إحترت بين الصح والغلط وهالبنتين بيخبلوني

غير عن الإحراجات ورمي الكلام البايخ من بعض الحريم الغير عرب لما يقولولي روحي كلمي أهلج يدورولج زوج شو تنتظرين إختاري الشخص المناسب وروحي كلمي أهلج يكلمونه نخيلوا!! وأرجع البيت وأنا دموعي تنزل وأقول يارب إرزقني بالزوج الصالح إللي بيكفيني شر هالناس وكلامهم الجارج..تخيلوا قبل فتره نفس هالحرمه في العمل تقول حق واحد مب متزوج وافد من نفس عمري..إنت شو تنتظر ما تزوجت لين أحين؟ متى بتلحق تيبلك عيال لما بتصير شايب!! تخيلوا كل هذا جدامي وأنا قلبي يتقطع من الجرح المهم هاذا مب موضوعي أحين بس كنت أبغي أتكلم عن معاناتي .أنا .قبل فتره كنت على ذنب كبير عن طريق التيلفون وكنت أحسب إني بلقى لي زوج بهاي الطريقه..وربي تاب عليه إن عطاني علامه إني لازم أوقف هالشي لما إتدمرت حياتي وانا كتبت قبل موضوع قصتي الفظيعه وإنحذف.. وأنا فعلا وقفت ورميت كل شي وقاومت الإثم، مع إني أستغفر الله العظيم أواجه وسوسة الشيطان كل فتره يخليني أفكر أرجع لها الشي بسبب إحساسي الفظيع بالوحده والفراغ العاطفي بعد ما كان في حد في حياتي ...

عندي 2 صديقات ماقدر أقول إنهم مقربات وايد لي بس اشوفهم وأتعامل وياهم يوميا بحكم العمل ..إثنيناتهم إنخطبوا هالسنه وأنا باركتلهم ومافي نيتي أي شي ضدهم ولا حاسدتنهم.بس هالبنتين ما يوقفون من الكلام فالموبايل والسماعه 24 ساعه في إذنهم وأنا هالشي تاعبني نفسيا والله أحس نفسي غلط بينهم مثل الوحيده مثل اليتيمه إللي مالها حد في هالدنيا وهم كل شوي في التيلفون ما يوقفون..سألتهم إنتوا خطبه ولا ملكه؟ قالولي لا نحن بس خطوبه ومافي شي رسمي بيننا لين أحين بس خطابنا راحوا وكلموا أهلنا وعطوهم الموافقه خلاص..قلتلهم حسب علمي إن هالشي ما يجوز إنكم تكلمونهم فالتيلفون ومافي شي بينكم..قالوا لا عادي..أنا سكت..بعد فتره لا حظت وحده منهم تطلع مع خطيبها بالسياره تقريبا يوميا وأهلها مايعرفون..قلتلها ما يصير هالشي دام إن مافي عقد شرعي بينكم ومحرد إنه ياكم البيت مب معناه إن صار زوجج عشان تطلعين معاه..تقول عادي ترانا في النهايه بنتزوج..الثانيه نفس الشي تكلمه كأن زوجها يعني تقوله كل تحركانها أنا رايحه المكان الفلاني وجالسه في ا لمكان الفلاني وكل شي تقوله له وأيضا يشوفون بعض من بعيد ما بغيت أتكلم أكثر عشان لا يقولون تغار منا..المهم أنا كان في بالي سؤال معين قلت بسألهم كيف إنخطبوا يمكن في طريقه معينه لاني تعبت نفسيا وأبغي أنخطب وأستر على نفسي وأتوب من الإثم وسوسة الشيطان إللي كل يوم أعاني منها...سألت الأولي كيف إنخطبتي صدمتني بجوابها..قالت إنا إنخطبت في حفله كنت سهرانه وشافني وعلى طول ياني خطبني بعد أقل من شهر!! معقول هالشي؟؟ الثانيه سألتها كيف إنخطبتي قالت لي نفس الشي كنت في دوره دراسيه مختلطه فالمعهد وشافني وخطبني على طول بعد شهر ولو تشوفون كيف متمسكين فيهم مشاالله أنا مب قصدي أحسدهم ولا في نيتي شي..لكن يا بنات والله تعبت مب عارفه شو الصح وشو الغلط شو لازم أسوي يعني؟؟ هل أروح أتعرف وأسوي نفس الشي؟؟ ماعرف شو أسوي بنفسي أخاف يصير في عقلي شي ..قمت أدخل مواقع المحادثه وأقول سبحان الله يمكن ألقا لي شخص يبغي يرتبط وأرجع مره ثانيا أسكر هالمواقع وأقول لالالالالالالا مابسوي هالشي خلاص..وأتوب يومين وأرد أدخل!! والله خايفه يا بنات يمر الوقت وأقول لنفسي خلني أتحرك خلني اسوي لنفسي شي يمكن حد يتقدم لي...وفي النهايه أقول لا هالشي غلط ما بسويه..بس أستغفر الله لما أشوف هالبنتين ترجع هالأفكار تيني مره ثانيه..ياربي مب عارفه شو الصح وشو الغلط؟؟ هل أيلس ساكته ماتحرك أنتظر نصيبي ولا أسوي شي؟؟ أخاف يمر الوقت ويضيع .. تعبت نفسيا شوروا عليه لاني لا عارفه أركز لا في شغل ولا في دراسه من هالفراغ العاطفي إل أنا عايشتنه ..