بكل لغات العالم مرحبا
طبعاً مرام يوم طلعت شقتها كانت تغلي من القهر!!
وقعدت تنتظر زوجها عشان تبث سمها في عقل عبدالرحيم اللي كانت شخصيته تَبَع!!ورضا زوجته مقدم عنده عن رضا أي انسان!
وبالفعل لما جاء عبدالرحيم..قامت مرام وفشت غِلها فيه!!
مرام:ماراح تصدق اش اللي صار معاي اليوم؟؟
عبدالرحيم:خير ان شاء الله..
مرام:اسمهان النسرة!ماكفاها اللي سوته فيني أمس..رجعت اليوم تنادي زوجة ناصر وتستفزع بها..لا ولو شفت الثنتين اش سووا فيني!!تصدق حبسوني بغرفة وهددوني تقول ريا وسكينة؟؟؟
عبدالرحيم:دخلوا بيتنا؟؟
مرام:لا نادوني عندهم ونزلت على نياتي..على بالي أبارك لرانية بس تفاجئت انهم حبسوني بغرفة ويقولون لازم تعتذرين وأحب راس اسمهان بعد!!طبعاً..يدرون إن ماوراي رَجَّال يدافع عني!!!!!!
عبدالرحيم:وش هالكلام يابنت الناس؟إنتي تدرين إني تهاوشت مع أخوي الكبير عشان عيونك ولأجل أحفظ لك كرامتك..وبعدين أنا مو قادر أصدِق فعايل زوجة عبدالرحمن..معقولة كل هذا يطلع منها؟؟؟
مرام:وليش مايطلع؟منزهة عن الخطأ حضرتها؟؟أصلاً هي من أيام الدراسة وهي غيرانة مني موت وهالحين استفحل الشر فيها مدري ليه؟؟؟
عبدالرحيم:بس من يوم مادخلت بيتنا ماسمعنا عنها إلا كل خير..وهي وحدة من ثنتين:يا إن أمي تحب تبالغ وتمدحها..يا إنها من يوم تزوجتي وشافتك أجمل وأأنق وأرق منها صابها حقد النسوان؟؟؟
مرام:كل التخمينين صح!أمك مرة رافعتها فوق مدري على إيش؟
عبدالرحيم:شوفي يامرام حقك بأجيبه يعني بأجيبه..أنا ألزم ماعلي كرامتي وكرامة زوجتي!
وعشان تعرفين إن وراك ظهر يدافع عنك!!!!!!إمحق من ظهر!ههههههه
ونزل عند أمه وسألها عن عبدالرحمن..
أم عبدالرحمن:مر عليه ناصر وخرجوا..يصلون ومارجع...
عبدالرحيم:أجل اسمعي يمه في سوالف لازم تعرفينها!
وبدأ يحكي لها عن أحداث البارح واليوم من منطلق نظرة مرام وتزييفها للحقائق!!
أم عبدالرحمن:لاحول ولاقوة إلا بالله..كل هالبلاوي قاعدة تصير ببيتنا وإحنا ماندري؟؟؟
عبدالرحيم:كله من راس هالعلة اسمهان..لازم تشوفين لها حل!!
أم عبدالرحمن:وليش ماتكون البلاوي من تحت راس زوجتك مثلاً؟
عبدالرحيم:يمه وش هالكلام؟
زوجتي أحسن وحدة في زوجات عيالك وبكرة الأيام تثبت لك!!
أم عبدالرحمن:ماشاء الله ماصار لك من عرفتها كم شهر وعلى طول شفتها هي الصح؟؟ياولدي اسمهان لها سنة وشهور معانا وعمرها ماغلطت على أحد بكلمة وأمها حرمة بقمة الذوق وتربيتها نعم التربية..
عبدالرحيم:يمه...كأني شايفك واقفة بصفها؟؟
أم عبدالرحمن:اسمع..أنا موب ساذجة لهذيك الدرجة..ولايمكن أحكم على طرف من غير ماأسمع الطرف الثاني..وأنا ماسمعت الكلام إلا من منظورك إنت وزوجتك وعشان أحل المسألة لازم أسمع اسمهان اللي أكيد عندها كلام ثاني تقوله..
عبدالرحيم:وليش تسمعينها؟عشان تضحك عليك بكلمتين؟؟
أم عبدالرحمن(بلهجة حادة):استح على وجهك ياقليل المروة...أنا ينضحك علي؟؟ليش؟ نسيت إني أمك؟ولا على بالك أنا بنية صغيرة؟؟أصلاً لو فيك خير..ماكان قعدت تنقل كلام النسوان عند أخوك..عيب عليك عيب!!
عبدالرحيم:من حقي أدافع عن زوجتي!!
أم عبدالرحمن:أنا طالعة هالحين لزوجة أخوك..خل نشوف اش سالفتكم!!
وطلعت أم عبدالرحمن لبيت اسمهان..اللي كانت مشغولة بتنظيف البيت بعد ماراحت من عندها رانية...
فتحت لها اسمهان الباب..
اسمهان:خالتي؟؟ياهلا ياهلا تفضلي..
دخلت أم عبدالرحمن وجلست بالصالة..
وبعد السلام والسؤال عن الأحوال
أم عبدالرحمن:اسمعي يااسمهان ترى ماودي أطوِّل عليك..الوقت تأخر وعبدالرحمن زمانه على وصول..لكن بغيت أسألك..انتي وش بينك وبين مرام بالضبط؟؟
اسمهان:كل خير ان شاء الله...
أم عبدالرحمن:بس الكلام اللي وصلني يقول غير كذا!
اسمهان:معقول ياخالتي هي شكتني عندك؟؟؟
أم عبدالرحمن:ماعليك من اللي شكى..أهم شي أبي أسمع السالفة منك..
