أم يحيى :

ماشاء الله حلو نظامك .. حنا إذا ضيوفنا من المقربين ويجونا كثير نسوي مثلك طبق رئيسي واحد ..لكن إذا من زمان ما داخلين بيتنا لازم ننوع في الأطباق بس أنا أحاول أسوي الأطباق السهلة اللي تقلل الجهد والوقت واللي اقدر عليها مثل الصواني ، أو الأطباق اللي يكون طبخها على النار فوق الفرن ثم أرتبها في البايركس وأدخلها الفرن تكمل طبخ حتى يكون شكلها حلو بعد التحمير وبنفس الوقت يكون شكلها حلو على البوفيه ..وإذا سمحت الظروف نجيب بعض الأطباق من برى مثل الكباب والمعجنات وأحيانا تشيز كيك لبعد العشاء .. وحتى حلى القهوة إذا ضايقني الوقت أجيبه جاهز ( بعض الناس يقولون تكلف لكن أنا رأيي أن الفلوس اللي بحطها على الخدامة أشتري فيها راحة البال وأشتري هذي الأشياء من برى ) وعشان أحسس ضيوفي أكثر بغلاهم عندي طريقتي هي أن إذا صارت عندهم عزيمة أطبخ لهم بنفسي في بيتي طبق مالح أو حلو وأحيانا الإثنين وآخذه معاي ( وأعطيهم خبر من قبل حتى يكون تنسيق بيننا ويخفف عليهم ) فإذا صارت العزيمة عندي وجبت الأكل من برى يقدّرون ويعرفون اني بسبب ضيق الوقت فقط وليس تقليل من قدرهم أو عدم اهتمام بهم ..طبعا إضافة إلى الأطباق الخفيفة اللي تؤخذ في الزيارات العادية ( أدري فيه بنات بيقولون ماقلت شيء جديد لكن أعرف ايضا في أن بنات يحتاجون هذي الخبرات ) ... الله يعطيك العافية ويقويك يارب .. ومعليش اختي احتسبي الأجر في التنظيف بعدهم ..الوحد مننا إذا تذكرت أنها قامت بالواجب وأدخلت السرور على اقاربها تنسى تعب التنظيف ...والله لا يخيب لنا ولا لك الأجر يارب .. الحمد لله ..أهم شيء ما يكون التكلف في الإستعداد عائق عن استقبال الضيوف ..وجزاك الله خير على المشاركة .. .

ماشاء الله حلو نظامك .. حنا إذا ضيوفنا من المقربين ويجونا كثير نسوي مثلك طبق رئيسي واحد ..لكن إذا...

داقة هاجوس :

، ،، تبين الصدق ياأم يحيى..؟ اللي متعودة على شغالة ماتقدر تستغني عنها حتى لو بيتها شقة وماعندها الا بزر ..! وتستبعد إن أحد يقدر يستغني عنهم ..وممكن تتهمه بأن صاحب التنازلات تفكيره تفكير رجل ..مثل أحد الأخوات هنا ..! واللي ماتعودت عليها - ماشاء الله تبارك الله- تقدر على عزيمة عشاء مركبة وبدون خدم..! بصراحة انا لسى ماتزوجت .. ومن طحت من بطن امي والخدم رايحات جايات .. و أهلي مساعدين في دلالنا كثير .. يعني مايحرصون نشتغل ولا نحط ولا نشيل ..<- بس عاد تراني سنعة واعجبتس .. مع ذلك أنا اتمنى نستغني عنهم .. ودايم أرفع شعار لا للخدم .. بس ..!<-وهنا مربط الفرس .. بس صعب الأنتقال من أقصى الشمال الى اقصى اليمين .. ممكن يسبب نكسة خطيرة .. لذلك دايماً أقول : شجعوا المتزوجات حديثاً على الإعتماد على أنفسهن والإستغناء كلياً عن الخدم .. لأن المسؤليات تبدأ بـ زيادة نفر عن مسؤليتها ثم تكبر شوي شوي ..وتنشأ متعودة على الكرف بدون خدامة .. وبكذا ينشأ لنا جيل بلا خدم ..ومثل مادخلوا الخدم بالتدريج يطلعون بالتدريج .. ومن غير أضرار نفسية ولا جسمية .. وزيادة الزمن يساعد على الإستغناء عنهم .. يعني بدال ماأجيب خدامة بالمبلغ الفلاني .. أصرف المبلغ على قيمة العزايم من برا .. ولو حسبنا تكلفة العزايم وتكلفة الخدامة بتصير الخدامة عن 10 عزايم .. نجي لصلب الموضوع <- ياويلي كل ذا وتونا ندخل بصلب الموضوع؟(هذي أم يحيى ) هالوقت تقدرين تفرزنين* المعجنات واغلب الموالح .. وأيضاً في أنواع للحلى تفرزن ..واللي مايفرزن يسوى في دقايق .. هذي اللي ماشاء الله عليها سنعه و تبي الشغل في البيت ..أو ماعندها احد يجيب من برا او لها ضروفها.. أما اللي تقدر تجيب شيء من برا وعجازة ..الحمدلله السوق مافتح الا لك .. نجي للعشاء .. [1] عزيمة كبيرة XL.. يمدحون البوفيهات الجاهزة .. أصلاً بتبدين على مين والا على مين ..؟ وهذي ميزتها انهم يجيبون أكلهم ويضفونه بعد .. "وهنا أحب اوضح نقطة : بعض المطاعم تأخذ الفائض وترميه ! فيستحسن بك تشيلين الفائض على جنب وتكلمين الجمعية الخيرية" [2] عزيمة كبيرة L.. يمدحون ان الطبق الرئيس من المطعم ..اللي هو الرز .. ويبقى عليك سلطتين + المعجنات اللي من الفريزر + 2 حلى عشاء + فاكهة.. وسفره ماحصلتتس .. لو تلاحظين ترا ماسويتي الا سلطتين وحلى نوعين ..بس..! أو سلطة + صينية "أما خضار أو بطاطس أومكرونة أو + حلى .. [3] عزيمة عادية .. برضو الطبق الرئيسي من المطعم أو أنتِ تسوينه براحتك .. مع نوع سلطه + نوع حلى + فاكهة .. وإذا بغيتي تزودين معجنات من الفريزر الله يعافيك خير وبركة .. .. وشكراً ياأ يحيى على الموضوع ..وأسفةجداً على الإطالة.. بس والله جيتي على الجرج وقلت أقول كل اللي بخاطري .. والله يخلي لك يحيى ويبلغك فيه وتشوفينه عريس وشيخ آآآآآآآد الدونيا .. ــــــــــــــ هامش: تفرزن : اي توضع في الفريزر الى وقت استخدام..وتطلع كأنها طازجة.. وأنا أنصح به وبشدة.. تدرون عاد إن أمي تفرزن " الكشنه "لأخواتي المتزوجات..؟ جربوها وبتدعون لي وتدعو لـ أمي ..

، ،، تبين الصدق ياأم يحيى..؟ اللي متعودة على شغالة ماتقدر تستغني عنها حتى لو بيتها شقة...