أقبلت بالزين ليمونه قومو فزو يابنات
|:| السلام عليكم ورحمة الله وبركاتة |:|
هذا اول موضوع لي في الاسره يعني انا اليوم ضيف ببلط عندكم كم يوم
فالله الله فيني
ما ودي اطول عليكم ندخل في الموضوع على طول لاني ما احب شي اسمه مقدمه دخلت القاعه بعد ما تأكدت من شكلي مليوون مرة في
المرايات الخارجية
خابرة البنات وتعليقاتهن السامجة
" ليمونة ليش كحلتس صايرن علية حادث عسى ماشر"
ولا " وش بلا صبغت/تس كأنتس شابة في شعرتس ضوّ "
الله يرفع ضغطهن يغثن الواحد ما بعد سمى بالرحمن وعيّن من الله خير وارتاح على
كرسيه
المهم جلست على اول كرسي واجهني وصرت اناظر في الحضور و انا شاقه الكشره
مستانسه .. الله يالدنيا وين كنا ووين صرنا .. صرنا نجلس على الكراسي ونحط رجل على
رجل بعد ماكنا نتخذ من الارض مقعداً
<<< تفلسف المره
وان اناظر الموجودين الا تطيح عيني على احد اشبالنا الصغار الذي تخطى مرحلة الطفوله
ودخل مرحله الورعنه والتي تتميز بالشقاوه و الوذى (الاذى) بشكل ملحوووظ
تقريبا كان عمره 4 سنوات واقف على احد الكراسي ويترفع على رجليه اليييييييين ناش
النجّافه (اللمبه) الي كانت فوق كرسيه .. طبعاً النجافه كانت شغّاله..
مسكها بأنامله الرقيقه >> لا تحسبون يده فيها مشق ولا سوداء من الوسخ لا العكس تماماً
فمسكها مسكة الطبيب ويتلّها محولاً اياها الى اشلاء لتتناثر حوله محدثة صوتاً مكتوماً لانفجار شيء ما
<<<< ما قلت لكم تتفلسف
مما جذب نظر الماما بتاعته الي جالسه جنبه .. وعطته نظره ( وش تعتقدون نوع النظره ؟؟ .. تأنيب ! استنكار! ) لا .. كانت النظره نظره اطمئنان ان فلذة كبدها لم يخدش ولم يصاب .. طبعا يوم تأكدت انه سلييييم ميه ميه بغض النظر عن تصرفه الرامبويى
الي ماهمها مثقال ذره.. راحت عنه تكمل سهرتها
الحين توني مستانسه للتغير الي صارلنا وكونّا صرنا اتكيت شوي يجي ذا المفعوص .. عقلة الاصبع ...الي توّ امه فاطمته ويخرب مزاجي
بتصرفه هذا يخليني ارجع سنين ورى حتى تقارنون بنفسكم ماذا كنّا وماذا اصبحنا
من الذاكره ~
ليمونه جالسه في الشارع تأكل بسكوت ( ابو ميزان )
صوره لتنشيط الذاكره //
طبعاً بما ان البسكوت ناشف ولا يحتوي على شوكلاطه فلا يحتاج انها تلحس القرطاسه قبل ماتنطلها(تحذفها _تقطها)
>>>>>>>>يييييييييييييييييعععع ليمونه حالياً
.. والكشه لا تسأل كيف شكلها ... والثوب حدث ولا حرج والله لا توقفه ان يوقف لحاله من الوسخ الي ميبسه <<<< الظاهر انّا رجعنا ورى جدّا انسوا انسوا الي قريتوه
لا نرجع للوراء قبل ماندخل قصور الافراح واوريكم كيف كانت عروسنا (زواجاتنا) .. او الحفلات التنكريه ان صح التعبير لأنّا نلبس براقع ..
||
1- المكان / سطح بيت المعرس اما اذا كان سطحه صغير فسطح اهله
وعلى حوافه دار مادار الشراع الازرق عشان ما احد يكشفنا
>>>> وش حادكم ..؟
وش حادنا!!! ....علشان غزلانا ما ينكشفن من قبل الملاحيدز الي يترززون على السطوح يبون يلقطون أي شيء حتى لو كانت شيله عجوزن مطيرها الهواء
2- المفروشات / زوالي طالبينها من حقين الافراح .
