاوهي تبكي وقالت:ليش يمه تخبون علي وفاتها ليش؟؟ليش ماعلمتوني من وقتها؟؟
أم أفنان:ولو كنا علمناك يابنتي واش كان بإيدك تسوين؟تردين لها الحياة من جديد؟؟
أفنان:لا..بس على الأقل كان ودعتها بآخر لحظات من حياتها..
وقامت أفنان تنتحب ودموعها تهل بغزارة...
أم أفنان:يابنتي عسى من جمعكم بالدنيا يجمعكم بالآخرة قولي آمين..
أفنان:آمين يايمه آمين..
ودخلت عليهم مشاعل في هذي اللحظة..وكانت أم أفنان دموعها على خدها انسحبت وراحت تغسل وجهها وتكمل مقابلة ضيوفها..
وبقيت مشاعل مع أفنان..ومسكت أياديها..
أفنان:ماني قادرة أصبر ياخالتي ماني قادرة أصبر!!
ورجعت تبكي...
مشاعل:مقدرة مشاعرك ياحبيبتي..بس هذا حال الدنيا معانا تاخذ وتعطي..وربي له حكمة بكل شي...ومافي أحد بيزيد عُمر أو ينقص..لكن إحنا ناس مؤمنين المفروض مانخلي المصايب تهزنا ونثبت..ولاتنسين إنما الصبر عند الصدمة الأولى..
ماكان عندي بالدنيا أغلى من أبوي الله يرحمه..
أفنان:ايه جدي الله يرحمه ماكان فيه أحد بطيبته..
مشاعل:بس كنت أستبدل حزني عليه بالدعاء له..وكل ماجاء ذكره ببالي أحاول أشغل نفسي بقراءة القرآن..أحس إنه يربط على قلبي كثير..
أفنان:الله يرحمك ياسندس ويجمعني فيك يالغالية..
============
أما ناصر ورانية كانوا كل يوم وهم ناقر ونقير..كل شي يختلفون فيه!
ومرت الأيام واتصلت اسمهان على رانية وبعد السلام..
اسمهان:وش ذا ماكأنك عروس؟
ليش حزينة؟متوفي لك أحد؟؟
رانية:فيني احباط..إحباط من العيار الثقيل..والهم يحط فيني ويشيل..ولانهاري نهار ولا ليلي ليل!!!!
اسمهان:ياحركات!!رجع لك الالهام؟وشفيك يابنت حزينة موب عوايدك؟؟
رانية:نويصر ياسوسو نويصر..ودي أمسكه وأكفخه لين يحس على دمه شوي ويهتم فيني!!!!
اسمهان:ههههه ياحليلك يارنو مامداكم على التكفخ!!
رانية:وش أسوي؟من حر مافيني أقول لك كذا..هذا مدري وين كان عايش؟بارد برود يفقع المرارة تقولين عصير مثلج!ومستهتر ومآخذ الحياة ببساطة شديدة!وجده هزل وهزله هزل...مايندرى عن صدقه من كذبه..وكل شي أطلبه منه يشوفه دلع وتشرط!!
اسمهان:طبيعي يارانية!
رانية:وش اللي طبيعي؟أقول لك هذا مهبول..عليه عقلية يخلف الله بس!!
اسمهان:يابنت الحلال..من غير اختلاف كيف توصلون لإتفاق؟؟
رانية:ايه غثيني بكلام من اللي يقطه عليك عبدالرحمن!
اسمهان:لا أنا صادقة..ناصر انسان عاش يتيم ووحيد أمه.. وأخوانه من أبوه بعيدين عنه..وأمه الله يرحمها انسانة مقعدة..ومعتمدة على شغالتها بكل شي..وناصر ماله دور بالبيت..إلا يعالجها أو يقضي لها أكلها وشربها..لاعنده خوات حتى يعرف يتعامل مع الإناث ولاعنده أحد يعلمه وينصحه..وصدقيني مثل ماأسمع عنه من عبدالرحمن ماقد سمعت إلا كل خير..قلبه طيب بس انتي ماعرفتي له!!!
رانية:ايه يختي..إقعدي عيرني مثل الآنسة نجلاء..تقول تستاهلين ماتعرفين تتنعمين له ولاتدلعينه!!
اسمهان:وليش لا؟يمكنها صادقة!بصراحة الكلام الحلو يلين الحديد وهو حديد...وإنتي يارانية من غير زعل كلنا نعرف أسلوبك صريحة وعصبية وتحذفين الكلام حذف!!صاحبتنا وتمونين..بس ولد الناس جديد عليه هالأسلوب..مو بسهولة ممكن يتأقلم!!وحطي في بالك إنه عاش في ظروف وبيئة مختلفة عنك مرة..فمو معقول بيجي على مزاجك بين يوم وليلة!!!
رانية:صحيح كلامك أنا ماأنكر..بس في أشياء بديهية المفروض يعرفها من حاله..مثلاً الفندق والسفر والطلعات الحلوة..كل مازهقت خذاني البر ولا البحر..ولاقلت له ودني مولات..يقول ليش؟ناقصك أغراض؟!!!!!!!!!!!!
اسمهان:ههههههه العيب في العزوبية..ترى حسب مافهمت من عبدالرحمن انه ناصر كان مُضرب عن الزواج زمان..فتلقين من جهالته مايسأل أصحابه المتزوجين عن هالأشياء ولايثقف نفسه فيها..ولايبحث عن الأشياء اللي تحبها الأنثى..والصراحة هنا يجي دورك..باللسان الحلو والتغنج والدلال يطيح عندك ولد الحلال!!!!
رانية:ومنكم نستفيد..بس ياويلك أجرب نصايحك وماتفيد!!يمين لأجيك أسطِرك بـ نعالي!!
إلا وناصر واقف ورا رانية!!
رانية(بارتباك):يلا سوسو أكلمك بعدين زوجي جاء..
وقفلت السماعة..
ناصر:ياحليلها..من هي هالضعيفة اللي بتسطرينها بنعالك؟؟
رانية:صاحبتي..ونمون على بعض!
ناصر:الله لايجعل اليوم اللي بتمونين علي فيه يجي!!!!
رانية:إلا إنت وين طسيت؟؟
ناصر:طلعت فوق أتطمن على الشقة..
رانية:ايه ذكرتني..لي كم يوم أبي أشوفها وأسألك عنها..هي شقة كبيرة كبر الدور اللي إحنا فيه؟؟؟
ناصر:لابيتنا أكبر..هي تقريباً ثلاث أرباع بيتنا والباقي سطوح..
