أشوفهم قدام عيوني ومشتاقه أكلمهم بس ماأقدر

يالله وآخيررررراً جاء اليوم اللي بطلع فيه اللي بقلبي ..ماتوقعت هاليوم بيجي أبداً كنت أفكر ياربي إلى متى كاتمه هالهم تعببببببببببببببت وأبي حل كنت أفكر أشكي لمدرسات القرأن بجامعتنا أبيها تنصحني وتوجهني وتساعدني لأني بجد تعبت أفكر بالليل وأقتنع بس إذا رحت للجامعه أقول لا يابنت لاتشتكين وأتراجع مدري ليه..؟؟
كنت أقول شكلك يادنيا بتعيشين وأنتي كاتمه هالهم هذا نصيبك ..وطبعاً حتى لو تزوجت مستحيل أشكي لزوجي أدري أنه بيتطنز علي بيواسيني لحظتها بعدين متى ماأزعل بيتطنز علي ..
المهم طفشتكم بمقدمتي بدخل بالموضوع ..قصتي بدأت تقريباً وأنا بسادس ..وأنا الحين آخر سنه جامعه الله يعدي هالسنه ع خير يعني القصة له فتره طويله جداً .. طبعاً ماأذكر التفاصيل بس فيه أشياء باقي محفوره بعقلي ومستحيل أنساها..
بطفولتي كانت الشغاله عنصر أساسي ببيتنا ماتروح شغاله إلا تجينا اللي بعدها قدمنا ع شغاله وجت الشغاله وحطيناها ببيت خالتي لأن شغالتنا اللي كانت عندنا باقي ماراحت وطبعاً أمي ماتبيهم يتقابلون وعشان كذا حطتها عند خالتي ..سافرت الشغاله اللي عندنا من هنا رحنا جبنا اللي عند خالتي من هنا ..دخلت جلست الشغاله بالمطبخ وكنا أنا وخواتي نلعب من قلب اخ بس ياذيك الأيام ماكنا ندري أنها بداية رحلة العذاب لنا .. وعطيناها غرفه لها كبيره والله مع أن بيتنا القديم ماكان مره كبير دور واحد بس المهم أمورنا مشت ويومياً أنا وخواتي لعب من قلب نقوم بس همنا نلعب وننام همنا بس نلعب وطبعاً كانت الشغاله تحاول تدخل بيننا وتلعب معنا زي الطفله كنا نرقى السطح ونسوي لنا سوق ونبيع وحركات كان عندنا دبابات ومراجيح يعني وناسه من قلب وكانت هي إلا تلعب معنا وكنا نخليها تلعب بس مع بعض النفور منا وماكنا نبيها ..وكانت تحااااااول تحببنا فيها بأي طريقه ياليتها بس تحببنا فيها كان هدفها تفرق بيننا ونصير نحبها هي حسبي ربي عليها وكفى.. مرت أيامنا دخلت المتوسط وبالتحديد بعيد الأضحى بلغت وتعرفون البنت بالفتره هذي ماتبي أحد يقول لها أنتي كبرتي خلاص عبايه ومدري وشو المفروض الوحده أمها تلبسها العبايه قبل البلوغ علشان ماتنصدم بكل هالأشياء مره وحده .. كانت أختي اللي أكبر مني بسنتين تلبس عبايه طبعاً غطئ وعبايه ساتره ع الرأس طبعاً أنا ماكنت أبي ألبس عباية ع الرأس أبي كتف بكيت عند أمي إلا تشتري لي طبعاً أمي رفضت وراحت شرت لي عبايه ع الرأس قلت لا ماأبي أحسها ثقيله علي قالت خلاص بشتري لك عبايه خفيفه وكنت مصره ماأبي غطاء زي أختي أبي نقاب شرت لي أمي النقاب ويوم رجعنا البيت راحت الشغاله قالت لأختي اللي أكبر مني ترى دنيا يشتري عبايه مافيه كويس خفيف مره وطلع عيون وطبعاً حشت رأس أختي بالكلام وراحت أختي عند أمي قالت لها تبين البنت تنحرف حرام عليك وليه تلبسينها كذا وش معنى هي ليه تسمعين كلامها وطبعاً أمي مشت الموضوع والشغاله بعد فتره رجعت لأختي وحشت رأسها بالكلام وقالت لها أني أكلم رجال ماأدري وشلون أكلم رجال وأنا رجلي برجل أمي بكل مكان...؟؟ ولاعندنا نت ذاك الوقت وطبعاً دخلت أمي زي ا لمجنونه أنتي ماتخافين ربك تبين تشوهين سمعتنا تبين تجيبين لي الجلطه حسبي الله عليك ..إلخ طبعاً انفجعت سكت ماقلت شيء وحاولت أفهمها بس ماعطتني فرصه وأنا بعد كان مايهمني أحد مايهمني مهما قالوا قلت لهم ترى ماسويت شيء غلط تصدقون صدقوا ماتبون بكيفكم وخليتهم وبعدين أمي رجعت قالت لي يابنتي خايفه عليكم لاتزعلين وأنا مو قصدي ومن هالكلام وأنا عادي رضيت لأني أدري من خوفها علي ..ومره بخيت عطر بالليل ومن بكره بداوم الصبح بروح للمدرسه راحت الشغاله تقول لأختي أني بخيت جت أختي عندي تقول بتصيرين زانيه ماتخافين الله أنتي تقصد عشان بكره المدرسه خفت لحظتها ورحت أتروش طبعاً بعد مشاده كلاميه قويه حصلت بيننا..وكان أبوي الله يرحمه ويغمد روحه الجنه كل مايجي من دوامه لازم يجيب معه ايسكريم ومشروبات غازيه وعصيرات اخ بس يايبه الله يرحمك فقدتك وطبعاً كنا نشرب ونعطي الشغاله ويوم من الأيام جاب أبوي الله يرحمه عصير منقا وتهاوشنا أنا وأختي ع هالعصير بس مدري ليه مع أنه كان علبه كبيره بس تخلف كل وحده تبي تشرب أول وهواااااااااش جت أمي عطت الشغاله الله يحرم وجهها عن الجنه العصير وكبته بالمغسله وانتهى يومنا وأنا وأختي لنا يومين مانتكلم جاء اليوم الثالث قلت للشغاله خلاص الحين 3 يوم مايجوز لازم أكلم أختي قالت لا عاادي يمكن يجلس شهر شهرين وقامت تضحك .. وطبعاً خلت أخواااني كلهم يزعلون مني وقالت لي أن أختي قالت لهم لايكلموني وكانت هي السبب وكنت أروح لأخواني أقول لهم تكفون كلموني مشتاقه لكم وكانوا يرفضون حنا نكرهك لاتجين عندنا لاتكلمينا اااه بس..وعشت أيامي وحيده تقريباً كانت فتره طويله بالأشهر ماأذكر كم بس مو أقل من 8 شهور وكانت الشغاله تقول لي ترى فلانه اللي هي أختي اللي تهاوشت معها هي السبب ماتخليهم يكلمونك وطبعاً صدقتها وكنت مشتاااااااااقه لأخواني وخواتي تقول لي تبين تكلمينهم قلت لها ايه قالت طيب كل يوم بالليل بخليك تكلمينهم من دون ماتدري أختك وأقابل أخواني بالظلام بالمخزن وأسولف معهم وكانت هي ع بالها تأمن المكان ..

ومره أمي جابت لنا كرتون برينقز كرتون يعني فيه حبات كثيره وبيومين خلص؟؟؟ جت الشغاله نادتني قالت لي تبين برينقز قلت لها ايه قلت من وين لك قالت أنا عندي قلت ايه أبي قالت بعطيك بس بشرط قلت وشو قالت تأكلينها بالحمام وعطتني بيدها وأكلت بالحمام ويومياً ع هالحال ..
ومره أختي الكبيره اللي تهاوشت معها عطت الشغاله المريول قالت لها غسليه وطبعاً أختي كانت تأمرها أمر بزمره يعني يلآ غسليه بسرعه والشغاله هنا حقدت وخلت أخواني اللي مقاطعيني يقاطعونها ولا يكلمونها وجلست أختي وحيده وخلت خواني يكلموني ..
وطبعاً كل ماتقول أمي لها نظفي كانت تعصب وإذا انكسر شيء وقالت لها أمي شيليه ..تشيله بس تحطه بقدر العشاء الله يأخذها وكانت تحط أعواد كبريت وتحط بلاوي شعر وقرف الله يأخذها وكنا نقول يمه قرف عشاءك فيه وسخ وكنا مانأكل من عشاء أمي وكانت تقول لنا ماما يسوي عشاء وسخ مافيه كويس لاتأكلون وكانت أمي ياعمري تعقد وللأن ياعمري تعاني من هالشيء من الشغاله الله يحرمها الراحه..