وبدأت اسمهان تحكي بصراحة عن كل شي...
أم عبدالرحمن:مو يمكن يابنتي تسرعتي في الحكم على الناس؟
اسمهان:صدقيني ياخالتي إنهم ناس موب زينين!!وأكبر دليل إنها يوم يزورونها ماتناديك ولاتنادي مشاعل عشان ماتشوفونهم وتتفشل هي!!
أم عبدالرحمن:ماتبي تناديني لأنها تبي تاخذ راحتها مع ضيوفها!
اسمهان:صدقيني ماغلطت عليها
أم عبدالرحمن:عموماً..أنا بكرة لازم أواجهكم ببعض..ونعرف مين الجاني والمجني عليه!!مو معقول بيت أم عبدالرحمن الشريف النظيف يسير فيه مشاكل وتفرقة بين الأخوان بسبب الحريم..والله عيب..!
واستأذنت من اسمهان وخرجت!
اسمهان(بداخلها):حسبي الله..مثل ماتوقعتك يامرام..
بتسوينها فتنة..
=========
عندي نوووووووم فظيع أكمل بعدين..

معكم يتجدد اللقاء
كان اليوم التالي هو يوم الجمعة واتصلت أم عبدالرحمن على اسمهان...
أم عبدالرحمن:الغداء عندي اليوم...وياليت تنزلين بسرعة قبل مايجي عبدالرحمن من الصلاة..
وتنزل مشاعل..أبيك انتي ومرام لحالكم!
اسمهان:ابشري..دقايق وأنزل..
واتصلت أم عبدالرحمن على مرام
أم عبدالرحمن:السلام عليكم..مرام؟بغيتك تنزلين الحين عندي..
مرام:خليها بعدين ياخالتي..أنا قاعدة مع عبدالرحيم!!!!
أم عبدالرحمن:ليش؟حضرته ماراح للصلاة لين الحين؟؟
مرام:دقايق ويروح!
أم عبدالرحمن:أبيك ضروري الحين!
مرام:حاضر..من عيوني..
وبعد ماانتهت المكالمة..التفتت مرام لزوجها وقالت:الله يستر.. أمك تبيني ضروري أنزل لها!!
عبدالرحيم:أكيد تبي تكلمك بخصوص مشكلة البارح..
مرام:ماشاء الله عليك..إنت رحت تعلمها؟؟ليش ماعلمت عبدالرحمن؟
عبدالرحيم:ماكان موجود..وبعدين مادامت السالفة بيد أمي فماعليك إلا تتطمنين..أمي انسانة حقَّانية وماتظلم أحد!
مرام:أتمنى يكون كلامك صحيح..أمك مايلة صوب اسمهان!
وقامت مرام تلبس وتتهندم ونزلت
وتقابلت مع اسمهان عند أم عبدالرحمن...
قعدت أم عبدالرحمن وقالت:أكيد طبعاً عارفين ليش جمعتكم اليوم بروحكم؟؟
اسمهان:ايه ياخالتي..
مرام:لا ماعندي علم..يمكن عشان نتغدى مع بعض؟؟
أم عبدالرحمن:السالفة مو بس غدا..إحنا مجتمعين عشان نحط حد للمشاكل اللي بينكم..
حاولت مرام تمارس كيد النسوان وتدعي الطيبة..!!
مرام:أي مشاكل ياخالتي؟..أنا مسامحتها خلاص!!!!!
اسمهان(بزعل):وليش تسامحيني؟أنا غلطت عليك أصلاً؟
أم عبدالرحمن:قولي لي يامرام وشهو أساس المشكلة؟؟
مرام:أبداً السالفة ومافيها تعرفت على صديقات بالمشغل وزاروني ببيتي..وناديت اسمهان..ويظهر إنهم ماراقوا لها لأنهم فرفوشات واسمهان جدية شوي!!!
اسمهان(بانفعال):أي فرفوشات؟
إلا قليلات حيا!!
أم عبدالرحمن:خلي مرام تكمل يااسمهان وبعدين بيجي دورك!
مرام:وفجأة انفعلت ورجعت بيتها كان تصرفها غريب الله يهديها حتى ضيوفي لاحظوا إن نفسيتها موب زينة..أنا قلت بنفسي يمكن تكون متهاوشة مع زوجها!!وقبل أمس ناديتها وكان عندي ضيفة.. وهَم ْبعد ماجازت لها..وقامت توصفها بأبشع أوصاف وتقول لي قاطعي هالناس وإلا بأتبلى عليك عند أم عبدالرحمن وأقول لها إنهم ناس فاسدين!!!
أم عبدالرحمن:صحيح هالكلام يااسمهان؟؟
اسمهان:لا..ومرام كذابة في أصل وجهها..فعلاً صديقاتها أردى ناس شفتهم بحياتي لاأخلاق ولاحيا!!
مرام(بلهجة تمثيلية هادية):الله يغفر لك يااسمهان..كل هذا لأني تعرفت على ناس من خارج الشلة؟؟لازم تقدِرين إني صرت انسانة متزوجة ولازم أوسِع دائرة علاقاتي!!!
اسمهان(وهي تصرخ):ومين قال لك إني غيرانة منهم مالت عليهم؟أنا كان قصدي أنصحك وبس وانتي اللي كبرتيها وهي صغيرة!!
