أهداء الى كل بنت اماراتيه من جنة أرض بابا زايد ( الله يرحمه )

خذوني .. و اتركوا ناجي قصيدة للشاعر ساقي الشوق
خذوني .. و اتركوا ناجي

للشاعر ساقي الشوق ..




وطن ضايع .. شعب يبكي .. مسحنا دمعـة عيونـه
فزعنا له .. وفا و اخلاص .. و كنا اكثر مْن اخوان

بعد رب الملا صرنـا علـى غـدر الزمـن عونـه
فتحنـا قلبنـا دار .. و لقـا فـي دارنـا احضـان

شعب عالواجب تربـى .. و مـن يومـه تعرفونـه
و من ينسى فضل زايد .. و بعده فضل بو سلطـان

غريبه كيف كـف ٍ جـاد بعـد خيـره تعضونـه !
و هل هذا جزا المعروف ؟ هل هذا جزا الإحسان ؟؟!!

غريبه كيـف مـن يقصـد بكـم خيـر ٍ تجازونـه
بفعل ٍ ما لقينا لـه اسـم لايـق سـوا النكـران !

عطوني لْفعلكم تبريـر .. ابعـرف وش تسمونـه ؟
جهاد ٍ كيف يا عالم ؟ ولا يحمـل شيـم شجعـان ؟

شجاعتكـم دفنتوهـا فـي امـس اللـي تهابـونـه
عن اللي كان فـي عهـده يقلـد هتلـر الألمـان !

و جيتوا اليـوم عالطاهـر .. تعاونتـوا تخطْفونـه
بعد ما علّقـت امـه لعرسـه زينـه عالجـدران ؟

كسرتـوا قلبهـا الليـن .. حـرام اللـي تسوونـه
حرمتوها فرح ليلة زفـاف اغلـى و اعـز انسـان

حـرام الشيـب فـي بيتـه بعـد فرحـه تبكـونـه
حرام امه تشـق الجيـب و ينـزل دمعهـا وديـان

خذوني و اتركوا ناجـي الخميـس الجـاي يزفونـه
و تنزل دمعـة الفرحـه و نمسـح دمعـة الأحـزان

ترى امه ما تذوق الزاد .. و تقضي الليل محزونـه
مـا تـدري اذا مـرتـاح ولا يشتـكـي تعـبـان

ولا تــدري اذا كنـتـوا تغـدونـه و تعشـونـه
ولا تدري اذا ف يومه يلاقـي المـاي اذا عطشـان

علمنـا يعطّـر الدنيـا اذا رفـرف علـى هـونـه
سـلام و خيـر يتغنـى و تشهـد للعلـم الــوان

شعبنا يرفعه عالي و من اقصـى الكـون يشوفونـه
حمامة سلم من يومـه ولا عـاون علـى العـدوان

عسـى الله لا يسامحـكـم اذا بكلـمـه تهينـونـه
اماراتي ولـد زايـد عزيـز و مـا انولـد ينهـان

عسـى الله لا يسامحكـم اذا بلمـسـه تضـرونـه
اماراتـي ولـد زايـد قـوي البـاس و الإيـمـان

ترى رب السما يغضب علـى اللـي مـا يخافونـه
و لكـن رحمتـه فيهـا كثيـر ابـواب للغـفـران

اذا كـان الأسـر غلطـه .. نناشـدكـم تفكـونـه
ترى ما فاتت التوبـه .. ولكـن وقتهـا قـد حـان

و اذا كـان الهـدف خطـه وراهـا شـي ترجونـه
ولا تتنفـذ و تنجـح سـوا بالجهـل و العصـيـان

خذوني و اتركوا ناجـي الخميـس الجـاي يزفونـه
خذوني .. كلمة ٍ جابت قصيـده ( كلهـا عنـوان )