رانية:أبي أشوفها..
ناصر:زين تعالي معاي..
وطلعوا سوى وكانت شقة كبيرة..
رانية:طيب إنت ليش تاركها فاضية؟
ناصر:وش تبيني أسوي فيها؟مخليها لأخواني لو جوا من الشرقية ويبونها يقعدون فيها..
رانية:هذا هم أخوانك مجتمعين بجدة من أيام زواجنا وماشفت أحد منهم جاء يقعد فيها..وبعدين هذي ورثك من أبوك يعني ماأتوقع أحد بيتجرأ يقول لك بأقعد فيها..
ناصر:وش القصد؟
رانية:قصدي..حرام تقعد فاضية..مابنستفيد منها إلا تجميع الغبار والحشرات..ومو بعيدة تنسكن بالجن!!!
ناصر:بعدي مافهمتك؟؟
رانية:ليه ماتأجرها؟بيجيك منها دخل إضافي وإنت مرتاح...
ناصر:لا لا الإيجار شغلانة ولابد أعرضها بمكتب عقار وبيأذوني الناس بالاتصالات والزيارات لأجل يشوفونها..ومايندرى شلون بيطلعون هالمستأجرين اللي بياخذونها بندخل في قضية مالها أول من تالي..خلينا مرتاحين أحسن!
رانية:زين واش رايك ترتاح من هاللفة الطويلة العريضة وتترك تأجيرها علي؟؟
ناصر:ههههه ضحكتيني وأنا جوعان!!وش فهمك بالتأجير.؟وشلون ومتى؟؟؟
رانية:الله يخلي المنتديات بأكتب هذاك الإعلان المرتب..لا ومابأختار أي وحدة تسكن بأختار ناس على مزاجي!!!
ناصر:خلاص..سويها وخل نشوف وش يطلع منك!!
===========
أما اسمهان حاولت توضح لعبدالرحمن بطريقة معينة إنه ناصر عنده جهل بأمور الطلعات والروحات مع عروسته...
عبدالرحمن:والمطلوب؟؟تبين أعطيه دروس خصوصية؟؟
اسمهان:أكيد لا..بس تكفى دحوم إقنعه بطريقة غير مباشرة إنه يطلعها اليوم أي مكان حلو..الصراحة صوتها ماكان عاجبني أبد!!تكفى تكفى!
قام عبدالرحمن يقلِبها في راسه..وقال:عندي فكرة وان شاء الله تضبط!!
واتصل على ناصر...وبعد السلام والسؤال عن الأحوال..
عبدالرحمن:تراني أول مافكرت فيك إنت..تصدق قبل أيام جاني هدية من الجريدة اللي أكتِب فيها دعوة شخصية لشخصين للعشاء بـ يخت في مرسى الأحلام بأبحر بالمطعم العايم..والمشكلة إنه لازم يكون اليوم وإلا بتروح علي..وأنا مشغول حيل اليوم..وقلت بدال ماتضيع بلاش..فكرت فيكم يالعرسان بتكون طلعة حلوة لكم...وش قلت؟
ناصر:والله يالحبيب..أنا عندي إجازة وفاضي..ومابأقدر أشوف عرض مغري مثل هذا وأخليه فما أقدر أقول لك غير تم..
عبدالرحمن:أجل توكل على الله وروح لهم بالليل ولاتنسى تقول لهم أنا حاجز جلسة بالمطعم العايم بإسم عبدالرحمن بن فلان!وترى الجلسة حلوة ومعاكم أشخاص ثانيين بنفس المطعم..
وبعد ماانتهت السوالف ثم المكالمة قال ناصر لرانية:اليوم يوم سعدك ياعروس...في الليل بنروح أنا وإنتي نتعشى بمكان مايخطر لك على بال!!!
رانية:بالله لاتخرعني..مفاجآتك صارت تجيب لي مغص!!لايكون بتوديني المطعم الشعبي اللي جلساته بالأرض وتعشيني فيه جريش وحنيذ؟؟؟لا والتحلية مهلبية خايسة جدتي تعرف تسوي أحلى منها!!!
ناصر:لا..صدقيني..هالمكان بيروق لك كثير..
===========
كانت حياة مشاعل مع عبدالمجيد مستقرة وهادية..وسبورة الفلوماستر تلعب فيها دور كبير!!حاطها عبدالمجيد بالصالة ويكتب لمشاعل كل مشاعره الدافية فيها وهي ترد عليه بالمثل!
وكانوا يقضون بعض أوقاتهم في ألعاب الذكاء والمسابقات..وغالب ومغلوب..
وكانت أم عبدالرحمن فرحانة حيل بعبدالمجيد اللي كل ماكانت تقابله تلقى السعادة مرسومة على وجهه..
وبيوم من الأيام كان عبدالمجيد ومشاعل نازلين من فوق ورايحين يشترون أغراض ومر على أمه يسلمون عليها وكانوا اسمهان ومرام عندها يتقهوون...وبعد مارحوا عبدالمجيد وزوجته..رجعت أم عبدالرحمن لمرام واسمهان وقالت:الله يرضى على عبدالمجيد كل ماشفته حسيت براحة نفسية..الحق ينقال مشاعل هذي هدية جاتنا من السما...
مرام:وش دعوى خالتي؟؟يعني أنا اللي قمامة خارجة من الأرض؟؟؟
أم عبدالرحمن:كلكم خير وبركة يابنتي..وانتي واسمهان عينين بـ راس..
=========
نستكمل في وقت لاحق بجزء لاعلى البال ولاعلى الخاطر!!!

السلام عليكم ورحمة الله وبركاته
كانت روحة رانية للمطعم العايم(يعني مطعم متحرك بوسط البحر)
على ظهر سفينة...من الخرجات الجميلة اللي فاجئها ناصر فيها والأدهى من ذلك إنهم وهم قاعدين في المطعم على ظهر السفينة والهواء يرفرف حولهم والإضاءات وكل شي ينطق بالجمال..
رانية:واااااي المنظر يهبل والقعدة رومانسية حيل..فديت قلبك ياناصر
ناصر(البكاش):وش هالزين والكلام الحلو؟؟عاد لو تدرين يارانية من متى وأنا أخطط لهاالقعدة ماتصدقين!!!!!طول الأسبوع وأنا شغَّال اتصالات أبحث عن مكان يليق فيك!