أم عبدالرحمن:الحين انتي ليش تصارخين يااسمهان؟؟ماتشوفين مرام كيف تتكلم بهدوء وعقل؟؟ إحنا نبي نوصل لحل مو نعقد الأمور بالصياح والهواش!عموماً أنا ماعاد أبي أسمع شي وانتي حكيتي لي كل شي أمس يااسمهان والصراحة ماأدري مين الصادق ومين الكذاب..لكن حطوا كلامي اللي بأقوله حلق بأذانيكم
طول عمره هالبيت ماينعرف عنه إلا كل خير وأولادي دوم مجتمعين على قلب واحد وكل واحد منهم يخاف على الثاني ويداريه..فمو معقول يجي يوم.. النسوان يفرقون فيه بينهم!!ولو هالسوالف طلعت من أحد غيركم كان قبلناها لكن منكم انتوا الثنتين غير مقبولة بالمرة!!لكم سنين مع بعض وتعرفون بعضكم زين وهالحين ببساطة جايين تخربون اللي بنيتوه عشان كلام ماصخ مايسوى؟؟؟؟
أنا طيبة وبأعطيكم فرصة تتصالحون فيها مع بعض..لكن لو تكررت هالفعايل فلي تصرف ثاني معاكم!!ورجاءً عيالي خلوهم بعيد..وانتي يامدام مرام لما تزعلين من صديقتك اقضبي لسانك عن زوجك..عيب يابنتي سوالف الحريم تطلع عند الرجال.وأنا بأجيب هالحين مصحف وكل وحدة منكم تحلف عليه إنها قالت الحق..
كانت اسمهان مرتاحة لأن الحق معاها..لكن مرام قلبها يرجف من الخوف!!
لما جابت أم عبدالرحمن المصحف قالت مرام:ودي أحلف عليه ياخالتي..بس عندي العذر الشرعي وماأقدر ألمس المصحف!
أم عبدالرحمن:أجل بلاها أحد منكم يحلف..
زعلت اسمهان إنه ماحد أنصفها ومن مرام اللي قاعدة تتمسكن وراحت للحمام تتوضأ ثم تصلي الظهر ..
استغلت مرام الفرصة وقامت تتقرب لأم عبدالرحمن..
مرام:كل شي ولا زعلك ياخالتي..وهذي راسك أبوسها!!
أم عبدالرحمن:جزاك الله خير..وعن إذنك بأروح أصلي الظهر..
مرام:أجل أنا بأطلع شقتي شوي ثم أرجع...
وخرجت مرام وهي طالعة شقتها قابلت مشاعل في الدرج..وسلموا على بعض..
مشاعل:إنتي طالعة بيتك؟
مابتنزلين للغدا؟؟
مرام:إلا بأنزل..بس طلعت أصلي الظهر..وبأرجع لكم!!!!!!!!!!!!!
ودخلت مشاعل ومالقت أحد وانتظرت بالصالة إلا اسمهان وأم عبدالرحمن انتهوا من صلاتهم ورجعوا يقعدون..
وقعدوا يسولفون شوي..
أم عبدالرحمن:اشفيها مرام مارجعت للحين؟؟
مشاعل:قابلتها بالدرج تقول بتصلي الظهر ثم تنزل!
قاموا اسمهان وأم عبدالرحمن طالعوا في بعض بدهشة!!!!!
شوي دق جوال اسمهان وكانت المتصلة سماح..وبعد الأخذ والعطا
سماح:اليوم أنا عازمة العرايس(أفنان ورانية) عندي ونبي حضورك..على العشا وأهلك معزومين بعد وبيجون..
وزوجك اتصل فيه محمد وعزمه..ننتظرك...أوكيه؟؟؟؟؟
اسمهان:أوكيه!
============
وبالفعل بالليل تقابلت اسمهان مع أفنان ورانية...وبعدين قعدوا رانية واسمهان على جنب وحكت اسمهان لها كل شي صار من أمس لليوم!
رانية:ياحليلك ياسوسو..وهقتك وأكلتيها من تحت راسي!معليش حبيبتي..ومرام الرِمة هذي يجي لها يوم..أجل تتهرب من الحلفان بالكذب وتاليتها تطلع تصلي؟؟أزين مافي الموضوع إن زوجك مادرى بسالفة أمس!
اسمهان:صادقة..كنت شايله همه حيل..
جات أفنان وقعدت معاهم..
أفنان:يلا عاد ماأنتم ناويين تزوروني؟ولا لازم دعوة رسمية؟
رانية:لا لا ماأسمح لك قد حجزت اسمهان من قبلك وإنتي ان شاء الله بتكونين ضيفة عندي..وعقبها أرد لك الزيارة!
أفنان:صار!
============
أما عبير انتهت من رحلتها الشاقة في اجراء العمليات ورجعت مع أبوها واخوانها وعمتها لـ جدة..
وراحوا لبيت أعمامها..اللي رحبوا فيها..
وحدة من زوجات أعمامها:ليتك أخذتيني معاك ياعبير..أشفط كرشي وأنفخ صدري!!!!!!
وحدة من عماتها:وأنا بعد ودي لو حقنت وجهي بوتكس وزرعت شعر بمقدمة راسي اللي بدأ يقرِّع!!!!
العمة منيرة:أقول تحمدوا ربكم على نعمة الصحة والعافية..على بالكم عمليات التجميل بقمة السهولة؟؟عبير مسكينة تبهذلت وهي بين غرف العمليات وأيادي الدكاترة..والجراحات اللي صارت لها..
وقاموا الكل يتحمدوا لها بالسلامة..وهي كل تفكيرها بتركي وصورته بذهنها يوم المطعم!وتتساءل بنفسها:لو تدري ياتركي فيني شلون قضيت إجازتي مابين غرف العمليات..وأنا أتنقل من غرفةلثانية.وإنت لاهي مع عروستك من مكان لمكان..بس يلا ماحد ياخذ أكثر من نصيبه!!!