3- اكسسوارات الاضاءه / عقد من اللمبات البرتقاليه حاطينه فوق روسنا على شكل علامة اكس وكبس على الخزان وجوده زي عدمه من كثر مايطفونه عصافيرنا المؤدبين
4- المشروبات / نتكلم عن الماء اولاً : عباره عن قدر ذبيحه مالينه ماء وفوق طباقته سحال غضار صغار للي يبي يشرب منه .. وذا القدر بنفسه سالفه .. ياما وياما طاحن فيه بنيّنا(بناتنا)ونسوانا .. وهن يحاولن يركبن فوقه علشان يقدرن يعاينن الميدان و يشوفن الراقصه وهي تهز خصرها يمنتن ويسره وذا طبعاً من الشفاح الي فيهن .. وأحدى الي طاحن مرة اخوي
وتبون الصراحه الحمد الله انا تخلينا عنه عشان البزارين ما يغرقون فيه اذا بغى احدن منهم رشفة ماء .. ثمن تطورنا شوي وحطينا تانكي (خزان) مويه وفوقه سحال قياس ثمانيه وعشرين عشان تكفي وحده ما نضطر إنا نروح ونرجع
والحين في زمن الطفره تطورنا وجبنا كراتين ماء نجران كاسات
5- البوفيه / الي كان ما نعرف منه إلا اسمه .. بس بوفيهنا غيييييييييييير وخروا عنه بس ..
نبذه عن اور بوفيه ..
صحون بلاستيك نحط فيها حبتين بيتزا وحبتين فطاير جبن وحبتين ورق عنب
هاه وش رايكم ؟؟ .. دسم صح
واذا جاء التوزيع من يوم تقبل الصبابة بالمعجنات والبزارين مثل الذبان عليها ما هوب شفاح فيهم .. مانيب ازكيهم كلهم .. بس كذا عادتن شينه فيهم يأخذون الاكل ويحذفونه و يلعبون فيه (الله يعز النعمه) اما المشروبات الغازيه فيخرقونها من النص
بعد ضربها على بلكه او على حديده وينثرونه على بعضهم .. اما ان كنتي محظوظه تحصلين شيء من الصحون فيكون بعض الاكل الي فيها ما كول نصه ومردود او انه مفغص ليييين قال بس
6- كيفيه التوزيع / الحريم يكونون جالسين على الارض في شكل حلقات دائريه محاوطه الميدان فإذا جاء وقت التوزيع يكون من الصعب انتس تخطينهم بسهوله لان بعضهن مرقدتن ورعها عند رجليها ولاّ الي ممدتن رجليها وما تبينا نتوطاها .. علشان كذا واجهتنا مشكله كيف نوصل للباقين كيف حليناها ؟!
اليكم الحل :
نأخذ صحون المعجنات والحلاو (الملبّس) و قواطي البيبسي وكراتين العصيرات ونحذفها على الي ما نقدر نوصل لهن
<<< تخيلوا المشروبات الغازيه تتحذف !!
الي تصقعها في علباها (مؤخرة رقبتها ) والي تستقر على جبهتها و الي توقع في حضنها مباشره مع اضرار قليله
<<< ليت الله ولا عيشتكم مانبي منكم شيء
اما بالنسبه للمشروبات الحاّره مثل الشاهي والقهوه
>>> هذي طبعاً ما نقدر نحذفها مالقينا لها حل
بس نحطها في زاويه معينه من السطح طبعاً هي في زمازم وطوافيرها عندها ببيالاتها وفناجينها
ولكن .. !