رانية:تصدق؟ كان قلبي حاسس..إنك لايمكن تكون بالتبلد اللي أنا شايفتك فيه..وإنه بيجيك يوم وتتعدل وتصير مثل الأوادم!!والحمدلله تحقق مناي!عساها تكون فاتحة خير وكل يوم والثاني يزيد ذوقك حلا!!
ناصر:عشان تعرفين إن نصور ماهو شوي..
دق جوال رانية وردت وكانت المتصلة اسمهان!!!
اسمهان:هلا رنو!بشريني؟عساك مبسوطة في المرسى؟؟
رانية:بسم الله وإنتي اش دراك؟لايكون إنتوا بعد هنا؟؟؟
اسمهان:لا إحنا ببيتنا..بس عندي علم بطلعتكم من عبدالرحمن..بصراحة قطعتي قلبي اليوم وخليته يهديكم هالطلعة عساها تكون عند حسن ظنك؟!!
رانية(بغيظ شديد من ناصر البكاش):آآآآآآه يعني السالفة كذا؟زين الله يعطيكم العافية وماله داعي هالتكاليف!
وحاولت تنهي المكالمة..
والتفتت لناصر وقالت:أقول؟يازينها الطلعات المجانية..صح؟؟تخرج تتمشى وتتعشى على قفا غيرك من غير ماتخسر هللة..جميلة الحياة بصحبتك الصراحة!!
ناصر(وهو يبلع ريقه):هذي اللي اتصلت زوجة عبدالرحمن؟؟
رانية:ايه عبدالرحمن صاحب التخطيط الله يحفظه!!
ناصر:ياحبي له..ماينسى أحد!!هو كريم وحِنا نستاهل!!
===========
ومرت الأيام تلو الأيام وانتهى شهر العسل عند رانية..واندمجوا مشاعل ومرام في حياتهم العامة.
وكانت اسمهان مشغولة بزياراتها مابين بيت أهلها أو بيت أسماء أو سماح أو عند سلايفها أو أم زوجها وعبدالرحمن بما إنه صار كبير العائلة تولى الجمعات مرة طلعات شوي في البر أو المخطط أو عصريات عند البحر هو وأخوانه وزوجاتهم وأحلام وزوجها أو خالته جوهرة..
وبإحدى الطلعات..
أم عبدالرحمن:كم بقي على ولادتك ياجوهرة؟؟
جوهرة:يعني تقدرين تقولين بنهاية أول شهر من الدراسة..
=======
وبيوم من الأيام حست اسمهان بالملل وزوجها مداوم.. واتصلت بأم عبدالرحمن لكن الشغالة ردت عليها وقالت لها إن أم عبدالرحمن مو موجودة..ودقت على مشاعل وقالت لها مشاعل:أنا رايحة لأهلي..واتصلت بمرام كـ حل أخير
وبعد السلام والكلام..
اسمهان:لاتصدين نفسي يامرمر وتقولين إنك طالعة بعد؟؟
مرام:لا أنا قاعدة بالبيت..
اسمهان:الله يبشرك بالخير..عاد أنا طقيت من الزهق ونفسي ألقى أحد فاضي يجي يتقهوى معي..وش رايك تجيني؟؟
مرام:لا..سوري أنا ماأقدر أزورك بس لو حبيتي إنتي تجين تعالي!
اسمهان:لا تعالي إنتي أحسن..صار لك مدة مادخلتي بيتي..
مرام:قلت لك ماأقدر لأنه صاحبتي بتجيني اليوم..خلاص تعالي انتي.
وفعلاً ماصدقت اسمهان أحد يعطيها وجه تجهزت وتزبرقت وراحت تزور مرام..بس لما دخلت انصدمت من ضيفة مرام!
كانت بنت متعرفة عليها مرام في مشغل أختها أيضاً..بس هيئتها مسترجلة!!!!!
قاصة شعرها قصة رجالية!!ولابسة بنطلون جينز ضيق جداً مع جاكيت أسود وبادي أبيض وساعة جلد سوداء عرييييضة!ووجهها خالي من أي مساحيق تجميل وماعليها أي اكسسوارات أو زينة تبين إنها أنثى!!!!والأدهى من ذلك إن حركاتها وطريقتها بالكلام مثل طريقة الرجال بالتمام!!
انصدمت اسمهان من هالمنظر!!
مرام:هذي زبونة تعرفت عليها في المشغل اسمها ندى فديت قلبها كل يوم تتصل فيني وتتطمن على أخباري.وتوثقت علاقتنا وهذي أول مرة تشرفني بزيارتها!
اسمهان(بينها وبين نفسها):وليتها ماشرفتك بزيارتها!
مرام:شوفي ياندى هذي سلفتي وصديقتي من أيام المتوسط..
ندى(تغمز وتتكلم بلهجة رجولية):
اش اسم الحلوة؟؟؟
اسمهان(بتردد):اسمهان..
وقامت مرام للمطبخ تجيب القهوة ولوازمها..
ندى المسترجلة(تكلم مرام):وإنت راجع ياحلو..جيب لي في طريقك موية!!!!
مرام:من عيوني..
ندى:تسلم لي عيونك ياقمر!!!
اسمهان(بفضول):إنتي متزوجة؟؟
ندى:أسكتي ياشيخة..أعوذ بالله!
اسمهان(باستغراب):ليش أعوذ بالله؟؟فيه أحسن من الزواج؟؟
ندى:ماأداني الرجال ولاأطيق ريحتهم!ميولي مو لهم أصلاً!!!!!!
ودخلت مرام وحطت القهوة والحلى..وندى تطالعها بنظرات شينة!!
حست اسمهان بقلبها بينط من صدرها وصارت تتساءل بينها وبين نفسها(ياترى معقول هالفئات موجودة بيننا؟؟ماقد شفناهم إلا بالمسلسلات والبرامج المنحطة!
معقول هالبنت متصاحبة مع مرام وعندها نوايا خبيثة؟؟!!يارب عافيها ولاتبتلي مسلم)
وكانت اسمهان نافرة من القعدة مع هالبنت..بس بنفس الوقت فكرت إنها تجلس معاهم لآخر لحظة لأنها ماودها إن هالبنت تستفرد بمرام!!
وقامت ندى تتكلم عن نفسها وحياتها:أمي ولدتني أنا وبعدي أخوي ولما صرنا بالابتدائي.تركتنا وتطلقت..وأبوي على طول مشغول..جاب لنا مربية فليبينية علمتنا بلاوي ماكنا نعرفها!!