=============
مرت الأيام..وسجلوا الصديقات الثلاث(اسمهان ورانية ونجلاء)بكلية التربية..
أما مرام وأفنان انتسبوا للجامعة..ومرام صارت تداوم رسمي بصالون أختها ماجدة وماسكة الإدارة فيه..وأفنان قعدت تدور بين المدارس الأهلية تبحث عن وظيفة معلمة بالروضة إلى جانب الانتساب..
==============
لكن اجازة الصيف مازالت وبقي أسابيع وتبدأ الدراسة..ورانية عندها فضول تتعرف على المستأجرين الجدد اللي ساكنين فوقها...
وبيوم من الأيام سوت غداء ورتبته بصحن مع سلطة وطلعته فوق وطقت الباب..
فتحت الحرمة الباب ولقيت رانية قدامها!
رانية:مساء الخير..أنا جارتك اللي تحت..وجبت لك الغداء..أدري إنك مشغولة بترتيب عفشك ومو فاضية للطبخ..
الحرمة:مشكورة ماتقصرين تفضلي عندي..
رانية:لا ماودي أضايقكم وقت غداكم..
الحرمة:لامضايقة ولاشي..أساساً زوجي ماهو في..
وماصدقت رانية ودخلت وفسخت عباتها وجلست..
الحرمة:عن إذنك أسنِّع نفسي وأرجع لك..
وقعدت رانية تتأمل بالبيت وكان بيت عادي جداً..والحرمة عندها ولد عمره سنة..
ورجعت الحرمة وقالت:ماتعرفت بإسمك؟
رانية:اسمي رانية..
الحرمة:والنعم فيك أنا اسمي روابي..بس ماشاء الله شكلك صغير توقعتك أكبر من خلال رسايلك وكلامك!
رانية:لا ياقلبي أنا حديثة عهد بالتخرج من الثانوي وبعد أسابيع بأنضم لكلية التربية..وأنا بعد كنت راسمة لك صورة إنك كبيرة!
روابي:هههه لاعاد مو مرة..أنا أدرس بثالث جامعة
..منتسبة..وبنفس الوقت معلمة بمدرسة خاصة!
رانية:معلمة أي مادة؟؟
روابي:كومبيوتر..
رانية:خلاص بآخذ عندك دورات مجانية!
روابي:هههه الله يحييك..بشرط تخفضون الإيجار!!
رانية:أجل بطلت آخذ دورات!
روابي:ههههه...مافي شي بهالدنيا بلاش..بس انتي كم صار لك متزوجة..؟؟
رانية:شهرين وعليها..
روابي:ماشاء الله مبروك..أجل أكيد لو بأسـألك عن رأيك بالزواج..بتقولين روعة!!لذا بأحتفظ بسؤالي وأسألك اياه عقب 3 سنين!!
رانية:لا لاتحتفظين بسؤالك..من ذا الحين بأقول لك الزواج خرطي!!وأحس نفسي في نزهة مؤقتة وممكن أرجع لأهلي بأي وقت!!!
روابي:يووووه الله يعينك..أجل شكل زوجك مثل اللي عندي..الله يعيننا عليهم بس!
رانية(بفضول):ليش اش فيه زوجك؟؟
روابي:خليني ساكتة أحسن!مصير الأيام تكشف لك!!
وشوي واتصل ناصر على رانية..
ناصر:وين هجيتي يابنت؟رجعت البيت مالقيتك؟
رانية:أنا عند الجيران الجدد..
ناصر:انزلي انزلي..حطي لي الغداء تراني جيعااااان وتعباااان..
وودعت رانية جارتها وأعطتها رقمها ووعدتها روابي إنها تزورها بأقرب فرصة...
=========
بيوم من الأيام واسمهان قاعدة ترتب طاولة السفرة وتجهزها للغداء في انتظار حضور عبدالرحمن من العمل..دق الجرس ولما فتحت كانت مشاعل على الباب..
اسمهان:مشاعل؟وش هالزيارة المفاجئة؟؟
مشاعل:لا أنا مو جاية أزورك..ودارية إنه وقت رجوع زوجك من العمل..أنا بس حبيت أجي وأبشرك بعد مابشرت خالتي
اسمهان؟أنا حـــــــــــــــــامل وتوني راجعة من المستشفى!
اسمهان:مبروك حبيبتي مبروك
مشاعل:ماتتخيلين عبدالمجيد وش كثر فرحته..وبهالمناسبة اشترى هذي التورتة وقال أهديها لعبدالرحمن وزوجته..
أخذت اسمهان التورتة ببرود وشكرت مشاعل..ورجعت مشاعل لبيتها...
لما راحت اسمهان بالتورتة للمطبخ لقيت كرت معلق على العلبة اللي التورتة فيها..فتحته
ولقيت هالعبارة مكتوبة فيه(مبروك ياعبدالرحمن..بتصير عم)التوقيع
أخوك عبدالمجيد..
هلت دموع اسمهان غصب عنها..وحست إنها محرومة من هالنعمة..وظلت تبكي لين جاء عبدالرحمن بعد دقايق ودخل البيت يكلمها ماترد عليه..
حاول يعرف سر دموعها لكن العبرة خانقتها ومو قادرة تتكلم
شاف عبدالرحمن التورتة وقال:ماشاء الله مين جاب هالتورتة الحلوة؟؟
وفتح الكرت وقرأ الكلام المكتوب فيه..
وقال:ماشاء الله..عبدالمجيد بيجي له نونو الله يهنيهم يارب..
زاد بكاء اسمهان وصار بصوت مسموع..
عبدالرحمن:لايكون هذا السبب اللي خلاك تبكين؟؟لايااسمهان ماخبرتك تحسدين أحد..
