عزيزتي شموخ الصبر .. اسمك حلو كثير ..

آنا معاك في اللي قلتيه .. لكن ما يكفي ان يقعد الانسان مع نفسه في بداية المشكلة بس .. لان ممكن يكون تحت تأثير صدمة .. و ما فكر في موضوعية .. فيحتاج ان يقعد مع نفسه مرةثانية و يفكر في اللي صار و يعيد ترتيب حساباته من جديد .. وهذا يعطيه فرصة أكبر في أن يفهم اللي صار أكثر ..

أشكرك عزيزتي .. واسعدني مرورك ..

:26:

يا عمري يا دموع .. دموعك غالية وما تستاهل انها تنزل على شخص ما يعرف قيمتك ..

معاك حق عزيزتي .. ما فيه أحسن من المصارحة .. مصارحة النفس .. حتى لو كانت هالمصارحة قاسية .. بس فيها مصلحة للانسان.. لان تعلمه وين الصح ووين الغلط ..

وما فيه لحظة أروع من لحظة يلقى فيها الانسان من يسمعه و يشاركه همومه و أحزانه .. و يعينه و يعاونه حتى على نفسه ..

:26:

عزيزتي لولي .. مو هي الوحيد اللي خسرت حتى آنا خسرت .. هي خسرت صداقتي و آنا خسرت جزء من قلبي ..

في يوم ليمن نخسر صداقة او يرحل عنا شخص عزيز.. لازم ياخذ جزء من قلبنا معاه .. هذا إذا مو كله ..

أشكرك عزيزتي على المرور

:26:

عزيزتي بياض الثلج .. فعلا الدنيا فيها كثير من الصدمات لكن العبرة إن نتعلم من هالصدمات و التجارب اللي مرينا فيها ..

عزيزتي الناس أجناس .. و طول ما انتي عايشة راح تشوفين ألوان و أشكال من الناس .. الله يحفظك و يكافيك شرهم

:26:

يا عمري يا قلب أدمته الجراح .. اسمك حزين كثير .. لا تتأسفين حبيبتي .. فضفضي اللي في قلبك .. ارميه في صدري ..

والله اني فاهمة شعورك .. و حاسة فيك .. شي صعب إذا كان أهلك اللي هم في الاساس مصدر الحب و الحنان و الأمان اللي تلجئين له في أي وقت .. يكونون هم السبب في جروحك ..


اسمحي لي يالغالية أشاركك همومك ، يمكن كلامتي تلقى صدى عندك .. شرايك أفتح لك صفحة من كتاب حياتي .. براويك جانب ما عرفه حتى أقرب الناس لي ، هذا الجانب كان سر غامض للي حواليني .. لانه كان نقطة بداية التغير اللي صار في حياتي .. وما فيه أحد كان يعرف شنو السبب في هالتغير ...

في فترة بحياتي كانت من أصعب الفترات اللي مريت فيها .. مريت بأوقات عصيبة ، كنت أحس بالوحدة و الغربة .. رغم اني وسط أهلي و حبايبي .. والدموع ما كانت تفارق عيني أبد .. كنت دائما أنظر للامور بتشائم .. كانت الدنيا في عيني مسودة ما لها أي قيمة ..

والسبب هو أن أهلي كانوا دائما يحبطون فيني .. ينتقدوني .. بدرجة انهم دمروني .. يمكن ما كانوا يقصدون .. بس هذا اللي صار .. في اليوم الواحد آلاف السهام كانت تجيني .. ونهاية اليوم كانت مخدتي هي اللي تحتضن دموعي .. ما كان يمر يوم إلا وأنا أبكي فيه .. وما كان فيه أحد يشوف دموعي .. و لا أحد يحس فيني .. في كل ليلة كنت أناجي ربي و أدعيه أن يرحمني و يهدي أهلي و يسامحهم و يغفر لهم .. وفي كل صلاة كنت أدعي لهم بالهداية ..

و كل يوم يصير أسوء من اليوم اللي قبله .. ونفسيتي تصير أسوء .. إلى أن جى يوم إلتقيت بانسانة .. اللي يشوفها يقول هاذي ما عندها هموم ولا مشاكل لانها كانت مرحة و بشوشة .. لكن اللي يعرفها من قريب يشوف ان مصائب الدنيا كلها فوق راسها .. وعمرها 16 سنة

كنت مستغربة منها ..شلون تقدر تضحك و هي عندها كل هالمشاكل .. كانت حياتها مأساة بمعنى الكلمة .. أبوها كان يضربها في كل يوم .. وأمها تحطم نفسيتها باليوم ألف مرة .. كانوا يعتبرونها خادمة مو بنتهم .. ومع كل هذا ما شاء الله عليها كانت مؤمنة .. و تدعي لهم بالهداية و الرحمة و الغفران ..

علمتني شي لا يمكن أنساه .. علمتني معنى السعادة .. والقناعة .. و الصبر .. و القوة .. و الايمان .. والامل.. علمتنى معنى الحياة .. خلتني أشوف الجانب المشرق من الحياة ..


علمتني شلون أجاري الحياة .. وأتكيف مع عواصفها .. فتغيرت نظرتي للحياة .. صارت نظرتي نظرة إيجابية ..

كانت دائما تذكرني بالآية القرآنية ( لن يغير الله ما بقوم حتى يغيروا ما بأنفسهم) ..

فقررت من ذاك الوقت أن أغير نفسي .. وأبدأ صفحة جديدة في حياتي .. وفعلا بديت أغير نفسي .. وأطور مهاراتي الذاتية ..