وكانت ندى بتكمل سالفتها بس اسمهان قاطعتها لأن ودها تغير الموضوع:انتي مكملة دراستك؟
ندى:كنت بالثانوي..بس انفصلت كذا مرة..لين ماتركت المدرسة وقعدت بالبيت!
مرام:وليش انفصلتي؟؟
ندى:ياشيخة.. البنات ماعندهم سالفة كل يوم مشتكيني للإدارة!مدري اشفيهم كل ماشافوا وحدة كوول قالوا عنها كلام مو زين!!!
اسمهان(بينها وبين نفسها):وأنا أشهد إنهم صادقين!
ولما جاء وقت الشاي قامت اسمهان تساعد مرام وتصب الشاي..
مسكت ندى شعر اسمهان الطويـــــل..
ندى:فديت القمر أبوشعر حرير!!
سحبت اسمهان يد ندى بقوة و دَفتها!!
وطالعت مرام في اسمهان باستغراب..!!!!!
وبعد دقايق استأذنت ندى وراحت بيتها وودعت مرام ببوسة على خدها!!وقالت:بيننا التيليفون ان شاء الله..
مرام:ان شاء الله...
وبس راحت..انفجرت اسمهان في مرام!
اسمهان:أسألك بالله؟هل هذي انسانة تتشرفين بدخولها لبيتك؟؟
مرام:قصدك عشان طريقتها في اللبس؟؟حرااام حتى أختي ماجدة موب طايقتها!أنا مدري ليش ظالمينها؟؟
اسمهان:وهي المسألة في طريقتها باللبس بس؟؟انتي مالاحظتي نظراتها لك شلون صايرة؟؟
مرام:عاد زودتيها يااسمهان..
وسكت لك كثير!!انتي كل ماشفتي ضيوف زايريني حطيتي فيهم عذاريب؟!!!مدري غيرة هذي ولا اش يسمونها!!!
اسمهان:أي غيرة وأي كلام؟
معقول عبدالرحيم هذاك اليوم شم ريحة الدخان وماعلَّق؟!!
مرام:أساساً بعد ماراحوا الضيوف هذاك اليوم بخرت البيت زين وفتحت مراوح الشفط!!
اسمهان:الحمدلله..وليش تصرفتي هذا التصرف؟لأنك خايفة لا زوجك يدري ويسويها لك قصة!لأنه مافي انسان محترم يرضى على نفسه أو زوجته تتصاحب مع ناس بهالمستوى!!
مرام:اسمهان؟,,انتي صايرة ماتنطاقين أبد!!أنا اللي غلطانة إني أناديك لاجاني ضيوف..المفروض إني أشغِّل مخي وأحافظ على خصوصياتي!
اسمهان:يامرام اصحي اصحي..أنا مدري اش اللي صاير لك..بعمرك ماكنتي كذا!! اش تبين فيهم هاللي تسمينهم صاحباتك؟؟
ألفاظهم بذيئة وكلامهم وسخ..وأفعالهم أردى!!وبالذات هاللي اسمها ندى احذري منها أشد الحذر..ولاتعطينها وجه..أنا من حبي فيك مارضيت أرجع بيتي وأخليكم بروحكم..هذي وحدة تصرفاتها شاذة ونظراتها مريبة..انتي شلون ماتلاحظين؟؟
مرام(بصوت عالي):لأن قلبي أبيض مو مثل قلبك!!انتي تحاولين تشكين بكل الناس على بالك ذكاء وفطانة!!لكن بكرة بتتأدبين يوم تلقين كل الناس ينفرون منك!!!
ماقدرت اسمهان تنطق من القهر ولبست عباتها ورجعت بيتها..ودموعها على خدودها..وكان عبدالرحمن قد رجع قبلها من عمله الليلي وبدل هدومه وتمدد في الصالة ينتظرها!!
ويوم دخلت شقتها وصفقت الباب
قام عبدالرحمن وقال لها:وعليكم السلام؟؟؟؟
بس لما لاحظ دموعها ووجهها اللي صار أحمر..قال:اسمهان؟؟اشفيك؟
عسى ماشر؟؟
اسمهان(وهي تحاول تداري دموعها):مافيني شي..
وقف قدامها عبدالرحمن وقال:ماني تاركك لين تعلميني بسبب دموعك!
اسمهان:أبد..وحدة كنت أعرفها توفَّت وبلغتني مرام وماقدرت أمسك دموعي!!!!!!!!!!
عبدالرحمن:أكيد؟؟هذي هي كل السالفة؟؟
اسمهان:ايه..
ودخلت تغير ملابسها وهي معزمة ماتكلم عبدالرحمن عن مرام لأن مرام مهما كان صديقتها وماودها تسبب لها مشاكل..
ومن يوم خرجت اسمهان من عند مرام ومرام تفكر براسها وتتساءل(وش يضمن لي ان اسمهان ماتروح تنشر أسرار ضيوفي عند أهل زوجي وتكرههم فيني؟؟وش يضمن لي إنها ماتروح تفتح فمها عند زوجها ويجي يعلم عبدالرحيم؟؟ياويلي لو وصلت الأمور إن عبدالرحيم يمنعني من وظيفتي بإدارة المشغل!!!
هين يااسمهان..تشوفين إن ماقلبتها عليك؟!!!!!!
وراحت تخطط شلون تتغدى باسمهان قبل ماتتعشى بها!!!
يوم رجع عبدالرحيم من برة..
راحت مرام تجري عنده بدلع..
مرام:عبدالرحيم؟؟
عبدالرحيم:عيوني أنا!!
مرام:بغيت أحكي لك عن سالفة مكدرة خاطري..وإنت أحسن واحد يفهمني..
عبدالرحيم:قولي اللي تبينه..
مرام:اسمهان ياعبدالرحيم مدري اشفيها تغار مني..حتى ضيوفي لاحظوا هالشي كذا مرة..تصور ياعبدالرحيم إنها تتلفظ عليهم بألفاظ شينة وتحقرهم ماكأنهم ببيتي!!بل إنها تتهمهم في شرفهم لاطلعوا من عندي!!يرضيك هالشي؟؟يرضيك؟؟يعني معقول أنا مرام أتصاحب مع ناس مايشرفوني ويرفعون راسي؟؟؟
عبدالرحيم:غريبة!!هذا وإنتم صاحبات عُمر..