اسمهان:أنا مو حسودة..أنا حزنانة على نفسي قد مااشتهيت الذرية الصالحة ماتحقق لي هالحلم.
عبدالرحمن:يابنت الحلال هذي أرزاق..وكل شي مقدر ومكتوب.. والمفروض إننا نفرح لفرحة أخواننا مو ننكد على أنفسنا..روحي روحي الله يهديك واغسلي وجهك وتعوذي من ابليس وتعالي نتغدى ونضحك ونفرفش مثل قبل..
وراحت اسمهان والحسرة بقلبها
===========
نستكمل بوقت آخر ياحلوات

هلا ومرحبا
رجعت اسمهان تتغدى..
وفي العصر اتصلت عليها أم عبدالرحمن
وبعد التحية والسلام..
أم عبدالرحمن:العشاء اليوم عندي ان شاء الله بمناسبة حمل مشاعل
..وصلتك العلوم؟؟؟
اسمهان:ايه وصلت..الله يتمم لها بخير بس ليش ياخالتي ماتجتمعون عندي أحسن؟؟؟
أم عبدالرحمن:لا حبيبتي خليها عندي وأحلام وجوهرة جايين بعد..
وبعد انتهاء المكالمة راحت اسمهان تسوي صينية حلى تاخذها معاها لأم عبدالرحمن..
وفي الليل اجتمعوا مرام ومشاعل واسمهان ببيت أم عبدالرحمن وكانوا جوهرة وأحلام مابعد جوا..
وقعدوا يتكلمون عن الحمل والولادة..
أم عبدالرحمن:يلا يامشاعل جيبي سرير وصفيه جنب مرام هالدلوعة..اللي من يوم ماحملت وهي ماتبي تطلع لبيتها وقاعدة عندي!!!
مشاعل:لا ياخالتي..أنا بأتوحم ببيتي وعند زوجي..
اسمهان(باستغراب):مرام؟؟انتي حامل؟
مرام:إيه..قولي ماشاء الله!!
طالعت أم عبدالرحمن في اسمهان وقالت:ليش؟انتي ماتدرين؟؟
اسمهان:لا ماأدري ماحد بشرني!
أم عبدالرحمن:غريبة يامرام..يعني قلتي للكل بحملك وصاحبتك نسيتيها؟
مرام:هي ماتتصل فيني حتى تسمع أخباري..!
أم عبدالرحمن:لايكون حتى عبدالرحمن مابشرتوه؟!!
مرام:ماأظن عبدالرحيم قال له!
أم عبدالرحمن:مالكم حق يابنتي..عبدالرحمن هو كبير العيلة الحين ومن حقه يعرف ويشارككم فرحتكم..وعيالكم عياله..
انقهرت اسمهان من تصرفات مرام..معقول وهم كانوا أعز صديقات.... خبر مهم مثل هذا تبشر كل الناس فيه وتنسى صاحبتها؟؟
اسمهان:مبروك يامرام..الله يتمم لك على خير..
مرام:الله يبارك فيك عقبالك!!
حست مشاعل إن خاطر اسمهان مكسور فحاولت تلطف الجو وقالت:أنا وعبدالمجيد مخططين لاجانا ولد ان شاء الله نسميه عبدالرحمن..
أم عبدالرحمن:الله يجزاكم خير..يافرحة عبدالرحمن لو سمع هالخبر...وانتم يامرام وش خططتوا تسمون؟؟
مرام:نفسي أسمي بنتي(ندى) على صديقتي...والولد لسه محتارين فيه..بس أكيد بيكون مميز ومو على أحد!!
قعدت اسمهان تفكر بينها وبين نفسها:مالقيتي يامرام تسمين بنتك إلا على صديقتك المنحرفة؟!!!!
وقامت أم عبدالرحمن للمطبخ وأشرت لمرام تلحقها..
وبالمـــــــــــــطبخ..
أم عبدالرحمن:زعلتيني منك يامرام!بالله هذا تصرف ؟تخبين حملك عن صديقتك وانتي قربتي تدخلين شهرك الثالث؟؟؟؟أبيك تجبرين خاطرها بكلمتين..مفهوم؟؟
مرام:مفهوم..
وراحت مرام وقعدت جنب اسمهان وقالت لها:المعذرة لو كنتي تضايقتي من خبر حملي اللي وصلك..بس مثل ماتدرين العين حق!!!!
اسمهان:اش تقصدين؟؟أنا بأحسدك يعني؟؟ليش؟إنتي أول من يحمل بهالكون؟؟
مرام:لا فهمتيني غلط..قصدت إنك بتقولين وشفيها هذي تزوجت من هنا وحملت من هنا؟..وانتي لك سنة وعليها وماانكتب لك حمل!!!
اسمهان:أنا ماأفكر بطريقتك..وماحد بيجيه رزقه إلا بالوقت اللي ربي كاتبه!
وقامت اسمهان وراحت للحمام وقعدت تبكي..وشوي وحضروا جوهرة وأحلام
وجاء وقت القهوة واسمهان مابينت وافتقدوها..
قالت مشاعل:أنا بأروح أناديها..
دقت عليها مشاعل باب الحمام..
اسمهان:نعم؟
مشاعل:تأخرتي يااسمهان وإحنا منتظرينك على القهوة..
اسمهان:شوي وأجيكم..
مشاعل:أبيك ضروري..اطلعي الله يسعدك..
خرجت اسمهان وعلى وجهها ظاهر آثار البكاء..
سحبتها مشاعل ودخلوا بغرفة من الغرف..
مشاعل:من غير ماتقولين شي يااسمهان أنا حاسة فيك..مرام الله يصلحها عليها تصرفات وكلام مو موزون..بس انتي زوجة الكبير ولازم يكون موقفك أقوى اسمعي وقطي الكلام ورا ظهرك..