وكانت الشغاله تسرق من عند أمي فلوس وإذا نامت أمي وأبوي الله يرحمه كانت تقول لي أنا وهي نروح للمخبز ونشتري فطاير وخرابيط ونمر البقاله كانت أسألها من وين فلوس كانت تقول لي أنا عندي وكنت أسكت لأن أمي ماتعطي الشغالات فلوس إلا إذا جو يسافرون ..و نروح للمخبز ونتقضى وكانت تخيرني تبيني أرضى ومره سألني راعي المخبز ليه تجون دااايم بالوقت هذا كانت أقول تو الحفله تبدأ اااااااااااااااااااااااااه ياقلبي ماكنت أدري وشلون بيفهمها لأن الشغاله كانت تسميها حفله وأعطاني نظره ومافرقت معي كنت دايم أجي ونمر البقاله ونشتري مالذ وطاب وطبعاً كله من حساب أمي وأمي ياغافلين لكم الله وع هالحال مده طووووويله ومره أمي كشفتها قالت لي الشغاله سرقت مني فلوس ؟؟ قلت لها لا ماأدري وطبعاً قلت ماأدري لأن الشغاله هددتني ماأعلم أمي..وكان عمي ساكن تحتنا وحنا فوق ومره وحنا راجعين قابلنا ولد عمي مصيييييييبه خفت قلت لها وش نسوي الحين أمي تهاوشنا قالت مافيه خووف الحين هذا مايقدر كلام أنا برسل له أحد يخلي مافيه كلام وقالت لها تقدرين قالت ايه أقدر وانبسطت وارتحت ماكنت أدري وشلون تقدر ..وكنا إذا رجعنا تخلينا نأكل بس تدرون وين نأكل تخلينا نأكل فوق عند الخزان اللي بالسطح الله يأخذها كان شوهت سمعتنا وحنا ماندري وإذا خلصنا أكل تقسم شغل البيت علي أنا وأختي اللي أصغر مني ننظف البيت وننظف الحمام ومانبي نزعلها ليه..؟؟ علشان نبي الخرابيط اللي معها حسبي الله عليها ..وكانت تخلينا نناظر مع الدرايش وكان يشوفون عيال عمي ويعطوننا نظرات ع أننا قليلات حياء كنا نقول لها مانبي نناظر مع الشباك كانت تهاوشنا تقول ناظروا ياويلكم..
وجاء اليوم اللي قررت فيه أراضي أختي وألم شملنا وقالت للشغاله شوفي اليوم بنتراضى وقعدت تصيييييح من قلب لاتراااضون لا ومدري وشو سألتها ليه ماتبين قالت إذا تراضيتوا ماراح تكلموني قلت لها لا والله بنكلمك وبنصير كلنا مع بعض ورفضت وقعدت تصيييييييييييييح وأنا عقلي لحظتها مدري وين كان قلت لها خلاص لاتصيحين بنجرب إذا بعدنا عنك خلينا نتزاعل زي أول أنتي تقدرين كانت هي مفهمتني أنها تقدر تدعي الله أنه يفرقنا لأن دعاءها داايم مقبول وصدقتها وفعلاً تراضينا ولكن.؟ ماقدرنا نكمل شعرنا بضيقه وكتمه كان شعور متعب مررره وقررنا نتزاعل مره ثانيه وللأبد..
ويوم جت بتسافر وهي ترتب شنطتها قالت لي دنيا ممكن يعطي أنتي أنا هيل قلت أنا ماأعرف الهيل قالت يلآ أمشي مخزن أنا وري وين هيل قلت لها يلآ.. ودتني للمخزن وعلمتني مكان الهيل قالت شوفي هذا هيل وعطتني علبه البلاستيك قلت حطي هنا قلت لها أنتي حطي زي ماتبغين قالت لا أبي بيد أنتي وحطيت لها ..وعطتنا أنا وأختي اللي أصغر مني المفتاح حق غرفتها قالت لاتعطون أختكم الكبيره المفتاح وخلوها ماتدخل الغرفه انتبهوا وطبعاً قفلنا الباب وكانت أختي إلا تبي تدخل ورفضنا وصارت ماتدخل غرفتنا اللي هي غرفة الشغاله ولا حنا ندخل غرفتها..
إن شاء الله بكمل لكم معاناتي شوي..
ملاحظة بنات أنا جديده ومشاركاتي بس 3 ..