مرام:لا هي الله يهديها مقهورة مني ومن مشاعل يوم إننا عرايس ومدلعات عند أزواجنا..أما هي أخوك لاهي عنها أغلب الوقت..تصور ياعبدالرحيم وهي طالعة من عندي قامت تهددني وتقول والله لأقول لخالتي إنك تستقبلين نسوان ماهم زينات وفاسدات؟!!!
وقامت مرام تمثل على عبدالرحيم دموع التماسيح وتتبكبك قدامه!!
عبدالرحيم(بزعل):ماعاش من يخليك تذرفين دمعك يالغالية..
وزوجة عبدالرحمن هذي حسابها عندي!!!
وطلع عبدالرحيم من البيت ونزل لبيت عبدالرحمن وطق الباب..
فتح له عبدالرحمن الباب وقال:هلا وغلا..تفضل تفضل..
ودخلوا مجلس الرجال وقعدوا..
عبدالرحمن:غريبة منك هالزيارة..بهالحزة.؟؟ وش وراك؟؟
عبدالرحيم(بلهجة حادة):ضِف زوجتك عننا ياعبدالرحمن..تراها تقذف الناس اللي يدخلون بيتي في أعراضهم وهذا شي مايشرفني!زوجتي بنت حسب ونسب ومو أي أحد ممكن تخليه يدخل بيتنا..بأي حق زوجتك تتسلط علينا بلسانها؟؟
عبدالرحمن:روِق روِق..ترى كل كلامك ماعندي فيه علم ولاأدري اش قصدك فيه؟؟
عبدالرحيم:زوجتك تهدد زوجتي إنها بتعلِّم أمي بالكذب إن ضيوفها ناس سمعتهم موب زينة وكل المسألة غيرة نسوان..ياخي خذ زوجتك وطلِعها من البيت ومشيها خلها تترك الحقد على نسواننا!!!!!!!
عبدالرحمن(بانفعال):رجاءً ياعبدالرحيم..هذا مو أسلوب تسولف فيه مع أخوك الكبير..ومشاكل النسوان خلها بينهم...إحنا مالنا فيها خُص!!!
ونزل عبدالرحيم وهو زعلان من بيت أخوه...
وجاء لاسمهان اللي كانت قاعدة على السرير تفكر في أحداث اليوم
اسمهان:تبون تشربون شي؟أسوي لكم عصير برتقال؟؟
عبدالرحمن:اسمهان؟أخوي طلع من بيتي زعلان!!ممكن تعلميني اش السالفة؟؟
اسمهان:وأنا اش اللي يعرفني بهالسالفة؟؟إنت اللي كنت قاعد معه!
عبدالرحمن:انتي اش قلتي لزوجته بالضبط؟؟
اسمهان:بخصوص إيش؟؟
عبدالرحمن:أنا ماأحب اللف والدوران..زعلتي زوجته اليوم في إيش؟؟؟
اسمهان(بخوف):الصراحة ياعبدالرحمن أنا بغيت أستر عليها بس مادام هي تبي تفضح نفسها فراح أقول لك..ضيوفها ناس سمعتهم ماتشرِف!!!
عبدالرحمن:وليه ماتشرِف ان شاء الله؟؟؟
اسمهان:تدخين وبذاءة لسان وشذوذ والعياذ بالله!!!!!!
عبدالرحمن(وهو مو مصدق):الله أكبر يااسمهان كل هذا لاحظتيه من خلال كم زيارة؟؟وش هالكلام الفاضي؟ليش حِنا وين قاعدين؟إنتي يظهر تتابعين برامج وتتخيلينها بالواقع!!قومي اطلعي الحين فوق لزوجة عبدالرحيم واعتذري لها قومي!!
اسمهان(بانفعال):أعتذر وأنا ماأخطيت؟؟ماني رايحة!!!
عبدالرحمن:اخزي الشيطان واطلعي للبنت استسمحيها..هذا اللي ناقص؟أخسر أخواني بسببكم يالحريم؟!!!
وبعد أخذ وعطا وكان عبدالرحمن واصل حده اضطرت اسمهان تطلع لمرام وتقول لها:أنا آسفة!!!
وحست مرام بلذة الانتصار!!
أما اسمهان رجعت لبيتها وهي مذلولة مخذولة وقلبها من القهر وده ينفطر نصين!!
========
أما رانية اجتهدت الأيام الماضية في البحث عن مستأجرين للشقة اللي فوقهم عن طريق نشر مواضيع بالمنتديات عن مواصفات الشقة...وانهالت عليها الرسائل لكن رانية أخذت معلومات عن كل عضوة وكانت تدور عن وحدة تكون عروس مثلها وسنها قريب منها!!!!
لكن للأسف مالقيت بين الراغبات بالاستئجار وحدة عروس!!لكن لقيت وحدة أكبر منها بثلاث سنوات وعندها طفل واحد..ورحبت فيها وكلمتها وعطتها العنوان!!
=============
بإذن الله غداً نلتقي

الله يسعد أيامكم
ثاني يوم من الموقف إياه بين اسمهان ومرام..وكان يوم خميس اتصلت رانية على اسمهان وكان عبدالرحمن برة البيت..
وبعد المقدمات الروتينية في أي مكالمة تليفونية..
رانية:اسمهانوه؟؟؟يامال العِلة!هالحين ياقليلة النخوة لي 5 أيام من يوم خلصت شهر العسل..وكل يوم أقول أكيد اسمهان تعرف الواجب والأصول وبتزورني وتبارك لي في بيتي وإنتي ولا إنتي معاي؟؟
اسمهان:والله إنك ببالي يارانية وماتتصورين وش كثر ولهانة على شوفتك..بس عبدالرحمن طول هالأسبوع ودوامه من الظهر لين الليل..
رانية:زين..اليوم مالك عذر! زوجك عنده إجازة ..وأبيك تجيني وتسليني..نويصر مرتبط بأصحابه اليوم..وخاطري أشوفك ونستانس
اسمهان:اليوم بالذات..ماينفع أزورك!
رانية:ليش؟زين بأتصل على مرام الدبة القاطعة وتعالي معاها!
اسمهان:لا تكفين لاتكلمينها..أنا متضاربة مع زوجي بـ سِبَتها..عشان كذا مابأقدر أقول له يجيبني عندك..
رانية:أفا يالعلم!وليش تضاربتوا؟
اسمهان:السالفة طويلة..
وماتتصورين قدر إيش أنا حاسة بالقهر وقلبي محروق من اللي صار أمس..بس تعالي إنتي..
رانية:ياعمري عليك ياسوسو شكل السالفة كايدة..ولو إني كنت حالفة ماأطب بيتك لين ماتزوريني بالأول..لكن مايخالف بأكلم نويصر يجيبني عندك وأسمع سوالفك..وإذا هالمراموه مسببة لك مشاكل..فأنا ماأبي أشوف رقعة وجهها ولاتنادينها اليوم!!
اسمهان:بعد اللي سوته فيني أمس..لايمكن أفكر أرمي نفسي عليها..خلاص أنتظرك بعد المغرب
رانية:تم..
وبعد دقايق جاء عبدالرحمن من برة..
واسمهان واضح على وجهها آثار الزعل..
عبدالرحمن(وهو مبتسم):السلام عليكم..
اسمهان:وعليكم السلام..
عبدالرحمن:عساك طبختي غداء؟
اسمهان:لا ماطبخت بعد..
عبدالرحمن:زين ماسويتي..بخاطري نطلع ناكل برة..تغيير من روتين الأسبوع..
اسمهان:رانية زوجة ناصر بتزورني اليوم عقب المغرب..
عبدالرحمن:الله يحييها..إحنا بنطلع ساعتين ونرجع قبل العصر..يعني ماعندك مشكلة..روحي تجهزي خل نطلع..
وراحت اسمهان معاه على مضض
وطول ماهم قاعدين بالمطعم واسمهان سرحانة وساكتة..
عبدالرحمن:هاتي السالفة؟
تقولين زوجة ناصر جاية؟؟غريبة!مع إنه المفروض إنتي تروحين لها تباركين..
اسمهان:فعلاً أنا نفسي أروح لها..بس بما إني متهاوشة معاك..فما قدرت إني أكلمك توديني وقلت لها إنتي تعالي..
عبدالرحمن:إنتي متهاوشة معاي؟وش هالكلام؟؟
اسمهان(بانفعال):ليش؟نسيت اللي صار لي أمس من تحت راس أخوك وزوجته؟؟؟؟
عبدالرحمن:آآآهااا! يااسمهان إحنا عيال اليوم..وبعدين لازم نكون صريحين مع بعض..إنتي غلطتي على الناس وكان الواجب تعتذرين
اسمهان:لاتجنني ياعبدالرحمن..إنت لو شفت الضيوف اللي تستقبلهم شلون صايرين.. كان عذرتني..
عبدالرحمن:مهما كان.. مو من حقك تعترضين على ضيوفها وإنتي في بيتها..حطي نفسك مكانها..ترضين أحد يسب ضيوفك؟
اسمهان:لا طبعاً!
عبدالرحمن:اشمعنى؟؟
اسمهان:لأن ضيوفي لايمكن يكونون بمستوى ضيوفها..أنا أكثر انسانة سيئة تعرفت عليها كانت عزة زوجة صاحبك..ولما عرفتها على حقيقتها قاطعتها على طول وريحت راسي..لكن إني أتصاحب مع ناس منحطين مثل اللي زوجة أخوك تستقبلهم ؟هذا المستحيل بـ عينه!!!
ووصل الجرسون وحط الطلبات على الطاولة..
عبدالرحمن:اسمعي..أنا أبيك ترمين كل هالكلام وراء ظهرك ولايعرف به أحد من أهلي..لا أمي ولاأختي ولاخالتي..حتى زوجة عبدالمجيد لاتدري به..لاتنسين إن معزتك عند أمي كبيرة وبالمشاكل هذي راح تطيحين من عينها..وبعدين كلمة انحطاط كلمة كبيرة أتمنى إنك ماتستخدمينها بالمستقبل!!!!!
وبدأ عبدالرحمن يآكل واسمهان تتابعه بعيونها اللي مليانة دموع وهي تتساءل بداخلها:اشفيك ياعبدالرحمن مو مصدقني؟؟اش اللي جرى لك بس؟؟
==========
أما رانية كانت ترتب البيت وفاجئها ناصر في العصر وقال:المستأجرين الجدد وصلوا وقاعدين يتفرجون على الشقة..ان شاء الله تعجبهم
رانية:يارب تكون من نصيبهم..عاد أنا مختارتهم على ذوقي..
وشوي واتصلت الحرمة اللي رانية أعطتها عنوان البيت..
الحرمة:مساء الخير..الأخت(أريج المسك)؟؟اسم رانية بالمنتدى..
رانية:ايه هلا تفضلي..
الحرمة:أنا طلعت شفت الشقة مع زوجي والصراحة ناسبتنا..بس ياليتكم تخففون الأجار شوي..
رانية:ياإختي(شذا طيبة)..يتهيأ لي مافي شقة بهالوقت مساحتها كبيرة وفيها كل المرافق وبتكون بهذا السعر,,أتوقع مابتلقين شقة بمواصفتها وتكون بالسعر اللي إحنا طلبناه..
الحرمة:صحيح..بس لاتنسين إن هالحي مو ذاك الزود!بالإضافة إنه المسجد مو مرة قريب..يبي له روحة بالسيارة..عِوضاً عن إنها بعيدة عن مدرستي..
رانية(تتميلح):ياحليلك..انتي طالبة؟
الحرمة:لا حبيبتي..معلمة!!
رانية:أفا يالعلم!!معلمة وقاعدة تطلبين تخفيضات؟؟
الحرمة:هههه من زين الراتب عاد؟ تراني أدَرِّس بمدرسة أهلية..وانتي أدرى برواتبهم اللي لاتغني ولاتسمن من جوع..
رانية:أشوى!لأنك لو كنتي معلمة بثانوية جدة...ماكان أأجر لك لو تفحطين!!
الحرمة:ههههه يازينك...ليش عاد؟
رانية:لأني كنت أدرس فيها ونص المعلمات متهاوشة معاهم!
إلا ناصر الي واقف جنب رانية قام يدقها ويقول:خـــلاص موب لازم كل الديرة يعرفون بتاريخك المشرق!!!!!!!
رانية:المهم ياإختي شذا طيبة إن كان لكم رغبة بالاستئجار فهذا زوجي الحين بيجيكم يتفق معاكم على التفاصيل..
ولما قفلت الحرمة السماعة قالت لزوجها:تصدق؟؟حبيت هالحرمة مرة وأنا بعدي ماشفتها..تدري؟توكل على الله وخذ الشقة..إحنا دخنا السبع دوخات عشان نلقى شقة وهذي جداً مناسبتنا يكفي إن السطح قدامنا نتسلى فيه ونشم هوا..