اسمهان:بس أنا مصدومة فيها..هي ليش تسوي معاي كذا؟حتى زوجها له فترة مقلوب على عبدالرحمن..بشارة استخسرها فيه؟؟
مشاعل:وهنا يجي دورك..إنك تلمين الشمل وتصغرين المشاكل
..وتحسسين نفسك إنك كبيرة بعمرك وعقلك..وإلا بتظلين حاسة بـ هموم على طول..عموماً امشي خل نتقهوى هالحين بيقولون هذول وين راحوا؟؟
وراحوا الثنتين وجلسوا مع الجميع بعد السلام..ومرت الليلة على خير..
ولما انحط العشا قالت مرام:خالتي؟وينها السلطة الحارة؟انتي مابلغتي الشغالة تسويها لي؟؟
أم عبدالرحمن:لا نسيت..
مرام:عاد أنا متوحمة عليها بشكل مو طبيعي ودي آكلها بكل وقت..
وقامت مرام تنادي الشغالة عشان تسوي لها السلطة...
حست أحلام بقهر من حركات مرام..وقالت:الله يعطيك العافية يامرام هذا انتي تمشين على رجولك..قومي سوي السلطة لنفسك..الشغالة مكروفة من الصبح وهي تشتغل..وواقفة على رجولها بالمطار تنتظر زوجها!!
جوهرة:ايه صحيح..وصل سواقكم؟؟
أم عبدالرحمن:ايه أبشرك..وأخيراً وصل وبأصير أطلع وأقضي مشاويري..
مرام:الصراحة الحمل متعبني..ورجولي توجعني..
أم عبدالرحمن:من كثر الجلسة على السرير يابنتي المفروض تقومين تمشين وتتحركين..
أحلام(بغيظ):ليش؟انتي لسه قاعدة عند أمي؟؟
مرام:ايه..
أحلام:ليش؟المفروض تطلعين بيتك..كلنا توحمنا ببيوتنا..
مرام:ماأطيق طلوع الدرج..وبعدين مين اللي بيطبخ لي؟ويخدمني؟؟
جوهرة(باستهزاء):صدقتي يامرام أختي أم عبدالرحمن حمالة الآسية دايماً..الله يعطيها العافية!!!!
وبعد مارجعوا الجميع لبيوتهم..جاء عبدالرحيم ينام مع زوجته ببيت أمه..
عبدالرحيم:كيف سهرتكم اليوم؟
مرام:مو حلوة!تصدق أمك فشلتني وقالت قدام اسمهان إني حامل؟..ولو شفت عيون اسمهان شلون كانت تناقز شرر..الصراحة خفت منها لو صار فيني شي راح أعرف إنه من عيونها!!!
عبدالرحيم:دايماً أوصيك تحصنين نفسك الله يهديك..انتي حلوة وعيون الناس ماترحم!!
=============
أما اسمهان بلغت عبدالرحمن بحمل مرام وإنه بيصير عم مرتين...
عبدالرحمن:الحمدلله..الله يبارك لهم
اسمهان:بس استغربت منهم مابشرونا ومرام قربت تدخل بثالث شهر!
عبدالرحمن:براحتهم..هم الخسرانين..مايبون أحد يشاركهم فرحتهم..ليش مشغلة نفسك؟؟؟
===========

ياحلوات اللي مستغربات كيف مرام كان عندها عذر شرعي وحامل!!!
مرام كذبت عشان ماتبغى تحلف على المصحف!
ثاني شي لما مشاعل قابلتها في الدرج قالت طالعة أصلي..ومشاعل قالت هالكلام لأم عبدالرحمن واسمهان وطالعوا في بعض بدهشة!اش يعني؟؟
يعني عرفوا إنها كذابة!!
غير كذا العادة إنه البكرية ماتعرف وتتأكد إنها حامل إلا بعد شهر من حملها..ولاحظوا إني قلت بالقصة مرت أيام..الأيام هذي ممكن تكون شهرممكن شهرين ولاحظوا إن مرام تزوجت ببداية إجازة الصيف يعني مر 3 شهور و أم عبدالرحمن عرفت بسالفة حمل مرام...بعد فترة مو من البداية..
كان ممكن أوضح السالفة هذي من خلال جزء لكن ماحبيت أتعمق بالأحداث...
المهم إنكم تعرفون إن أم عبدالرحمن في قرارة نفسها عارفة إن مرام ماتخلى من الحركات النص كم!!

**هلا من جديد**
مرت الأيام وحصل تبادل زيارات بين أفنان ورانية واسمهان..
وبعدها بدأت الدراسة بالكلية واجتمعوا الصديقات الثلاث(نجلاء واسمهان ورانية)..
لاحظوا اسمهان ورانية إن نجلاء متغيرة ناحيتهم شوي وكلامها معاهم مختصر!!!
وبيوم من الأيام كانوا رانية واسمهان جالسين بحوش الكلية وكانت اسمهان زعلانة من مرام وتفضفض لها..
اسمهان:تصدقين؟مسخرتها زادت عن حدها كل يوم والثاني أسمع صوت ناس طالعين من الدرج ورايحين لمرام..وأفتح الباب بشويش وأشوفهم..لاستر لاحشمة..مدري ليش أحس إنها تتنقى أخس الناس وتتصاحب معاهم!!
رانية:إلا وإنتي الصادقة هم اللي حريصين يتعرفون عليها لأن صاحبة المشغل أختها ومرام ماسكة الإدارة..وأسعار المشغل نار فتلاقين المصلحة تطغى على كل شي!!أكيد يوم يتعرفون عليها يضمنون الخصومات والتخفيضات هذا إن ماكانت بعد تقدم لهم خدمات مجانية!!
