وعد.. @oaad_36

عضوة فعالة

أنثى جَميلَه { أبدَعَ الخآلِقُ صُنعهآ } ~

السلام عليكم ..

حبيباتي جيتكم اليوم بحاجه في خاطري باقولها وياليت اقدر افتح راس كل وحده وادخل فيه هالكلام ..
لازم تستوعبونه تمام ..

باتكلم عن اهتمامنا يالبنات .. واللي صار عندنا هوس اهتمام
بالبدايه مافيه بنت مو حلوه كل بنت هي اللي تبرز الجمال بنفسها..

عدم التوحد اللي تعانين منه هو اهمالك حبيبتي .. لازم تصحين وتتغيرين
لا تظربين أبر وتنفخين وتشدين .. او تستخدمين كيميائيات
خليك على الطبيعه اللي خلقك ربي عليها

طيب بتقولين الان طاح الفاس بالراس وصارت تصبغات ومشاكل ايش اسوي الان !!
تعالى معاي نبدأ خطوه بخطوه

جيبي ورقه وقلم واكتبي كل مشكله تعانين منها
ابدأي بالترتيب مثلا :
شعرك / متقصف وجاف ومو صحي او ينفش او اي مشكله تعانين منها
وجهك / ( اكتبي مشاكل وجهك )
جسمك / ركب واكواع ومناطق سمراء - مفاصل اصابع سمراء - حبوب .. واي شيء تعانين منه

الان انتهينا من المشاكل
تبدأ مهمه البحث

حبيبتي انتي لازم تحبين نفسك وتتدلليها , مو عشان زوج او غيره , عشانك انتي .. عشان رربي جميل يحب الجمال .. فانتي تتجملين حتى تكونين سعيده وتفتحين نفس كل من شافك
وكل ما شفتي نفسك بالمرايا تنبسطين ..

غمضي عيونك وتخيلي شكلك تغيرتي ووصلتي للمرحله اللي انتي تبينها ,, مو حاجه سعيده !!
الى متى والزوجه تخاف على زوجها من البنات .. ليه ما تكون واثقه بنفسها وبجمالها اللي اعطاها ربي
وعلى فكره حبيباتي ترا الزوج يحب الزوجه الواثقه من نفسها ..

استعيني بالله وابدأي ابحثي عن حل لكل نقطه ابدأي بالترتيب .. ودوني عندك بورقه ( انا مخصصه دفتره اكتب فيه مشاكل وحلول لعنايتي ومشترياتي وكل شيء )

خلاص بحثتي !
الان حددي ايش راح تستخدمين

الان احسبي ميزانيتك ( وحددي مبلغ معقول )
انا عن نفسي ما احتجت مبلغ كثير لان من كثر ما احوس بالخلطات لقيت كل شيء عندي عدا اشياء بسيطه ههههههه

بعدها دوني بورقه صغيره الاشياء اللي مو موجوده عندك اكتبي العدد اللي تحتاجينه
مثلا ملح الحليب حبتين
سنفرة كاب حبه وحده
وهكذا ...

انزلي للسوق واشتريها .. او اطلبيهم من تاجره او وصي احد يجيبها لك ..
( للمعلوميه ترا انا وحده ما انزل للسوق كثير يمكن بالصيف مرتين الى ثلاث ) لكن حددت الاشياء اللي ابيها ورحت شريتها واشياء طلبتها ..)

والان بسم الله تبدين تشتغلين على نفسك
بالجدول اللي سويتيه

خلي الكسل على جنب وحطي نفسك قدام خيارين لا ثاث لهما ( اما انك ترضين بعدم توحد لونك وعدم جمال شعرك اذ كان عاجبك اهمالك ) او ( انك تشدين حيلك وتهتمين بنفسك لحد ما توصلين للنتيجه اللي تبينها )

مافيه شيء مستحيل ابدا
كل شيء مالي السوق بس الكسل مجننا
لازم نشد على ايدين بعض . احنا خوات كلنا لبعضنا
من الان ابدأي اشتغلي على نفسك وانتبهي تغفلين عن طاعة ربك ...
وادعي ايوه ادعي .. الدعاء سلاح قوي وش يمنعك .. ممكن ربي يطيحك على خلطه تكون هي سبب جمالك ..

بعدين حبيبات قلبي جمالك بملامحك .. صحيح البياض شيء مرغوب عند الاغلب
لكن ترا فيه بعض الملامح اذا تخيلتي البنت بيضا بنفس ملامحها ما تكون جميله حلاتها بلونها
الاهم مو البياض ..
الاهم النظاره وتكون بشرتك صحيه
انا من المناصرين للطبيعه لكن ابتعد عن الاكل
ما احب استخدم ( رز او حليب ) مع اني كنت استخدمها قبل
تركتها لوجه الله وقلت ربي بيعوضني وبييسر لي خلطه تنفعني اكثر من هالاشياء
( حاجه بنفسي فقط ) لكن استخدم مثلا زيت او عصير ليمون
صحيح اتعب شويات ( ابشر صوابين وخرابيط ومدري ايش ) لكن اقول لنفسي ماعليه اتعب فتره لحد ما اوصل للنتيجه اللي ترضيني وبعدها تكون عنايتي بسسيطه ..
واصبري واقهري الكسل اللي فيك ..
وخليك قد التحدي ..