زوجها:وأنا رأيي من رأيك..
وقابلوا ناصر واتفقوا معاه على دفع الإيجار على دفعتين..
وبعد المغرب تجهزت رانية لزيارة اسمهان..
بس اش اللي صار ودار؟؟هذا ماسنعرفه بعد ساعتين بإذن الله!

ياقلبي عليكم من حبي فيكم
ودي أسوي سفرة معجنات وحلى وأعزم كل متابعاتي في المنتديات وآكل قدامهم ولاأعطيهم!!
(عاد وش تقولون تأثرت ببعض أبطال القصة الحسودات!!هههه)
المهم...
راحت رانية لاسمهان ونزل ناصر من السيارة واستقبله عبدالرحمن وأصر عليه يدخل ودخل ناصر في مجلس أم عبدالرحمن ..
ولكنه قال لعبدالرحمن:ترى ماراح أطوِّل عندك بأقعد لين آذان العشاء وأروح لأني متواعد مع بعض الزملاء نتقابل..
عبدالرحمن:على راحتك والله يحييك..
ودخلوا مجلس الرِجال.وراح عبدالرحمن لأمه..وقال:يمه لو قهوتك زاهبة هاتيها ناصر عندي بالمجلس..وأهله طلعوا فوق..
أم عبدالرحمن:ابشر..
وكانت مرام قاعدة عند أم عبدالرحمن..تتقرب لها!!!
أم عبدالرحمن:هذا عبدالرحمن يقول ناصر عنده بالمجلس شكل صاحبتك رانية عند اسمهان!
وانشحنت مرام بالغيظ وقالت:غريبة ياخالتي اسمهان عندها ناس ومانادتك عندها؟!!
أم عبدالرحمن:عادي..حتى إنتي دايم يجيك ضيوف ولاتناديني!!
انقهرت مرام وقالت بداخلها:والله إنك سوسة ياأم عبدالرحمن!!
..وطبعاً استقبلت اسمهان رانية بالأحضان...
اسمهان:للللللوش ياحيا الله من جانا...تَو مانور البيت..
رانية:منوِر بأصحابه الزعلانين بسرعة بسرعة علميني اش اللي صاير..!!!!
اسمهان:هاتي عباتك بالأول!!
وفعلاً جلسوا الثنتين وبدأت اسمهان تحكي لرانية عن أسلوب مرام بشكل عام وعن الناس اللي تتعرف عليهم وعن المشكلة اللي صارت أمس..
رانية:أفااااااااا ياذا العِلم!!يعني صدق مرام مغرورة وشايفة حالها شوي بس ماهقيت إنها كذابة ومشكلجية وملسونة..بهالشكل!
بس ترى الشرهة موب عليها لحالها..الشرهة على الخيخة اللي صدقها وجاء يشتكي لأخوه!!
اسمهان:اسكتي يارانية..أنا ماعلي منهم يصطفلون الإثنين..
بس مو قاهرني أحد كثر عبدالرحمن اللي مارضى على زعل أخوه وماصدق كلامي!!
رانية:شوفي أنا من وجهة نظري..إن زوجك ماخلاك تطلعين تعتذرين لأنه حاقرك..بالعكس بس هو بغى يدفن المشاكل من بدايتها عشان لو حصل في المستقبل أي مشكلة ثانية ماتضطرون توصلونها للرِجال..
وترى مقبولة من عبدالرحمن..لكن لو ناصر اللي مسويها ومخليني أطلع أعتذر يمين لأتوطى في بطنه وأوريه نجوم الليل بعِز القايلة!!!!
اسمهان:ههههه ياحليله هالناصر الصراحة أرحمه!
رانية:بس تصدقين يااسمهان؟ترى هذي هي نهاية صحبة المشاغل والصوالين..تلقين فيها كل الناس الزين والشين ومرام مندفعة ومصاحبة الشيون..بس خلها لاطاحت الفاس بالراس بتعرف إن الله حق!!
اسمهان:بس أنا من جد مستغربة من ذوقها في اختيار صديقاتها..أقول لك مبين من أشكالهم من غير ماينطقون إنهم مو مضبوطات..الله يهديها..
رانية:الصداقات اللي من هالنوع ماتستمر..بكرة لااكتشفتهم بتندم وترجع لنا..
شربوا اسمهان ورانية العصير...
رانية:إلا أمس كانت تكلمني أفنان وسألتني عنك..انتي شكلك مقاطعة الكل؟؟
اسمهان:لا حرام عليك.أنا كنت ناوية زيارة لك ولها..بس ماساعدتني ظروفي..زين وش أخبارها؟؟
رانية:بخير الحمدلله..تقول إن أهلها تبرعوا بكل أجهزة سندس الطبية لجمعية المعاقين...وكل يوم وهي عند أمها..وماشاء الله شكلها مرتاحة مع تركي..
اسمهان:الله يهنيهم مع بعض..
رانية:وشفيك تقولينها بحسرة؟؟اللي يسمعك يقول عبدالرحمن مذوقك المر!أجل وين حياة أول اللي كنا نحسدك عليها طلعات وروحات و ردَّات وأشعار ورومانسيات..وتفاهم وحب؟؟
اسمهان:مدري يارانية..أنا بس أفكر إذا هذي بدايتها مع مرام وزوجها أجل شلون بتكون حياتنا بعدين؟؟أخاف عبدالرحمن يعطي سَمْعه لكل من يحكي فيني..
رانية:آآآآآه من مرام هذي..شكلي بأمر عليها وأنا راجعة بيتي وبأقطِّعها بأسناني!!افتكينا من عبير طلعت لنا مرام!!
وطبعاً مرام أكلها قلبها من القهر!من اجتماع رانية باسمهان من غير ماينادونها فاستأذنت من أم عبدالرحمن وطلعت بيتها واتصلت على جوال رانية..!!!
دق جوال رانية وشافت اسم مرام على الشاشة..وقالت:اسمهان؟الحقي هذي مرام تتصل فيني!مو بعيدة شافتني وأنا طالعة عندك!اش رايك أقول لها تجي؟؟
اسمهان:لا تكفين..مو طايقة أقابلها!
رانية:مالك شغل أنا بأحلها بطريقتي!!
وردت رانية على مرام بترحيب غير معهود!!