وهم يتكلمون عن مرام طبَّت عليهم نجلاء فجأة!!
نجلاء:لا ماحبيتها منكم أبد!تحشون بمرام ياللي ماتستحون؟ماكأنها كانت صاحبتكم؟؟؟
رانية:تكفين!!عاد هي اللي مرة حاطة لنا اعتبار وماتحش فينا؟!!أقص إيدي إن ماكانت تسبنا بكل محل!!
نجلاء:يحق لها تتكلم عنكم إنتم أصلاً انقلبتوا عليها وصرتوا حزب!!
اسمهان:وانتي اش دراك؟
نجلاء:أنا علاقتي فيها مستمرة..
ودايم نكلم بعض..وإنتي بالذات يااسمهان بان الوجه الثاني لك!!
اسمهان:ليش؟الله يسامحك أنا وش سويت؟؟
نجلاء:قبل..كنا كلنا ماخذين مقلب إنك عايشة حياة سعيدة رغيدة ونغبطك على زوجك!بس بعد ماتزوجت مرام وصارت من نفس العيلة وصارت أكثر وحدة ممكن تعرف خصوصياتك وعرفت النكد اللي زوجك معيشك فيه...قمتي تكيدين لها المكايد عشان تكَرِهين الكل فيها..لكن أحب أذَكرك إنه من حفر حفرة لأخيه وقع فيها!!!
اسمهان:معقول حتى إنتي يانجلاء بتقلبين علي؟؟هي الدنيا اش اللي صار فيها؟؟وبعدين ماأسمح لك إنك تتهمين زوجي بأنه منكد علي....ماأتوقع فيه في الدنيا رجَّال برجاحة عقل عبدالرحمن وعاطفته..
رانية:شوفي يانجول..إن كان بتعطين سمعك للي ماتتسمى مرام؟..فإحنا بنغسل إيدنا منك..ماهو ناقصنا وحدة نمامة تخرب علينا صداقاتنا..تبين تستمرين معانا حياك!!ماتبين؟درب يسد مايرد!!!
نجلاء:أعوذ بالله من إبليس..هي الصداقة صارت رخيصة لهذا الحد؟ متى ماطرى على بالكم تتزاعلون تتزاعلون؟؟
اسمهان:صدقيني يانجلاء إني أغليكم كلكم..ومازلت متمسكة حتى في مرام اللي غلطت علي كثير..لكنها نكرت العشرة اللي بيننا وكل يوم أتفاجأ بمواقفها
..شي ينقال وشي ماينقال!!وبالرغم من هذا ماحقدت عليها عندي أمل إنها ترجع مرام اللي قبل!
رانية:لا أنا ماعندي أمل الصراحة!اللي هذا أوله ينعاف تاليه..وطالما زوجها الطرطور يطاطي راسه وراها وتعرف شلون تديره بريموت كونترول؟أجل على الدنيا السلام!
نجلاء:الصراحة حيرتوني!!مو دارية أصدِق مين؟!!
رانية:صدقينا إحنا!خبرتينا كذبنا عليك بشي قبل؟؟؟
نجلاء:اسمعوني.. أفضل حل إننا نجتمع أربعتنا بمكان ونسوي جلسة صُلح!
اسمهان:كان غيرك أشطر!!ياما تجمعنا عند أم زوجي عشان تصلح بيننا ونصطلح يومين واليوم الثالث تطلع لنا مشكلة من تحت الأرض!
خلاص أنا تُبت من التجمعات..حتى زوجي يوم شاف الفتن زادت بطل من الطلعات العائلية..ماأجتمع بمرام إلا في بيت خالتي أو بيت مشاعل أما هي لاتجيني و لاأجيها!
نجلاء:حسافة..تصدقون إني بعد مادخلت بيتها؟؟
رانية:وليتك ماتدخلينه أبد!!!
نجلاء:لا من جد أنا ناوية أزورها قريب ونفسي من قلب إننا كلنا نتقابل عندها!بس للأسف ماتوقعت علاقتكم ببعض ساءت لهاالدرجة!!!!
رانية:حبيبتي؟هي الحين دخلت بشهرها الخامس..أنا أقول اصبري شوي وزوريها في الولادة أحسن!
ولو ماتزورينها أبد أفضل!!
اسمهان:وش هالكلام يارانية الله يصلحك؟ إحنا مو حقودات لهالدرجة.وبعدين مرام غلطت علينا بس ماغلطت على نجلاء حتى تقاطعها..نجلاء حبيبتي ودك تزورينها زوريها هذا واجبك..بس الحقيقة أنا أعتذر عن الحضور إلا لو مرام فكرت تكلمني وتعزمني عندها...
نجلاء:لا أنا فكرت أزورها هذا الأربعاء أو الخميس بس لسه ماكلمتها..
رانية:أنا وأفنان مخططين نزور اسمهان هذا الأربعاء..اش رايك بعد انتي تزورين اسمهان,,وتخلين مرام بعدين؟؟
نجلاء:لا..يوووه لو تدري مرام بتزعل.. الزيارة لها أولى أنا بعدي ماباركت لها في بيتها..
===========
وبالفعل كلمت نجلاء مرام وقالت لها مرام:تعاليني الأربعاء بيجوني ضيوف..فرصة تتعرفين عليهم وتستانسين!!!أما الخميس أنا رايحة لأهلي..
ومرت الأيام وجاء يوم الثلاثاء..وكان الوقت عصر..جاء لمرام اتصال من وحدة من صاحباتها وياكثرهم وماأخسهم!!!