يالله خلونا ندخل التحدي ونثبت للكل اننا نستطيع ان نوصل لقمة الجمال ..
لا تملين .. بتجربين وتكونين فار تجارب وبتتعبين حبتين بس بالنهايه بتحصلين النتيجه اللي تبينها ..

يالله يابنات لابد نتغير ونطرد الكسل ..
ادخلي التحدي واثبتي للكل ان انتي لك رب خلق لك عيون جميله وانف حلو وملامح ناعمه
خلقك وأبدع في صنعك ..

يالله استعيني بربك وادخي السباق وماراح نوقف الا لين نحصل نتيجه حلى لو كانت بعد سنه ..
خلي الكريمات .. وخذي خلطات طبيعيه وابدأي اشتغلي لان هذا أفضل لك ..

وقفه " ابتسم , تفاءل , وكن أنت التغيير الذي تحب أن يكون في العالم "

يلزم عليك تسجيل الدخول أولًا لكتابة تعليق.

تسجيل دخول

حواء مودرن • 9 سنوات

الله يسعد ايامك كلامك عين العقل

بس حالنا صرنا مثل فار التجارب ما خلينا شي ما جربناه الغالي والرخيص

موضوعك حلو خصوصا تحديد المشكله في ورقه احس تحمست معاك

تماضر55 • 9 سنوات

يسعدنى انى اول من يرد على موظوعك و فعلا مامجنا غير الكسل لونترك الكسل لكان صرنا ملكات جمال الكون انا اشوف بنات فى المجتمع كثير ملا محهن مهى حلوة بس سبحان الله عنايتهن بانفسهن ونظافتهن
والاتيكيت وثقتهن بانفسهن مطلعة لهن طابع ثانى ماتغظين النظر عنهن

سبحان الله وبحمدة , سبحان الله العظيم

ناعمه القصيم • 9 سنوات

من جددد ماحب البنت تهتم لاقرب زواجها تتوتر من مشاكل بشرته ونفسيته تتعب زياده
وفوق هذا تجرب اشياء الناس تمدحه لكن هي ماراح تناسبه وتخرب بشرته زياده لازم كل وحده تعرف ايش يناسبه
مثلا كريم 21. احبه مررا لكن اختي يسمرره
ونفس الشي اختي تحب منتجات سيباميد انا اكره ولا تناسبني

وعنايه البنات حلو تكون بسيطه لكن مع الاستمرار تعطي نتايج جميله ولا تزيد مشاكل البشره
يعني تقشير كل اسبوع مع ترطيب <~نتايييييججج جممممممميله مرررررره مرره
اثار الحبوب وغيره تراه تروح مع الزيوت والتقشير لكن يبي له اربع شهور تقريبا

حلو تهتم الحين لانه تكون ماتبي نتايج سريعه
وبالنسبه لي اشوف وحده ملامحه عاديه لكن بشرته حلوه ولا هالات ولا بقع ولا سواد مفاصل احسن من اشوف وحده ملامحه حلوه لكن الشعر متقصف وهالات واشياء تدفن جماله

وعد.. • 9 سنوات

حواء مودرن :

الله يسعد ايامك كلامك عين العقل بس حالنا صرنا مثل فار التجارب ما خلينا شي ما جربناه الغالي والرخيص موضوعك حلو خصوصا تحديد المشكله في ورقه احس تحمست معاك

الله يسعد ايامك كلامك عين العقل بس حالنا صرنا مثل فار التجارب ما خلينا شي ما جربناه الغالي...

ويسعدك ياعسل ..
تسلمين

كلنا صرنا فئران تجارب .. لا يهمك وش صرتي الاهم صار عندك خبره من كثر التجارب
والان انتي تقدرين تحددين اللي ينفع لك او لا

يحلي ايامك يارب ..
يالله سوي الطريقه واطرحي مشكلتك ممكن نقدر نساعدك
وعقبال ما تكتبين لنا موضوع ( صرت جميله ) يارب

نورتي

وعد.. • 9 سنوات

تماضر55 :

يسعدنى انى اول من يرد على موظوعك و فعلا مامجنا غير الكسل لونترك الكسل لكان صرنا ملكات جمال الكون انا اشوف بنات فى المجتمع كثير ملا محهن مهى حلوة بس سبحان الله عنايتهن بانفسهن ونظافتهن والاتيكيت وثقتهن بانفسهن مطلعة لهن طابع ثانى ماتغظين النظر عنهن سبحان الله وبحمدة , سبحان الله العظيم

يسعدنى انى اول من يرد على موظوعك و فعلا مامجنا غير الكسل لونترك الكسل لكان صرنا ملكات جمال الكون...

طبعا الثقه والذوق والادب والاتكيت لهم دووووور كبير
يالله شدي حيلك وبانتظار تجاربك الناجحه ياحلوه
اسعدني مرورك