رانية:هلا وغلا..وحشتيني يامرمر
مرام:لو واحشتك صحيح..ماكان اجتمعتوا انتي والأخت اسمهان من غير ماتعطوني خبر..
رانية:حرام عليك من قال هالحكي؟اتصلنا عليك أنا واسمهان كذا مرة اليوم بالعصر وجوالك يعطينا إنه مغلق..مدري اش سالفته؟رجعنا قلنا مالنا نصيب بشوفة مرام!!
مرام(بدهشة):غريبة!مع إنه مفتوح!
رانية:لا..يمكن حاطته بمكان مافيه ارسال..المهم مادامك ببيتك تعالي! شوفي هذي اسمهان جنبي تقول لزمي عليها تجي!!!!
واسمهان ياحرام بالمطبخ مو دارية عن السالفة!!!
وبالفعل دقايق إلا مرام طالعة!
دقت الجرس وفتحت لها رانية وسحبتها على غرفة الحريم وقفلت عليهم الباب!!
دقت اسمهان الباب عليهم..بس رانية صاحت فيها:خلينا بروحنا يااسمهان شوي ونجيك!!
واسمهان تقول بنفسها:أما صحيح رانية متهورة!ماأقول غير الله يعينك ياناصر!!
ودار الحوار التالي بين رانية ومرام
رانية:الحين يامراموه النذلة يابايعة العِشرة..كل هالبلاوي تسوينها باسمهان اللي كانت صاحبتك وصديقتك المخلصة؟؟
مرام:امممم يعني متفقين علي اثنيناتكم؟؟؟
رانية:ماحد متفق عليك ينقال مهمة عاد؟؟تراني أقول لك الظلم ظلمات وكل شي تسوينه بينقلب عليك بيوم من الأيام!
مرام:يعني هي حكت لك عن كل شي؟؟
رانية:وليش ماتحكي لي يابعدي؟ صديقات ونمون على بعض..مو جاحدات المعروف مثل بعض ناس!
مرام:أنا من حقي أدافع عن نفسي ماهو بكيفها تعطيني أرائها في ضيوفي..
رانية:أقول فكينا من كلامك اللي مايوكل خبز..ولاتنسين إنه لولاها ماكان تم زواجك على أخو زوجها!هي السبب في معرفة أم عبدالرحمن فيك صح ولا لا؟؟
مرام:حافظتها هالآسطوانة!!يعني اللي يسمعكم يقول أنا كنت بايرة ببيت أهلي وهي اللي خلصتني من شبح العنوسة!!حبيبتي مكتوب لي آخذ عبدالرحيم برضاها أو غصب عليها هي مالها دعوى!
رانية:لاااه.. انتي يبيلك اصلاحية وعلاج نفسي!شوفي يالنذلة مثل ماذليتيها وخليتي زوجها يغصبها تعتذر لك..فأنا مو مخليتك تطلعين من هنا إلا لما تحبين راسها وتعتذرين لها!!
مرام:لاياشيخة..ابعدي أحسن لك..على بالك حركات ريا وسكينة ذي بتمشي علي؟؟مو أنا اللي راسي ياطى التراب!
لكن رانية وقفت قدام الباب ومنعتها تطلع..
رانية:شوفي.. أنا عنيدة وعربجية ولاركبتني العفاريت مايفكك مني غير معجزة!وبتطلعين تعتذرين وإنتي ماتشوفين الطريق..خل راسك اللي واصل للسقف يصير بمستوى رووسنا حِنا الضعايف!!وترى أنا مايهمني لو أظل حابستك طول الليل بهالغرفة!!!
اسمهان:فكوا الباب..انتم اش قاعدين تسوون؟؟
مرام:ايه تمَسْكَني ياست اسمهان ماكأنكم عاجنينها وطابخينها سوى هالحركات..منادية رانية تستفزعين بها علي يالضعيفة؟؟
رانية:هيا مادام إنك خبيثة ولسانك متبري منك اش رايك أخلي اسمهان الضعيفة هذي تتصل بأم عبدالرحمن وتقول لها كل شي؟ونخليك تعتذرين غصب عليك قدامها؟؟
مرام:لا تكفون!! كلِش ولا خالتي!اش دخلها بسواليفنا؟؟خل مشاكلنا نحلها مع بعضنا بالسر..
رانية:ويوم إنك تعرفين السر ياأم سر ليش رحتي تكذبين على بنت الناس عند زوجك؟ناوية تخربين بيتها؟؟
مرام:خلاص عاد تراكم زودتوها..
أبي أطلع من هنا بسرعة اختنقت!
صارت اسمهان تطق الباب بقوة..
اسمهان:كفاية عاد..ماصارت هذي! أنا ماأبي من أحد شي..
فتحت رانية الباب..
مرام(بسخرية):أنا آسفة يامدام اسمهان..خلاص انرد لك اعتبارك؟؟
وجات متوجهة لباب الشقة..
اسمهان:مابتشربين القهوة معانا؟
مرام:خل صديقتك العربجية تشربها!!
خرجت وصكت باب الشقة وراها..
رانية:شفوا قليلة الحيا ياناس!أنا مدري وشلون انتي متحملتها؟لا وتعزمينها على القهوة بعد؟ليتك فكيتي ترمس القهوة فوقها!!!
اسمهان(بزعل):رانية إنتي مو معقولة!تصرفاتك صبيانية..بالله هذي سالفة؟تدخلين الغرفة وتصكون عليكم الباب وتتهددينها؟وماحد بينضر من السالفة هذي كلها إلا أنا..الله يعين والله لو درى عبدالرحمن لايسويها لي فضيحة !!
رانية:أقول اسكتي واللي يعافيك..انتي خوافة زيادة عن اللزوم..أنا وقت كنت معاها بالغرفة حسيت إني مشحونة على 220 فولت..حسافة والله حسافة كان ودي أطلِّع عفاريتي عليها!!
اسمهان:الله يسامحك يارانية..الله يسامحك بس..جيت افتك من مشكلة ورحتي كبرتيها زيادة!أنا البارح يوم نصحتها بس وسوت فيني اللي مايتسوى..أجل شلون اليوم يوم حبستيها وهددتيها؟ أكيد بيصير علوم!!
رانية:أقول استريحي..طالما إنك على حق خلي راسك مرفوع!
وشربوا الشاي والقهوة وتعشوا الثنتين وهم مايدرون وش قاعدة تطبخ لهم مرام فوق!!!!!
=======
بإذن المولى بعد ساعات نلتقي!