ميساء:هلا مرُّومه!أنا قريبة مرة من بيتكم ومعايا القمصان اللي وصيتيني عليها..اش رايك أمر وأعطيكي هي من عند الباب؟؟
مرام:وليش من عند الباب؟..تعالي بيتي...
ميساء:لا مرة مستعجلة وعندي كم مشوار أبغى أخلص منهم..
مرام:براحتك..
ميساء:مرام؟ خلاص أنا قدام البوابة الخارجية انزلي لي..
وكانت مرام لابسة بنطلون برمودا(حق حمل) وبلوزة بحبال...يعني أكتافها مكشوفة وجزء بسيط من ظهرها وسيقانها!!!
ومن العجلة نزلت مرام تجري من بيتها اللي بالدور الثالث للحوش!وفي هذي اللحظة كانت أم عبدالرحمن قاعدة بالحوش تشرب كوب كوفي واستغربت من منظر مرام اللي راحت تركض باتجاه البوابة الرئيسية..وراحت أم عبدالرحمن تمشي وراها وتراقبها من بعيد..
فتحت مرام لميساء الباب وكانت ميساء متبرجة وبيدها سيجارة وتضحك بصوت عالي عند باب الشارع وتسولف مع مرام شوي..
ولحظات وودعتها مرام..ورن جوال مرام وردت وطلعت صاحبتها..
واسمها جميلة...
وبعد السلام والتحايا..
جميلة:اشتقت أشوفك..وش رايك تزوريني اليوم؟؟
مرام:وين أزورك؟نسيتي إن الثلوثية اليوم دايماً ببيت خالتي أو سلايفي؟لو إنها عند سلفتي اسمهان كان طنشت وجيتك!!بس للأسف هي عند مشاعل!
جميلة:يووه إنتي بعدك في مشاكل مع سلفتك؟؟
مرام:إيه..الكل يحبها مدري على إيش؟حتى أم زوجي هالمتشببة واقفة بصفها أغلب الأحيان على إيش ياحسرة مدري؟؟بس بكرة لاجبت الولد بأخليهم يحبوني غصب عنهم!
جميلة:أقول أهل الزوج دايم مايجون على المزاج..الله يعينني ويعينك!
مرام:هههه ياعيوني لاضمنتي الرجال بجيبك.. ماعليك من أهله!!!
كل هالحوار ومرام تتمشى بالحوش وتسولف بجوالها وأم عبدالرحمن واقفة قريب منها..!!!
وبعد بعض الحش والغيبة..قفلت مرام الجوال وتفاجئت بأم عبدالرحمن بوجهها!!!!
مرام(بدهشة):خالتي؟؟؟؟
أم عبدالرحمن:إيه..خالتك المتشببة!!!
مرام(بارتباك):أهلين..ماكنت منتبهة لوجودك..
أم عبدالرحمن:ايه واضح إنك مو منتبهة حتى لنفسك!!فيه حامل تنزل تجري بهالسرعة؟؟
مرام:من العجلة ماحسيت بعمري
أم عبدالرحمن:وبعدين يابنتي هالبيت فيه شباب..شلون تسمحين لنفسك تطلعين بهالمنظر من غير عباة أو شي تغطين به نفسك؟؟افرضي واحد منهم صادفك؟وش بيكون تصرفك؟
مطت مرام شفايفها من غير ماترد!
أم عبدالرحمن:وبنت الأصول والحمايل ماتتكلم عن أهل زوجها بشي مايرضيهم عند الناس!المفروض تحافظين على الأسرار!
تفشلت مرام وقالت:خالتي انتي فهمتيني غلط!
أم عبدالرحمن:مايحتاج أفهمك غلط وأنا سامعتك بأذني!وبعدين رفيقتك هذي مو عيب عليها تطلع وهي متبرجة وشعرها مكشوف من كل جهة وشايلة سيجارة بيدها وتضحك بعد بصوت عالي..وياعالم هي راكبة مع سايق وهي بهالتصرفات ولا لا؟؟
هيا اطلعي بيتك بسرعة قبل لايشوفك واحد من العيال!
وبنفس اليوم بالمغرب..اتصلت أم عبدالرحمن على مشاعل وقالت لها:وش رايك ننقل الزيارة من بيتك للحوش تحت؟؟الجو مرة حلو ويشجع على القعدة..
مشاعل:اللي تبينه ياخالتي..بس ممكن ترسلين الشغالة تساعدني في شيل أغراض القهوة والشاي؟
وبالفعل اجتمع الكل بالحوش(أم عبدالرحمن واسمهان ومشاعل ومرام)...
وبعد مدة من جلستهم كان عبدالمجيد راجع من برة يبي ياخذ شي من البيت...وبما انه مايسمعهم ومايدري انهم بالحوش جاء ماشي من جنبهم بسرعة!لمحته اسمهان وتخبت تحت الطاولة..أما مرام ظلت قاعدة!
ومرام تثرثر...
مشاعل:اسكتي شوي يامرام وقومي!!
مرام:ليش؟زوجك أصنج مايسمع!
مشاعل:ايه بس عنده عينين ويشوف!
وقامت مرام على مضض!!
أما اسمهان طول هالزيارة وكلامها رسمي جداً..
===========
لما رجعت مرام بيتها كان عبدالرحيم توه جاي..
مرام:أف من أهلك هذول!!! مايشوفوني أمر من مكان إلا ويقولون تغطي وتستري!!
عبدالرحيم:من حقهم..إنتي قمر ويخافون عليك!!!!!!!!!
=============
اليوم الثاني اجتمعوا أفنان ورانية ومشاعل عند اسمهان..
أما أم عبدالرحمن طلعت في زيارة لناس...
ومرام جاها ضيوف ومنهم نجلاء..
========
نستكمل بعدين يالغوالي..