هناك من لن يتركها سليمه .. اكييييييييييد عرفتوهم ..
بذكر لكم ما تعانيه البيلات والفناجيل :
مره وانا اتابع راقصات البوب قدامي إلا اسمع قربعه وراي فألتفت اشوف وش السالفة لقيته واحد من بزورتنا الحلوين طايح في الطوفريه وخرب المعاميل
أثاريه المملوح قاعد يلعب حبشه مع اقرانه وماسك الرضاعه في زغنه(ابطه) السيد ماعنده وقت يقعد يرضعها
7- العشاء / عباره عن صحون ذبايح ترقى للنسوان فوق السطح
<<< لا تسألون من يرقيها فوق لان الشباب في صراع من بيوديها للنسوان ويظفر بالنظر للحريم والتمخطر قدامهن
طبعاً يفوز الاقرب صله للمعرس
8- اللبس واللوك / طبعاً كنّا نلبس ثياب الكم يوصل ليييين بدايه الكف وياويلها من كان كمها شفاف او اقصر من كذا ... وسيرتها تبقى على كل لسان عند الرجاجيل والعجز الله يصلحهن هن الي يخربن علينا دايماً اذا نوينا بس نتهور .. والوان الثياب لازم انها تكون غامقه حتى ما نتشبه بالرجاجيل
<<< شفتوا تفكيرهم
وشرطن في الثوب يكون وسيع و عيب تلبس الوحده ثوبن ضيق ولا يوصف جسمها هذا شين منقود عندنا .. ودلعّة الثوب (فتحه الصدر) تكون على شكل رقم 7 ولا تظهر الوحده اكثر من كذا .. والاّ تعرف وش رح يصير لها من تهورها اذا حاولت التمرد على الزي ..
والكحل ذاك القلم الناشف ابو ريال الاصيفر تكحل به الوحده داخل عينها ويكفي كذا ولا ننسى الديرمه السحريه الخضراء او ذيك الحمره الصغيره السوداء ولونها كان احمر الي ماتنمسح الين تموت الوحده .. والشعر ماله حيله .. الي شعرها ناعم محظوظه اما من كان شعرها جعد فتقعد بها
9- حلبه الرقص / سبق وقلت ان الحريم يتجمعون على شكل دائره محاوطين الميدان متزعم الحلبه الطقاقات وبجنبهن العجز .. عجزنا الله يطول باعمارهن
<<< قولوا آمين
وطبعاً العجز قريبات من الميدان حتى يشوفن زين ويبرقن وينقدن متعذرات بضعف نظرهن حتى يجن قريب منه
10- هويه الراقصات / هن حسب قربهن او بعدهن عن اهل العرس .. بس بوجه عام من جاء في خاطرها انها تهز وسطها فحياها والميدان لها .. اما الي ما لها خاطر تنتفض في الميدان ف:: ألخلا ::
يعني (سوقيها) وصفّي من ضمن المتغترات او الجالسات واتخذي لتس مقعد .. وانتظري الغارات الجويه الي بتجيتس
11- استرتيجية الرقص / على الراغبات بالرقص يتوجهن الى رئيسه الفرقه وتقدم لها اوراقها .. أأأأأأأأ .. قصدي بياناتها الشخصيه النيم بتاعها والفاميلي الي تنتمي لها .. فتتقدم قائله : أنا فلانه بنت فلان .. ليه ؟! .. حتى يغنن فيها وفي عائلتها في حين هي تقدم ما لديها من مهارات في الحلبه
هذا إن لم يكن للراقصه ضره فهذا بحد ذاته مشهد اكشن
اول ماتهز الوسط ماتشوفون غير ذا التشجيع من اقاربها
وهي ما تقصر من ابداء بعض الحركات الاستفزازيه واللااخلاقيه بيديها وذلك حتى تحّر الجاره التي تنقل بصرها على كل شيء واي شيء ما عدى الميدان وتجاهل من بداخله
/
\
/
\
/
\
عوده للواقع :
+ ليمونه
+ليموووونه وصمخ .. ليموووووووووووونه و وجعّ ..
- هاه..
+ هويتي وفي النار دويتي .. قد لي ساعتن احاكيتس وانتي منتيب حولي ...
- من متى وانتي جالسه معي ؟
+ لااااااا البنت رايحتن في يدها .. امشي خلينا نروح للبنات
.. قعدت اطالع حصه وهي تتكلم ..
المكياج مزين عند افضل واحسن الكوفيرات واغلاهن .. والشعر آخر صيحات الموضه من لون , وقصه , وخلافه
والفستان من اغلى الفساتين وعند المصمم الفلاني ومتخسره فيه الشيء الفلاني ..
سيور بسيطه على الاكتاف والظهر ثلاثه ارباعه ظاهر ان ما كان كله والفستان ضيق عليها وكأنه صمم خصيصاً لها .. والفتحه الين بداية الركبه .. يعني مدري وش خشت السنافيه
ومهيب هيّ لحالها بعض الموجودات نفس الشيء والبعض الاخر نقول عنه اكثر ستراً بالمقارنه معهن .. والقله القليله ينظرن بنقد مع استنكار لفعل سالفات الذكر
<<< تراني مانيب من ذولي لا احد يحسبني منهن
~
بعضكم يتسائل وين عجزنا من لبسنا ولوكنا ؟! ووين أهلنا ؟!
* البعض منهم مايبي يكسر بخاطر اخر العنقود ويفشلها عند اقرانها ويجبرها على لبس شيء ماتبيه ويجي في نفسها ويجي شكلها بلدي على قولتها عند الاخريات.
* والبعض الاخر اعمى اصم من اقربائه بس على الاخريات مايخلي شيء الا يقوله
ويفضحها.
* اما الرجال بعضهم مايدري ماذا يلبسن محارمه ويهببن داخل القصور لأن لبسهن اخر مايشغله .. وهناك العكس تماماً من هؤلاء حيث انه لازم يشوف وش لابسات وياويلهن لو حطن مكياج لانه يكره شيء اسمه ماكياج
<<< لانه حسب اعتقاده تغيير لخلقة الله
والله انه على نياته ولا شاف من المنكر شيء .. لذلك يلقن اهله عقده كل زواج ولازم تخطيطات كيف يتخطون الجمارك بكل يسر وسهوله
والبعض يعزو هذا الشيء الى الحريه الشخصيه ويجعلها تلهو وتمرح على كيفها .. أما انصاف الرجال الذي ليس له كلمه عليهن بل تفعل ماتريد هي وما تراه مناسب اما هو فآخر من يتكلم
من خلال هذا الموضوع حبيت اسلط الضوء على امور وعادات سلبيه تحصل :.
اولاً / أن التطور والتقدم ليس شرطا او اقول عذراً لكي نضرب بتعاااليم الدين عرض الحائط و ليس سبباً لكي نعلق اخطائنا على شماعته
فترى الواحده تلبس الفستان العاري وتغير من شكلها من نمص وقص .. قصات ما ادري كيف شكلها هذا غير العمليات اليّ طاحوا فيها الحين
تحت مسمى التقدم والتطور .. اذا حاولت تكلم وحده او تنصحها ترد عليك " وينك عايشه فيه؟! هذا ياعمري الموضه "
هل لأني بلباس ساتر وبدون تخفيف للحواجب او نمصها اصبحت بلدي !
هل لاني احرم ما حرم الله ورسوله واستنكره اصبحت بلدي .. عجباًعلى هكذا زمن لا لن اقول زمن .. هذه احد حجج اصحاب هذا الزمان الواهيه .. يفعلون المنكر ويقولون العتب على الزمن .. بل انا مع قول الامام الشافعي (ان لم تخني الذاكره) :
نعيب زماننا والعيب فينا ×× وما لزماننا عيب سوانا
ثانياً / ماذا تعني التربيه في هذا الزمان ؟ او اقول بمنظورها الحديث لدينا..