ومثل كل مرة كنت ألاقي النقد و الاحباط .. لكن بشكل أكبر .. وهذا ما كان يزيدني إلا إصرار و ثبات و صبر .. قويت علاقتي بربي .. وهذا ساعدني كثير.. لاني كنت استمد قوتي من القوي العزيز .. في كل يوم يزيد إيماني كان يزيد معاه قوة صبري ..

كنت أحمد ربي دائما .. لاني بنعمة كبير .. لو أحصيت نعم الله علي .. ما راح أخلص .. وانا احسن من غيري بكثير .. آنا عندي بيت يأويني لكن غيري ينام بالشارع .. آنا عندي أكل يسد جوعي لكن غيري ينام على لحم بطنه .. انا عندي شوية مشاكل لكن غيري عنده جبل من المشاكل .. فالحمد لله والشكر له ..

وعدت هالفترة .. وتغير كل شي .. معاملتهم تغيرت كثير .. هذا بفضل ربي ورحمته .. الحين آنا أقرب وحدة لقلوبهم .. وحنانهم وحبهم لي كبير ما أقدر أقيسه بشيء .. و ربي يسامحهم .. مهما كانوا ومهما سووا هذولي أهلي وحياتي من غيرهم ما لها طعم .. و مهما ظلموني و جرحوني بظل أدعي لهم بالخير و التوفيق و الغفران ..

هم راس مالي في هالدنيا .. الله يحفظهم و يخليهم لي و لا يحرمني منهم .. وصدقيني لولا هالشي اللي صار .. و الصعوبات و المصائب اللي مريت فيها .. ما كنت وصلت للي وصلته الحين .. لاني وصلت لاشياء غيري ما قدر يوصل لها .. والحمد لله .. هذا كله من فضل ربي ..

يا قلبي في أشياء تصير لنا .. لان الله كاتبها علينا .. وهذي اقدار .. لها حكمة .. وفيها خيرة لنا .. حتى لو كنا نشوفها ظاهرياً مو زينة .. لكن باطنياً يمكن تكون زينة .. وما يعلم فيها غير الله سبحانه ..

اتمنى ان كلماتي وصلت لقلبك .. وإذا كنتي محتاجة للمساعدة .. فآنا حاضرة .. قلبي مفتوح لك في كل وقت ..

الله يسعدك و يبعد عنك الهم و الحزن ..

:26:

يا بعد قلبي يا مشاعل .. سلامتك من الجروح .. علاج قلبك سهل .. انك تتجهين لربك.. و تقوين علاقتك فيه .. وصدقيني بيرجع لك قلبك .. وجروحك راح تشفى بإذن الله ..

الله يبعد عنك الهم و الغم .. وينور قلبك بنور الايمان ..

:26:

عزيزتي همسات الورد .. اسعدني مرورك .. أشكرك عزيزتي ..

:26:

عزيزتي اسم غريب .. اعذريني يا الغالية .. كنت مشغولة في الدراسة .. و ما لقيت وقت أكتب موضوع .. فاستغليت الاجازة .. لكن ان شاء الله أعوضكم في الايام الجاية ..

حاولي انك تتغلبين على هالمشاعر .. و تداوين جروحك .. وربي يسهل عليك ..

اسعدني مرورك .. لا تحرميني من طلتك ..

:26:

عزيزتي بنت نجد .. أكرر شكري لمتابعتك .. وجودك أسعدني

:26:

عزيزتي أزهار الربيع .. يسعدني انكم تستفيدون .. فهذا هدفي .. أشكرك على المرور عزيزتي ..

آآمين يا رب

:26:

عزيزتي الامل الضائع .. رغم ان الامل ما يضيع .. حاسة فيك قلبي .. بس حاولي تسامحين .. ترى ما في أحلى من ان الواحد يسامح ..

الله يوفقك يا رب

:26:

عزيزتي ظل زائل .. عارفة اني متأخرة لكن اني أبدأ متأخرة أحسن من أني ما أبدأ أبد ..

الحمد لله يا اختي .. الله عوضني صديقات يعرفون قيمتي .. ويعرفون معنى الصداقة .. ومع كل هذا صرت حذرة أكثر ..

:26:

عزيزتي أريج .. فعلا القرآن هو أفضل علاج .. أشكرك على المرور

:26:

حبيبتي قلب أدمته الجراح .. حلو انك تحاولين تسامحينهم .. و يكون لك قلب أبيض ..

أشكرك لمشاركتك لي .. ويسعدني وجودك ..

:26:

عزيزتي فينوس ..

في بعض الجروح تحتاج لوقت أطول .. امنحى نفسك فرصة للتسامح .. وصدقيني راح تلقين نفسك سامحتيها .. أشكرك على المرور

:26:

عزيزتي نور القمر ..

أنا أقولك ليش .. لانك ما سامحتيهم .. ليمن تسامحينهم ما راح تجيك هالانفعالات .. امنحى نفسك فرصة للتسامح .. أشكرك على المتابعة ..

:26:

الف شكر لك يالغاليــه,,
وعساك على القوه يارب,,

اختك,, نور القمـر,,

مرآة نفسي
هذا بالضبط ما أردت أن أعلمه لنفسي وأذكربه اخواتي
أن القرب من الله عزوجل والإيمان هو الكفيل بتحقيق سعادة القلب وصحته وبعده عن الجراح والآهات والآلام أيا كان مصدرها
تسلمين حبيبتي:27::27: