أنا عايشة في عذاب ونار

الأخوات العزيزات

أنا أول مرة أكتب في هذا المنتدى واللي بصراحة يعتبر من أفضل وأروع المنتديات إللي تصفحتها في الانترنت .
وأنا عندي مشكلة وايد وايد مؤرقتني وما اتخليني أنام الليل من الخوف .
أنا إتزوجت واحد أصغر مني بست سنين وكان زوجي مدمن ويشرب الخمر وأنا وأعوذ بالله من كلمة أنا وقفت وياه وساعدته كثير كثير والله على ما أقول شهيد ، المهم إتزوجنا وأنا وفرت عليه كثير في مصاريف الزواج ، وأنا للحين بعدني أصرف عليه وهو حاليا بصدد إنه يدور على شغل لأنه قبل كان يشتغل مع أبوه في التجارة وخسروا ( الله لا اعتراض ) علشان هذا السبب إتعاطى زوجي وكانت حالته حالة . المهم أنا مب مقصرة معاه في أي شي ولكن زوجي للحين يشرب وأنا خايفة عليه إنه يرد يتعاطى مرة ثانية لأن أهله دايما يعايرونه بإنه كان مدمن ومن فترة زوجي قام يصلي ولكنه ترك الصلاة ما أعرف ليش ؟؟؟؟؟؟؟؟؟؟؟؟؟؟
وأنا دايما أقول له صلي واذكر ربك ويرد عليه ( الله كريم ) وان شاء الله يصير خير .
في بعض الأوقات ما يكون عندي أنا وزوجي أي فلوس فاضطر إني أبيع أي شي من أغراضي علشان إنكمل باقي الشهر لين ما ينزل راتبي ، بس والله العظيم إن زوجي كثير يحبني بس ظروفه الصعبة هي إللي إتخليه أحيانا يتصرف تصرفات غير طبيعية .
ونحن صار لنا متزوجين خمسة شهور ولين الحين ما حملت والحمدلله على كل شي .
بس قولوا لي وردوا عليه كيف أتعامل مع زوجي وما أخليه يرد لطريق الإدمان مرة ثانية .
وتسلمون .