هل يعني ان على الام و الاب توفير المأكل والمشرب والملبس ؟! هذا ليس كل شيء .. اي نعم ان هذا من الضروريات ولا نختلف على هذا .. لكنهم تناسوا اهم شيء واعظم شيء في التنشئه .. الا وهو التربيه
تعلم الابن او الابنه الصح من الخطأ والجيد من الرديء و الصالح من الطالح او الفاسد
التغاضي عن تصرفاتهم وابداء الامبالاه ازاءها .. هذا اكبر غلط
ثالثاً / التكلف في الماكولات والمشروبات وخلافه في الزواجات .. التي غالبا مصيرها الى سله القمامه
رابعاً / التكلف في اللبس والاعداد للحفله
تجد الفتيات يبتاعن الفستان بتلك القيمه .. هذا غير الكوفيره .. والاكسسوارات والعطورات والجزم اعزكم الله
_ ولو سألتها كم مئه او نقول مبلغ معين لتتصدق به او لتكفل به يتيما وتربح مجاورة النبي صلى الله عليه وسلم في الجنه لتكاثرته وعزّ عليها انفاقه اما لو وجدت اصبع روج بمئتين او اكثر من احد الماركات العالميه لانفقته وهي مغمضة العينين حتى انها لم تفكر مرتين ! هي والله الخاسره
خامساً / احب ان اقول على الرغم من البساطه في المأكل والملبس الذي كنّا نتميز به في الماضي .. إلا انه والله ثم والله ثم والله اجمل ايام واحلى ليال قد مرت علينا او سوف تمر .. كان أي شيء نحصل عليه نفرح فيه وننبسط به .. الحين نحصل كل شيء وحنا جالسين في اماكنا لذلك مانستمتع به .. لانه جاء جاهز مجهز.. علشان كذا تناظر بزارين هالأيام مايعجبهم العجب ولا الصيام في رجب .. على قولة المثل .. تحسهم ماينبسطون بأي شيء نشتريه لهم .. حتى تحسهم ما يعيشون طفولتهم ..
| نقطه خارج السطر |
موضوع لا يخلو من المبالغه وشيء بسيط من تشويه بعض الحقائق الغير مهمه ..
قد اكون سلطت الضوء على النساء فقط واهملت الرجال .. وهذا بديهي لاني انتمي اليهن ..
ربما تحول الموضوع الى خطبه دينيه في الاخر .. هي ليست خطبه بالمعنى الصحيح ولكنها وقفه بسيطه لكي ننهض على اثرها من ما نحن فيه
عارفه اني تخبطت بين الفصحى والعاميه وهذا علشاني اعشق الفصحى ولكن العاميه تأبى إلا ان تفرض وجودها .. فاستروا ما واجهتوا
رأيك يهمني أخي / أختي القارئ / ة .. فلا تبخل علي به
|| :.
وش احسن ماسكارا ابي رايكم :
كلارنس or ديور or لانكوم
الأمانه منقول
11
1K
يلزم عليك تسجيل الدخول أولًا لكتابة تعليق.
أسيرة الامس
•
جزاك اله الف خير موضضضضضضضضضضضضووووووووووووع حلو,,,,,,,,,,,,,
شقآوه
•
يسلموووو معناااتي ماقريت لانه طويل بس ماحبيت اطلع وانا ماتركت اثريسلموووو معناااتي ماقريت لانه طويل بس ماحبيت اطلع وانا ماتركت اثر
اولآ حياك بين اخواتك
ثانيآ الموضوووووع مره حلو
ثالثآ يسلموووو ياعسسسسسسل
:26::26::26::26:
ثانيآ الموضوووووع مره حلو
ثالثآ يسلموووو ياعسسسسسسل
:26::26::26::26:
الصفحة الأخيرة